Tńg-khı̀ Jı̄-chúi ke-á

Kúi lō tang chêng, Tân sian-siⁿ in tō lóng poaⁿ khı̀ Tiân-tiong toà--a. In kiáⁿ Bo̍k-seng--a kap Sin-pū tı̄ Jı̄-chúi leh chò chúi-kó phoe-hoat ê seng-lí, ta̍k-jı̍t tı̄ Tiân-tiong kap Jı̄-chúi 2-ê só͘-chāi lâi-lâi khı̀-khı̀. Ū 1-kang tiong-tàu chia̍h-pá, Bo̍k-seng--a in Ang-á-bó͘ ū tiā-chı̀ tńg-khı̀ Jı̄-chúi. Chiah chhut-mn̂g bô goā kú, tiān-oē tō liang--a. “Oê ~e, chioh mn̄g Bo̍k-seng--a káⁿ ū tı̄ chhù--nih?” Thiaⁿ--khí-lâi sı̄ 1-ê chheⁿ-hūn ê siaⁿ-im, m̄-koh chiâⁿ ū lé-māu. “I chhut--khı̀-a, bô tı̄ chhù--o͘!” Tân sian-siⁿ chin kheh-khı̀ kā hoê-tap. “A̍h thàu tiong-tàu-thâu, I ē cháu khı̀ tó ūi?” “In Ang-á-bó͘ chò-hoé tńg-khı̀ Jı̄-chúi ke-á--lah!” “Hâⁿ~á, thàu tiong-tàu? Ang-á-bó͘? jı̍h-chúi-ke-á? Sı̄ tio̍h iā m̄-tio̍h?” Tiān-oē hit-pêng-thâu thoân-lâi 1-chióng chhiong-boán giâu-gı̂ ê siaⁿ-im.