Î Sian-seⁿ lı̄-piat ê phoe

Ùi Wiki Tô·-su-kóan
 Goá só͘-thiàⁿ só͘-him-bō͘ ê hiaⁿ-tı̄ chí-moāi í-kı̍p siàu-liân ê pêng-iú, chhiáⁿ lí chún goá tùi lín kóng-khí kúi-nā kù-oē. 
 Chiàu lín chai Sian-seⁿ-niû lâi Tâi-oân put-chí ài toà tı̄ lín chia, iáu-kú ū hoān-tio̍h tāng-pēⁿ kàu eng-kai tio̍h tò-khı̀ chó͘-ke. In-ūi ǹg-bāng i nā toà tı̄ Tn̂g-soaⁿ ē khah ióng-kiāⁿ, Eng-kok ê Kàu-hoē ū phài goá soá-khı̀ tı̄ Soàⁿ-thâu khah lāi-soaⁿ ê só͘-chāi, chiū-sı̄ Kheh-lâng ê tiong-kan, Tı̄-hia chò Chú ê kang. Goá lı̄-khui Tâi-oân kı̂-sı̍t m̄-sı̄ pún-ı̀, sǹg sı̄ ko͘-put-chiong, chiū-sı̄ ha̍p tı̄ Siōng-tè ê chí-ı̀. 
 Goá toà Tâi-oân í-keng cha̍p-sò͘-nı̂. Tng chiah-kú chia̍p-chia̍p ū kap lín kau-poê, sı̄ hō͘ goá ê sim hoaⁿ-hí kàu bē-kò͘-tit. Lín siông-siông thiàⁿ-thàng goá, tùi-tiōng Siōng-tè chún goá thoân ê kà-sı̄. Goá eng-kai tio̍h kā lín soeh to-siā; goá éng-éng siàu-liām lín, ia̍h sui-jiân goá ê sin bô thang khah kú-tn̂g tı̄-chia, iáu-kú goá ài lín bêng-bêng chai goá ê sı̂n sı̂-sı̂ kap lín tı̄-teh. Tùi goá lâi Tâi-oân kàu-taⁿ goá to̍k-to̍k ū ı̀-sù ài chān lín bat Chú, iā siông-siông ài kui êng-kng tı̄ I. Goá chin-chiàⁿ hoaⁿ-hí in-ūi tı̄ chit cha̍p-sò͘-nı̂ ê tiong-kan ū khoàⁿ-kı̀ⁿ Tâi-lâm ê Kàu-hoē toā chı̀n-pō͘. Kàu chit-tia̍p ū siat hoat-tō͘ put-chí chiâu-pı̄, ia̍h goá toā-toā ǹg-bāng Kàu-hoē thang chiām-chiām heng-khí. Chóng-sı̄ nā ài tit-tio̍h chit-hō ê lı̄-ek tāi-ke, put-lūn sı̄ lâm-hū ló-iù, tek-khak tio̍h chı̄n i-ê pún-hūn,ia̍h sı̂-sı̂ tio̍h him-bō͘ oá-khò Sèng-sı̂n ê koân-lêng. Tû che í-goā sı̍t-chāi bô pa̍t lō͘ thang chı̀n-ek.
 Lán toà tı̄ chit sè-kan sı̄ ná-chhin-chhiūⁿ chhut-goā. Lán êng-kng ê tau tı̄ thiⁿ--nih. Tı̄-hia lóng sı̄ hok-khı̀ liáu-liáu. Lán tiàm tı̄ tē-bı̄n-chiūⁿ ta̍uh-ta̍uh tio̍h tio̍h-boâ, iā ū-sı̂ tú-tio̍h chhı̀-liān iu-būn ê tāi-chı̀. Iáu-kú lán koat-toàn m̄-thang loé-chı̀ pàng-sak chin-lí. Tek-khak tio̍h kiat-liân tı̄ Chú, ta̍k-sı̂ tio̍h choân-choân oá-khò I. Nā sit-lo̍h pún-hūn chiū bē-bián-tit siū-hāi, ia̍h nā bô hoán-hoé sı̍t-chāi beh éng-oán tı̂m-lûn. Goá só͘ thiàⁿ ê hó pêng-iú, chhiáⁿ lí chún goá kiû lín tio̍h thoat-lı̄ chit-ê siāng-toā ê chai-eh. Tı̄ sí-āu bô thang ı̂-e̍k, só͘-í tùi chit-chūn tio̍h koat-ı̀ toè Chú, bô hō͘ sím-mı̍h lâng sím-mı̍h mı̍h bê-he̍k lín ê sim. Che chiàⁿ-sı̄ goá pek-chhiat ê oē, goá ê choân-sim só͘-ài. In-ūi lán ê kok tı̄ thiⁿ--nı̍h, in-ūi Chú beh koh lâi sím-phoàⁿ chèng-lâng, ia̍h in-ūi lán thang ǹg-bāng hō͘ Chú piàn-hoà lán pi-chiān ê seng-khu o̍h I êng-kng sı̂n-lêng ê thé, lán tāi-ke tio̍h sio̍k Chú kian-kò͘ khiā-chāi. (Khoàⁿ Hui-lı̍p-pí tē-saⁿ-chiuⁿ boé kap tē-sı̀-chiuⁿ thâu)
 Goān só͘ thiàⁿ só͘ him-bō͘ ê hoē-iú choè chı̄n-tiong kàu lō͘-bé, chiū lán sui-jiân tı̄ chit sè-kan nā bô koh chài saⁿ kı̀ⁿ-bı̄n, iáu-kú thang tiāⁿ-tiāⁿ ǹg-bāng oē tit-tio̍h choè-hoé chū-chı̍p tı̄ lán ê Kiù-chú Iâ-so͘ Ki-tok ê ūi-chêng, thang saⁿ-kap hióng-siū éng-oán bô hān-liōng ê hok-khı̀. SIm só͘ goān. Î jiâu-lí siá--ê.