Sam-jū-keng Sin-choān Pe̍k-oā Chù-kái/Lūn Sam-jū-keng Pún-bûn ê Thé-thóng kap Chit-pún Taⁿ-chiah Chhut ê Sam-jū-keng Sin-choān Pe̍k-oā Chù-kái

Sam-jū-keng Sin-choān Pe̍k-oā Chù-kái
三字經新篡白話註解 (1894 nî)
Lūn Sam-jū-keng Pún-bûn ê Thé-thóng kap Chit-pún Taⁿ-chiah Chhut ê “Sam-jū-keng Sin-choān Pe̍k-oā Chù-kái”
Chok-chiá: Î Jiâu-lí

Lūn Sam-jū-keng ê Chhu-sū

1904 nî tiông-ìn.

LŪN

SAM-JŪ-KENG PÚN-BÛN Ê THÉ-THÓNG

KAP

CHIT-PÚN TAⁿ-CHIAH CHHUT

Ê

“SAM-JŪ-KENG SIN-CHOĀN PE̍K-OĀ CHÙ-KÁI”

Hoān-nā ài-beh ha̍k-si̍p tāi-chì eng-kai tio̍h tùi kán-séⁿ kàu khui-khoah. Chit-ê hoat-tō͘ ta̍k sè-tāi ê lâng ē-hiáu tùi-tiōng, sī in-ūi chai lâi hun-hun sòaⁿ-sòaⁿ káng-kiù bān-hāng-sū sī hoân kap oh-tit. Lūn-kàu tha̍k-chheh ia̍h sī án-ni, só͘-í, iáu-kín tio̍h chiàu chhù-sū, chhin-chhiūⁿ sio̍k-gú kóng, "Pah-chhioh koân lâu tùi tē khí." Tāi-seng ê lâng ū ēng Lé-kì ê Lōe-chek á-sī Siáu-ha̍k chò khí-thâu ê chheh, āu-lâi ê lâng khah-siông tōa chun-tiōng Sam-jū-keng chò siàu-liân-lâng ê chho͘-ha̍k.

Lâng piàn-piàn tùi-tiōng Sam-jū-keng sī ūi-tio̍h in phah-sǹg chit-pún ū kúi-nā hāng hó ê khoán-sit:

Sī ke̍k lī-piān. Chiū-sī i-ê kù-tāu té, bûn-sû hó-tha̍k. koh khoài ē kì-tit, ia̍h hó-tòa, ia̍h bē-kùi.
Sī chho͘-ha̍k ê chia̍t-lō͘. Tī Tiong-kok sàn-hiong lâng bô thang kú-kú tha̍k-chheh, só͘-í chit-hō ê chheh put-chí ha̍p i-ê khiàm-khoeh.
Sī chin-si̍t. Só͘ kì-chài sī kiû si̍t-chāi, lóng bô hô͘-tô͘.
Sī bē hūn-loān. Só͘ káng-lūn--ê lóng sī chiàu chhù-sū.
Sī kán-séⁿ. Sui-jiân ū chū-chi̍p khoah-tōa ê sū, iáu-kú só͘ ēng ê oē kap ì-sù sī kai-koat bêng-láng.
Sī pau-hâm chiu-bi̍t. Lí-ha̍k ê kin-goân, chu-chheh ê kin-ki, kap kong-kàm ê chhù-sū lóng ū pau tī chit--ni̍h, só͘-í kiám-chhái chit-pún-chheh thang kiò-chò "chhiú-ńg-lāi ê sió-lūi-su."

Sam-jū-keng sī Sòng-tiâu ê On̂g Eǹg-lîn (Pek-hō͘ Sian-seⁿ) ê chhiú tù--ê. I sī put-chí gâu ê tha̍k-chheh-lâng, iā bat chò pa̍t-mi̍h ê chheh hō-chò Khùn-ha̍k kí-bûn (ū cha̍p-sì pún; pun chò sì-hāng, chiū-sī gī-lūn keng-chheh, thain-tē ê lí, phoe-phêng si, í-ki̍p cha̍p-lio̍k ê tāi-chì) kap koh chi̍t-phō miâ-kiò Gio̍k-hái (ū nn̄g-pah pún; sī lūi-chi̍p Tiong-kok chē-chē hāng chheh ê iàu-kín, ná-chhin-chhiūⁿ lūi-su ê thé).

Tī Tiong-kok ū káng-chheng lâng sui-jiân siông-sè ha̍k-si̍p Sù-su kap Ngó͘-keng, m̄-kú lóng bô iàu-kín káng-kiù Sam-jū-keng. In khah bô sím-mi̍h ē hiáu-tit chhâ-khó lâi thàu-thiat i-ê ì-sù. Káⁿ-sī tng gín-ná ê sî ū o̍h oa̍t-liām i-ê pe̍h-bûn ê jī-kù nā-tiāⁿ, bô tùi-tiōng i-ê ké-soeh. Chit-ê sī tōa chhò-gō, in-ūi lâng hoān-nā só͘ chò ê tāi-chì eng-kai tio̍h siông-sè bêng-pe̍k kàu bat. Khó-sioh! Tiong-kok lâng khah-chē in-ūi chí-ū ài khó-kàu tit kong-bêng, só͘-í kan-ta óa-khò pa̍t-lâng só͘ thoân ê ké-soeh, lóng bô beh chīn-sim lâi ka-tī siūⁿ kek-chhut in só͘ tha̍k ê chheh ê ì-gī, sū-put-ti to̍k-to̍k sī thàn chit-ê hoat-tō͘ chiàⁿ-ē chò lâng chì-tōa ê lī-ek.

Ū nn̄g ê sio̍k-gú kóng, "Sam-liân tho̍k-su, put-jû thèng-káng" (chiû-sī, Sa-nî tha̍k-chheh m̄-ta̍t-tio̍h thiaⁿ ké-soeh), koh, "Jū-jū iàu ngáu-chhut chip-chiong lâi" (chiū-sī, Jī-jī koh kā-chhut chiuⁿ-chiap lâi); só͘-i, káu-séⁿ-chheh ê pe̍h-bún sī put-chí hó, m̄-kú lâng nā ài khe-khó i-ê ōe kap thiah-bêng i-ê gī chiū chù-kái iā bê chió-tit. Nā-sī ēng chù-kái ê lâng m̄-thang ū chhò-gō͘, koat-toàn m̄-thang choan-choan óa-khò hit-ê pang-chān ê chheh lâi pāi-hoāi i ka-tí ê sim. Pún-sin tio̍h khîn-khó͘ siūⁿ-chhut pe̍h-bûn jî-kù ê ì-sù, sī iu-ūi ū sî chù-kái ū ké m̄-tio̍h, thoân bō͘ ha̍p-gî ê kà-sī, ia̍h ûi-lāu iàu-kín ê sū. Tiong-kok ê sian-seⁿ í-keng ū chhut Sam-jū-keng kúi-nā hō ê chù-kái, chóng-sī chiah-ê chheh gín-ná ka-tī bô thang ēng in-ūi i bô kàu-gia̍h bat-jī. Kai-chài! pe̍h-ōe-jī sī chò tōa pang-chān ê lō͘-ēng. Lâi o̍h chit-hō jī nā-sái chi̍t-nn̄g goe̍h-ji̍t-kú, chiū jián-āu m̄-bián sian-seⁿ siông-siông lâi kà, put-lūn sím-mi̍h kì pe̍h-ōe-jī ê chheh lóng ē ka-tī tha̍k. Só͘-i kiám-chhái chit-ê siu ê khoán-sit ê chù-kái thang lī-ek lâng.

Tiong-kok ê chheh só͘ gī-lūn ê tāi-chì ū chē-chē hāng lóng bô ha̍p ti Siōng-tè ê chin-lí, só-í Kàu-hōe nā bô kín-sīn hun-piat tû-khì chit-ê m̄-tio̍h ê kà-sī chiū to̍k-to̍k sī lâu i chò lâng ê bê-he̍k. Tī o̍h--ni̍h nā bē-bián-tit ēng Khóng-chú ê chheh chiū eng-kâi tio̍h ké-chiàⁿ i-ê put-ha̍p. Chit-ê taⁿ-chiah-chò ê Sam-jū-keng Sin-choān Pe̍k-oā Chù-kái ū phó͘-ho̍k-á hō͘ lâng chai Siōng-tè ê chin-lí kap sèng-hiân ê kà-sī ū sím-mi̍h koh-iūⁿ. Ia̍h, lēng-gōa, chit-pún-chheh-lāi ū kúi-nā hāng ê iàu-kín, chiū-sī,—(1) Bô sím-mi̍h ēng jī-gán, in-ūi gín-ná lâng iáu-bōe ē-hiáu tha̍k chhim-jī; (2) Sī lio̍h-á chhin-chhiūⁿ lūi-su ê khóan-sit lâi khoah-tōa pau-koat chē-chē chat ê tāi-chì, in-ūi tú-á teh o̍h tha̍k-jī ê lâng si̍t-chāi bē tit-thang chhâ-khó chhim-ha̍k ê chheh; (3) Sī ēng lī-piān ê hoat-tō͘ lâi káng-lūn Tiong-kok ê Sú-kì, chóng-sī lia̍t-ūi ê hông-tè ê sū-chêng khiok bô só͘-chāi thang kì-chài kàu lóng chiâu-chn̂g; (4) Sī chiàu chhù-sū chiong siàu-ba̍k lāi hun-piat pún-bûn ê jī, in-ūi tī Tiong-kok ê chheh sī oh-tit chhōe chiuⁿ-chat jī-kù; (5) Sī ta̍k-jī ta̍k-chat ê ké-soeh lóng ū lēng-gōa kì-chài; (6) Ū só͘-chāi sī hun-piat kúi-nā hāng ê ké-soeh lâi ín-chhōa lâng thang ka-tī siūⁿ sím-mi̍h soeh sī khah-ha̍p; (7) Ia̍h sī tām-po̍h-á kóng-khí sim-sek ê sū hō͘ lâng ê sim khah hoaⁿ-hí tha̍k. Só͘-í, káⁿ-ū thang ǹg-bāng chit-ê sin chhut ê chheh ē ke-khui lâng ê sim-khiàu. Hoān-nā ài-beh chai i pûn-kok gâu ê sian-seⁿ ê kà-sī chiū bē bián-tit lâi khîn-khîn tha̍k chhim-chhim siūⁿ. Chit-pún-chheh nā ē bián-lē lâng lâi khui-khoah i-ê kiàn-bûn chiū pī-pān i ê kong-le̍k chiah lâi khui-khoah i-ê kiàn-bûn chiū pī-pān i ê kong-le̍k chiah bô kui tī khang-khang; chóng-sī tē-it iàu-kín sī lâng tio̍h o̍h Siōng-tè ê tō-lí, hō͘ Pó-hui ê Sian-seⁿ siông-siông lâi chí-sī.

Tùi siá chit-pûn-chheh liáu iok-lio̍k ū le̍k-kòe sì-nî kú. Lūn-kàu ìn sī bô chiap-sio̍k, to̍k-to̍k ū ki-hōe chiah chò; iū-koh nn̄g-nî ê tiong-kan tú-tio̍h góa kàu-jīm tò-khì chó͘-ke. Tng hit-sî góa chì-hó ê kò͘-iú Thô͘ Bo̍k-su hián-bêng jîn-ài pang-chān sûn chit-ê ìn-chheh ê sū.

Góa bêng-bêng chai chit-pún-chheh m̄-sī chiâu-chn̂g, nā-sī teh ǹg-bāng ū thang chò kóng Ē-lâm-khiuⁿ Kàu-hōe ê lâng kap Gōa-kok Kàu-sū ê lō͘-ēng.

Kúi-nā nî chêng góa siūⁿ eng-kai tio̍h chiàu Kàu-hōe ê lí-hoat lâi thiat-tí chù-kái Tiong-kok ê Keng-chheh. Chiàu góa phah-sǹg chit-pún tú-á chhut ê chheh thang chò kui-bô͘ lâi sêng-chiū hit-ê tāi-chì. Káⁿ-sī Chú ū chù-tiāⁿ góa tio̍h tiàm pa̍t só͘-chāi chò. I-ê kang, só͘-í góa bô thang ū-hūn tī hit-ê tōa iàu-kín ê bûn-sū, m̄-kú góa pek-chhiat ǹg-bāng hit-ê só͘ siūⁿ--ê thang hō͘ pa̍t-lâng tit-tio̍h. Siōng-tè ê in chiâⁿ-chò kàu bêng-pe̍k.

Tâi-lâm

Tiáⁿ-ló Kàu-hōe.

Î Jiâu-lí lâ--ê.

Se-le̍k. 1894.

About four years have elapsed since this book was written. It has only been possible to do the printing at irregular intervals: moreover, during two years I was at home on furlough. My dear friend, the late Rev. W. Thow, M. A., at that time did what he could in getting the book through the Press.

I am conscious that the work is not perfect, but I am hopeful that it may be found useful not only to the Chinese Christians but also to the Foreign Missionaries wherever the Amoy Vernacular is spoken.

Several years ago it occurred to me that the Chinese Classics should be edited from the Christian point of view, and in a thorough manner. The present work is, according to my idea, a plan on which such a design should be carried out. The Lord has apparently appointed my sphere of labour elsewhere, so that I can have no share in executing such an important task, but I earnestly hope that the suggestion may, by God's grace, be heartily followed out by others.

George Ede,

English Presbyterian Mission, Formosa.

A. D., 1894.

⁂ Tī chit-pún-chheh kán-séⁿ kì-chái “Iâ-so͘ chêng”, “Iâ-so͘ aū”, ū ì-sù sī Iâ-so͘ kàng-seng ê chéng, Iâ-so͘ kàng-seng ê aū.

Sam-jū-keng chù-kái. Chêng-pang ìn 800 pún lóng bē-liáu. Taⁿ ū têng ìn 2000; chóng-sī kap kā-pún bô koh-iāⁿ, put-kò ū ké-chiàⁿ chi̍t nn̄g chhò nā-tiāⁿ.

Tâi-lâm, 1904 nî.