Tı̄ 4 goe̍h 2 jı̍t, phí-jı̂n kap kúi-nā lâng tùi Ka-gı̄ chē 7 tiám 5 hun ê A-lí-san-soàⁿ jı̍p-khı̀, ū keng-koè 18 ê ia̍h-chām chiah kàu ūi. Āu-lâi koh chē chhia jı̍p khı̀ kàu teh chhò-chhiū ê só͘-chāi, sı̄ tı̄ Ho̍h-soaⁿ kap Bı̂n-goe̍h, í-keng nn̄g tiám-poàⁿ. Tô͘-tiong ū keng-koè 69 ê pōng-khang. Soaⁿ-lō͘ ê tn̂g ū 4812 lí 3 hun. Lō͘-tô͘ khi-khu, hoé-chhia kap pêⁿ-iûⁿ ê chhia bô siāng, khah sè-tiuⁿ, iā chhia-thâu ê ki-khı̀ bô siāng ê chin chē. Beh jı̍p-khı̀ chhia-thâu sı̄ chò āu-piah sak,beh chhut-lâi ê sı̂ sı̄ chò chêng, thang tòng chhia hō͘ i kiâⁿ-liáu khah ē sūn-sū. Tô͘-tiong san-lı̂m chin chē, thâu-chām sı̄ Jia̍t-tài-lı̂m. Tiong-chām sı̄ Loán-tài-lı̂m, kàu A-lí-san sı̄ Un-tài-lı̂m. Chhiū-ba̍k chin chē khoán, ū sam, siông-ngô͘, iā ū o͘ siông-ngô͘ chin súi; ū-ê 10 goā tn̄g koân, ū-ê sı̄ chin lāu-châng, chē-chē sı̄ chı̍t-nn̄g chheng nı̂. Kı̂-tiong ū chı̍t châng chiàu ha̍k-chiá chèng-bêng kóng oá 3000 nı̂. Êng-lı̂m-só͘ í-keng the̍h chin chē sam chhut-lâi, hiān-sı̂ chit khoán ê chhâ chin ta̍t chı̂ⁿ, chin súi, khí chhù lâng chin ài ēng, ū-ê phoè khı̀ Loē-tē chin chē. Chiàu só͘ àn-sǹg chiah ū thang koh the̍h 10 goā tang nā-tiāⁿ,chóng-sı̄ ū chiām-chiām koh chai sin-ê,m̄-kú chit khoán chhâ teh hoat chin bān,nā toā kàu chı̍t chiu-ûi ê toā, tio̍h ài 10 goā nı̂ kú.
Kéng-tı̀ chin hó, khı̀-hāu siāng koân sı̄ 70 tō͘, siāng kē sı̄ 30 tō͘, chı̍t nı̂ ê pêng-kin sı̄ 55 tō͘. Lú-koán iā chin lı̄-piān. Hiān-sı̂ Thô-hoe, Eng-hoe, It-hio̍h-lân lóng toā khui. Kàu A-lí-san í-keng ū hái-poa̍t 7500 chhioh. Goán tı̄ chhe-saⁿ chá-khí 4 tiám goā ū peh chiūⁿ Chiok-soaⁿ sı̄ 8263 chhioh, iā tùi-bı̄n ū chē-chē koân-soaⁿ. (Sin-ko-soaⁿ,Tang-soaⁿ, Sai-soaⁿ, Pak-soaⁿ, Chiân-soaⁿ, Lâm-soaⁿ) lóng sı̄ bān chhioh í-siōng ê koân-soaⁿ. Kı̂-tiong Sin-ko-soaⁿ siāng koân ū 1,3635 chhioh.
Jı̍t-thâu beh chhut ê sı̂ kéng-tı̀ chiâⁿ hó lóng khoàⁿ chin bêng, koh bı̄n-chêng ê sió-soaⁿ lóng ū chhiū-nâ, iā chhiū-nâ ê ē-bı̄n ū pe̍h-hûn chin súi, hō-choè hûn-hái, chit-ê kéng-tı̀ sı̄ cha̍p-hun ê bí-lē. Lâng nā ài peh Sin-ko-soaⁿ tùi chia khı̀ sı̄ khah kı̄n, chiah iáu chhit lí goā lō͘, chóng-sı̄ óng-ho̍k iû-goân tio̍h saⁿ-jı̍t. Tı̄ A-lí-san ê hū-kı̄n ū nn̄g-siā ê chhiⁿ-hoan, chı̍t-siā kiò-choè Ta̍t-pang-siā, chı̍t-siā sı̄ La̍h-la̍h-chih, lóng sı̄ chin toā-siā, lóng bē thâi-lâng chin un-sûn. Lâng nā kàu hia khoàⁿ-tio̍h chit-ê chū-jiân-kài ê bí-lē, lí ún-tàng hō͘ lâng ke-thiⁿ kèng-ùi Siōng-tè ê toā-koân-lêng, lâng khoàⁿ-tio̍h sè-kan ê toā-kiàn-tio̍k, chiū o-ló chin súi chin gâu, chóng-sı̄ nā jı̍p-khı̀ kàu tı̄ Chiok-san téng khoàⁿ-tio̍h bı̄n-chêng só͘ khoàⁿ-tio̍h ê chū-jiân-kài, chiū chai siōng-chú ê koân-lêng pí lâng kúi chheng-bān poē.
Chóng-sı̄ lâng nā khı̀ A-lí-san khoàⁿ chhò chhiū, tio̍h soà khoàⁿ Ka-gı̄ Êng-lı̂m-só͘ ê chok-gia̍p chiah khah chiâu-pı̄.
(Tâi-oân-kàu-hoē-pò tē 543 hō, 1930 nı̂ 6 goe̍h)
