Joa̍h--lâng jı̍t chhiâ-sai ê ē-po͘-sı̂
Ǹg-liâng ê têng-á-kha
Goá phak tı̄ A-má ná iô-kô ê kha-thúi phāng
A-má chho͘-chho͘ un-jiû ê chhiú-chéng-thâu-á
Tı̄ goá ê kha-chiah-phiaⁿ kho̍k-kho̍k-pê
Pê--á pê--á pê
1-chiah 1-chiah ê pùi-á-thâng
M̄-chai cháu tó chhàng
Pê--á pê--á pê
Ài-khùn-sı̂n lâi hioh tı̄ goá ê ba̍k-chiu chêng
Ke-á-lō͘ ê chhia-siaⁿ
Têng-á-kha ê kha-pō͘-siaⁿ
Jú lâi jú sè-siaⁿ
Jú lâi jú sè-siaⁿ
Koâⁿ--lâng ê chái-khí-sı̂
Tiàm-thâu êng-chheng-chheng
Lâng-kheh iáu-bē lâi kàu-ūi
A-kong chē tı̄ sū-bu̍t toh-á chêng
Goá peh chiūⁿ A-kong ná liu-lông ê sin-khu téng
Chit-pêng khàng
Hit-pêng nǹg
Cháu-chhoē A-kong piàn bô--khı̀ ê gō͘-kak-gı̂n
Gia̍p tı̄ chhiú-chéng-thâu-á
Chhàng tı̄ chhiú-ńg--nı̍h
Seh tı̄ hı̄ⁿ-á āu ê gō͘-kak-gı̂n
Kong-sun-á 2-lâng ê chhiò-siaⁿ
Thàng kàu chhia-lō͘ kı̂ⁿ
Chhiu-thiⁿ ê tiong-tàu sı̂
1-chūn tēng-tauh a-peng-ko ê phoê-ê siaⁿ
Khip-ín goá ê ba̍k-chiu sı̂n
Iáⁿ-tio̍h 1-ê siàu-liām ê hêng-iáⁿ
Goá hèng-hūn ê sim-chêng bô hoat-tō͘ am-khàm
Hòng-sàng kui chhù-keng
Toā-hàn a-chek tńg--lâi--lah
Toā-hàn a-chek tńg--lâi--lah
Kau-chhiâng toā-hàn ê Saⁿ-chek..a
Ná khan-chhiu ê siang-chhiú
Kā goá phō koân-koân
Goá chhin-chhiūⁿ 1-chiah hui-hêng-ki
Tı̄ thian-pông-ē
Poe koân poe kē
Poe koân poe kē
(Tâi-oân-jı̄ tē 13 kı̂, 2002 nı̂ 5 ge̍h)
