Si Tiat-sam goân chok
Hô-piⁿ ê lâng teh sàn-pō͘, kám-kak kap éng-pái bô kāng
Beh tâm-chêng kiam soat-ài lóng ē lâi
Hô-piⁿ ê lâng ū A-pa ū A-bú chhoā gín-á chò-hoé lâi
Goá khan lí, lí khan goá, tāi-ke chò-hoé kiâⁿ-lō͘ chin sóng-khoài
Hô-piⁿ ê lâng ū hok-khı̀ chiah ē-lâi
Hı̂-á 1-kûn 1-kûn iā tùi hái-té lâi
Chúi-lāi thiàu, hoāⁿ-piⁿ thiàu, tāi-ke oa̍h thiàu-thiàu
Hô-piⁿ ê lâng bô hun tóng-phài
Goá m̄-chai lí oá tó 1-phài
Tāi-ke tı̄ chia chí-ū saⁿ-thiàⁿ
Goá thiàⁿ lí, lí thiàⁿ goá, tāi-ke chò-hoé lâi
Hô-piⁿ ê lâng, jı̍t-sı̂ phah-piàⁿ, àm-sı̂ lâi kiâⁿ
Sin-thé chiah ē ióng-kiāⁿ
Ū súi ê koa thang thiaⁿ, iā ū súi ê tô͘ thang khoàⁿ
Hô-piⁿ ê lâng kap chúi-kng goe̍h-niû chò-phoāⁿ
Kiô-thâu kiô-boé hoat kng koh ū chúi-iáⁿ
Thàn ē kiâⁿ, tāi-ke lâi kiâⁿ
Sàn-chhiah lâng, hó-gia̍h lâng tāi-ke kiâⁿ-tio̍h bô su-iâⁿ
Hô-piⁿ ê lâng chhiūⁿ chí-moāi, chhiūⁿ hiaⁿ-tı̄
Kap chúi-lāi ê hı̂ 1-boé 1-boé tı̍t-tı̍t kiâⁿ
Chûn ē iô, chúi ē thiàu
Hı̂-á gín-á saⁿ-kha-hoe-thiàu.
Hô-piⁿ ê lâng tı̄ Sài-ná, tı̄ Ài-hô
Sı̄ Pa-lê ê lâng sı̄ Táⁿ-káu ê lâng.
Chí-ū saⁿ-thiàⁿ chiah sı̄ hó.
Chûn-iô hı̂-thiàu hái-chiáu poe bē liáu.
(Tâi-oân-jı̄ cha̍p-chı̀ tē 14 kı̂, 2002 nı̂ 7 ge̍h)
