Pêng-bîn ê Ki-tok-toān/Tē IV Koàn/Tē-13 chiuⁿ

Tē-13 chiuⁿ: CHA̍P-JĪ SÙ-TÔ͘

It-poaⁿ ê lâng lóng sī hòan-hòan bô sûi-ê sûi-ê lâi siūⁿ cha̍p-jī sù-tô͘. Lán khah-siông sī kan-ta liām in ê miâ, iā khah bô káng-kiù in ê chòe lâng ê khoán. Lán khah-siông khòaⁿ-liáu in sī chhin-chhiūⁿ chi̍t kûn ê sèng-tô͘ ê siōng, in ê súi sī lóng put-chí siāng khoán, kiám-chhái sī khòaⁿ-kìⁿ in ê thâu-khak pîⁿ-pîⁿ ū hô-kong tī-teh, chhin-chhiūⁿ tī pài-tn̂g thang-á sī ōe ê tô͘ chi̍t-poaⁿ-iūⁿ. Chóng-sī chū-jiân, chāi hiah ê ū bêng-pe̍k in ê teh khòaⁿ, in sī kap lán put-chí siāng-khoán, bô kóng lóng sī siāng chi̍t-iūⁿ. In sī chi̍t thôan o̍ah-o̍ah, ū jia̍t-chêng ê lâng, choân-jiân ū koh-iūⁿ tī in ê iông-māu, phín-sèng, sèng-chit, thian-sèng, in sī sûi-ê bô saⁿ-tâng, sī ū chhù-bī thang hō͘ lán káng-kiù ê chi̍t thôan. Siat-sú lán nā ū khn̂g chit khoán ê liām-thâu lâi siūⁿ in, iā lán nā tha̍k-tio̍h in ê sū, hit-sî lán thang chiàu só͘ bat in ê khoán lâi hun-piat in, ia̍h thang chai Iâ-so͘ Tī hit-sî cháiⁿ-iūⁿ khiàm-ēng ta̍k téng-hō ê lâng, ia̍h tī chit-tia̍p iû-goân khiàm-ēng ta̍k téng-hō ê lâng, liân chhin-chhiūⁿ lán pún-sin chit téng-hō ê, to ū khiàm-ēng lán lâi ho̍k-sāi tī i ê Sèng-kok.

Góa chit-tia̍p sī tī Bí-kok, óa Thài(**Tāi)-se-iûⁿ ê chi̍t ê thó-hî ê hiong-chhoan lâi teh siá chit pún chheh. Tī góa ê bīn-chêng, ū chi̍t ê hái-oan chhin-chhiūⁿ ô͘ ê khoán, tāi-iok tn̂g ū cha̍p-jī eng-lí, khoah ū la̍k-eng-lí, iok ū Ka-lī-lī ô͘ ê tōa, siang-pêng ū tn̂g-tn̂g ê hái-hōaⁿ ûi-teh. Góa ta̍k ji̍t lóng ū chiap-chhiok-tio̍h chōechōe thó-hái ê kap chûn-chú, í-ki̍p chhin-chhiūⁿ Pí-tek, Ngá-kok, An-tek-lia̍t hit kai-kip ê lâng. In lóng sī put-chí ióng-kám, (**thiām/tiām)-chēng, koh khûn-bián. In tiong-kan chōe-chōe sui-jiân tiām-tiām, hán-tit kóng-khí in ê sìn-sim, iáu-kú sī ū chhim-chhim ê chong-kàu sìn-liām ê lâng. Lán nā kap in se̍k-sāi liáu, in lóng sī ke̍k chhù-bī, lán ōe kì-tit in tiong-kan, ū ê Sī bín-chia̍t, chhong-bêng ê lâng, iā ū-ê sī ū giâm-siok, e̍h-to̍eh ê siān-ok-kám, iā ū-ê sī ū phāu pòaⁿ-pi pòaⁿ-hí ê jîn-seng koan. Lán mā ū khòaⁿ-kìⁿ in chhin-chhiūⁿ goân-sí sî-tāi ê lâng, siông-siông hián-chhut kî-īⁿ ê sim-chêng, iā lán Sī bô àn-sǹg in iû-goân ōe siⁿ-khí bí ê kám-liām, lâi khiā-teh khòaⁿ kàu tiām-chiuh-chiuh.

Tak-pái ji̍t to iáu-bē chhut, iáu put-chí àm ê sî, in hiah ê chho͘-lī ê chûn, chiū lóng chhut-khì gōa-hái thó-hî. Ū-sî in ū lia̍h-tio̍h chin chōe hî tńg-lâi, iā ū-sî in “thong-mî tio̍h-bôa thó lóng bô.” Chit hō thâu-lō͘ sī chi̍t chéng bô pîⁿ-tháⁿ gûi-hiám ê seng-oa̍h. Chāi tiàm tī lio̍k-tōe ê lâng teh khòaⁿ, in ê seng-oa̍h Sī bô chhù-bī, bô piàn-ōaⁿ, ia̍h in Sī bô chhù-bī bô piàn-ōaⁿ ê lâng, chóng-sī lán nā kap in se̍k-sāi, thiaⁿ-kìⁿ in teh kóng-khí tī hái-bīn ê kî-īⁿ ê lê-bêng, á-sī léng-chēng ê chá-khí sî ê súi ê chhiⁿ-siù, á-sī koh thiaⁿ-kìⁿ, ū-ê teh kóng-khí in tú-tio̍h chhiⁿ-kông-hong, sim-lāi iô-choah ê keng-giām tâm, á-sī kap soa-hî, í-ki̍p pa̍t-khoán tōa hî teh saⁿ tò͘-cheng ê kî-kòai tâm, hit-sî lán chiū chai thó-hî lâng ê seng-oa̍h, chiū m̄-sī chiàu lán sī siūⁿ ê khoán-sit lah.

Chit ê chêng-hêng ū pang-chān lán, khòaⁿ hit ê “Hái-kiⁿ” ê Ka-pek-lông ê seng-oa̍h khah bêng. Iâ-so͘ sī siat-li̍p lâi chòe I ê sù-tô͘ ê, chiū-sī chit khoán ê lâng. Iâ-so͘ só͘ bat ê, chiū-sī thó-hái lâng; in Sī bōe hiáu piáu-chhut in ê sim-chêng, iáu-kú in ū him-bō͘ Siōng-tè, in ū thiàⁿ-thàng I, iā in ū kóng chōe-chōe kò͘-sū, í-ki̍p chhiò-khoe ōe, tī hit ê tōa chai-lān ê ji̍t bē kàu ê í-chêng, chiū-sī tiàm Ka-lī-lī sī ū keng-giām, hit ê khòai-lo̍k ê ji̍t ê tiong-kan, hō͘ I thiaⁿ-liáu put-chí ài chhiò.

In tāi-ke put-chí ōe giú I ê sim. I put-chí chhim-chai in ê khoán, chiū-sī chai-iáⁿ Iok-hān sī chi̍t ê siàu-liân bōng-sióng-ka; To-má sī ū chong-giâm ê bīn-māu; Ka-ná-nî ê Se-bûn sī sim-sîn khòai iô-tāng ê kok-sùi chú-gī-chiá, ài bô͘-hoán. Pí-tek sī chi̍t ê chhiong-tōng-tek, kín-sèng ê lâng, in sûi-lâng sûi-lâng lóng ū chōe-chōe khoat-tiám tī-teh, iáu-kú Iâ-so͘ sī chin thiàⁿ in, iā chai-iáⁿ iáu hit nn̄g ê put-sî kiat chòe-hé ê Hui-le̍k kap Ná-tàn-gia̍p, í-ki̍p kî-thaⁿ ê ha̍k-seng, koh chòe-āu mā-sī chai-iáⁿ hit ê ko͘-to̍k ê Ka-lio̍k lâng Iû-tāi, i kap hiah ê pak-pêng ê ha̍k-seng, tāi-ke chòe-hé liáu sī chin ū chū-jiân. In lóng sī ke̍k chiàu lâng ê khoán, ū chōe-chōe khoat-tiám tī-teh. Chóng-sī Iâ-so͘ nā bô in tiàm tī sin-piⁿ, chiū ōe siⁿ-chhut chi̍t chéng bû-liâu ê kám-liām. I ê sèng-chêng sī ài kap lâng saⁿ kau-pôe, ia̍h in mā-sī iû-goân bô sioh in ê sim-sîn, chin ài kap I saⁿ-kap kau-pôe.

Thâu chi̍t tūi ê ha̍k-seng, chū-jiân sī hiah ê siāng ū châi-tiāu ê, jia̍t-sim-ka, chí-tō-chiá, iā sī siāng ū kám-hòa-la̍t ê, í-ki̍p siāng jia̍t-sim lâi khiân-sêng hiàn hō͘ Iâ-so͘, í-ki̍p I ê úi-tāi ê kè-e̍k ê lâng. Chiū-sī kiò-chòe Pí-tek kap An-tek-lia̍t, í-ki̍p Ngá-kok kap Iok-hān chit nn̄g tùi ê hiaⁿ-tī. Chit sì ê lâng lóng sī chin chhin-bi̍t ê pêng-iú. Tī ha̍k-seng ê thôan-thé tiong, in sī tē-it tāi-seng bat Iâ-so͘. Lán ōe kì-tit tī chi̍t nî gōa chêng, in ū thâu chi̍t pái kap I siong-hōe. Chiông-tiong chi̍t ūi, chiū-sī Iok-hān, tī i nî lāu ê sî, ū siá i ê Hok-im-su, lâi hôe-sióng hit sî it-chhè ê chêng-hêng, kàu chin siông-sè, liân tú-tú sī sím-mi̍h sî-kan kap I siong-hōe mā iáu ōe kì-tit. Chiū-sī tī ū chi̍t Ē po͘ iok sì-tiám. Kiâⁿ Sóe-lé Iok-hān ê ha̍k-seng tiong, ū nn̄g ūi chiū-sī An-tek-lia̍t kap Iok-hān, tú-tú kap in ê sian-siⁿ saⁿ-kap khiā tī iok-tàn hô, hit sî Iâ-so͘ ū tùi hia keng-kè. Kiâⁿ Sóe-lé Iok-hān chiū kan-chèng kóng, “Lí khòaⁿ Siōng-tè ê Iûⁿ-ko.” Tùi án-ni, chit nn̄g lâng ū chìn-chêng khì tè Iâ-so͘, iā sim-lāi ùi-ùi, chi̍t-sim hoaⁿ-hí ài kap I kóng ōe, iā chi̍t-sim kiaⁿ-hiâⁿ m̄-káⁿ. Ia̍h I kó-jiân ū o̍at lâi kap in kóng-ōe. I chiū chhōa in khì kàu tī i só͘ tiàm, hit ê sòe-sòe keng ê chhù, tī hit ê kî-biāu ê àm-thâu-á in ū kap I saⁿ-kap kau-pôe, sòa hióng-siū I sī pī-pān hit ê kán-tan ê àm-pn̄g, iā sòa thiaⁿ I ê su-sióng. Hit àm in kap I saⁿ-sî chhut-lâi, chi̍t-ē khòaⁿ gōa-bīn sī ū chhiⁿ-siù kng móa-thiⁿ, iā in ê sim-koaⁿ iû-goân ū hián-chhut tōa koh sin ê ài-chêng, hi-bōng kap jia̍t-sêng tī-teh, koh in ê jîn-seng-koan sī put-chí piàn-ōaⁿ. Tùi án-ni, in ê sim ū éng-oán kap I saⁿ kiat-liân.

Chit nn̄g lâng ê tiong-kan, chi̍t ê sī Se-bûn Pí-tek ê hiaⁿ-tī, kiò-chòe An-tek-lia̍t. Āu-lâi An-tek-lia̍t ū tú-tio̍h i ê hiaⁿ-tī Se-bûn, chiū chhōa i lâi chiū-kūn Iâ-so͘. Lán thang sióng-siōng, siāng hit sî Iok-hān mā ū sòa khì chhōa i ê hiaⁿ-tī Ngá-kok, lâi chiū-kūn Iâ-so͘ chiah tio̍h.

Chit sì-ê lâng khah siông sī kiat chòe-hé, lán thang liāu-sióng tú-tú Iâ-so͘ tùi tī soaⁿ-ni̍h lo̍h-lâi kàu pòaⁿ-lō͘ ê sî, in chit sì-ê lâng ū saⁿ-kap kiâⁿ óa-khì tè Iâ-so͘. Khah tōa-bīn Pí-tek sī tiong-liân ê lâng, m̄-sī siàu-liân mā m̄-sī lāu-lâng, (“Lí siàu-liân ê sî, ēng tòa ka-kī pa̍k, to̍k-to̍k kàu lāu, pa̍t-lâng chiū pa̍k lí,”) iā-sī chi̍t ê chho͘-tōa ê thó-hî lâng, bīn-māu lóng siū-hong siū-song, iā i ê chòe lâng sī gâu kóng chhiò-khoe, sī chin chhin-chhiat, sī gâu thiàⁿ lâng, hō͘ pêng-iú sī hoaⁿ-hí, iā-sī ū chōe-chōe jio̍k-tiám hō͘ Iâ-so͘ sī kiáu-chèng, i ê sèng-chêng khah-kín, tì-kàu ū chōe-chōe m̄-tio̍h, chhin-chhiūⁿ ta̍k ê ū kè-ta̍t ê lâng sī éng ū ê.

Pí-tek ê sim sī put-chí kèng-ài Iâ-so͘, i ū hián-chhut lāu-tōa lâng ê sim-chêng, ài koàn-kò͘ i sī chun-kèng chit ê siàu-liân ê Chí-tō-chiá Iâ-so͘, in-ūi I lóng bô koan-sim pún-sin ê sū. I ū pí pa̍t-lâng khah chū-iû lâi kàn-chèng Iâ-so͘ ê sī-chòe. Ia̍h bat chi̍t-pái i ū chū-sìn siuⁿ kè-thâu--khì. Chóng-sī Iâ-so͘ kàu-gia̍h chai-iáⁿ; só͘-í ún-tàng bô gō͘-kái i.

Tiàm tī Pí-tek ê sin-piⁿ ê, m̄-sī i ê hiaⁿ-tī An-tek-lia̍t, hoán-tńg sī Iok-hān, in nn̄g lâng sī put-sî kiat chòe hó pêng-iú. Tī chit ê Ki-tok-toān tiong, “Pí-tek kap Iok-hān” put-sî sī kiat-liân chòe-hé. Iok-hān m̄-sī chòe thâu, chóng-sī i ê sèng-chêng sī pí Pí-tek chám-jiân khah chhim-tîm. Iok-hān sī chi̍t ê su-sióng-ka. Lán thang sióng-siōng, i sī chi̍t ê bīn-māu súi koh un-jiû, ū ha̍k-būn ê chheng-liân, iā i ê ba̍k-chiu ū hián-chhut bōng-sióng-ka ê gán-kong tī-teh; sui-jiân i sī kiâⁿ Tī chit ê chhiⁿ-chhùi ê sè-kài, iáu-kú ū khòaⁿ-kìⁿ “tī thiⁿ-ni̍h ū mn̂g khui-khui,” i sī chèng ha̍k-seng tiong tē-it khòai liáu-kái i ê Sian-siⁿ ê ko-siōng ê su-sióng. I kap i ê hiaⁿ-tī Ngá-kok, sim-chêng lóng sī khah kín, ūi-tio̍h án-ni, Iâ-so͘ siông-siông kap in kóng-chhiò, lâi chheng in sī “Lûi ê Kiáⁿ.” Chóng-sī í-gōa bô pa̍t-lâng chhin-chhiūⁿ Iok-hān ū thang tit-tio̍h ún-chún lâi hiah-ni̍h kap Iâ-so͘ chhin-bi̍t saⁿ-kap kau-pôe. “Iok-hān sī Iâ-so͘ sī thiàⁿ ê ha̍k-seng.”

An-tek-lia̍t sī kap Ngá-kok kiâⁿ chòe-hé. Lūn An-tek-lia̍t ê sū lán sī chai-iáⁿ tē-it iàu-kín ê, chiū-sī i ū chhōa i ê hiaⁿ-Tī lâi chiū-kūn Iâ-so͘. Kàu-hōe ū liû-thôan kóng, An-tek-lia̍t ū siū tèng tī Si̍p-jī-kè, ia̍h i ū tùi Si̍p-jī-kè ê téng-bīn sòa-chiap lâi kóng-khí i ê Chú ê sū. Chit ê kò͘-sū sī chòe Sèng An-tek-lia̍t ê Si̍p-jī-kè ê hoat-goân. Lūn Ngá-kok ê sū-chek, lán sī chai ê, Sī bô (**jōa)-chōe. I sī siàu-liân chiū sí. Put-kò lán chai--iáⁿ, Iâ-so͘ ū siông-siông chheng i sī “Lûi ê kiáⁿ,” ia̍h chai i sī chi̍t ê tiōng-iàu ê jîn-bu̍t, ōe kham-tit thang hō͘ Hi-lu̍t ông lâi thâi i ê thâu-khak. Hi-lu̍t ông bat hē chhiú lâi tùi tī chit ê thâu-chi̍t tūi lia̍h nn̄g ê lâng, chiū-sī Ngá-kok kap Pí-tek, iā Siōng-tè chi̍t-bīn ū chún Ngá-kok lâi siū hāi-sí, koh chi̍t-bīn ū chín-kiù Pí-tek. siat-sú Ngá-kok nā bô siū hāi-sí, kiám-chhái tī chèng ha̍k-seng tiong ōe chiâⁿ-chòe chi̍t ê úi-tāi ê jîn-bu̍t. Chóng-sī Siōng-tè Tī hit pêng ê sè-kài ū khiàm-ēng i. Tī chit sî i í-ki̍p Pí-tek lóng chai-iáⁿ, hit-sî Siōng-tè cháiⁿ-iūⁿ hō͘ i tú-tio̍h siū hāi-sí. Tī sì-cha̍p nî āu, in tī hit ê khah khoah-tōa ê sè-kài saⁿ-kap koh siong-hōe ê sî, in ún-tàng ōe siông-siông saⁿ-kap lâi tâm-lūn hit-sî ê chêng-kéng.

Thâu-chi̍t tūi, chiū-sī chhin-chhiūⁿ chit khoán ê lâng, chiū-sī úi-tāi, jia̍t-chêng, jia̍t-sim ê lâng, chhin-chhiūⁿ Ngá-kok sī chi̍t ê bô kiaⁿ-ùi lâng ê lâng, ū ūi-tio̍h Ki-tok lâi sí, iā An-tek-lia̍t sī chi̍t ê si̍t-chè-tek ê lâng, ū ūi-tio̍h Ki-tok lâi tio̍h-bôa, iū-koh Iok-hān sī chi̍t ê chhim-tîm hán-tit kóng-ōe ê lâng; iā Pí-tek sī chi̍t ê bô chhim-siūⁿ, chia̍p-chia̍p kóng-ōe ê lâng, koh sī sèng-chêng kek-lia̍t kāu chhò-gō͘ ê lâng, iáu-kú Tī chèng ha̍k-seng ê tiong-kan i sī tē-it ū lâng ê sèng-chêng tī-teh. Lán chai chit ê Pí-tek sī chin gâu po̍ah-tó, ia̍h bat saⁿ tiám-cheng kú chòe bô tám-liōng ê lâng, iáu-kú Iâ-so͘ ū kéng-tiàu i. Chit ê sū-si̍t sī ōe kek-lĒ lán ê sim, hō͘ lán siⁿ-khí tōa ê ǹg-bāng, in-ūi lán ū lâng mā iû-goân chin khòai kiâⁿ chhò, chin bô tám-liōng, iáu-kú lán iû-goân thang khak-chhiat kap chit ê loán-jio̍k ê Pí-tek saⁿ-kap kóng, “Chú ah, Lí bô sī m̄-chai; lí chai góa thiàⁿ lí.”

Taⁿ, chhiáⁿ lâi siūⁿ, tāi-ke saⁿ-kap teh kiâⁿ hit ê tē-jī tūi ê ha̍k-seng, chiū-sī Hui-le̍k, Ná-tàn-gia̍p, Pa-to-lô-mái, Má-thài, kap To-má. In chiah ê ha̍k-seng sī put-chí khah koh-iūⁿ. In khiok iû-goân sī ū thiàⁿ Iâ-so͘. Chóng-sī in sī khah sió-khóa ê lâng, chū-jiân in sī ū lō͘-ēng, si̍t-chè-tek ê lâng, put-kò khah bô châi-tiāu thang chòe chí-tō-chiá. In sī chhim-tîm, khiok khah m̄-sī kah (**jōa) kāu giâu-gî ê lâng. In-ūi in tiong-kan, ū-ê lâng sī tio̍h keng-kè chin-kú chiah beh sìn Iâ-so͘ sī Siōng-tè. In Sī bô pa̍t-mi̍h hoat-tō͘ thang pang-chān in ê sìn-sim, che sī tùi Pē-bú siⁿ-chiâⁿ ê.

Chhiáⁿ lâi khòaⁿ Hui-le̍k. Ū chi̍t ji̍t Iâ-so͘ ū mn̄g i kóng, “Lán beh tùi tá-lo̍h bóe piáⁿ lâi hō͘ chiah ê lâng Tī chit ê khòng-iá lâi chia̍h ah?” Iâ-so͘ tùi i kóng chi̍t kù ōe sī teh-beh chhì i ê sìn-sim, chóng-sī Hui-le̍k bōe hiáu-tit sī tio̍h ìn I ê ōe, bōe hiáu-tit thang ìn I kóng, “Chú ah, Lí to chai-iáⁿ, Lí Sī bô sī m̄-ōe.” Sòa kan-ta tiàm tī sim-lāi lâi àn-sǹg piáⁿ-tiàm ê kè-sò͘ kóng,” “Chú ah, goán bô hoat-tit. Tio̍h khiàm-ēng nn̄g pah ê gûn-á ê piáⁿ,” Koh ū chi̍t ji̍t, Hui-le̍k ū chhui-pek Iâ-so͘ tio̍h chèng-bêng PĒ hō͘ in khòaⁿ, kóng, “Chú ah, ēng PĒ hō͘ goán khòaⁿ, chiū kàu-gia̍h.” Iā Iâ-so͘ chiū ēng un-jiû ê ōe lâi chek-pī, ìn i kóng, “Hui-le̍k, góa kap lín tiàm kàu chiah kú, lín iáu m̄-bat góa mah? í-keng khòaⁿ-kìⁿ góa ê, chiū-sī khòaⁿ-kìⁿ PĒ.” Hui-le̍k chiū-sī chhin-chhiūⁿ chit khoán ê lâng, chiū-sī him-bō͘ chèng-bêng ê lâng, him-bō͘ ài beh khòaⁿ-kìⁿ PĒ ê lâng. Che khiok nā-sī bô kè-thâu, Sī bô sím-mi̍h pháiⁿ.

Hui-le̍k ê tâng-phōaⁿ, chiū-sī kiò-chòe Ná-tàn-gia̍p, in nn̄g lâng ê khoán sī sio-siāng, iáu-kú iā ū bô saⁿ-tâng ê só͘-chāi tī-teh. Ná-tàn-gia̍p iû-goân sī chi̍t ê lī-tūn sió-sim ê lâng, koh iā-sī ū tām-po̍h ài giâu-gî ê sim tī-teh. Chhin-chhiūⁿ ū chi̍t ji̍t, Hui-le̍k ū jia̍t-jia̍t tùi i kóng-khí Bí-sài-a Iâ-so͘ ê sū, hit-sî i ū giâu-gî, m̄-sìn Iâ-so͘ Sī bí-sài-a, kóng, “Ná-sat-le̍k kiám ōe chhut sím-mi̍h hó-mi̍h mah?” Chóng-sī i chi̍t-ē khòaⁿ-tio̍h Iâ-so͘ ê sî, i sī ū ê gî-sim, chiū chek-sî siau-bô--khì, i sī chi̍t ê (**thiām/tiām)-chēng, ài be̍k-sióng ê lâng, ū siông-siông tiàm tī i ê hoe-hn̂g lāi ê Bû-hoa-kó chhiū-kha lâi tha̍k Sèng-chheh, lâi kî-tó Siōng-tè, sòa lâi sàm-su I ê chí-ì. Chhin-chhiūⁿ chit hō lâng, sī put-chí khòai chìn-pō͘ tī i ê cheng-sîn chiūⁿ ê tōng-chhat-la̍t. I kap Iâ-so͘ saⁿ-kap chòe-hé bô kúi-hun cheng kú, iáu-kú sûi-sî ōe-hiáu âu-kiò kóng, “Lia̍p-pí, Lí chiū-sī Siōng-tè ê Kiáⁿ; Lí chiū-sī Í-sek-lia̍t ê Ông.” Ná-tàn-gia̍p chiū-sī Hui-le̍k sī tio̍h kau-pôe ê chi̍t ê put-chí thang thiàⁿ ê pêng-iú, sī sêng-si̍t, sim-koaⁿ chheng-khì ê lâng, sī put-chí gâu tông-chêng lâng, iā kóng-ōe sī tiong-si̍t. Só͘-í Iâ-so͘ chiah o-ló i kóng, “Lí khòaⁿ, chin-chiàⁿ sī Í-sek-lia̍t lâng, sim bô khúi-khiat ê.”

Lūn To-má, lán khah siông siūⁿ kóng i sī chi̍t ê “Hôai-gî-chiá.” Hōan-sū i khah siông to lóng sī khòaⁿ hit ê o͘-àm ê hong-bīn. “Chú ah, Lí khì ê só͘-chāi, goán to m̄-chai; thài ōe chai hit tiâu lō͘-ah?” Iâ-so͘ ū bat chi̍t pái mō͘-hiám beh lo̍h-khì Ιû-thài khòaⁿ hit ê sí-khì ê Lia̍p-sat-lō͘, hit-sî To-má chiū siūⁿ kóng, Iâ-so͘ tiāⁿ-tio̍h Sī bōe thang cháu-siám lâng ê hām-hāi. Iā i ū kū-cho̍at i ê tâng-phōaⁿ kan-chèng ê ōe, bô beh sìn Iâ-so͘ ū koh-o̍ah. To-má sī hoaⁿ-hí pàng-sak sè-kan it-chhè lâi sìn Iâ-so͘ ê koh-o̍ah, chóng-sī m̄-káⁿ phah-sǹg hit ê sī sū-si̍t. To-má siⁿ-sêng sī chit khoán ê lâng. Í-gōa mā ū lâng chhin-chhiūⁿ án-ni. In-ūi ū ê lâng iā sī pí-pa̍t lâng khah oh tit sìn-gióng Iâ-so͘ Ki-tok. Chóng-sī hit hō lâng khah siông sim-koaⁿ sī sêng-si̍t, sī hó. Hit hō ê lâng nā bat Iâ-so͘, hit-sî khah-siông in ê sìn-sim sī ōe chiâⁿ-chòe tē-it kian-kò͘ ê. To-má chiū-sī chhin-chhiūⁿ chit khoán. Sui-jiân i bōe thang khòaⁿ-tio̍h Iâ-so͘ Sī beh khì hit tiâu lō͘, iáu-kú i ài beh tè Iâ-so͘ kàu lō͘-bé. Sui-jiân i siūⁿ Iâ-so͘ nā lo̍h-khì Ιû-thài hù Lia̍p-sat-lō͘ ê sàng-chòng, Iâ-so͘ tek-khak ōe hō͘ lâng thâi-sí, iáu-kú i ū ēng tiong-si̍t ê sim lâi âu-kiò kóng, “Lán chiah ê ia̍h lâi khì kap I tâng-sí.” Sui-jiân i bān-bān chiah lâi sìn Iâ-so͘ ū koh-o̍ah, iáu-kú i it-tàn tit-tio̍h khak-sìn hit sî, i ê sìn-sim ū chìn-pō͘ kàu iâⁿ-kè Tī lóng-chóng ê ha̍k-seng. “Góa ê Chú ah, góa ê Siōng-tè ah!” Si̍t-chāi chiong-lâi bē-bat ū lâng ōe hiáu chheng-ho͘ Iâ-so͘ sī Siōng-tè.

Má-thài sī kap To-má chòe chi̍t-tùi. In nn̄g ê lóng sī (**thiām/tiām)-chēng ê lâng. Lūn Má-thài ê sū lán bô kah (**jōa) chai-iáⁿ. I sī A-lī-hoat ê kiáⁿ, tōa-bīn iā sī Kek-liû-pa ê, iā nā-sī án-ni, i chiū-sī lán ê Chú Iâ-so͘ ê piáu--ê. I sī thiu-hiòng ê, ū hō͘ i ê chhin-cho̍k kek--chhut-khì. Chóng-sī i siū-tio̍h Iâ-so͘ ê jîn-keh ê khip-ín-la̍t kám-hòa tio̍h ê sî, i chiū hoat-chhut ko-siōng ê sim-chì lâi chiap-la̍p I. “I chiū pàng-sak it-chhè khí-lâi tè I.” Tōa-bīn i teh pī-pān “Iâ-so͘ ê Giân-hēng-lio̍k” (Logia), chit pún chiū-sī āu-lâi ū hoat-tián chiâⁿ-chòe sī ū ê Má-thài Hok-im-su, hit-sî i chāi-lâi sī ū ê chit-bū-siōng ê hùn-liān, ū put-chí pang-chān i ê khùi-la̍t. Má-thài ū tī i ê chhù lâi pī-pān iân-sia̍h chhiáⁿ Iâ-so͘, tùi án-ni, siū Keng-ha̍k-sū, í-ki̍p Hoat-lī-sài lâng ngia̍uh-ngia̍uh-liām, lâi húi-pòng Iâ-so͘ ê sī-hui, iā tùi án-ni, Iâ-so͘ chiah ū kóng-chhut chit ê úi-tāi ê soan-giân, lâi chôngchông**chong)-ha̍p choân Hok-im ê tō-lí kóng, “Góa lâi m̄-Sī beh chio gī lâng, Sī beh chio pháiⁿ-lâng lâi hoán-hóe.”

Chòe-āu hit chi̍t tūi tī hok-im-su, í-ki̍p tī khah āu-lâi ê Sù-tô͘ Hēng-toān ê chheh-ni̍h sī lóng bô kóng-khí, tōa-bīn sī ūi-tio̍h in ū lī-khui khì kàu tī khah hn̄g ê só͘-chāi lâi chòe Chú ê kang. In sī chòe ta̍k sî-tāi chōe-chōe tiong-si̍t ê lâng ê tāi-piáu, piáu-bêng in sī chòe ê àm-chīⁿ ê kang, to̍k-to̍k Siōng-tè ū chai-iáⁿ, ia̍h in ê miâ ū kì tī Oa̍h-miā ê Chheh. Hit tiong-kan ū saⁿ ê sī Má-thài ê hiaⁿ-tī, A-lī-hoat ê kiáⁿ, kiò-chòe sió Ngá-kok, Iû-tāi, í-ki̍p hoán-pōan chèng-hú ê Se-bûn, in lóng sī chin goân-kò͘ ê Ιû-thài lâng, ia̍h in ōe hiah-ni̍h goân-kò͘, kiám-chhái sī in-ūi in ê hiaⁿ-tī sī chòe thiu-hiòng ê. Sió Ngá-kok āu-lâi ū chòe Iâ-lō͘-sat-léng ê Kam(**Kàm)-tok, iā Sin-iok Sèng-chheh lāi hit tiuⁿ giâm-kín iu-chhiû ê phoe, chiū-sī Iû-tāi sī siá ê. Se-bûn sī chi̍t ê Kok-sùi-tóng ài hoán-pōan Lô-má. Lán thang kóng in sī o̍eh-to̍eh goân-kò͘, ū-iáⁿ, in khiok ū hoán-tùi Pí-tek lâi kap īⁿ-pang lâng saⁿ-kap chia̍h, iā bô sím-mi̍h tông-chêng Pó-lô sī khn̂g hit khoán kek-bēng-tek ê koan-liām lâi chú-chhiòng kóng, Kàu-hōe sī tio̍h khui-khoah tī choân sè-kài, bô hun īⁿ-pang, Ιû-thài, tāi-ke tī Siōng-tè ê bīn-chêng lóng sī tâng tē-ūi. Tī hiān-kim lán mā-sī iû-goân ū khòaⁿ-tio̍h chit khoán ê lâng. Chit khoán lâng khiok ū tām-po̍h o̍eh-to̍eh, chóng-sī put-chí ū jia̍t-sêng tī-teh. Chit khoán lâng nā chi̍t-ē kap Iâ-so͘ saⁿ kiat-liân, in ê sim chiū chiām-chiām khui-khoah. In ê sim-koaⁿ iā iàu-kín tio̍h chiām-chiām khui-khoah. Iáu-kú nā ū sím-mi̍h chhò-gō͘, á-sī sin ê sū tio̍h hoán-tùi ê sî, in sī put-chí ū kè-ta̍t ê lâng. Só͘-í lán ê kàu-hōe khah-siông sī tio̍h ài kā chit khoán lâng kiò to-siā chiah ōe Ēng-tit.

Tī ha̍k-seng tiong pâi siāng lō͘-bé ê, koh sī siāng tē-it bî-sè ê, chiū-sī Ka-lio̍k lâng Iû-tāi. I sī chi̍t ê keng-chè-ka gâu pān-sū ê lâng; i sī teh chiáng-lí thôan-kàu-siōng it-chhè ê sū-bū ê kang. Tī kàu-hōe chit khoán sī put-chí tiōng-iàu. Si̍t-gia̍p-ka sī khah bōe hiáu soat-kàu, á-sī soan-thôan tō-lí, iáu-kú i nā hiàn in ê châi-tiāu lâi ūi-tio̍h kàu-hōe pān sū-bū, chiū i ê sī chòe ê hōng-sū sī tē-it ū lō͘-ēng, sui-jiân lán bô àn-sǹg in beh hoaⁿ-hí lâi seh-siā, in-ūi lán ū chiong in lâi kap Iû-tāi saⁿ pí-phēng, iáu-kú lán thang hó-táⁿ án-ni kóng.

Lán lóng teh kî-kòai, m̄-chai ūi-tio̍h sím-mi̍h in-toaⁿ, Iâ-so͘ chiah lâi kéng-soán chit ê Iû-tāi, á-sī àn-chóaⁿ chit ê Iû-tāi thài beh hoaⁿ-hí lâi tè I. Chit ê Iû-tāi beh lâi tè Iâ-so͘, ún-tàng m̄-sī siūⁿ ài thàn-chîⁿ ê in-toaⁿ. In-ūi tùi tī chit cha̍p-jī ê sòng-hiong ê soan-kàu-su Sī bô (**jōa) chōe thang tit-tio̍h, á-sī thang thau-the̍h. Lūn khí i khí-thâu cháiⁿ-iūⁿ lâi chhē-tio̍h Iâ-so͘, hit ê kò͘-sū, ún-tàng ū thang kám-tōng lâng chiah tio̍h, khó-sioh lán lóng m̄-chai, tùi án-ni, lán sòa bōe-thang chai-iáⁿ Iâ-so͘ lâi kéng-soán i lâi tiàm I ê sin-piⁿ ê in-toaⁿ. I tek-khak sī ōe giú Iâ-so͘ ê sim chiah tio̍h. Kiám-chhái i ū chai-iáⁿ i ka-kī ê loán-jio̍k, só͘-í teh siūⁿ kūn-óa Iâ-so͘ sī khah thò-tòng. Ū-iáⁿ, i ū tūi-lo̍h kàu tī chin chhim ê só͘-chāi. Chóng-sī lán tio̍h ōe kì-tit i ū him-bō͘ ài kap Iâ-so͘ chòe-hé, ia̍h lán tio̍h ōe kì-tit, tng i hoán-hóe chhám-chhoeh ê sî, i sī kàu-gia̍h úi-tāi, chiah ōe khì tìm hit ê siū-iū(**hòe) ê chîⁿ Tī hiah ê ín-iú i ê lâng ê bīn-chêng, jiân-āu chiah khì tiàu-ām sí. Nā-sī khah sió-khóa ê lâng tiāⁿ-tio̍h Sī bô beh chòe chit hō sū. Si̍t-chāi Iâ-so͘ ū tōa ê khùi-la̍t teh khip-ín i, chiū-sī pôaⁿ-kè i sī chai-iáⁿ ê, iā ū lâi chhui-pek i ê sim, hō͘ i khòaⁿ-kìⁿ I ê siū tēng-chōe, lâi kan-khó͘ kàu hoat-kông, lâi chai-iáⁿ i ū pōe-pōan Iâ-so͘. “Hit-lâng bô chhut-sì sī khah hó”. Chóng-sī Iâ-so͘ kiám sī chū án-ni éng-oán bōe kì-tit i mah?

Chhin-chhiūⁿ án-ni, Iâ-so͘ ū kéng-soán chōe-chōe téng-hō ê lâng lâi chòe I ê sù-tô͘. Nā-sī lâng kam-gōan ūi-tio̍h I ê kang lâi hiàn, chiū bô-lūn sím-mi̍h khoán-sit ê lâng, sī thian-châi ê, sī jia̍t-sim-ka, sī khòai po̍ah-tó ê, sī gâu giâu-gî ê, sī gû-chhún ê, sī lī-tūn ê, it-khài lóng ū khiàm-ēng. Lán tāi-ke lóng ū úi-tāi ê iàu-sò͘, chiū-sī I sī ài hō͘ i it-hoat chìn-pō͘ ê, koh iā ū pháiⁿ ê iàu-sò͘, chiū-sī kap I saⁿ kau-pôe, chiū ōe hòe-bô khì ê. I ū khiàm-ēng lán, koh ū kéng-soán lán it-chhè ê lâng.

TĪ kàu-chit-chiá ê hong-bīn, I ū khiàm-ēng jia̍t-sim-ka, tī cheng-sîn-kài ū thian-châi ê, í-ki̍p Chú ê sian-ti. I mā-sī iû-goân khiàm-ēng loán-jio̍k ùi-siáu-lé, gû-chhún ê bo̍k-su, in sui-Sī bô (**jōa) ū châi-tiāu, iā bô (**jōa) gâu kóng-ōe, koh mā bô (**jōa) gâu liāu-lí kàu-hōe, chóng-sī in nā-sī ū thiàⁿ-thàng ê seng-oa̍h, hit ê seng-oa̍h chiū-sī chi̍t ê soat-kàu put-sî ū kám-tōng-la̍t tī-teh. Tī it-poaⁿ ê sìn-tô͘ ê hong-bīn, I ū khiàm-ēng gâu lín-bín, chhin-chhiat ê lâng, in-ūi in ōe hō͘ chong-kàu pìⁿ-chiâⁿ put-chí ū kám-tōng-la̍t, koh iā khiàm-ēng (**thiām/tiām)-chēng gâu kín-sīn ê lâng, in-ūi in ū hit hō siān-ok-kám, chiū thang tit-tio̍h o-ló. I ū khiàm-ēng gâu ê hū-jîn-lâng ê siáu-soat-ka, in-ūi tùi i ê chheh ōe-thang sió-khóa thê-ko sè-kài lâi kūn-óa tī Siōng-tè, ia̍h ū khiàm-ēng tan-sûn bô tōa le̍k-liōng ê hū-jîn-lâng, thang lâi hō͘ ka-têng tit-tio̍h hēng-hok, i ê kiáⁿ-jî tōa-hàn, chiū kám-siā i ê thiàⁿ-thàng. I ū khiàm-ēng lán, koh ū kéng-soán lán, ia̍h tùi I ê un-tián hō͘ lán lóng ū la̍t thang chīn lán ê pún-hūn lâi hō͘ chit sè-kài tit-tio̍h khòai-lo̍k.