Âng--sı̄ Chin ê Sió-toān
Âng--sı̄ Chin khah siông kiò-chò Ho͘-ḿ, sı̄ Tè Hoán Bo̍k-su ê lēng sian-bó. Chú-āu 1854 nı̂ chhut-sı̀, kàu kin-nı̂ ( = 1940 nı̂), tú hióng-siū 86 hoè. 46 hoè ê sı̂ sı̀n Chú, kiōng 40 nı̂ kú keng-koè sı̀n ê seng-oa̍h. Ē lâi chiū-kı̄n Chú ê tōng-ki, sı̄ tùi tı̄ tú-tio̍h pı̄ⁿ-thiàⁿ, kám-kak pêng-sı̂ só͘ chong-pài ê sı̂n-pu̍t, bē thang hō͘ i ê sim pêng-an, chiū siū khó͘-khǹg koat-sim chun-thàn tō-lí jı̍p sı̀n-gióng kèng-pài Siōng-tè. I chin chiàu pún-hūn ho̍k-sāi Siōng-tè, Siōng-tè si-in sù-hok hō͘ i, hō͘ i kiáⁿ-sun chin heng-ōng, kiáⁿ-jı̂ sim-pū, lāi goā sun chóng sǹg chiâⁿ pah lâng. Lūn kàu i ê seng-pêng chin khó-chhú, ū chē-chē bí-tiám. Chit-tia̍p kı̀ kúi-nā hāng hō͘ lán chò siàu-liām :--- 1. Sı̀n-gióng kian-kò͘ : Sı̀n Chú liáu, sui siū lâng kong-kek, phí-po̍k, iàm-chiān, ki-chhı̀, í-kı̍p tú-tio̍h hoān-lān khùn-khó͘, iā-sı̄ iú-chı̀n bô thè. 2. Tı̀ ı̀ ka-têng : Chin kı̂-biāu ! ! ! Kiáⁿ-sun toā to-sò͘ kap i tâng-sim kèng-pài Siōng-tè kiâⁿ thiⁿ-lō͘. Ē án-ni, cha-khó khí-lâi, bô m̄-sı̄ tùi tı̄ i ê sı̀n-sim kap sı̀n ê hó só͘ kiâⁿ só͘ kám-hoà lâi chiâⁿ--ê. 3. Gâu thiàⁿ Chú : Sı̂-siông chiàu só͘ ē hōng-sū kàu-hoē, koan-sim tı̄ Chú. Te̍k-pia̍t thang hián-chhut i ê thiàⁿ--ê, chiū-sı̄ hiàn kiáⁿ hō͘ Siōng-tè. Cha-bó͘ kiáⁿ hiàn chò Siōng-tè ê lú chhe-ēng, chiū-sı̄ khng Hoán Sian-siⁿ-niû. Hāu-siⁿ hiàn chò Siōng-tè ê lô͘-po̍k, chiū-sı̄ Tè Hoán Bo̍k-su. 4. Jı̂n-ài hô-pêng : I ê chò lâng, tùi lāi tùi goā chin oân-boán. Ta̍k-lâng to o-ló i ê hó lú-tek, hō͘ kiáⁿ-jı̂ sim-pū chin hàu-sūn. 5. Ài kı̂-tó : Hoān ū tú-tio̍h toā sió sū gâu oá-khò Siōng-tè, kau-hù I chhui-pâi. I tı̄ 3 goe̍h chhe 8 jı̍t khí-pı̄ⁿ ; tı̄ 3 goe̍h 15 jı̍t chá-khí chiū siū Chú kéng-tiàu tńg-khı̀ Thiⁿ Pē ê ke. Tng tı̄ pēⁿ chin loán-jio̍k ê sı̂, iáu-kú kı̂-tó, kiû kóng “Chú ah kiù goá, Chú ah kiù goá.” Phí-jı̂n chiàu só͘ chai kı̀ chiah--ê, chin siū kám-kek. Chhim-bāng i ê ûi-cho̍k kap lán tāi-ke ē o̍h i ê hó bô͘-hoān ! ! !
(Tâi-oân Kàu-hoē Kong-pò tē 663 hō, 1940 nı̂ 6 goe̍h)