Sū-ka ê Hū-jı̂n-lâng

 “Sū-ka ê hū-jı̂n-lâng” 
 “Iâ-so͘ ı̀n i kóng,.......Kı̀ⁿ-nā lim goá só͘ beh hō͘ i ê chúi ê éng-oán boē chhùi-ta” Iok-hān 4:13,14. 
 Teng-tiûⁿ ê jı̂n-bu̍t: 
A-tāi: Pún-hiuⁿ ê hū-jı̂n-lâng. 
Tāi-pí-tāi: Lâi Sū-ka sin khiā-khí ê hū-jı̂n-lâng. 
Ko-bia̍t: Ài jiá-khí oan-ke ê pún-hiuⁿ hū-jı̂n-lâng. 
Tāi-lı̄-lia̍p: Siū léng-lo̍k ê hū-jı̂n-lâng.
 Sı̂-kan:Iâ-so͘ keng-koè Sat-má-lı̄-a ê sı̂-hāu. 
 Tē-tiám:Sū-ka ê hiong-chhoan. 
 Pò͘-kéng:Tiong-ngó͘ ê hiong-chhoan chíⁿ-piⁿ. 
 Kéng: 
 Khui-bō͘, lán sûi-sı̂ thang khoàⁿ-kı̀ⁿ hiong-chhoan ê chíⁿ, tı̄ tâi-téng ê tiong-ng; chíⁿ-āu ū sè-châng chhiū-á kap chháu ê poē-kéng. 
 A-tāi sı̄ chı̍t ê hô-khı̀ ái-ái chin ū tı̀-sek kap keng-giām ê nı̂-hoè ê lâng.Tú tùi chíⁿ lāi chhiūⁿ-chúi tò tı̄ khǹg tiàm chíⁿ-noâ-piⁿ ê chúi-koàn.A-tāi tú chhiūⁿ-oân liáu chúi, Tāi-pí-tāi toà chúi-koàn tùi chó-pian (tò-pêng) jı̍p-lâi. Tāi-pí-tāi khoàⁿ-kı̀ⁿ A-tāi tı̄ hia chiū tiû-tû chı̍t-ē, chóng-sı̄ A-tāi gia̍h thâu chı̍t ē khoàⁿ, chiū ēng bı̂-chhiò hoan-gêng i. 
 A-tāi: Chú chiok-hok lí. 
 Tāi-pí-tāi: (Thı̀m-thâu kiok-kiong) Chú chiok-hok lí; sím-mı̍h lâng to thang tùi che chíⁿ chhiūⁿ chúi mah? 
 A-tāi: Sı̄, che chíⁿ sı̄ ūi-tio̍h tāi-ke chiah ū ê, chhiáⁿ chhiūⁿ! Lán ū chı̍t ê chíⁿ lı̄ chia ū hiah hn̄g à, sı̄ Ngá-kok ê chíⁿ, hit ê chíⁿ chin chhim, m̄-kú chúi chin chheng-liâng. 
 Tāi-pí-tāi: Ū lâng kā goá kóng, hit ê chíⁿ sı̄ goán ê chó͘-sian só͘ ku̍t ê, goá siūⁿ lâi khı̀ hia chhiūⁿ chúi hó. 
 A-tāi:Chiah nih joa̍h ê sı̂-chūn, khah hó tiàm chia chhiūⁿ moá lí ê chúi-koàn, thèng-hāu hông-hun àm khah liâng ê sı̂-chūn, chiah thang kiâⁿ khah hn̄g ê lō͘ khı̀ hia chhiūⁿ. 
 Tāi-pí-tāi: Chit khoán ê chò-hoat, sı̄ chit toē-hng ê hong-sio̍k mah? 
 A-tāi: Lí sı̄ siⁿ-hūn lâng sı̄ bô? 
 Tāi-pí-tāi: Sı̄, goán choè-kūn chiah tùi Ka-lı̄-lı̄ poaⁿ lâi ê lah; Hia Sat-má-lı̄-a lâng tiàm Ka-lı̄-lı̄ khiā-khí sı̄ chı̍t hāng bô sóng-khoài ê sū, só͘-í goán, goá ê tiōng-hu, goá pún-sin kap goán nn̄g ê kiáⁿ-jı̂ lóng-chóng poaⁿ-lâi Sū-ka. 
 A- tāi: Hoan-gêng lín lâi Sū-ka khiā-khí, chhiáⁿ chē, siⁿ-hūn lâng! (In chiū saⁿ-kap chē tı̄ chéⁿ-noâ-téng). Goán Sū-ka lâng tùi Sa-má-lı̄-a tông-cho̍k, kàu-taⁿ lóng sı̄ iú-siān--ê, (iu-siong ê chhiò) tong-jiân Iû-thài lâng lóng siám-pı̄ goán, chı̀-chió ia̍h m̄ hō͘ goán ê khı̀-sek jia-khàm tı̄ in ká-chong kèng-khiân ê keng-thâu-téng. 
 Tāi-pí-tāi: Goá chia-iáⁿ, goán chí ūi-tio̍h kim-chı̂ⁿ chiah khiā-khí Ka-lı̄-lı̄, taⁿ sui-sı̄ ūi kim-chı̂ⁿ goán iā boē-thang koh jím-siū tio̍h ka-kı̄ ê kiáⁿ-jı̂ hō͘ lâng kiò kóng “Ti-lah” “Ti-ko lah.” 
 A-tāi: Kā goá kóng tı̄ Ka-lı̄-lı̄ ê chōng-hóng, in-ūi goá chin kú m̄-bat kap tùi hia lâi ê lâng tâm-lūn chiah ê oē. 
 Tāi-pí-tāi: Hiān-chāi só͘ ū ê hiong-bı̂n to͘ ūi-tio̍h chı̍t ūi ka-kı̄ toàn-giân I sı̄ Bí-sài-a ê ba̍k-chhiūⁿ teh toā heng-hùn lioh! 
 A-tāi: Só͘ èng-ún ê kiám m̄-sı̄ I mah? 
 Tāi-pí-tāi: Boē-oē sı̄ I, I thài sòng-hiong, koh-chài chio chı̍t koá phó͘-thong lâng Sím-mı̍h lia̍h hı̂ ê lah! Sím-mı̍h thiu-hiòng ê lah! Chhin-chhiūⁿ I ê, kun-toè I......! Put-kò chit ê sū chin chhı̀-kek liáu Hoat-lı̄-sài lâng; che iā sı̄ goán poaⁿ lâi Sū-ka ê koh chı̍t ê goân-in. Chia chin súi, sui-jiân boē thang iâⁿ koè Ka-lı̄-lı̄ hit khoán ê chhiⁿ-chhùi, m̄-kú......o͘h! Tı̄ hn̄g-hn̄g hia sı̄ sèng-tiān mah? 
 A-tāi: Sı̄, tı̄ Ki-lí-sim soaⁿ; thiaⁿ-kı̀ⁿ kóng hia boē thang chhin-chhiūⁿ Iâ-lō͘-sat-léng ê tông-hông, chóng-sı̄ hia goán ê chó͘ Ngá-kok bat tı̄ hia kèng-pài, iā lı̄ goá ê chó͘ Ngá-kok só͘ ku̍t ê chúi-chíⁿ bô hn̄g. Tng Bí-sài-a kàng-lı̂m ê sı̂-chūn, I ia̍h koh lı̂m-kàu chı̍t ê só͘-chāi, ná chhin-chhiūⁿ chiūⁿ Iâ-lō͘-sat-léng chı̍t-poaⁿ-iūⁿ. 
 Tāi-pí-tāi: Goá ia̍h án-ni siūⁿ, goá ke-lāi ê kiáⁿ-jı̂ thang kàu hia ha̍k-sı̍p mah? 
 A-tāi: Sím-mı̍h m̄-thang! Tong-jiân lah, lí it-tēng beh hoaⁿ-hí lán ê hó lia̍p-pí. 
 Tāi-pí-tāi: Goá eng-kai khai-sí lah (khiā khí-lâi), lí sı̍t-chāi chin chû-ài chhin-chhiat lâi kap goá chit ê chheⁿ-hūn lâng kóng oē, goá ê miâ kiò Tāi-pí-tāi. 
 A-tāi: Goá ê miâ sı̄ A-tāi, chhiáⁿ lí í-āu siông-siông lâi chia, thang ke-thiⁿ pún-hiuⁿ hū-lú ê iú-gı̂. Ah! Ko-bia̍t lâi lah, goá chin kı̂-koài, i cháiⁿ-iūⁿ bô khah chá lâi. 
 (Tāi-pí-tāi kiâⁿ kūn chíⁿ chiong chúi-tháng thiām lo̍h teh chhiūⁿ chúi; Ko-bia̍t tùi tò-pêng chiūⁿ tâi, i chı̍t piⁿ kiâⁿ, chı̍t piⁿ oa̍t thâu khoàⁿ āu-bı̄n toā siaⁿ chhiò). 
 Ko-bia̍t: Ouh! A-tāi, thiaⁿ ò͘! Che chiàⁿ sı̄ toā sū-kiāⁿ, tú-chiah goá kiâⁿ ke-lō͘ ê sı̂-chūn, goá chhin-ba̍k khoàⁿ-kı̀ⁿ Tāi-lı̄-lia̍p; goá sim-lāi kı̂-koài, i chā-jı̍t chiah tú-tio̍h piⁿ phah, iáu ū chit khoán ê táⁿ-liōng thang koh lâi chia. Chóng-sı̄ m̄-sı̄ ah! I chı̍t ē khoàⁿ-tio̍h goá, chiū lı̍p-khek oa̍t kè ke-lō͘ kàu phian-piⁿ-lō͘ khı̀. Goá siūⁿ, i phah-sǹg m̄-káⁿ koh-chài kūn-oá lán, chóng-sı̄ i kàu an-ún ê só͘-chāi chiū hoê-thâu, chhùi chhut ok-giân, ná chhin-chhiūⁿ tı̀m chio̍h-thâu chı̍t-iūⁿ. 
 A-tāi: Goá siūⁿ, lán m̄ chún i lâi chia chhiūⁿ chúi sı̄ thài bô jı̂n-chêng ê chò hoat; chiah-nih joa̍h ê thiⁿ-khı̀ khı̀ Ngá-kok ê chíⁿ sı̄ siong-tong ê hn̄g lō͘, liân lán ka-kı̄ iā boē-oē chhı̀ siūⁿ kiâⁿ chiah hn̄g lō͘ neh. 
 Ko-bia̍t: Goá m̄-kú chin ài hō͘ chit khoán pháiⁿ hū-jı̂n-lâng, chāi-lâi bô ū chı̍t ê chhin-chhiūⁿ i, só͘-í hō͘ i khı̀ kiâⁿ hn̄g lō͘, lán m̄-bián khı̀ koán i, kiám-chhái Siōng-tè oē phah-sí i, hō͘ lán thang kap chit hō chhiong-ki thoat-lı̄ koan-hē lah. 
 A-tāi: Ai-ioh! Ko-bia̍t! M̄-thang kóng pháiⁿ oē, i mā lí ê sı̂-chūn lí cháiⁿ-iūⁿ? 
 Ko-bia̍t: (Tek-ı̀ ê chhiò) Ouh, goá choè pí mā koh-khah lı̄-hāi ê sū: goá hiòng i tı̀m chio̍h-thâu, jiân-āu bú-jio̍k i. 
 A-tāi: Lí kiù-kèng sı̄ chı̍t ê thih-sim, chio̍h-tn̂g, khok-hêng ê lâng. Ko-bia̍t! Lâi ò͘, lâi kap chit ūi poaⁿ lâi chia kap lán chò chhù-piⁿ saⁿ-kap khiā ê siⁿ-hūn-lâng kı̀ⁿ bı̄n chı̍t-ē (Tāi-pí-tāi í-keng chhiūⁿ oân liáu chúi, chēng-chēng thiaⁿ in ê tâm-oē). 
 Ko-bia̍t: Goān Chú chiok-hok lí, siⁿ-hūn-lâng! 
 Tāi-pí-tāi: Goān Chú chiok-hok lí, hit ūi......lí tú-chiah thê-khí ê hit ūi hū-jı̂n-lâng......chia ū chin-choē chhin-chhiūⁿ i ê mah? 
 Ko-bia̍t: Bô, bô, chí-ū chı̍t ê, chiū-sı̄ i, put-kò goán koh bô kú oē chiong i koáⁿ cháu, m̄-chún i kūn che chíⁿ, che chí sı̄ chho͘-pō͘ ê choè-hoat. 
 A-tāi: Tāi-pí-tāi, goá sim-lāi it-tı̍t siūⁿ hit ūi jiá-khí sū-kiāⁿ ê......lí siūⁿ I oē kiâⁿ-koè che tiâu lō͘ lâi mah? 
 Tāi-pí-tāi: Goá khak-sı̀n I it-tēng boē oē lâi, chhı̀-siūⁿ I sı̄ lû-thài lâng, chiah ê ha̍k-sū iū chiām-chiām chin teh siū-khı̀ I lâi, kiám-chhái hiān-chāi I í-keng bô tı̄ sè-kan lah. 
 A-tāi: Sian-ti só͘ kı̀-chài ê sı̂-hāu kūn lah (i chù-sı̂n khoàⁿ hn̄g ê só͘-chāi ka-kı̄ kóng), siat-sú lán bô kı̀ⁿ I chiū ū chai-ē lah. 
 Ko-bia̍t: (Heng-hùn tio̍h) Khoàⁿ! Khoàⁿ i lâi lah. Tāi-lı̄-lia̍p lâi lah, i ēng cháu--ê lâi. Oh! Hó toā táⁿ, kèng káⁿ tùi chit tiâu lō͘ lâi! Lán kā koáⁿ i cháu. Tāi-pí-tāi, lí kap A-tāi, goá, saⁿ-kap lâi tí-khòng i. 
 (Tāi-lı̄-lia̍p cháu chiūⁿ tâi, heng-hùn tio̍h, ū sı̂ gı̄m kûn-thâu-bú, khui tio̍h chhiú). 
 Tāi-lı̄-lia̍p: Oh! Goá ê pêng-iú, goá ū siau-sit, toā siau-sit neh! 
 Ko-bia̍t: Goán bô hi-hán lí ê siau-sit, goán iā m̄-sı̄ lí ê pêng-iú. 
 Tāi-lı̄-lia̍p: Ūi cháiⁿ-iūⁿ m̄-sı̄ nih? Sı̄ là, lín sı̄ goá ê pêng-iú; goá toà tio̍h hó siau-sit lâi. Thiaⁿ! Bí-sài-a í-keng lı̂m-kàu lah! 
 Ko-bia̍t: Goá kóng, khı̀, khı̀! Lí liân chúi-koàn to bô toà leh, koh khah bô lí-iû tiàm chia sûn-lâi sûn-khı̀, khı̀, khı̀! 
 Tāi-lı̄-lia̍p: (Ēng kiaⁿ-hiâⁿ kı̂-koài ê gán-kong khoàⁿ khang siang-chhiú). Ūi sím-mı̍h goá bô toà chúi-koàn nih? Goá it-tēng pàng-hē tı̄ Ngá-kok ê chíⁿ-piⁿ, chóng-sı̄......bô chúi-koàn ū sím-mı̍h koan-hē neh! Taⁿ goá í-keng khoàⁿ-kı̀ⁿ koè hit ūi sù oa̍h-miā ê chúi......, lâng lim chiū éng boē chhùi-ta...... Ah! I hit khoán chû-siông ê ba̍k-chiu, I ê siaⁿ-im chhiong-moá tio̍h lı̂n-bín; tng I kóng, “Hū-jı̂n-lâng ah, chúi hō͘ goá lim” (Tāi-lı̄-lia̍p khoài-lo̍k, sim-chı̀ hûn-bê hóng-hut tı̄ ka-kı̄ ê thé-giām tiong. Ū sı̂ i bô lí-hoē pa̍t lâng, i koh-chài tı̍t-chiap hiòng in kóng). 
 Tāi-lı̄-lia̍p: Goá kóng Lí kı̀-jiân sı̄ Iû-thài lâng cháiⁿ-iūⁿ tùi goá che Sat-má-lı̄-a lâng thó chúi lim? 
 Ko-bia̍t: Lí sı̄ ài goán phah lí mah? Khı̀, khı̀! 
 Tāi-lı̄-lia̍p: Jiân-āu i kóng, “Lí nā chai-iáⁿ tùi lí kóng, hō͘ goá lim ê sı̄ chı̄-chūi, lí tek-khak kiû I, I chiū ēng oa̍h-miā ê chúi hō͘ lí.” Goá chiū kóng, “Sian-siⁿ, lí bô ū chhiūⁿ chúi ê khı̀-kū, chíⁿ iū koh chhim.” I kóng, “Kı̀ⁿ-nā lim goá só͘ beh hō͘ i ê chúi ê, éng-oán boē chhùi-ta.” 
 Ko-bia̍t: (Toā siū-khı̀). Tiām-tiām! Kiâⁿ khui-khı̀ hó m̄? 
 Tāi-lı̄-lia̍p: (Bô lí-hoē). Goá chiū kóng, “Chhiáⁿ ēng che chúi sù goá lim.” Jiân-āu......ah! Pêng-iú! Tı̄ hit sùn-kan goá hiáu-ngō͘, I chiū-sı̄ só͘ èng-ún ê hit-ūi. (I ê siaⁿ-im bān-bān piàn un-jiû, i kè-sio̍k chhut sı̂n ê to̍k-gú). Goán tâm-liáu chin kú, I iū tiâu-chèng goá ko͘-tâ, pháiⁿ ê sim-lêng. 
 Ko-bia̍t: Che sı̄ goá choè-āu chı̍t pái ê kéng-kò, khı̀, khı̀! 
 Tāi-lı̄-lia̍p: Ko-bia̍t! Lí chhin-sin lâi khoàⁿ I lah! I chiong goá pêng-sò͘ ê it-chhè to͘ kóng chhut-lâi. 
 Ko-bia̍t: Un2-tàng, I kā lí kóng, lí sı̄ pháiⁿ hū-jı̂n-lâng. 
 Tāi-lı̄-lia̍p: Sı̄! I iā ū án-ni kóng, put-kò I iā kóng beh sià-bián goá, chhat-siau goá ê koè-khı̀; goá chai-iáⁿ I chiū-sı̄ hit chı̍t ūi Bí-sài-a. 
 Ko-bia̍t: A-tāi, Tāi-pí-tāi lâi! Pang-chān goá koáⁿ cháu i. 
 Tāi-lí-lia̍p: Ko-bia̍t! Lâi ah! I oē kám-tōng lí ê Pháiⁿ sim-koaⁿ. (Tāi-lı̄-lia̍p chhin-chhiat khan i ê chhiú, i m̄ chhap i, kā hàiⁿ-cháu). 
 Ko-bia̍t: M̄-bián! M̄-bián! Goá m̄ khı̀! Goá oàn-hūn lí, lí sı̄ hā-chiān ê cha-bó͘-lâng. 
 Tāi-lı̄-lia̍p: I oē kà lí m̄-thang oàn-hūn goá, tio̍h oàn-hūn i só͘ chhat-siau koè ê choē. I oē khoàⁿ thàu lí sim-tiong só͘ ū ê sū. 
 Ko-bia̍t: (Kiu-kiu tio̍h thè-āu). M̄! M̄! Goá m̄ ài chai-iáⁿ. 
 Tāi-lı̄-lia̍p: (Sêng-khún teh khoàⁿ i). Lí bô siūⁿ ài chai-iáⁿ; in-ūi lí ê sim pháiⁿ, lí tùi goá toā chân-jím lah; nā sı̄ kúi-tiám-cheng chêng goá oē thâi-sí lí. Taⁿ hiān-chāi......ūi sím-mı̍h nih? Ko-bia̍t! Goá hoán-tńg thiàⁿ lí. 
 Ko-bia̍t: (Kı̂-koài, koh i ê siaⁿ-im khê-khê kóng boē chū-jiân). Lí thiàⁿ goá mah? Ūi cháiⁿ-iūⁿ neh? 
 Tāi-lı̄-lia̍p: In-ūi Bí-sài-a bat kà-sı̄ goá tio̍h cháiⁿ-iūⁿ thiàⁿ tùi-te̍k. 
 Ko-bia̍t: (Kéng ū piàn-hoà lah, i ēng siang-chhiú am-bı̄n, i ê siū-khı̀ chiām-chiām thoè, chiah khai-sí háu, chhǹg-chhǹg háu). 
 Tāi-lı̄-lia̍p: Lâi! Lâi! Lâi khoàⁿ Bí-sài-a lah. (I khan Ko-bia̍t ê chhiú, chit pái bô hàiⁿ cháu). 
 Ko-bia̍t: Goá bêng-pe̍k I sı̄ Bí-sài-a. I kı̀-jiân oē-thang kā lí sià-bián; goá che bat tùi lí thài chân-jím ê lâng, ún-tàng I iā beh sià-bián goá lah! Tāi-lı̄-lia̍p! 
 A-tāi: (A-tāi khoàⁿ in lı̄-khui, Tāi-lı̄-lia̍p khan iáu teh chhǹg-chhǹg háu ê Ko-bia̍t). 
 A-tāi: (Oa̍t-thâu khoàⁿ Tāi-pí-tāi kóng). Khó-lêng i chiū-sı̄ tú-chiah só͘ thê-khí ê hit ūi Bí-sài-a oh! 
 Tāi-pí-tāi: (Bô khak-sı̍t ê khoán-sit), chóng-sı̄ goá ...... goá m̄ chai-iáⁿ, kiám-chhái sı̄! Goá ná chún iáu kı̀-tit; i ū i-hó phoà-pı̄ⁿ lâng, hō͘ pái-kha ê oē kiâⁿ lō͘, chheⁿ-mê ê oē khoàⁿ-kı̀ⁿ, chhàu-hı̄ⁿ ê oē thiaⁿ-kı̀ⁿ, sí-lâng oē koh-oa̍h; lán lâi-khı̀, lâi-khı̀ khoàⁿ ah! 
 A-tāi: Hó! Lán lâi khı̀, lán thang chı̍t lō͘ thoân-pò che hó siau-sit hō͘ lâng chai-iáⁿ. 
 (Lú-soan Ge̍h-khan tē 16 kı̂, 1961 nı̂ 4 ge̍h)