Iōng-chiá:Iyumu/sandbox01

Lūn Táⁿ-pān Sí-lâng ê Sin-khu, kap Khit-chúi Bo̍k-io̍k

(Tâi-ôan Kàu-hōe Kong-pò, tē 57 kî, 1890 nî)

Ta-po͘-lâng sí tio̍h thì-thâu, hū-jîn-lâng sí tio̍h se-chng. Lâm-jîn tio̍h kiáⁿ-sun kā i se, lí-jîn tio̍h cha-bó͘-kiáⁿ sim-pū kā i se. Se thâu ê khoán thâu-chêng se saⁿ ē, āu-piah se sì ē. Siàu-liân chhâ-se tio̍h at-chi̍h, chi̍t koe̍h hiat-ka̍k, chi̍t koe̍h hē tī sí-lâng ê hâ-pau lāi. Hàu-lâm chhēng môa-saⁿ phâng chi̍t ê khaⁿ, ēng nn̄g ê chîⁿ pa̍k âng-sòaⁿ kàu khe-piⁿ á-sī chéⁿ-piⁿ, chiong chîⁿ hiat lo̍h chúi, khaⁿ iúⁿ kóa chúi khí-lâi, hō-chò khit-chúi. Phâng chúi iân-lō͘ khàu kàu chhù, ēng khaⁿ-ni̍h ê chúi lâi kā sí-lâng sé, hō-chò bo̍k-io̍k. Tāi-seng sé thâu-khak ēng chi̍t tiâu kin chhit, āu-lâi sé sin-khu lēng-gōa chi̍t tiâu kin.

Chián kha-kah chhiú-kah, té tī sè ê tê-á, thèng-hāu liām-chó͘ liáu hē tī pán lāi. Sé liáu hiah ê chúi tò tī chheng-khì ê só͘-chāi, hit ê khaⁿ lâu-teh té gîn-chóa hu, hō-chò chîⁿ-lô͘.

Táⁿ-pān sí-lâng ê sin-khu hō͘ i chheng-khì siùⁿ hó-khòaⁿ, sī eng-kai tio̍h án-ni. Chóng-sī tio̍h sím-mi̍h lâng kā i se, iū tiāⁿ-tio̍h se kúi ē, tio̍h tùi tó-ūi se khí, tio̍h chóaⁿ-iūⁿ se, chóaⁿ-iūⁿ chhit, tio̍h kúi tiâu kin, tio̍h lēng-gōa khit chúi, he lóng sī īⁿ-toan, sìn Chú lâng m̄ thang o̍h in. Sèng-keng kóng Siōng-tè chhòng-chō thiⁿ tē bān mi̍h lóng-sī Siōng-tè chiáng-koán. Thái-thó lēng-gōa ū chúi-sîn? Ēng ke lāi teh ēng ê chúi sé chiū ē-ēng-tit, mih-sái tio̍h lēng-gōa khit?