Âng Tek-sin Sió-toān

Kun sı̄ Hoan-oah kàu-hoē ê hoē-iú. Tı̄ 11, 12 hoè ê sı̂ , khı̀ Sin-kiat-chng ê Sió-o̍h kap N̂g Chok-pang Sian-siⁿ tha̍k. Cha̍p-la̍k hoè jı̍p Tiong-o̍h; 20 hoè jı̍p Toā-o̍h; 24 hoè chut-gia̍p Sı̂n Ha̍k. Liáu-āu siū-phài toà Pak-káng, Kiâm-chúi-káng, Hōng-soaⁿ. Taⁿ koè-sin 29 hoè. Chhit goe̍h 4 hō ê Chú-jı̍t tı̄ Hōng-soaⁿ ko-seng chò Tiúⁿ-ló, iā koh bô loā-kú kiám-chhái ē chò bo̍k-su. Bô phah-sǹg 5 hō chá-khí 10 tiám khí koâⁿ-jia̍t; 6 hō chá-khí 8 tiám chiū koâⁿ kàu khàu. Tùi án-ni kū-nı̂ ê kū hek-súi-jia̍t ê chèng koh khí. Pún-sin chiū liām kóng, “Sè-kan sı̄ khó͘-hái, tio̍h tńg-lâi-khı̀ khah tio̍h, goá ê sim í-keng piān.” Sian-siⁿ-niû ı̀n i kóng, “ Lí tńg-khı̀ goán beh án-choáⁿ?” Kun bô ı̀n. Āu-lâi chhiáⁿ Phêⁿ Chheng-iok I-su tiau-tı̄, chóng-sı̄ Kun put-chí bô ài chia̍h io̍h, kóng, “M̄-bián i, bē hó lah.” Nā-sı̄ in-ūi hū-jı̂n lâng kap i-seng ê khó͘-khǹg, chiū bián-kióng chia̍h, kı̀ⁿ chia̍h io̍h kı̀ⁿ thò͘. Ta̍k jı̍t ná siong-tiōng, lō͘-boé tāi-siáu-piān kap chhùi lóng chhut hoeh. Pài-it khí chèng, pài-gō͘ mê oá 8 tiám chiū koè-sin. Pài-la̍k ē-po͘ 3 tiám chhut-chòng. Kun pêng-seng ióng-kiāⁿ toā-hàn. Lāu-pē khiām-tn̂g neh-tō͘ thàn chı̂ⁿ lâi hō͘ Kun tùi sè-hàn tha̍k kàu toā-hàn, ǹg-bāng Kun jı̍t-āu thang chò toā lō͘-ēng ê lâng. Tı̄ chûn-nı̂ Kun ê lāu-pē pia̍t-sè. Ke-lāi chí-ū chhun āu-bó kap chı̍t ê toā-chí kap chı̍t ê sió-moē; chóng-sı̄ chí-moē lóng chò kheh, kè-bó kap sió-moē toà chò-hoé. Só͘-í Kun thang kóng í-keng bô liân-lūi, kap loē-chō͘ thang choan-sim chò kang. Iū-kiam Kun ê seng-khu, ha̍k-būn, tek-hēng, nı̂-hoè, seng-hoa̍t-kè lóng siong-tong. Koh keng-koè hit 3 ūi kàu-hoē ê sêng-chek iā sı̄ chha-put-to. Kun chit-tia̍p thang kóng sı̄ tē-it toā thang oa̍h-tāng ê sı̂. M̄-kú Chú ê chí-ı̀ sı̄ lâng só͘ bē chhek-to̍k--tit. Taⁿ sè-kan ê sū Kun soah lah. Hàiⁿ--ah! Lâng ê sı̀ⁿ-miā chin bô tiāⁿ-tio̍h. Lám--ê sí, ióng--ê iā sí. Phí-jı̂n chiap-tio̍h Kun sí ê tiāu-pò, lia̍h-chò kún-chhiò, khı̀ thàm-thiaⁿ kúi-nā ūi sian-siⁿ, tāi-ke iā sı̄ kóng, “ Káⁿ bô iáⁿ”. Goá chiū chē kip-hêng chhia khı̀ khoàⁿ, soà ǹg-bāng beh kap Kun kóng-oē. Hàiⁿ--ah! Chı̍t-ē kàu ūi, thiaⁿ-kı̀ⁿ Kun tâi liáu, sim bô m̄ toā gông-ngia̍h. Hoān-nā sio bat ê sian-siⁿ pêng-iú thiaⁿ-kı̀ⁿ, iā bô m̄ án-ni. Koh Kun pêng-seng sı̄ pêng-hô chú-gı̄ ê lâng, só͘-í chē-chē lâng ūi-tio̍h Kun toā pi-siong. Nā-sı̄ sı̍t-chāi só͘ thang pi-siong ê, chí-ū sı̄ Kun ê ûi-cho̍k nā-tiāⁿ. Ǹg-bāng Thiⁿ-pē chiàu-kò͘ Kun ê hū-jı̂n lâng kap 2,3 ê sè-hàn ê cha-bó͘-kiáⁿ. Nā lūn kàu Kun, sı̄ m̄ bián thè i iu-būn, in-ūi i ê sim pı̄-pān ū piān, sı̍t-chāi tio̍h thè i kiong-hí. Taⁿ “Bô koh iau, chhùi-ta; jı̍t bē pha̍k, hoé bē sio-tio̍h. Siōng-tè chhit-khı̀ i lóng-chóng ê ba̍k-sái.” Goá iā toā ǹg-bāng ē chhin-chhiūⁿ Kun pı̄-pān ū piān thang hù sí; kàu sı̂ pêng-an kı̀ⁿ Chú. Soà kap Kun tı̄ chō-ūi-nı̍h saⁿ-kap gı̂m “Ha-le-lu-iah. A-men.” (Tâi-oân Kàu-hoē-pò tē 425 koàn, 1920 nı̂ 8 ge̍h)