Thong-lō͘
Lán lóng chai-iáⁿ, chhài-se, koé-chí siu-sêng liáu-āu, kè-siàu sı̄ chhı̄-á hiah-ê hoàn-á teh koat-tēng, bô-lūn siau-hùi chhı̄-tiûⁿ kè-siàu án-choáⁿ teh khí-lo̍h, lı̄-thâu lóng hō͘ khòng-chè “thong-lō͘” ê chhài-thâng báu-báu--khı̀. Ū chı̍t-ê pêng-iú chhù--nih khui kang-tiûⁿ teh chò piáⁿ, tiāⁿ teh kóng in chit-má kap choh-sit-lâng kāng ūn-miā, kāng-khoán hō͘ “thong-lō͘” ah kah kiōng beh ai bē chhut-siaⁿ. Sán-phín tàn-khı̀ thoân-thóng thong-lō͘ , hō͘ tiong-poâⁿ hoah kàu tēng-kè ê saⁿ-siâⁿ, seng-lí tō kóng ē sêng, nā hō͘ keng-siau-siong sı̄ saⁿ-siâⁿ-gō͘. M̄-koh chit-má chhı̄-tiûⁿ hō͘ hiān-tāi-hoà ê liân-só thong-lō͘ chia̍h--khı̀, thoân-thóng thong-lō͘ kan-taⁿ chiàm saⁿ-siâⁿ khah ke. Thoân-thóng kám-á-tiàm piàⁿ bē koè liân-só thong-lō͘ , iau-kiû ê lı̄-sûn thê-ko, hō͘ tiong-poâⁿ kap keng-siau--ê ài ta̍h kàu saⁿ-siâⁿ-gō͘ kap sı̀-siâⁿ chiah chò ē sêng. Châi-thoân keng-êng ê hiān-tāi-hoà liân-só thong-lō͘ pun-chò chhiau-siong, chhiau-chhı̄ kap toā-bē-tiûⁿ saⁿ-chióng hē-thóng. Sán-phín nā beh tı̄ chiah-ê thong-lō͘ bē, kè-siàu kap hō͘ keng-siau-siong--ê kāng-khoán sı̄ sı̀-siâⁿ, m̄-koh ài koh lēng-goā la̍p “mn̂g-phiò”----『上架費』. Ta̍k-keng liân-só thong-lō͘ kong-si『上架費』kè-siàu bô-kâng, mn̂g-chhı̄ jú chē--ê jú koân-kè. Khè-iok chı̍t-tang chhiam chı̍t-pái, ū--ê kui-tēng nā bô-kàu in tēng ê êng-gia̍p-gia̍h tio̍h-ài thè-hoè, ū--ê sı̄ kāng-lūi siong-phín êng-gia̍p-gia̍h ê àu-boé kúi-miâ ài thè-hoè, beh têng jı̍p-hoè ài koh chhiam-iok la̍p『上架費』; êng-gia̍p-gia̍h nā chhiau-koè ı̄-tēng-liōng, nı̂-boé ài la̍p “chióng-lē-kim”, “chióng-lē” thong-lō͘ gia̍p-chiá gâu kā lí bē sán-phín. Thong-lō͘ kong-si ê gia̍p-bū koh ē put-sı̂ chhoē seng-sán gia̍p-chiá pān sán-phín ê phah-chiat oa̍h-tāng, kiám thàn--ê “thong-lō͘” bô beh hū-tam. Chhiūⁿ chı̍t-ap piáⁿ bē cha̍p-kho͘, thong-lō͘ beh thàn sı̀-kho͘, nā phah peh-chiat, bē peh-kho͘ in kāng-khoán beh thàn sı̀-kho͘, chı̍t-sián chı̍t-lı̂ to bô beh kiám-siu, kiám--ê chhiúⁿ-siong ka-tı̄ ài khip-siu. Toā-bē-tiûⁿ hē-thóng khui ê tiâu-kiāⁿ tō koh khah khok-hêng--a. Ū--ê jı̍p-hoè tio̍h-ài seng la̍p 200 bān. Toā-bē-tiûⁿ nā beh khui sin-tiàm, ū jı̍p-hoè ê chhiúⁿ-siong ài chiàu êng-gia̍p-gia̍h pí-lē hū-tam hùi-iōng; nā beh ı̂-siu iah hoan-siu, kāng-khoán khui-chhùi kā chhiúⁿ-siong thó, koh sı̄ iû-chāi thong-lō͘ kong-si khui-kè, m̄-sı̄ chiàu sı̍t-chè khai-siau lâi pun-pheⁿ; sán-phín nā bē kah ū siau-lō͘, keh-tńg-nı̂ chhiam sin-iok ê sı̂, ùi sı̀-siâⁿ piàn-chò beh tı̍h sı̀-siâⁿ-jı̄, sı̀-siâⁿ-saⁿ..., che mā-sı̄ bô thang kóng-kè--ê, in kóng, mı̍h-kiāⁿ ū-siau sı̄ in gâu bē, m̄-sı̄ sán-phín hó-siau. Seng-sán gia̍p-chiá ūi beh lı̄-iōng hong-piān ê liân-só thong-lō͘ phah chhı̄-tiûⁿ, kā thong-lō͘ kong-si jú chhı̄ jú pûi, kàu-taⁿ soah tian-tò hō͘ thong-lō͘ chı̍p-thoân chia̍h-sí-sí. Chit lō thong-lō͘ chiáng-ak seⁿ-sí ê chhu-sè, hō͘ seng-sán-chiá kù-chāi thong-lō͘ pak-siah, pek seng-sán-chiá ài it-tı̍t kā sêng-pún ah-kē, m̄-tāⁿ lô-tōng tiâu-kiāⁿ piàn-bái, goân-liāu ê sêng-pún mā tio̍h kàng-kē, sán-phín ê phín-chit tō oh iau-kiû--a. Kàu boé--á tiong-sió khı̀-gia̍p jú lâi jú oh seng-chûn, keng-chè-koân ta̍uh-ta̍uh-á chı̍p-tiong tùi toā-châi-thoân chhiú-thâu khı̀. Tû-khı̀ lô-tōng sêng-pún, thong-lō͘ lóng-toān cheng-ka ê keng-êng sêng-pún, mā sı̄ chō-chiâⁿ Tâi-oân tiong-sió khı̀-gia̍p koaiⁿ-mn̂g iah sı̄ chhut-cháu ê tiōng-iàu goân-in. Lán ê seng-oa̍h tùi chu-pún chú-gı̄ chhı̄-tiûⁿ ūn-chok ê oá khò jú lâi jú chhim, nā bô beh hoán-séng chu-pún chú-gı̄ ūn-chok ki-chè, kù-chāi i it-tı̍t ká--lo̍h-khı̀, lán chiong-kı̂-boé ē hō͘ i kā kah bē tín bē tāng. Lán m̄-tāⁿ tı̄ keng-chè siōng án-ne, chèng-tı̄, bûn-hoà, siā-hoē kok chân-bı̄n, mā ta̍uh-ta̍uh-á hō͘ thong-lō͘ khan leh kiâⁿ. Chèng-kheh kiông-tiau ài hù-ha̍p chú-liû kap bı̂n-ı̀, chú-liû sı̄ kàu-io̍k, mûi-thé kap soan-thoân thong-lō͘ teh khòng-chè--ê, bı̂n-ı̀ tō-sı̄ khòng-chè thong-lō͘--ê chè-chō--chhut-lâi-ê, kàu lō͘-boé, kûn-chiòng soah kan-taⁿ sı̄ toè chèng-kheh kap mûi-thé ê kháu-hō teh khí-tâng. Beh kái-kek, beh thiau-chiàn chú-liû ê ūn-tōng--leh? Ūi beh ū “siau-lō͘” tio̍h-ài tiōng-sı̄ “pau-chong” kap “hêng-siau”, liáu-āu ō tiâu tı̄ “thong-lō͘” ê bāng-á lāi cháu bē chhut--lâi, koh jú liâu jú chhoē bô-lō͘, chiân-tê, goân-chek, lı̍p-tiûⁿ kap he̍k-sim kè-ta̍t mā hō͘ “thong-lō͘” ê kui-hoān kap kui-chek lā kah bū-sà-sà, kàu siōng boé--á, beh ‘chhui-siau” hō͘ kûn-chiòng ê hoān-sè m̄-sı̄ pún-té ê mı̍h-kiāⁿ--a, kám m̄-sı̄--leh? (TGB Thong-sı̀n tē 63 kı̂, 2004 nı̂ 12 goe̍h)