Tháu-pàng

Chêng 1-chām-á chêng-sû bô joā ún-tēng, mā éng-hióng tio̍h ka-tı̄ ê seng-oa̍h. chèng-keng kóng--khí-lâi, ùi 8--goe̍h khai-sí chia̍h thâu-lō͘, ka-tı̄ pún-té ê ha̍k-seng sim-thài tō it-tı̍t bô thiâu-chéng--koè-lâi, ta̍k-kang thàu-chá lóng chiok oàn-chheh--ê. Sı̄ án-choáⁿ tio̍h-ài khı̀ siōng-pan? Sı̄ án-choáⁿ tio̍h-ài hông chhau gah beh sí? Sı̄ án-choáⁿ hā-pan tńg--lâi lóng bô cheng-sı̂n? Sı̄ án-choáⁿ ài chò ê tāi-chı̀ 1-hāng to bô chò--tio̍h? Sı̄ án-choáⁿ siūⁿ beh kái-piàn soah lóng goân-chāi án-ne? Kui goe̍h-jı̍t lo̍h--lâi, lóng kiu tı̄ ka-tı̄ o͘-àm ê siū lāi-té, it-tı̍t kàu ke teh thı̂ chiáu teh kiò, tē 1 lo̍h kng-soàⁿ chhiō--lo̍h-lâi ê sı̂, chiah chai-iáⁿ, m̄-tāⁿ ài tháu-pàng ka-tı̄ ê koè-khı̀, koh ài tháu-pàng ka-tı̄ ê sim. Chit-chām-á sim chēng--lo̍h-lâi, ta̍uh-ta̍uh-á kiâⁿ jı̍p-khı̀ ka-tı̄ ê sim, kā ka-tı̄ ê choân-pō͘ lóng ó͘--chhut-lâi, pho͘ tı̄ jı̍t-thâu ē-kha pha̍k. Tı̄ chia, ū 1-koá sı̄ ka-tı̄ m̄-goān khı̀ bı̄n-tùi--ê, in-ūi ē kiaⁿ-hiâⁿ ē kiàn-siàu. M̄-koh chim-chiok hoán-séng kiám-thó liáu-āu ē hoat-hiān, kiaⁿ-lâng--ê kā se̍h--koè liáu-āu, tō-sı̄ 1-ê sin ê khai-sí. Chin-chiàⁿ bı̄n-tùi ka-tı̄ ê o͘-àm, chiah ū châi-tiāu kiâⁿ ǹg kong-bêng. Chit kúi kang, thàu-chá khí--lâi ê sı̂, sim-chêng hoat-seng hoà-ha̍k piàn-hoà, piàn gah kap éng-koè bô kāng-khoán. Chit-chūn goá chiah hoat-hiān, chò-lâng siōng oh mā siōng kán-tan--ê, tō-sı̄ thiāu-chiàn ka-tı̄, hō͘ lêng-hûn chhin-chhiūⁿ hái-éng, hō͘ bah-thé chhin-chhiūⁿ koân-soaⁿ, hō͘ sı̂n-keng chhin-chhiūⁿ kùi-hong, hiah-nı̄ bín-kám ióng-chāi ǹg chêng chhiong--khı̀. Goá chiok ài chit-má ê ka-tı̄, sui-bóng koh ū koá khih-kak, tán goá kā pó͘ hō͘ oân-boán. (TGB Thong-sı̀n tē 30 kı̂, 2002 nı̂ 3 goe̍h)