Chhiáⁿ lín goân-liōng goá
Chá-chêng tùi lín ê ko͘-hū.
Bô-thang hō͘ lín
Tı̄ che ài phòng-chhèng ê sè-kan,
Tit-tio̍h khoa-kháu.
Chı̍t-pái koh chı̍t-pái
Ge̍k lín ê ı̀,
Kian-chhı̂
Kiâⁿ ka-kı̄ ê lō͘,
Ū-sı̂ bêng-chai
Kiâⁿ--lo̍h-khı̀ tiāⁿ-tio̍h poa̍h-tó,
Piàn-sin thàng-thiàⁿ.
Nā-sı̄ goá chai
Ka-kı̄ it-seng só͘ kiû,
Bô sio̍k sè-sio̍k ê chō-chiū,
Iā boē-oē tı̄ kim-seng tit-chiâⁿ.
M̄-sı̄ khong-tian, m̄-sı̄ gín-á-sèng,
Chí-sı̄ chá lâng chı̍t-pō͘
Khoàⁿ-tio̍h chı̍t-ê bí-lē sin sè-kài,
Bāng lâng só͘ m̄-káⁿ bāng ê lí-sióng-kok,
Kiàn-lı̍p tı̄ hn̄g-hn̄g ê chiong-lâi.
Siⁿ-chiâⁿ pi-kio̍k ê sèng-keh,
Minority ê lō͘ chù-tiāⁿ ko͘-toaⁿ?
Kan-ta ǹg-bāng
Chı̀-chhin ê lín,
Kàu lō͘-boé,
Thiaⁿ goá kóng-soah,
Tng choân sè-kài lóng chhiò goá gōng,
---- lín iā án-ni kóng.
Taⁿ goá sı̀ⁿ-miā ê teng chiap-kūn hoa,
Hō͘ goá toà lín ê chhim-sı̀n,
Sè-chiūⁿ choè-āu chı̍t-pha kng-bêng,
Lo̍h thô͘-té:
Goá, chāi-siⁿ m̄-bat khí-siáu,
Hoán-tńg pí choē-choē oa̍h-teh ê lâng
Iáu khah chheng-chhéⁿ.
