Só͘ siàu-liām ê Chí-moē

Ùi Wiki Tô·-su-kóan

Sèⁿ-miâ chheng-chhó Lı̂m--sı̄ Hio̍h, khah-siông lâng lóng kiò i Sūi-chím, sio̍k Koè-kau ê kàu-hoē, khiā-ke tı̄ Gû-tiâu-khe, lı̄ pài-tn̂g saⁿ lí lō͘. I tit-tio̍h tō-lí thâu-boé káu nı̂ sı̍t, tı̄ chûn-nı̂ kap i ê lú-jı̂ Lí--sı̄ Khiok, siū Ong Bo̍k-su mn̄g tō-lí chı̀n-kàu. I chhut-sı̀ tı̄ Chú-āu 1870 nı̂, kàu kū-nı̂ 12 goe̍h 17 jı̍t Thiⁿ-pē kéng-tiàu i lı̄-khui sè-kan, hióng-siū 56 hoè. Cha-khó i ê seng-pêng chin-chiàⁿ ū thang khó-chhú: 1.Hō͘ goā-lâng o-ló. Chin hó lú-tek, chin jı̂n-ài, hoān-sū un-jiû siông-sè, hó chhin-kı̄n, khoài-khoài siū khó͘-khǹg, khı̂n-kín koh khiām-phok. Chı̍t-ē pia̍t-sè, lâng-lâng to͘ lâu ba̍k-sái, thó͘-khùi, kóng, “ Khó-lı̂n ah! Khó-lı̂n ah!” 2.Siū ke-lāi kèng-tiōng. M̄-nā pún-sin jı̄n-chin ho̍k-sāi Chú, koh choân-ke lóng kèng-ùi Siōng-tè, lóng iàu-kín ka-têng ê lé-pài kap siú An-hioh-jı̍t, toā-toā sè-sè it-giân it-hêng, kó-jiân kap bı̄-sı̀n-chiá ū toā koh-iūⁿ tı̄-teh, thang kám-sim. In ê ke, ē ū chit hō koé-chí, kā i chim-chiok khí-lâi, choân sı̄ i chı̍t lâng ê khip-ín-le̍k. Siat-sú i nā kan-ta tùi goā-bı̄n lâng chhin-chhiūⁿ sı̀n-tô͘, tı̄ chhù-nı̍h ná siâ-kúi, beh cháiⁿ-iūⁿ? Beh cháiⁿ-iūⁿ ín-chhoā ke-lāi ah? Só͘-í khoàⁿ kàu thong-ke chin-sı̍t tı̄ Chú, chiū-sı̄ chāi i chı̍t lâng ê bí-tek, tùi ū tek-hēng, tı̀-kàu ke-lāi kèng-tiōng. 3.Tit-tio̍h Siōng-tè hoaⁿ-hí. (1) Jı̄n Chú bô kiaⁿ kiàn-siàu. Tı̄ i ê chhin-chhek, chhù-piⁿ lı̂n-iū, pêng-iú tiong chhut-thâu jı̄n Iâ-so͘, sı̄m-chı̀ siū hiah-ê lâng kheng-sı̄, ki-chhı̀, kong-kek, hoán-tùi iā bô sió-khoá lún-neh, thâu kàu boé chū-chāi kian-kò͘, iú-chı̀n bû-thè. Chhin-chhiūⁿ bat chı̍t pái, siú lé-pài tńg-lâi, só͘ chèng ê koé-chí chò chı̍t-ē hō͘ lâng châu, beh chhia-tó i ê sı̀n-gióng; chóng-sı̄ i it-hoat hó-táⁿ. (2) Iâⁿ chhı̀-liān. Sı̀n Chú í-āu chhı̀-liān ná chı̀ⁿ-pé tı̍t-tı̍t lâi. Thâu-pái sit-lo̍h chı̂ⁿ-châi, kā lâng kóng chhin-chhiūⁿ bé thiⁿ-lō͘. Tē-jı̄ pái tú-tio̍h sí-sit, tan-tan seⁿ chı̍t ê kiáⁿ miâ kiò Siú-ah, hō͘ Siōng-tè thó--khı̀. (In tit-tio̍h tō-lí ê chéng-chí sı̄ tùi Siú-ah)! Chı̍t-sı̂ Sūi-chek ê sim chin gı̂-ngái, i hoán-tńg an-ùi i. Āu-lâi pún-sin seⁿ-thiàⁿ, tı̄ ām-kún pō͘, oá chiâⁿ-nı̂ kú; lio̍h-á khah-hó, tē-jı̄ lú-jı̂ Hiān-ah koh hō͘ Chú tiàu-khı̀. Chiàu lâng teh siūⁿ ún-tàng ē sit-chı̀, nā-sı̄ i jia̍t-sim bı̄-sı̄. Kàu kū-nı̂-thâu koh jiám--tio̍h pı̄ⁿ-chı̍t, tı̄ 12 goe̍h 17 hō an-jiân kı̀ⁿ Chú. Tng i teh kan-khó͘ ê sı̂ siaⁿ-siaⁿ kù-kù lóng sı̄ o-ló Chú, siàu-liām Chú, beh lı̂m-chiong ê sı̂ chhiáⁿ i ê tiōng-hu tı̄ i sin-piⁿ kā i kóng, “Lí m̄-thang hōng-hiahN, nā hōng-hiahN ē chı̍t lâng chı̍t lō͘.” Thêng tia̍p-á-kú kóng, “Sı̂-kan kàu lah, kā goá oāⁿ-saⁿ.” Oāⁿ-hó, chhut-siaⁿ “Chú oê! Kiù goá ! Siōng-tè oê! Kiù goá oh!” chhiú, kha liòng-tı̍t chiong án-ni tò-khı̀. Ah! chin-chiàⁿ sı̄ Chú só͘ thiàⁿ só͘ hoaⁿ-hí--ê lah! Kám-siā Thiⁿ-pē. Goá ē siá chit kúi-kù sı̄ in-ūi án-ni: 1.Bô pò-iông i ê hó siau-sit m̄-koè-sim. 2.Soà ǹg-bāng ē hō͘ khoàⁿ Pò ê lí, goá, toè kha-pō͘, êng-kng Thiⁿ-pē. 3.Ài lán tông-chêng i ê ûi-cho̍k, tı̄ pài-saⁿ ê kı̂-tó hoē, á sı̄ kò-jı̂n kı̂-tó ê sı̂, saⁿ siàu-liām , kiû Chú kiông in ê chı̀, chòng in ê sim. (Tâi-oân Kàu-hoē-pò tē 493 koàn, 1926 nı̂ 3 ge̍h)