1995-nı̂ ê chhun-kùi, goá toè Tiuⁿ I-su kap 1-tı̄n pêng-iú khı̀ Han-chı̂-hn̂g chham-ka Tâi-lâm Sı̂n-ha̍k-ı̄ⁿ kí-pān ê Tâi-gí Bûn-hoà Kàu-sek. Hit-ê sı̂-chūn goá tùi o̍h Tâi-gí oân-choân bô khài-liām, mā bô bêng-khak ê bo̍k-phiau. Kan-ta sı̄ tı̄ sin-thé siōng hi-jio̍k, sim-lêng siōng bô oá-khò ê sı̂, siūⁿ beh the̍h-lâi pâi-khián sı̂-kan chò gı̄-niū--ê. Siūⁿ-bē-kàu soà in-ūi án-ne lâi chiap-chhiok tio̍h pó-kùi koh cheng-bı̍t ê Lô-má-jı̄. Koh se̍k-sāi kā it-seng hōng-hiàn hō͘ Siōng-tè kap Tâi-oân ê Tı̄ⁿ Jı̂-gio̍k Bo̍k-su, hō͘ goá chhim-chhim thé-hoē tio̍h Tâi-gí kap Tâi-oân bûn-hoà thoân-sêng--lo̍h--khı̀ ê tiōng-iàu-sèng, bô hêng-tiong iā kái-piàn goá ê 1-koá siūⁿ-hoat.
Kóng--khí--lâi chin kiàn-siàu, goán chit-tē sǹg-sı̄ chin hēng-ūn, chin hó-miā ê 1-tē-lâng. Goá chhut-sı̀ ê sı̂, Tâi-oân ê keng-chè tú khai-sí teh khí-poe. Chia̍h-chhēng bô khoeh-khiàm--tio̍h, koh ū-thang khı̀ ha̍k-hāu tha̍k-chheh, bat koá jı̄. Ûi-hām ê sı̄ goán siū ê kàu-io̍k oân-choân thoat-lı̄ Tâi-oân siā-hoē. Ha̍k-hāu bô kà goán jı̄n-bat ka-kı̄ khiā-khí ê só͘-chāi, Tâi-oân chit-tè thó͘-tē kap Tâi-oân ê le̍k-sú, tē-lí kap bûn-hoà. Goán ê su-sióng siū-tio̍h sok-pa̍k, goán bē-hiáu to̍k-lı̍p su-khó. Chiông-lâi m̄-bat khı̀ su-khó ka-kı̄ tàu-té sı̄ sím-mı̍h lâng, beh chò sím-mı̍h khoán lâng, eng-kai ūi siā-hoē chò sím-mı̍h khah chiàⁿ-bı̄n ū ı̀-gı̄ ê tāi-chı̀.
Kàu chham-ka Tâi-gí Bûn-hoà Kàu-sek, khai-sí o̍h Tâi-gí liáu-āu, chiah chai-iáⁿ goân-lâi goá it-tı̍t hō͘ lâng khoàⁿ-khin ê bó-gí kèng-jiân ū jı̄, jı̂-chhiáⁿ iā-ū bûn-hoat, ū kui-lu̍t kap kı̂-tha ê gí-giân kāng-khoán. Koh hoat-hiān tı̄ goá iáu teh khùn, iáu bē kak-chhéⁿ ê sı̂, chē-chē nı̂ lâi, í-keng ū chē-chē lâng kian-sim it-chı̀ teh chò pó-liû, thui-kóng, kap hoat-tián Tâi-oân gí-giân kap bûn-hoà ê sū-kang. Tı̄ⁿ Bo̍k-su chiū-sı̄ kı̂-tiong ê 1-ê léng-tō-chiá. I niá-chhoā tāi-ke chı̀n-hêng chit-ê úi-tāi koh ū ı̀-gı̄ ê sū-kang. Tı̄ i beh oá 80 hoè ê hoè-thâu iáu bô siūⁿ beh thè-hiu tiàm chhù--nı̍h khiau-kha lián-chhùi-chhiu, hiáng-siū jı̂n-seng ê tē-2 ê chhun-thiⁿ. Ta̍k-kang ūi-tio̍h Tâi-oân-jı̄ pē-bú-oē sı̀-kè teh cháu-chông, koáⁿ hoé-chhia lâi-lâi khı̀-khı̀ teh siōng-khò. Bô-lūn thiⁿ-khı̀ koâⁿ joa̍h hó bái, hoaⁿ-hí kam-goān hù-chhut i choân-pō͘ ê sim-hiat. Chit-khoán cheng-sı̂n sı̍t-chāi hō͘ lâng ū-kàu khim-phoè.
Tı̄ⁿ Bo̍k-su éng-oán sı̄ lán ha̍k-sı̍p ê bô͘-hoān. Lán tāi-ke ū-iân tàu-tı̄n o̍h Tâi-gí, chò Tı̄ⁿ Bo̍k-su ê ha̍k-seng, sı̄ lán ê hok-khı̀. Kin-á-jı̍t, tāi-ke chin bô kán-tan chiah thang chò-hoé tı̄ chia khèng-chiok Tı̄ⁿ Bo̍k-su 80 hoè ê seⁿ-jı̍t, goá beh chiok-hok Bo̍k-su seⁿ-jı̍t khoài-lo̍k, sin-thé kiān-khong, bô hoân-ló. Koh beh chiok-hok lán Tâi-oân kiâⁿ-jı̍p 21 sè-kí ê sin sı̂-tāi. Kiàn-lı̍p chin-chiàⁿ chū-iû bı̂n-chú, ū jı̂n-koân, ū kong-gı̄, ū bûn-bêng ê pang-kok.
(Tâi-oân-jı̄ Cha̍p-chı̀ tē 13 kı̂, 2002 nı̂ 5 ge̍h)
