[24] Iâ-sou tshông-tõ hṳ́-kò khí-kiâⁿ, chiũ lĩ-khui khṳ̀-ji̍p Thî-lô Si-tũn kâi kau-kài. Ji̍p che̍k-kâi tshù-lāi, m̄ àiⁿ nâng tsai: nā-sĩ put-lêng ṳ́n-tshâng. [25] Sûi-chiet ũ che̍k-kâi hũ-jîn, i-kâi iùⁿ-nńg pĩ siâ-sîn só-tùe, thiaⁿ-kìⁿ Iâ-sou kâi sṳ̄, chiũ lâi, phak-lo̍h tõ I kha-ẽ. [26] Chí-kâi hũ-jîn sī Hi-lĩ-nî nâng, tshut-tsóu sĩ Sũ-lĩ Hui-nî-ki. I chiũ khiû Iâ-sou to̍k-tshut kúi lī-khui i-kâi nńg-tsṳ́. [27] Iâ-sou chiũ tùi-i tàⁿ, Hôiⁿ chiàⁿ-kâi sòi-kiáⁿ soiⁿ chia̍h-pá: khie̍h chiàⁿ-kâi sòi-kiáⁿ kâi piáⁿ ka̍k pun káu chiũ m̄-ha̍h. [28] Hũ-jîn tùi I ìn--tàⁿ, Tsú a, sĩ: tān-sĩ káu-kiáⁿ tõ hṳ́ tshn̂g-ẽ iā tit--tie̍h chia̍h sòi-kiáⁿ kâi piáⁿ-tshùi. [29] Iâ-sou chiũ tùi-i tàⁿ, Ũi-tie̍h chí-kù-ūe lṳ́ hó tsò-lṳ́ khṳ̀; kúi íⁿ-keng tshut--khṳ̀, lī-khui lṳ́-kâi nńg-tsṳ́, liáu. [30] Hũ-jîn chiũ kui-tńg i-kâi-ke, thóiⁿ-kìⁿ nńg-tsṳ́ u̍t tõ mîn-tshn̂g, hṳ́-kâi-kúi íⁿ-keng tshut--khṳ̀-liáu.
[31] Iâ-sou iũ tshut Thî-lô kâi tī-kài, keng-kùe Si-tũn, tùi Tí-ka-po-lī kâi kài-lãi, chiũ kàu Ka-lĩ-lĩ hái. [32] Ũ nâng tùa che̍k-kâi hīⁿ lâng, siãng-chhiáⁿ kat-chi̍h kâi nâng lâi-chiũ I; khiû Iâ-sou àn-chhiú tõ i-sin. [33] Iâ-sou ín i ka-kī tuaⁿ-nâng lī-khui tãi-chèng-ke chiũ tsang chhiú-tsóiⁿ thàm-ji̍p i san-hîⁿ, iũ phùi-nũaⁿ, chhiú mông i-kâi chi̍h; [34] ngiáng-thiⁿ, tháu-khùi, chiũ tùi-i tàⁿ, Íⁿ-huap-tã, chiũ-sĩ, Khui. [35] I sang-hīⁿ chiũ khui, chi̍h kat--kâi iā kói, tàⁿ-uē chiũ hun-mêng--liáu.
[36] Iâ-sou hun-hù in mài kāng-nâng tàⁿ, nā-sĩ zú hun-hù in, in zú-kèng tūa-tūa-ē pùa-iâng. [37] Chèng-nâng ke̍k-tūa-ẽ khî-ĩ, chiũ tàⁿ, I só-tsò kâi sṳ̄ lóng-tsóng sĩ hó: iā sái hĩⁿ lâng kâi nâng thiaⁿ-kìⁿ, é kâi nâng tàⁿ-uē.
8
Tng-hṳ́-sî, iũ-tsài ũ tūa-khûn-nâng tõ--kò, in iā bô-ũ hõ-chia̍h, Iâ-sou hàm I kâi mn̂g-thû bûa--lâi, chiũ kāng-in tàⁿ, [2] Uá liên-mién--tie̍h chèng-nâng, in-ũi in kāng-uá tsò-pû nā chí-kò íⁿ-keng saⁿ-ji̍t--liáu, bô-ũ hó-chia̍h: [3] zû-jia̍k in tõ-gō uá chiũ sái-in hûe-ke, pit-tiāⁿ tõ lōu--kan chiũ khùn-he̍k; khî-tang iā ũ nâng tshông-tõ hñg--kò lâi. [4] I kâi mn̂g-thû ìn I, tàⁿ, Tõ chí khuàng-iá kâi tĩ-hng, àiⁿ tshông-tî-kò tit-tie̍h piáⁿ sái chí tsùaⁿ-kâi-nâng chia̍h kàu-pá, né? [5] Iâ-sou mn̄g in, tàⁿ, Nín ũ jie̍h-tsōi-
