Kò͘-hiong ê A-pà

Lı̄-khui goá ê kò͘-hiong Gô͘-chhe í-keng ū kúi-á-nı̂--a, chū kok-tiong khai-sí, goá tiō chhut-lâi goā-kháu tha̍k-chheh--a! Tı̄ Tām-chúi tha̍k-chheh kàu taⁿ, put-sı̂ ē ū lâng hoâi-gı̂ goá kám sı̄ chiàⁿ-káng ê hái-kháu-lâng? Sı̄ án-choáⁿ tiāⁿ beh chai-iáⁿ goá ê khiuⁿ-kháu ū hái-kháu-khiuⁿ--bô? In mā ē mn̄g Tâi-pak ê Tām-chúi kap Tâi-tiong ê Gô͘-chhe, toh 1-ê só͘-chāi khah koâⁿ? Tı̄ goá loē-sim, Tām-chúi sı̄ seng-khu ê léng; Gô͘-chhe sı̄ loē-sim ê léng. Tām-chúi ta̍k-nı̂ lóng ū siōng kē-un ê sı̂, m̄-koh Tām-chúi koh án-choáⁿ léng, mā pí boē koè goá kò͘-hiong ê a-pà. A-pà ê khang-khoè sı̄ ta̍k-kang thàu-chá thiⁿ bē kng, tio̍h-ài chhut-mn̂g “pun pò-choá”, kui-nı̂-thàng- thiⁿ kan-taⁿ koè-nı̂ ē-sái hioh-khùn niâ. Goā-kháu thiⁿ iáu-bē kng ê sı̂, a-pà tio̍h-ài khí-chhn̂g choh-sit, bô-lūn goā-bı̄n o͘-sô-sô, thàu-hong lo̍h-hō͘, hân-sng léng-sún-sún ah sı̄ joa̍h--lâng jı̍t-thâu chhut--lâi liáu-āu, khiâ o͘to͘bai pha̍k kah o͘-mà-mà, a-pà tńg-lâi chhù--nih, saⁿ-á-khò͘ lóng tâm- kô͘-kô͘. Ē kı̀-tit soè-hàn ū 1-pái, a-pà in-ūi ba̍k-chiu siū-siong khui-to, i-seng kóng ba̍k-chiu ài ke hioh-khùn, boē-sái pha̍k jı̍t-thâu. Ah m̄-koh, a-pà kian-chhı̂ beh chhut-mn̂g choh-sit, i kóng: “Iáu ū chin choē lâng teh tán in ê pò-choá!” A-pà chhut-mn̂g thàn-chı̂ⁿ, sı̄ ūi-tio̍h beh hō͘ gún tha̍k-chheh. Chit-má, gín-á lóng toā-hàn--a, a-pà mā 60 kúi hoè--a, kiò a-pà mài koh choh-sit, tı̄ chhù--nih hioh-khùn, a-pà kóng siàu-liân-sı̂ choh-sit sı̄ 1-chióng chek-jı̄m, chit-má tùi i lâi kóng, sı̄ 1-chióng ūn-tōng. Sui-bóng a-pà chhùi--nih án-ne kóng, goá chai-iáⁿ sı̄ ūi-tio̍h beh kā gún an-ùi, in-ūi, ta̍k-piàn a-pà chhut-mn̂g ê sı̂, goá ê sim tiō pí koâⁿ--lâng khah léng, pí joa̍h--lâng khah joa̍h. (TGB Thong-sı̀n tē 39 kı̂, 2002 nı̂ 12 goe̍h)