Goá ê tiān-oē phō͘-á

Ū lâng kóng goá chin sioh-chêng, khoàⁿ-tio̍h goá ê tiān-oē phō͘-á lóng ū chı̍t-koá ı̀-kiàn kap būn-tê: “Lí kám ē kı̀-tit chiah-nı̄ chē lâng?” “Lí khām in kám lóng ū teh liân-lo̍k?” Chū sè-hàn, goá ū chı̍t-chióng koàn-sı̀, tō-sı̄ m̄-koán kap goá sı̄ siáⁿ-mih koan-hē ê lâng, goá lóng ē chı̄n-liōng kı̀ tı̄ phō͘-á, jı̂-chhiáⁿ kā tùi ta̍k-ê lâng ê kám-kak siá--khí-lih. M̄-koh lâng teh toā-hàn jı̂n-sò͘ cheng-ka, loē-iông mā ē tiāⁿ-tiāⁿ oāⁿ, ta̍k-kái têng-siá têng-chhau lóng chin hùi-khı̀, ū lâng oāⁿ tiān-oē hoan-hō, e-mail, chhiú-ki-á ê sı̂, goá tō ē khı̀ siūⁿ chit-ê lâng teh chò siáⁿ-mih, tō chhin-chhiūⁿ teh khoàⁿ ka-tı̄ ê sêng-tióng koè-têng. Í-chêng goá teh hun-lūi, sı̄ ùi kok-sió, kok-tiong, ko-tiong, im-ga̍k-pan, mô͘-pit-pan, Eng-gí-pan......kàu tāi-ha̍k liáu-āu, chham-ka siā-thoân, tha̍k-chheh-hoē kap iâⁿ-tūi, bat ê lâng ke chiok chē, nı̂-hoè mā chha chin chē, ū gín-á mā ū lāu-lâng. Ū lâng chhiò goá kóng: :Lí lâng-bı̄n chin khoah, í-āu chhut-lâi soán tāi-piáu--lah!” Che m̄-sı̄ goá ê bo̍k-te̍k, kan-taⁿ sı̄ beh iōng ka-tı̄ ê lêng-le̍k khı̀ chò tāi-chı̀ niā-tiāⁿ, chò siáⁿ-mih pēng bô tiōng-iàu. Pêng-iú tō-sı̄ ài hō͘-siong tàu-saⁿ-kāng, sui-jiân lı̄ chin hn̄g, m̄-koh m̄-koán siáⁿ-mih sı̂-kan iah-sı̄ siáⁿ-mih só͘-chāi, goá lóng chin jia̍t-sim, chin-sim teh kau pêng-iú. Se̍k-sái bô it-tēng kú-tn̂g, mā ū khó-lêng sı̄ “koè-kheh” niā-tiāⁿ, m̄-koh goá tú-tio̍h chin chē kùi-jı̂n. Ū sı̂-chūn, tùi-hong hoān-sè m̄ chai-iáⁿ goá bat--i, iah-sı̄ i í-keng bē kı̀-tit goá--a, m̄-koh goá jı̄n-lâng jı̄n-lō͘ ê lêng-le̍k koh bē bái. Goá ê kò-sèng khah ke-pô, kok-sió, kok-tiong, ko-tiong ê tông-chhong-hoē lóng sı̄ goá teh pān, liân poaⁿ-chhù ê tông-o̍h mā hō͘ goá chhoē--tio̍h, m̄-chiah in lóng kiò goá『阿亮慧』. Goá bat siūⁿ--koè, goá ê miâ sı̄-m̄-sı̄ tı̄ pa̍t-lâng ê sèⁿ-miā tiong Delete--khı̀-a? Chin kám-siā ta̍k-ê tı̄ goá sèⁿ-miā tiong chhut-hiān--koè ê lâng, ta̍k-ê sū-kiāⁿ kap kò͘-sū, lóng ē kam chit-pún tiān-oē phō͘-á kı̀-lo̍k--khí-lâi. (TGB Thong-sı̀n tē 29 kı̂, 2002 nı̂ 2 goe̍h)