Sin Chong-kàu Kio̍k-pún 03

 Sè-kan tē-it iàu-kín ê sı̄ sím-mı̍h? 
 (Khah toā hàn ê 8 miâ) 
 Lia̍t-ūi chhin-ài ê hiaⁿ ché pêng-an. Goán chit kúi ê sı̄ tông-ha̍k, goán ê lāu-su ū chhut chı̍t ê siok-tê hō͘ goán, chiū-sı̄ kóng: “Sè-kan tē it iàu-kín ê sı̄ sím-mı̍h”? Taⁿ goán kok-kok ū chún-pı̄ hó lah, ài beh chı̍t ê chı̍t ê kóng hō͘ tāi-ke thiaⁿ, ǹg-bāng tit-tio̍h kok-ūi ê chí-kàu. 
 A): Goá siūⁿ sè-kan tē-it iàu-kín sı̄ chı̂ⁿ, sio̍k-gú kóng “Ū chı̂ⁿ sái kúi ē e-bō͘”, á-sı̄ kóng “Chı̂ⁿ nā bô, lâng chiū sô”. Chhiáⁿ lí siūⁿ khah chin, bô lūn beh chò sím-mı̍h, kiám ū chı̍t-hāng m̄-bián chı̂ⁿ ē ēng tit ê, bô chı̂ⁿ chiū kiâⁿ bô lō͘, kim-chı̂ⁿ sı̄ bān-lêng. só͘-í goá toā-hàn ê sı̂, beh piàⁿ-sè thàn chı̂ⁿ, thang chiâⁿ chò toā pù-ong. 
 B): Goá siūⁿ sè-kan tē it iàu-kín tio̍h ū ha̍k-būn, sio̍k-Gú kóng “Chı̍t jı̄ ta̍t chhian-kim”, ū chı̂ⁿ chin chē, nā m̄ bat jı̄, mā sı̄ chheⁿ-mê gû, “Jı̂n put ha̍k, put ti gı̄”, lâng nā m̄-bat jı̄, siá phoe iā chin put piān. Só͘-í goá beh piàⁿ sè tha̍k chheh, āu-lâi chò phok-sū, chò gâu-lâng ......... 
 C): Goá siūⁿ sin-thé kiān-khong ióng-kiāⁿ tē it iàu-kín, ū chı̂ⁿ ū ha̍k-būn, nā lám-sin-miā, ta̍k-jı̍t teh chia̍h io̍h, thái ū sím-mı̍h hēng-hok? Só͘-í goá beh kò͘ goá ê seng-khu hō͘ i ióng-kiāⁿ, thang chia̍h kàu lāu khok-khok. 
 D): Goá siūⁿ sè-kan thit-thô siāng iàu-kín, kó͘-chá lâng kóng “Jı̂n-seng jio̍k bōng, ūi-hoan ki hô?” ı̀-sù chiū sı̄, jı̂n-seng ná chhin-chhiūⁿ chı̍t tiûⁿ ê bı̂n-bāng, hoaⁿ-hí ê sı̂ bô kúi pái, só͘-í goá beh piàⁿ-sè lâi thit-thô, in-ūi chı̍t sı̀ lâng bô loā kú. 
 E): Goá siūⁿ sè-kan tē-it iàu-kín tio̍h lâu miâ-siaⁿ, sio̍k-gú kóng: “Hó͘ sí lâu phê, lâng sí lâu miâ”, ū chı̂ⁿ, ū ha̍k-būn, ū ióng-kiāⁿ ê seng-khu, thang ta̍k-jı̍t thit-thô, sí liáu āu, nā pháiⁿ miâ-siaⁿ, sı̄ chin bô kè-ta̍t. Só͘-í goá beh chhut-la̍t siu-ióng, lâu miâ-siaⁿ kàu āu sè-tāi. 
 F): Goá siūⁿ sè-kan pak-tó͘ ē pá siāng tē it iàu-kín, miâ-siaⁿ bô lō͘ ēng, sio̍k-gú kóng: “Chia̍h lo̍h pak, ún-tak-tak”, ta̍k jı̍t nā ū hı̂, ū bah, hō͘ goá thang chia̍h kàu pá, goá chiū chin boán-chiok, nā beh sí lah, mā beh chia̍h hō͘ i chı̍t tō͘ pá-pá thang chò pá kúi. 
 G): Chu-ūi, goá khoàⁿ lín chiah ê lóng sı̄ hiān-sè chú-gı̄, bu̍t-chit chú-gı̄ kap hióng-lo̍k chú-gı̄, lóng bô teh siūⁿ āu-lâi ê tāi-chı̀ ...... goá siūⁿ sè-kan tē it iàu-kín tio̍h sı̀n Iâ-so͘ chiah ū éng-oán ê hok-khı̀, ū chı̂ⁿ, ū ha̍k-būn, ióng-kiāⁿ, hó miâ-siaⁿ, ta̍k jı̍t thang chia̍h hı̂, chia̍h bah, sí liáu-āu lêng-hûn hā lo̍h tē-ge̍k, ū sím-mı̍h lı̄-ek? 
 Kin-á-jı̍t sı̄ kiù-chú-tàn, goá khó͘-khǹg lín ta̍k lâng tio̍h lâi sı̀n Iâ-so͘. In-ūi chāi-seⁿ sı̀n Ki-tok, sí-āu, chiah oē thang kàu thian-kok. 
 Lia̍t-ūi chhin-ài ê hiaⁿ-ché, goán chiah ê hó pêng-iú só͘ kóng ê tó chı̍t ê khah tio̍h, tá chı̍t-hāng sı̄ tē-it iàu-kín? Goān lán oē kéng tio̍h chin-chiàⁿ tē-it iàu-kín ê. 
 Chhiáⁿ lán tāi-ke saⁿ-kap lâi gı̂m: “Lâi sı̀n Iâ-so͘” ê si. 
 (oân) 
 (Chù-ı̀, tio̍h “F” tāi seng kóng, “E” lō͘-boé) 
 Lû-á Ê Hoaⁿ-hí 
 (Sè-hàn--ê 8 miâ) 
 Chhù-chiáu-á 5, Thò͘-á 1, Thiⁿ-sài 1. Lû-á 1. (Sè-chiah chiáu-á 5 miâ chhiùⁿ-koa, tı̄ chhiū-ki teh hı̀ⁿ-lâi hı̀ⁿ-khı̀) 
 C: (Thò͘-á tı̄ tiong-ng teh thiàu, kàu koa chhiùⁿ liáu ê sı̂, lóng-chóng kóng) Chin-gâu, chin-gâu. 
 C-1: Thò͘-á hiaⁿ, lí thái oē hiah gâu thiàu-bú ne? 
 T: Bô ah, lín chin gâu chhiùⁿ-koa, goá thiaⁿ liáu chin hoaⁿ-hí, só͘-í chiah tı̍t-tı̍t thiàu lah. 
 C-2: Taⁿ chin oàⁿ lah, lán tio̍h kín lâi khı̀. 
 L: (Koáⁿ-kín chhut lâi) Hó pêng-iú ah, lín beh khı̀ tó-ūi? 
 C-3: Goán beh lâi khı̀ Iû-thài kok ê Pek-lı̄-hêng. 
 L: Beh khı̀ chhòng sím-mı̍h? 
 C-4: Lí m̄ chai hâⁿ? Kin-á-jı̍t tı̄ hia Ki-tok chhut-sı̀, goán beh lâi khı̀ khèng-hō. 
 L: Ki-tok sı̄ sím-mı̍h lâng? 
 C-5: Sı̄ sè-kài jı̂n-lūi ê kiù-chú. 
 T: Goán lóng beh lâi khı̀ pài I. 
 C: (Lóng chóng) Goán beh khı̀ chhiùⁿ-koa hō͘ Ki-tok thiaⁿ. 
 L: Hō͘ goá toè hó m̄? 
 T: Lí kiám oē hiáu thiàu bú? 
 L: Bē ah. 
 C-1: Ia̍h bô lí kiám oē hiáu chhiùⁿ-koa? 
 L: Sió khoá. 
 C: (lóng-chóng) Chhiùⁿ khoàⁿ māi lè. 
 L: Hi hi ......... Hu hu ......... 
 C: (lóng-chóng toā chhiò) Án-ni bē ēng tit là. 
 T: Taⁿ lán kín lâi khı̀ bô ē siuⁿ-oàⁿ. (C kap T ná chhiùⁿ koa ná thiàu jı̍p khı̀ .........Chú-jı̍t-o̍h Sèng-si 34) 
 L: (Lâu ba̍k-sái) 
 S: Lû-á hiaⁿ, lí tı̄ chia teh háu án-choáⁿ? 
 L: Kin-á-jı̍t Kiù-chú Iâ-so͘ chhut sı̀, sè chiah chiáu-á beh khı̀ chhiùⁿ-koa hō͘ I thiaⁿ, Thò͘-á beh khı̀ thiàu-bú hō͘ Iâ-so͘ khoàⁿ, goá bē hiáu chhiùⁿ koa, iā bē hiáu thiàu-bú, in m̄ hō͘ goá toè, chò in khı̀. 
 S: Lû-á hiaⁿ, lí bián hoân-ló, goá beh chhoā lí lâi khı̀. 
 L: Ū iáⁿ bô? 
 S: Ū iáⁿ noh, koh bô kúi jı̍t Iok-sek beh chhoā eⁿ-á Iâ-so͘ lo̍h khı̀ Ai-kı̍p, goá teh chhoē 1 chiah lû-á thang hō͘ in khiâ. 
 L: Chhoē tio̍h á bē? 
 S: Chhoē tio̍h lah, chiū-sı̄ lí. 
 L: Ū iáⁿ, kài hoaⁿ-hí goá thang kap Kiù-chú saⁿ-kı̀ⁿ. 
 S: Taⁿ lán kín lâi khı̀. 
 (oân) 
 Iâ-so͘ ê chit-gia̍p 
 A: Kı̄n-lâi Ki-tok-kàu chin chhiong-sēng, ta̍k só͘ chāi to ū kàu-hoē, siông-siông thiaⁿ-kı̀ⁿ teh pò͘-tō, chóng-sı̄ tàu-tí Iâ-so͘ ê chit-gia̍p m̄-chai sı̄ sím-mı̍h? Kài tú-hó Bo̍k-seng hiaⁿ tı̄ hia teh lâi, lâi kā i mn̄g khoàⁿ māi. 
 Bo̍k-seng hiaⁿ, kài tú-hó, goá beh chhéng-kàu lí. 
 B: Khí-kám, sím-mı̍h tāi-chı̀? 
 A: M̄-chai Iâ-so͘ ê chit-gia̍p sı̄ sím-mı̍h hòⁿ? 
 B: Ah, soah m̄-chai sı̄ ba̍k-kang sai-hū, I ê iúⁿ-pē Iok-sek Sı̄ Ná-sat-le̍k siâⁿ chhut miâ ê ba̍k-kang, só͘-í, soah tō koh siūⁿ? 
 A: Goá ioh I sı̄ kò͘ iûⁿ ê, in-ūi I bat kóng, goá sı̄ hó ê bo̍k-chiá, goá beh ūi iûⁿ pàng-sak sèⁿ-miā. 
 B: Goá ioh ê khah tio̍h, lí ioh ê m̄-tio̍h lah, m̄-sı̀n Iú-sêng hiaⁿ tı̄ hia teh lâi, lâi kā i chhéng-kàu. Iú-sêng hiaⁿ, tàu-tí Iâ-so͘ ê chit-gia̍p sı̄ sím-mı̍h? 
 C: M̄-bián kóng mā-sı̄ i-seng. In-ūi Iâ-so͘ bat i-hó chin-chē phoà-pēⁿ ê lâng, iā ū chheⁿ-mê--ê, pái-kha--ê, piàn-sūi--ê, mā bat hō͘ sí-lâng koh-oa̍h, iah bô lín sı̄ kóng sím-mı̍h? 
 A: Goá ioh sı̄ bo̍k-chiá. 
 B: Goá ioh sı̄ ba̍k-kang. 
 C: Lín ioh ê khah m̄-tio̍h, goá ioh ê chiah tio̍h, m̄-sı̀n Piáⁿ-sin hiaⁿ tı̄ hia teh lâi, lán lâi mn̄g i khoàⁿ māi. Piáⁿ-sin hiaⁿ, goán tāi-ke teh ioh, khoàⁿ Iâ-so͘ ê chit-gia̍p sı̄ sím-mı̍h, chı̍t lâng ioh chı̍t khoán, taⁿ ài chhéng-kàu lí, m̄-chai lí ioh sı̄ sím-mı̍h? 
 D: Iâ-so͘ sı̄ teh chò-piáⁿ, lín kiám m̄ bat thiaⁿ tio̍h Iâ-so͘ tı̄ khòng-iá iōng piáⁿ hō͘ 5000 lâng chia̍h kàu pá, koh chhun 12 kheng, nā m̄-sı̄ teh chò-piáⁿ thái ū thang hō͘ hiah chē lâng chia̍h, koh chhun hiah chē. 
 A: Ū-iáⁿ to tio̍h, chóng-sı̄ goá bat khoàⁿ tio̍h ang-á tô͘ oē Iâ-so͘ phō iûⁿ-á, khah kóng iā sı̄ bo̍k-chiá khah tio̍h. 
 B: Goá ioh ba̍k-kang, Iú-sêng hiaⁿ ioh sı̄ i-seng. 
 D: Lín ioh ê lóng m̄-tio̍h lah, goá ê chiah tio̍h lah. 
 C: Hái-éng hiaⁿ tı̄ hia teh lâi lah, lán lâi mn̄g i khoàⁿ-māi? 
 D: Hái-éng hiaⁿ, goá kóng Iâ-so͘ ê chit-gia̍p sı̄ teh chò-piáⁿ, in kóng m̄-sı̄ lah. 
 C: Goá ioh Iâ-so͘ sı̄ teh chò i-seng. 
 B: Goá ioh Iâ-so͘ sı̄ teh chò ba̍k-kang. 
 A: Goá ioh Iâ-so͘ sı̄ bo̍k-chiá. 
 E: Lín lóng m̄-tio̍h, Iâ-so͘ ê chit-gia̍p chiū-sı̄ teh lia̍h hı̂. Lín kiám m̄-bat thiaⁿ kóng Iâ-so͘ kiò ha̍k-seng pha bāng lo̍h hái, liâm-piⁿ ûi-tio̍h hı̂ chin chē, kàu bāng beh lı̍h. Nā m̄-sı̄ lia̍h hı̂ choan-ka, iā ē tàng án-ni, thó͘-siūⁿ mā chai. 
 B: Lāu-su tı̄ hia teh lâi, lâi chhéng-kàu i siāng tio̍h. 
 *: (Lóng chóng) Lāu-su Pêng-an! 
 S: Pêng-an. Lín chò hoé tı̄ chia teh tâm-lūn sím-mı̍h? 
 E: Lāu-su, goán tāi-ke teh ioh Iâ-so͘ ê chit-gia̍p tàu-tí sı̄ sím-mı̍h? Chı̍t lâng ioh chı̍t khoán, taⁿ m̄-chai sím-mı̍h lâng khah tio̍h? 
 S: Hòⁿ! Án-ni kài hó, tio̍h siông-siông án-ni gián-kiù chiah ē chı̀n-pō͘. Taⁿ lín só͘ ioh ê sı̄ sím-mı̍h? 
 A: Goá ioh sı̄ bo̍k-chiá. 
 B: Goá ioh sı̄ ba̍k-kang. 
 C: Goá ioh sı̄ i-seng. 
 D: Goá ioh sı̄ teh chò-piáⁿ. 
 E: Goá ioh sı̄ thó-hái lâng. 
 S: Án-ni lín só͘ ioh ê lóng bô m̄-tio̍h. In-ūi Iâ-so͘ sı̄ hó ê bo̍k-chiá, teh chiàu-kò͘ lán, chhin-chhiūⁿ bo̍k-chiá chiàu-kò͘ iûⁿ-á; iā sı̄ gâu kā lán siu-chéng lán pháiⁿ-khoàⁿ ê phín-hēng, chiâⁿ-chò ke̍k hó khoàⁿ ê ba̍k-kang; iā sı̄ gâu i lán lêng-hûn ê pēⁿ-chèng ê toā i-seng; iā-sı̄ chiong oa̍h-miā ê piaⁿ, beh hō͘ lán--ê; iā sı̄ chhin-chhiūⁿ thó-hái lâng gâu lia̍h hı̂. I chin gâu chio ha̍k-seng. Chóng-kóng I siāng kin-pún ê chit-gia̍p chiū-sı̄ beh kiù lâng, iáu-kú sı̄ tùi chē-chē hong-bı̄n ê piáu-hiān, lín chiah ē ioh hiah chē khoán lah.
 A: Án-ni goá toā-hàn beh chò bo̍k-su, lâi ū hūn tı̄ Iâ-so͘ ê kiù-lâng, lâi chiàu-kò͘ Siōng-tè ê iûⁿ-kûn. 
 B: Goá toā-hàn beh chò ba̍k-kang, lâi khí lé-pài tn̂g. 
 C: Goá toā-hàn beh chò i-seng, lín nā pak-tó͘ thiàⁿ, thâu-khak hı̂n, chhàu kha phı̄ⁿ-liâm lóng lâi chhoē goá, bián chı̂ⁿ beh kā lín hōng-sū, kiám-chió lâng-lâng ê kan-khó͘. 
 E: Goá toā-hàn beh lia̍h-hı̂, iā beh ūi Chú lâi thoân tō-lí. 
 D: Goá beh khui piáⁿ-tiàm, lâi hō͘ iau ê lâng thang tit-tio̍h pá. 
 S: Án-ni chin-hó, ē-hng tú-hó sı̄ Chú ê seⁿ-jı̍t, iā sı̄ lín ê koat-sim ê jı̍t, lín tio̍h siông-siông ē kı̀-tit. Chhiáⁿ lâi gı̂m chı̍t siú si lâi o-ló Chú. 
 (Chú-jı̍t-o̍h Sèng-si tē 2 pō͘ 20 siú) 
 Oân