——Hō͘ Chin-lí Tāi-ha̍k Tâi-oân Gí-giân Ha̍k-hē Tē 1 kài ê Ha̍k-seng
Kàu chia lán tio̍h beh hun-khui,
Taⁿ goá chhoā lín kàu tı̄ jı̍p-soaⁿ-kháu,
----Lín kiâⁿ chit-pêng,
Goá kiâⁿ hit-pêng.
Lán bat tâng-kiâⁿ chı̍t-choā khi-khiau ê lō͘,
Ū hong ū hō͘,
Iân-lō͘ ū phang-hoe, ū koé-chí,
Mā bat tú-tio̍h chhı̀-phè kap hām-kheⁿ,
Che lóng siu tı̄ lán kı̀-tı̂ ê phāiⁿ-á,
Phoāⁿ lán kiâⁿ tı̄ thâu-chêng ê soaⁿ-lō͘.
Goān lín beh kiâⁿ chit-choā,
Ná lâi ná khui-khoah.
Goān lín ná kiâⁿ sim ná tiāⁿ,
Ná peh-kiā ná ióng-kiāⁿ.
Goá só͘-kéng--ê hit-choā,
E̍h koh àm koh sip,
Chio̍h-thâu lōng-khòng, bô lâng ài kiâⁿ,
Teh-beh ı̀n-lo̍h goá ê kha-jiah.
Poa̍h-tó ê sı̂ goá ē siàu-liām,
Lán bat saⁿ-khan ê jı̍t-chí.
Chhùi-ta ê àm-mı̂ goá ē bāng-tio̍h,
Goe̍h-kng ná choâⁿ-chúi,
Tùi chit-pêng ek kàu hit-pêng-soaⁿ,
Tı̄ hia----
Lán beh koh saⁿ-kı̀ⁿ,
Chiàu lán chêng só͘ iok-sok,
Tı̄ th iⁿ-kng ê saⁿ-kak-tiám,
Seng-khu-téng ê khang-chhùi lóng bē koh thiàⁿ.
Lán beh lâu-koāⁿ khèng-chiok
Thâu-chı̍t-tih lō͘-chúi kap jı̍t-kng,
Toā-hong-hō͘ koè--khı̀ thâu-chı̍t-choā khēng,
Áⁿ tı̄ lán kha-ē,
Hn̄g-hn̄g----
Bô-hān chhiⁿ-chhùi kng-bêng
Chiām-chiām cheng-sı̂n--khí--lâi
Sin kok-ka thàu-chá ê khòng-iá.
Tùi soaⁿ-kha thàng kàu hái-pêng-soàⁿ.
(Tâi-bûn Bóng-pò Tē 96 kı̂, 2004 nı̂ 9 goe̍h)
