Ông-lâi kho͘-chhit

Chhiò phoà lâng ê chhùi Tâi-oân chhut-sán ông-lâi siōng kài ū-miâ ê só͘-chāi sı̄ tı̄ Tâi-lâm Koan-biō , m̄-koh hit tong-sı̂ Koan-biō seng-sán ê ông-lâi bô kàu bē , chiah ū poâⁿ-soaⁿ-koè-niá, cháu khı̀ Tâi-tang chèng ông-lâi , tán siu-sêng ê sı̂-chūn , tō chū-jiân ū se-pō͘ ê seng-lí-lâng lâi ba̍uh khı̀ se-pō͘ bē ,hiàng-sı̂ Tâi-tang iáu-koh bô siat-pı̄ chin hó ê lú-koán , tùi se-pō͘ khı̀ ê seng-lí-lâng , tāi-pō͘-hūn lóng toà tı̄ hoàn-á-keng koè-mı̂.Hoàn-á-keng ê siat-pı̄ chiâⁿ kán-tan , piān-só͘ kap sé-sin-khu-keng sı̄ tı̄ goā-kháu kong-ke iōng--ê , pâng-keng kap pâng-keng tiong-kan kan-taⁿ iōng chı̍t tè po̍h-po̍h ê pang-á keh-khui , keh-piah pâng-keng kóng ê oē , tāi-pō͘-hūn lóng mā thiaⁿ ē tio̍h . A-châi--a sı̄ khı̀ Tâi-tang beh hoàn ông-lâi tńg-khı̀ Tâi-lâm bē ê tiong-poâⁿ-siong , hit nı̂ in-ūi nı̂-tang bô joā hó , ông-lâi khiàm-siu , soah lâi khí toā-kè , kū-nı̂ chı̍t kin kho͘-poàⁿ ê ông-lâi , kin-nı̂ khí kàu nn̄g-kho͘-poàⁿ , hit mı̂ A-châi--a tāi-khài lim siuⁿ-chē tê , khùn bô siáⁿ ē khı̀ , tó tı̄ bı̂n-chhn̂g-téng teh poâⁿ-sǹg , ông-lâi chāi-tē chı̍t kin nn̄g-kho͘-poàⁿ , koh ka ūn-kim kap siau-mô͘ ài sǹg gō͘-kak , kang-chı̂ⁿ ,só͘-hùi kap lı̄-sûn mā ài gō͘-kak , án-ni chı̍t kin tio̍h ài bē saⁿ-kho͘-poàⁿ chiah bē liáu-chı̂ⁿ, sı̍t-chāi bô joā hó bē ...... Tng-tang hit ê sı̂-chūn , thiaⁿ keh-piah pâng-keng ū lâng teh kóng: “Ông-lâi kho͘-chhit” , ná chhin-chhiūⁿ sı̄ A-thó͘--a ê siaⁿ . A-châi--a thiaⁿ chı̍t-ē , sim-koaⁿ chông-á loān--khı̀ , siūⁿ kóng i kap A-thó͘--a pêⁿ-pêⁿ lóng sı̄ kā A-gı̄--a phoàⁿ ông-lâi bé tò-tńg-khı̀ Tâi-lâm bē--ê, chāi-tē A-gı̄--a bē i nn̄g-kho͘-chhit , ah bē A-thó͘--a kho͘-chhit , chı̍t kin tō chha peh kak--a leh , tı̄ chhı̄-tiûⁿ beh án-choáⁿ kap A-thó͘--a kēng-cheng , lú siūⁿ lú khùn bē khı̀ , siūⁿ kóng bêng-á chá-khí , tio̍h ài liōng-chá lâi-khı̀ kap A-gı̄--a sǹg-siàu. Keh-jı̍t thiⁿ bē-kng , A-châi--a tō khı̀ A-gı̄--a in tau , tùi A-gı̄--a kóng : “A-gı̄--a, A-gı̄--a, lí sı̍t-chāi ū kàu bô ı̀-sù--neh , lán sı̄ hiah-nı̍h kú ê lāu-pêng-iú , seng-lí mā chò hiah-nih kú--lah , ah lí ná ē tùi goá hiah-nih-á bô kong-pêⁿ--a?” A-gı̄--a ba̍k-chiu thih iáu-bē kng--leh , hiông-hiông thiaⁿ tio̍h A-châi chia ê bô-thâu-bô-boé ê oē , chı̍t-sı̂ mā lia̍h bô niau-á-mn̂g, tō kā ı̀n-kóng: “Lí sı̄ teh kóng siáⁿ--lah , kū-nı̂ ông-lâi chı̍t kin kho͘-poàⁿ , kin-nı̂ chı̍t-kin tō khí kàu nn̄g kho͘ poàⁿ , goá tō chai-iáⁿ ū būn-tê--o͘ , goân-lâi lí sı̄ bē goá khah kùi, bē pa̍t-lâng khah sio̍k--o͘ .” A-châi--a kóng: “Lí bē A-thó͘--a chı̍t-kin kiám goá peh-kak--a! Ná ē bô?” A-gı̄--a kóng: “Choa̍t-tùi bô án-ni , lí mài ka-kı̄ seⁿ oē beh lâi tháu kè-siàu--lah , kin-nı̂ ông-lâi khiàm siu , khí toā-kè , chı̍t-kin lóng sı̄ chāi-tē nn̄g kho͘ poàⁿ , pa̍t-lâng mā sı̄ bē chit hō kè-siàu , ta̍k-ê lóng kāng-khoán--lah.” Tng teh hoe ê sı̂-chūn , A-thó͘--a ang-á-bó͘ tú-tú-á kàu ūi , khoàⁿ in tı̄ hia hoe kah hiah hó-sè , tō hó-ı̀ oá khı̀ kā in mn̄g kóng: “Taⁿ lín sı̄ teh hoe siáⁿ-mih oáⁿ-ko , hoe kah hiah-nı̍h-á nāu-jia̍t?” A-gı̄--a khoàⁿ tio̍h A-thó͘--a lâi , tō kā khiú lâi mn̄g kóng: “Lóng mā sı̄ lí--lah , bô-tiāⁿ-tio̍h sı̄ lí kap A-châi--a tàu-khang--ê , beh lâi kā goá thó kè-siàu--leh , lí kóng goá ông-lâi chı̍t-kin bē lí joā-chē?” A-thó͘--a kóng: “Ná ū? Goá ná ū án-ni kā i kóng?” A-châi--a kóng: “Lín lóng bián ké--lah! ké kah ná chhin-chhiūⁿ chin--ê leh . châng goá tō bêng-bêng thiaⁿ tio̍h lí kā lín bó͘ kóng ông-lâi kho͘ chhit , ông-lâi kho͘ chhit , lí koh kóng bô?” A-thó͘--a in nn̄g ê ang-á-bó͘ thiaⁿ tio̍h , hiông-hiông bı̄n-chhiuⁿ soah âng--khı̀-lâi , kóng: “Bô--lah , m̄-sı̄ án-ni lah , lí thiaⁿ m̄-tio̍h lah .” A-châi--a kóng: “Goá thiaⁿ kah chiok chheng-chhó--ê , choa̍t-tùi bô thiaⁿ m̄-tio̍h , lín mài koh tàu-khang-á lâi kā goá phiàn--lah , goá tō m̄-sı̄ chē-chûn--koè-lâi ê koh , bē hı̂n-chûn--lah.” A-gı̄ thiaⁿ kah khı̀-phut-phut , siūⁿ kóng bêng-bêng tō bô-iáⁿ-bô-chiah ê tāi-chı̀ , kóng kah ná chhin-chhiūⁿ chin--ê kāng-khoán . A-thó͘--a in ang-á-bó͘ ê bı̄n sı̄ âng-kı̀-kı̀ , kàu boé--á A-thó͘--a chiah kóng: “Lán mài koh-chài hoe--lo̍h-khı̀ lah , tāi-chı̀ sı̄ in-ūi goá ín-khí--ê , sı̍t-chāi chin pháiⁿ-sè--lah . Sū-sı̍t sı̄ án-ni--lah , to in-ūi seng-lí siōng bô-êng ê koan-hē , gún nn̄g-ê ang-á-bó͘ chin kú bô chò-hoé--lah , tán kàu châng chiah chò-hoé , khang-khoè chò soah liáu-āu , chı̍t-sı̂ chhoē bô mı̂-á-choá thang chhit , chiah kā goá ê cha-bó͘-lâng kóng ‘iōng lāi-khò͘ chhit’ lah.” Tng tang goá chiong chit ê kò͘-sū kóng hō͘ chı̍t-ê pêng-iú thiaⁿ ê sı̂-chūn , goá hit ê pêng-iú kóng: “Bô--o͘! He sı̄ khah-chá ê kè-siàu , í-keng koh-chài khí kè-siàu--lah.”