Sàn-chiah ê ngó͘-lêng nı̂-tāi
Tâi-oân ê chng-kha
Lı̂ chhân bô joā hn̄g ê chı̍t-keng thô͘-kak-chhù
Chı̍t ê kok-sió ê gín-á
N̂g-sng tah-meh
Tı̄ lāu-pē ka-kı̄ khioh pang-á tèng--khí-lâi
Hián-jiâng siuⁿ-koè kē ê chheh-toh-á téng
Tı̄ hun-n̂g ê teng-kng ē-kha
Tha̍k-chheh
“Lâi! hioh chı̍t-ē khùn leh
Seng lim chı̍t oáⁿ ke-thng!
Chiah koh khı̀ tha̍k!”
A-bó m̄-chai sím-mı̍h sı̂-chūn
Tih hó chı̍t oáⁿ ke-thng
Phâng lâi hō͘ chit-ê êng-ióng put-liông ê gín-á
Kú-kú-á sió chia̍h chı̍t-ē-á pó͘
Lim koè A-bó tih ê ke-thng
Chit-è sán pi-pa ê gín-á
Āu-lâi chheh tha̍k kàu phok-sū
Lim koè A-bó tih ê ke-thng
Chit-ê sàn phí-phí ê gín-á
Āu-lâi chheh kà kàu Harvard
Hó-gia̍h ê nn̄g-chheng nı̂-tāi
Niú-khio̍k ê Tiong-kok-oē kàu-io̍k chi hā
Sim-lêng sàn-hiong ê Tâi-oân gín-á ah
Lâi! seng hioh chı̍t-ē-á khùn leh
Seng lim chı̍t oáⁿ A-bó ê oē tih--chhut-lâi ê ke-thng
Sió chia̍h chı̍t-ē-á pó͘ leh
Chiah koh phah-piàⁿ
Lâi! seng lim chı̍t oáⁿ sim-leng ê ke-thng
Lim koè A-bó ê oē tih--chhut-lâi ê ke-thng
Tâi-oân beh cheng-sı̂n pá-chiok kiâⁿ hiòng sè-kài
Lâi! seng lim chı̍t oáⁿ sim-leng ê ke-thng
Lim koè A-bó ê oē tih--chhut-lâi ê ke-thng
Tâi-oân-lâng beh tı̄ sè-kài chhut-thâu-thiⁿ!
