[Sū-giân: Goá m̄-sı̄ siáu-soat-ka, só͘-í goá bô teh siūⁿ goá ē siá hó ê Chong-kàu siáu-soat thang lı̄-ek tāi-ke. Chóng-sı̄ téng jı̍t chiap-tio̍h lán Lâm Tâi ê Phian-chip-pō͘ tiúⁿ bēng-lēng goá siá, chóng-sı̄ i kā goá chí-tēng chong-kàu- tek, hok-im-tek, té-phiⁿ--ê. Só͘-í goá chiū ēng kı̂-tó lâi siá.
Lūn siáu-soat ê kám-hoà sı̄ chin toā. Lí khoàⁿ Lu-so siá kàu-io̍k siáu-soat, jiá-khí Hoat-kok ê kek- bēng. Bí-kok ê bó͘ chí-moē siá “Lô͘-châi To-má”, chiū ín-khí Bí-kok lâm-pak chiàn- cheng, pı̀ⁿ-choè pàng Ou-lô͘ ê ūn-tōng.
Lán kok-nı̍h ê Hō-chhoan Hong- gān--sı̄ só͘ tù ê chong-kàu siáu-soat, hit ê kám-hoà ê la̍t iā-sı̄ chin chhim.
Lūn pò-choá chha-put-to m̄-bat kóng ū pò bô siáu-soat. Nā-sı̄ lán ê Kong- pò tùi chá kàu-taⁿ m̄-bat khiat-chài siáu-soat. Goá khoàⁿ chit pái sı̄ chhı̀- chò, iā-sı̄ kin-nı̂ Phian-chip-pō͘ tāi eng-toàn. Kı̀-tit chá-nı̂ “Bân-lâm Sèng-hoē-pò” liân-chài “Gō͘-keⁿ-cheng” chin ū chhù-bı̄ kap lı̄-ek. Bat hô hàn- bûn kap goā gú ê hiaⁿ-ché ū chē-chē hó ê siau-sit, á-sı̄ sı̍t-oē thang tha̍k. Nā sı̄ tı̄ lán Tâi-oân chí-ū ē-hiáu tha̍k Lô- má-jı̄ ê hiaⁿ-ché bô tú-hó ê chheh thang tha̍k, lâi poê-iúⁿ in ê chêng-sū, kap tùi hit ê lâi bat chē-chē iú-ek ê sū. Sı̍t-chāi chin ûi-hām. Chá goá bat siá “A-niâ ê ba̍k-sái”, iā-sı̄ ūi chit ê ı̀-sù.
Taⁿ chit pái tı̄-chia ài ēng “Ēng kha- chiah ǹg Siōng-tè” chò tê-ba̍k, lâi siá chı̍t ê sū-sı̍t siáu-soat. Sū, sı̍t--ê. Kóng miâ khah pháiⁿ-sè, it-chhè ēng ké miâ, iā chiàu hit ê keng-koè ê tāi- lio̍k, goá kā i hu-ián thoàⁿ-khui chò siáu-soat lâi piáu-hiān tı̄-chia, chò 5 pái lâi liân-chài.
Chhiáⁿ hiaⁿ-ché ē kı̀-tit, goá m̄-sı̄ siáu-soat-ka, goá sı̄ Siōng-tè ê lô͘-po̍k. Só͘-í kiat-kio̍k goá só͘ siá ê siáu-soat, chiū-sı̄ ēng siā-hoē sū-sı̍t ê hêng-siòng lâi biô-siá; iû-goân sı̄ chı̍t-phiⁿ ê soat- kàu. Hō͘ khoàⁿ ê lâng thàu-koè hit ê sū-sı̍t, lâi tit-tio̍h chin-lí ê kà-sı̄. Só͘-í chit phiⁿ ê siáu-soat, thâu-boé sı̄ chong- kàu-tek, hok-im-tek; chhiáⁿ lín liōng- kái. Koh chit phiⁿ siáu-soat sı̄ ēng “Teng-hû-só” chò tiong-sim lâi kóng.
Lūn siá siáu-soat tı̄ pò-bı̄n, chit pái put-châi sı̄ thâu-pái. Só͘-í nā ū bô tú- hó ê só͘-chāi, chhiáⁿ chit hong-bı̄n ê chu sian-poè thek-chèng chiū-sı̄.]
1. Hóng-mn̄g
“Bo̍k-su pêng-an”. “Oân-ché lâi chē”. Bo̍k-su tùi āu-bı̄n chhēng chı̍t- niá khùn-saⁿ, chhiú gia̍h khí-bín, bı̄n iáu tài ài-khùn-sı̂n, chiū tùi chàu-kha chhut-lâi. Chá-khí goā-bı̄n lóng tà-bū, thiⁿ-khı̀ chin léng. Bo̍k-su só͘ chhēng ê saⁿ chin kāu; chin koâⁿ chhiú kiu-kiu. Chiū tùi Oân-ché kóng, “Oân-ché lí chá-khí thài chiah gâu chá.” ”Bô gâu chá nē ! Í-keng 8 tiám goā lah”. “Hò͘ ! Goá chá-khí chin oàⁿ khí-lâi. Sı̄ in-ūi goá cha-àm chin siān, khı̀ pò͘-tō kiâⁿ chin hn̄g, hó ki-hoē soà siuⁿ àm soah. Tò-lâi í-keng chin àm, só͘-í chá-khí chiah bān khí-lâi; sı̀-kè lóng tà-bū, goá lia̍h-chún iáu chá leh.”
“Hò͘ ! Sı̄ án-ni o̍͘h ! Chin kiáu-jiáu, chin kiáu-jiáu.” “Bē, bē.” “Bo̍k-su, kı̂-sı̍t goá sı̄ ū chı̍t hāng iàu-kín ê sū ài pài-thok lí, iā chin bô sı̂-kan thang lâi chhoē lí, chiah sūn chit ê beh khı̀ chhı̄- tiûⁿ bé chhài ê sı̂-kan oan tùi lí chia lâi.” “Sı̄ án-ni o̍͘h, chhiáⁿ lí kóng, sı̄ sím-mı̍h iàu-kín ê sū.” “M̄-sı̄ goá ka-tı̄ ê sū, sı̄ goán keh-piah ê sū.” “Keh-piah sím-mı̍h lâng án-choáⁿ ?”
“Tı̄ chit chéⁿ-kha kóng khah pháiⁿ- sè, lâi khı̀ lāi-bı̄n goá chiah kā lí kóng.” Tú teh kóng ê sı̂, Bo̍k-su-niû chhiú phâng chı̍t tè tāu-hū jı̍p-lâi chiū ia̍h kap Oân-ché saⁿ-chioh-mn̄g chhéng-an. Tùi án-ni 3 ê chiū saⁿ chhoā jı̍p-khı̀ kheh-thiaⁿ chē. Bo̍k-su-niû chiū kóng, “Oân-ché, lí thâu-tú-á kóng, lín keh- piah sı̄ sím-mı̍h lâng án-choáⁿ ?”
“Goán keh-piah chı̍t ê chí-moē kiò- chò Teng-hū-só, goá chin ài Bo̍k-su lí khı̀ kóng tō-lí hō͘ i thiaⁿ.” “Án-ni no͘h, i sı̄ án-choáⁿ ?” “Chit ê Teng-hû-só in tiōng-hu sı̄ tı̄ .............só͘-chāi teh chò kàm-tok, chin ū tē-ūi ê lâng. Nā-sı̄ ke-lāi chin bē hô, cha-àm nn̄g ê ang-bó͘ chiah saⁿ-phah, phah kàu toā-khang sè- lı̍h, kiàⁿ-tâi siak-siak phoà, tiû-saⁿ lı̀-lı̀ phoà, gín-ná toā-lâng khàu be-be.” “He sı̄ cháiⁿ-iūⁿ?” Bo̍k-su kap Bo̍k-su-niû chı̍t ē thiaⁿ Oân-ché kóng án-ni, chı̍t sim thè Teng-hû-só khó-lı̂n, chı̍t sim hò͘ⁿ-kı̂ chin ài chai. Nn̄g ê ba̍k-chiu lia̍h Oân-ché kim-kim siòng. Oân-ché iā chin iàu-ı̀ ê khoán-sit, chiū chiap-soà koh kóng.
“Thiaⁿ-kı̀ⁿ kóng, pêng-seng Teng-hû- hiaⁿ chin gâu khai-hoā, iā cha-hng kap pêng-iú chio khı̀ Chùi-goa̍t-lâu lim. Nā-sı̄ Teng-hû-só chin gâu kā i tng, cha-hng kàu 11 tiám goā bô tò-lâi, i chiū koh khı̀ kā i chhoē, chhoē kúi-nā keng, chhoē bô, chhoē kàu Chùi-goa̍t- lâu tú gū-tio̍h i ê tiōng-hu tı̄-hia. Chı̍t- sı̂ chhò͘ hoé toā to̍h, chiū tng-tiûⁿ tı̄ chiú-lâu oan chı̍t-khùn. Tāi-ke khoàⁿ-liáu kio̍k-bı̄n chin bái, pêng-iú chiah khó͘-khǹg Teng-hû-hiaⁿ kap i tò-khı̀. Kàu chhù to hoan poàⁿ-mê āu, tiám goā lah. Tò-lâi kàu-tè kiù-kiù jióng, chı̍t-ê chhoh, chı̍t-ê lé, sio-mē chı̍t-khùn; goán chhù-piⁿ lóng hō͘ i chhá cheng-sı̂n. Bô phah-sǹg thêng chı̍t ē-á soà pı̀n piàng kiò, kiàⁿ siak-siak phoà, phah kàu ai-ai kiò. Teng-hû-só ka-tı̄ bô siⁿ, pun chı̍t ê cha-bó͘ gín-ná, kin-nı̂ tú 7 hoè, iā khàu be-be. Chı̍t-sı̂ ke-lāi loân kún- kún. Kan-ta tı̄ khàu be-be ê siaⁿ-tiong thiaⁿ chı̍t-kù, “kin-á-jı̍t lâi kàu chia goá goān sí phoè lí lah” ê siaⁿ. Hit ê siaⁿ sı̄ chin bô-la̍t, hū-jı̂n-lâng ê siaⁿ. Hit-sı̂ goá chiah kiò goá ê tiōng-hu khí-lâi, kā i kóng, phah-sǹg lán tio̍h lâi khı̀ kā i chiàm. Khí-thâu goán sı̄ siūⁿ kóng ang-bó͘ tāi, chhùi kap chı̍h éng ē sio- gāi; chhn̂g-thâu phah, chhn̂g-boé chiū hô lah. M̄-ài khí-lâi kā in chiàm, àn- sǹg lâng ê ke-lāi tāi, ū-sı̂ tio̍h-la̍t koh m̄-hó khoàⁿ. Chóng-sı̄ thiaⁿ in phah kàu án-ni pı̀n piàng kiò, koh khàu kàu be-be kiò, sim iā put-jím chiah khı̀ kā in chiàm. Khı̀ kàu ūi, goá ê tiōng-hu chiah tùi Teng-hu-hiaⁿ kā i lám cháu, goá chiah tùi Teng-hû-só kā i giú khui. Teng-hû-só thâu-hia̍h chı̍t khang, tāi- khài sı̄ khı̀ hō͘ Teng-hû-hiaⁿ ēng kiàⁿ sai-tio̍h. Teng-hû-hiaⁿ chhiú-kut chı̍t khang, khoàⁿ sı̄ hō͘ Teng-hû-só kā--tio̍h. Nn̄g ê iáu chhiauh-chhiauh jióng; i iā kóng beh phoè--i, i iā kóng beh phoè--i. Goán kā i chiàm khui, hoān iáu sı̄ kúi pái jı̍h oá-khı̀ beh koh saⁿ phah. Chı̍t ê iū gâu chhoh, kiāu; chı̍t ê lı̄ gâu lé, khu̍t. Ah ! Ka-têng, sim-lāi bô tō-lí ê kng, chin-chiàⁿ oán-jû oa̍h tē-ge̍k. Goá kap goán gín-ná in a-pa nn̄g-ê kap i tiàm hia tı̂ⁿ kui-mê, kàu thiⁿ beh kng lah, chiah kóng, taⁿ thiⁿ-kng lah, bē khoàⁿ-tit, ē hō͘ lâng chhiò, chiah soah kó͘; goán chiah tò-khı̀. Bē su poaⁿ chı̍t pı̂ⁿ bē hiān-sı̀ ê toā-hı̀; m̄-sı̄ kóng m̄-bat oan nē, sı̄ ū làng jı̍t bô làng lé-pài--ê, sı̄ cha-mê te̍k-pia̍t toā poaⁿ. Só͘-í goán chiah ū koè-khı̀ kā i chiàm.
Bo̍k-su lí siūⁿ án-choáⁿ ? Lí khı̀ kóng tō-lí hō͘ in thiaⁿ hó-bô ?” “Hó no͘h ! chhı̀n-chhái lâng lán mā ài kóng hō͘ in thiaⁿ.” Chóng-sı̄ Bo̍k-su-niû chin hò͘ⁿ- kı̂, chiū koh tùi Oân-ché kóng, “Oân- ché, iáu chá-khí taⁿ án-choáⁿ ?” “Chá- khí to bô thiaⁿ-kı̀ⁿ teh koh jiáng, iā bô thiaⁿ-kı̀ⁿ khí-lâi chú-pn̄g, iā goā chá Teng-hû-hiaⁿ chiū chò i chhut-khı̀-lah.”
“Ah ! Bô tō-lí sı̍t-chāi chin khó- sioh.” Bo̍k-su chiap Bo̍k-su-niû ê oē- kóng “Oân-ché, lí pêng-sı̂ bat kóng tō- lí hō͘ in thiaⁿ á-bô ?” “Hán-tit nē, Teng-hû-hiaⁿ thàu-chá chhut-khı̀ kàu àm-àm tò-lâi; koh ū-sı̂ àm-sı̂ tong-tı̍t, goán chin hán-tit tú-tio̍h i. Nā tú-tio̍h sı̄ kap i saⁿ chioh mn̄g nā-tiāⁿ, koh chin oh chhin-kı̄n; m̄-chai sı̄ chò kàm-tok ê tē-ūi á m̄-sı̄. Pêng-sı̂ bı̄n hán-tit chhiò, nā bô seng mn̄g--i, i m̄-bat beh mn̄g lâng--ê, só͘-í goá hán-tit kap i kóng-oē. Iā nā-sı̄ Teng-hû-só tú-tn̄g ū-sı̂-á, goá bat kóng tām-po̍h hō͘ i thiaⁿ. He sı̄ bô hiah khoài, sı̄ hui-siông ê bê-sı̀n, chhú-chêng āu-piah to hē, to pài. Lán chia ê biō pài bô kàu, kū-nı̂ chiah khı̀ Pak-káng Tiâu-thian-kiong Má- chó͘-pô hia koah-hiuⁿ, kin-nı̂ khı̀ Sin- tek hē Sêng-hông. Thiaⁿ-kı̀ⁿ kóng, Sin-tek Sêng-hông-biō hō͘ Boán-chiu ê chêng goā-kau tāi-sı̂n Siā Kài-se̍k lâi sū-pián, kóng goā heng leh, chiū khı̀ hē. Chiàu goá khoàⁿ hit ê lâng sı̄ chin oh, khoàⁿ Bo̍k-su lí khı̀ kóng hō͘ i thiaⁿ ū piàn á-bô.”
“Bo̍k-su mā-sı̄ bô pān-hoat, tû-khı̀ Siōng-tè ê sı̂n beh kiù--i í-goā.”
“Taⁿ sı̂-kan chin oàⁿ lah, Bo̍k-su lí chhiáⁿ, goá ài kín lâi khı̀ chhı̄-tiûⁿ. Chóng-sı̄ chhiáⁿ Bo̍k-su lí iàu-ı̀ khı̀ kóng tō-lí hō͘ i thiaⁿ hè.” “Hó, kiám-chhái ē-po͘ goá nā ū ki-hoē chiah kap Bo̍k- su-niû lâi khı̀ chhoē Teng-hû-só chē, chóng-sı̄ goá m̄-bat kap i siong-hoē.” “Bô iàu-kín, lí nā lâi-khı̀ goá chiah kā lí siāu-kài.” “Hó, hó, án-ni ē-po͘ goán chiah lâi-khı̀.”
“Bo̍k-su, Bo̍k-su-niû taⁿ lín chhiáⁿ.” “Chiah koh lâi chē, ē-po͘ goán chiah lâi khı̀ chhoē-lí.” “Hó.” Tùi án-ni Oân- ché kap Bo̍k-su in saⁿ-sı̂ kín-kín khı̀ chhı̄-tiûⁿ, kàu ē-po͘ Bo̍k-su kap Bo̍k- su-niû kó-jiân saⁿ-chhoā khı̀ chhoē Oân- ché kap i khı̀ Teng-hû-só in tau.
“Teng-hû-só chhiáⁿ lí khui-mn̂g”, Teng-hû-só thiaⁿ-kı̀ⁿ Oân-ché ê siaⁿ chiū chhut-lâi, thâu-khak pau phêng- toà, sió-khoá ū hoeh âng-âng tò͘ chhut- lâi tı̄ goā-bı̄n. Chhin-chhiūⁿ chin bô-ı̀ pháiⁿ-sè ê khoán-sit, in-ūi tùi lāi-bı̄n thiaⁿ goán ê siaⁿ, koh tùi sam ê lı̂-pa- phāng ū khoàⁿ goán tı̄ goā-bı̄n teh khiā. Kàu khui sam lı̂-pa ê toā-mn̂g ê sı̂, goán chiū kā i tı̀m-thâu; i lia̍h goán kim- kim siòng, in-ūi tāi-ke m̄-bat siong-hoē.
Oân-ché chiū kā i siāu-kài kóng, “Teng-hû-só, chit ê chiū-sı̄ goán kàu- hoē ê bo̍k-su, chit ê chiū-sı̄ bo̍k-su- niû.” Teng-hû-só ê bı̄n bô hoaⁿ-hí ê khoán, chı̍t toā-kù chiū ı̀n kóng “chia̍h kàu sian-siⁿ tio̍h-m̄?” Mn̄g án-ni bô khoà thèng-hāu Oân-ché kā i ı̀n, chū án-ni oat tùi lāi-bı̄n jı̍p-khı̀, iā liâm-piⁿ koh chhut-lâi, chhiú me chı̍t-la̍k pe̍h- pe̍h ê mı̍h, chhùi phùi-phùi kiò kóng, “soe, soe; phúi-phúi, Iâ-so͘ Siōng-tè phúi-phúi.” Chiong chhiú-nı̍h só͘ the̍h pe̍h-pe̍h ê mı̍h, tı̍t-tı̍t iā-lâi. Chit-sı̂ Bo̍k-su in hu-hū kap Oân-ché 3 ê soà gāng-gāng.
2. I̍t-to soat-hı̄n(一刀雪恨)
Khí-thâu Bo̍k-su, Bo̍k-su-niû khoàⁿ i tı̍t-tı̍t iā--lâi, lia̍h chún i teh iā sím-mı̍h leh. Nā-sı̄ thiaⁿ i phùi-phùi kiò chiah siông-sè kā i khoàⁿ, tō-sı̄ iâm kap bí. Chiah chai in chı̍t-hâng saⁿ ê, sı̄ khı̀ hō͘ siak iâm-bí. Siūⁿ liáu iā hó khı̀, iā hó chhiò, iā khó-lı̂n. Oân-ché chı̍t sı̂ soà gāng-gāng, sim-lāi àm-àm teh siūⁿ chit ê lâng sı̄ siong-tong ê tē-ūi ê hū-jı̂n- lâng, iā tha̍k koè ko-lú, án-choáⁿ kin-á- jı̍t ē án-ni. Tùi Bo̍k-su kap Bo̍k-su-niû chin pháiⁿ-sè, soà tāi-ke chı̍t-sı̂ sio-khoàⁿ, tāi-ke lóng gāng-gāng bô oē.
Teng-hû-só kiau-thâu koh bán-lân ê khoán-sit, bı̄n chhàu-chhàu, huiⁿ-leh chò i jı̍p-khı̀. Thiaⁿ mn̂g soà koaiⁿ--khı̀.
Chı̍t sı̂ Bo̍k-su siūⁿ-liáu soà ài-chhiò, siūⁿ kóng taⁿ thài soà án-ni. Oân-ché kap Bo̍k-su-niû teh lâu ba̍k-sái, sim chin kan-khó͘, Bo̍k-su chiū kóng,
“Lán tiàm chia khiā lâi thè i kı̂-tó kúi kù, bāng Chú khui lō͘ kiù i, chiah tò-lâi.” Tāi-ke chiū chhih-chhih khiā tı̄ in toā- mn̂g ê lāi-bı̄n piⁿ kı̂-tó. Saⁿ lâng tı̄ hia kı̂- tó liáu-āu, Bo̍k-su, Bo̍k-su-niû kap Oân- ché saⁿ-sı̂ tò-khı̀ pài-tn̂g. Oân-ché chin m̄-koè-sim, siūⁿ kóng i kin-á-jı̍t thiau- kang chhoā Bo̍k-su kap Bo̍k-su-niû lâi hō͘ lâng chau-that. Nā-sı̄ Bo̍k-su in hu- hū chin hoaⁿ-hí, bô lia̍h chò ı̀-sù, ke̍k- le̍k an-ùi Oân-ché ê sim. Oân-ché àm- àm siūⁿ kóng, ūi Chú ê miâ siū lâng húi-pòng, siat-to̍k, phùi-noā phah-sǹg sı̄ chit ê khoán-sit. Chı̍t sim siūⁿ kóng, Chú kóng, ūi-tio̍h I ê miâ lâi siū khún- tio̍k, thí-chhiò, lé-mē ê ū hok-khı̀, in-ūi thian-kok sı̄ i ê. Nā siūⁿ án-ni, sim chiū siū an-ùi, siūⁿ kóng it-seng iā sı̄ kin-á-jı̍t thâu-pái siū chit hō lêng-jio̍k, lâi kap Chú tam-iu, chı̍t-sı̂ sim ná-chún chin hó-táⁿ, chin hoaⁿ-hí, in-ūi chai ū kap Chú saⁿ-kap ū hūn tı̄ sı̍p-jı̄-kè ê kan-khó͘. Chóng-sı̄ koh chı̍t-bı̄n siūⁿ hit-sı̂ ê chêng-kéng, chı̍t-kù iā phúi, nn̄g-kù iā phúi, iā liân kiò Chú ê sèng miâ lâi phùi. Siūⁿ-liáu ūi Chú chin m̄- goān. Siūⁿ tò-tńg, khiok sı̄ in-ūi i m̄- bat. Koh siūⁿ-tio̍h Teng-hû-só in ê ka- têng ê chhám-kéng, chiū seⁿ-khí khó-lı̂n sià-bián--i ê sim.
Chóng-sı̄ koh chı̍t-bı̄n chin m̄-goān Mô͘-kúi ê chò-kang. Oán-jiân Chú ê lô͘-po̍k ū thâi-su siū lêng-jio̍k ê khoán-sit. Só͘-í sim chin kan-khó͘, kha-pō͘ chin tāng, kap Bo̍k-su saⁿ-sı̂ chiū thâu chhih-chhih chin loé-chı̀ iā oat tùi i ê tiâⁿ jı̍p-khı̀.
Bo̍k-su in hu-hū kap Oân-ché saⁿ-sı̂ tò-khı̀. Hit àm ka-têng lé-pài tú-gū ū pa̍t ê hiaⁿ-ché lâi saⁿ chhoē chē, chiū tāi-ke ūi chit chân sū lâi kı̂-tó.
Keh kúi jı̍t āu, Bo̍k-su ka-tı̄ chı̍t lâng koh khı̀ hóng-mn̄g Teng-hû-só. Chit- pái bô tùi toā-mn̂g, sı̄ tùi āu-bı̄n tiâⁿ ê sió-mn̂g khı̀. Khı̀ ê sı̂ Teng-hû-só thâu- khak ê phêng-toà lóng tháu khí-lâi lah, chiàu khoàⁿ m̄-sı̄ sím-mı̍h tāng-siong, chiū liâm-piⁿ hó-hó, tı̄ āu-bı̄n chóng-pho͘ soà chhut-lâi ê cháu-bé-lō͘ teh ta̍h kha- ta̍h-chhia , teh chhia gín-ná saⁿ.
Bo̍k-su khı̀, khoàⁿ i ê cha-bó͘-kiáⁿ iā tı̄ hia, chiū kap in tı̀m thâu kā in chhéng-an. Chit-pái Teng-hû-só khah bô hiah pháiⁿ. Phah-sǹg siūⁿ téng-jı̍t ka-tı̄ ê só͘ chò pháiⁿ-sè, só͘-í khah bô hiah pháiⁿ. Chóng-sı̄ bı̄n chhih-chhih chò i chhia saⁿ, iā bô beh chhiù-chhái Bo̍k-su. Bo̍k- su iā bô iàu-kín i ū chhiù-chhái i á bô. Tı̍t-tı̍t kiâⁿ kàu Teng-hû-só teh ta̍h chhia chò saⁿ ê ūi, chiū chē tı̄ nı̂-chı̂ⁿ cháu-bé-lō͘ ê kı̂ⁿ (chóng-pho͘ soà chhut-- lâi ê kı̂ⁿ 緣側) chiū kóng,
“Chêng-jı̍t chin sit-lé, kap Oân-ché chin chhióng-pōng lâi pài-hāu--lí. Kin- á-jı̍t koh lâi, ǹg-bāng bô khı̀-hiâm, goá ài tha̍k kúi kù Sèng-keng hō͘ lí thiaⁿ.”
Bo̍k-su kóng án-ni, Teng-hû-só iā sı̄ bô thêng-kha, chò i chhâi-hông-chhia tı̍t-tı̍t lap, chhia ê siaⁿ phē-phē-kiò. Phah-sǹg i sı̄ khoàⁿ bo̍k-su chò chhin- chhiūⁿ káu teh pūi, só͘-í m̄-chhap--i.
Bo̍k-su iā put koán-thaⁿ, chiū hian chı̍t-ūi Sèng-keng tha̍k hō͘ i thiaⁿ. Tha̍k liáu chiū chio i kı̂-tó. In-ūi Bo̍k-su khoàⁿ bô ki-hoē thang kóng tō-lí hō͘ i thiaⁿ. M̄-kú kı̀-jiân lâi, m̄-ài khang- khang tò-khı̀. Bo̍k-su chiū khiā khí-lâi kı̂-tó. Teng-hû-só khoàⁿ chò bô kap i kan-sia̍p, iû-goân chò i ta̍h chhâi-hông- chhia, i ê cha-bó͘-kiáⁿ 7 hoè, tı̄ sin-piⁿ ba̍k-chiu kim-kim siòng. Phah-sǹg i sı̄ siūⁿ chit ê o-jih-sàng sı̄ khí siáu, goán a-bó to m̄-chhap--i, i thài ba̍k-chiu kheh- kheh teh liām sím-mı̍h. Só͘-í cha-bó͘ gín-ná lia̍h chò chin kı̂-ı̄ⁿ, chin sim-sek kim-kim siòng.
Bo̍k-su bián loā-kú chiū kı̂-tó soah, chiū kap Teng-hû-só saⁿ-sı̂ tı̀m-thâu chhut-khı̀. Teng-hû-só iû-goân bô pàng kang chò i ta̍h chhâi-hông-chhia, thâu- boé i lóng m̄ chhap Bo̍k-su. Kàu Bo̍k- su chhut sió-mn̂g ê sı̂, chiū kiò i ê sè cha-bó͘-kiáⁿ kín khı̀ koaiⁿ mn̂g, oán-jiân kiaⁿ Bo̍k-su koh oat tò-tńg ê khoán.
Chóng-sı̄ Bo̍k-su chin hoaⁿ-hí i kin- á-jı̍t ē tit tı̄ hit ê lâng ê ka-têng tha̍k Sèng-keng. Iā ē tit tı̄ Teng-hû-só ê bı̄n-chêng ēng Iâ-so͘ ê miâ kı̂-tó, iā m̄- bián koh siū siak iâm-bí, só͘-í chı̍t-lō͘ iân-lō͘ kám-siā Siōng-tè. Siūⁿ kóng Chú í-keng ū iâⁿ Mô͘-kúi chı̍t pō͘ lah.
Ū chı̍t chá-khí, Oân-ché toā-pō͘ kiâⁿ, sè-pō͘ lap, lâi kàu Bo̍k-su ê siok-sià, phēⁿ-phēⁿ chhoán, bı̄n sit-sek, kóng-oē toā-chı̍h-kâu, chhin-chhiūⁿ chin kiaⁿ ê khoán-sit.
Bo̍k-su kap Bo̍k-su-niû khoàⁿ i hiah- nih tio̍h-kip koh kiaⁿ-hiâⁿ ê khoán, chiū kín chhiáⁿ i jı̍p-lâi chē.
Oân-ché bô khoà chē lo̍h í, chiū kóng, “hāi-lah-nē, Bo̍k-su.”
“Án-choáⁿ hāi ? Hāi án-choáⁿ ? Taⁿ lí mā chhoán lı̄--leh, chiah kóng”.
Oân-ché hoān iáu sı̄ phēⁿ-phēⁿ-chhoán toā-chı̍h, kiam ka-láu-loé, thı̍h-thı̍h-kiò teh kóng, “Bo̍k-su, lán téng-jı̍t khı̀ chhoē hit ê Teng-hû-só hāi lah nē.”
“Kan-ta hāi, hāi, taⁿ sı̄ hāi án-choáⁿ?”
Oân-ché chiah chē lo̍h í, chhin-chhiūⁿ khah bô chheⁿ-kông ê khoán chiah kóng,
“Bo̍k-su, lán chêng-jı̍t khı̀ thàm--i, hit ê chí-moē cha-hng ēng thı̀-thâu-to beh thâi-sí in tiōng-hu nē.”
“Ia̍h ū kā i thâi á bô ?” “Ū.” “Thâi- tio̍h tó-ūi ?” “Thâi-tio̍h ām-kún.”
Bo̍k-su-niû thiaⁿ-liáu chin kiaⁿ, sim- koaⁿ pho̍k-pho̍k-chhéng kín mn̄g kóng, “Taⁿ án-choáⁿ ?”
Oân-ché kóng, “Hit-sı̂ Teng-hû hiaⁿ kín hoah kiù-lâng, m̄-kú í-keng thâi chı̍t khang, tı̄ tò-pêng ê hı̄ⁿ-á-āu, hoeh chim-chim lâu.”
Bo̍k-su-niû koh mn̄g kóng, ”Sı̄ án- choáⁿ kā i thâi.”
“Thiaⁿ-kı̀ⁿ kóng, chū hit-jı̍t ang-bó͘ oan-ke liáu-āu, Teng-hû-hiaⁿ koh-khah khı̀. Chū án-ni m̄-chai tùi tó-ūi khı̀, sa chı̂ⁿ khı̀ tùi Chùi-goa̍t-lâu ê thâu-ke sio̍k hit ê Pó-chu-á, chū án-ni khı̀ soè chı̍t tè chhù tı̄ Mûi-ki-teng. Kóng iā hak saⁿ-á-tû kiàⁿ-tâi, ta̍k hāng to ū, chiah kú àm-sı̂ tiāⁿ bô tò-lâi chhù- nih. Teng-hû-só thı̂, khàu, siak, chiah kú bı̄n chheⁿ-sún-sún bē su khí kông.
M̄-chai sím-mı̍h lâng kā i thok-thàu, chū án-ni khı̀ chhoē, chù-sí khı̀ hō͘ i chhoē-tio̍h hit keng chhù. Khı̀, kó-jiân khoàⁿ Teng-hû-hiaⁿ kap Pó-chu-á oán- jiân hu-hū to bô hiah chhin, chū án-ni bē tit Pó-chu-á sí, beh jı̍p-khı̀ phah Pó- chu-á, Teng-hû-hiaⁿ chhò͘-hoé koh toā- to̍h. Ēng chı̍t ki siông ēng ê kàu-chhoê, sa khí--lâi tùi Teng-hû-só liân phah sò͘ cha̍p ē. Teng-hû-só jû-thâu sàm-koè, chı̍t siaⁿ pē, chı̍t siaⁿ bó, chı̍t siaⁿ lé, chı̍t siaⁿ khu̍t, iân-lō͘ khàu tò-lâi.
Chhàu-tú-khám cha-mê Teng-hû-hiaⁿ tò-lâi chhù-nih khùn, cha-hng ê àm- thâu-á goá khoàⁿ Teng-hû-só chng kàu chheng-chheng chhó-chhó, so hún chhah hoe, chhēng kûn, goá sim-koaⁿ-té àm- àm teh siūⁿ kóng, ê-hng tāi-ke ang-bó͘ káⁿ sı̄ khah ū oē kóng lah. Ná chai thiⁿ beh kng ê sı̂, hut-jiân gín-ná háu kàu kè-kè-kiò, iā cha-po͘ lâng siaⁿ teh hoah kiù-lâng. Goán chı̍t-ē koè-khı̀ kā i khoàⁿ, chı̍t chóng-pho͘ choân hoeh. Chhù-piⁿ ûi-ûi lâi khoàⁿ, ū-ê kín khı̀ kā i kiò i-seng, ū-ê kóng phah-sǹg tio̍h khı̀ pò phài-chhut-só͘, ū-ê kóng ang-bó͘ tāi pháiⁿ-khoàⁿ. Taⁿ i-seng seng lâi khoàⁿ siong sı̄ tāng á khin chiah lâi phah-sǹg. I-seng lâi khoàⁿ, chai sı̄ bô sím-mı̍h tāng siong, sı̄ thâi tùi hı̄ⁿ-á-āu siah chı̍t-lı̍h, kut tēng-tēng, só͘-í bô toā siong-hāi, kín siat-hoat khı̀ i-ı̄ⁿ kô͘-io̍h.
Tāi-ke loān soah, chiah siūⁿ-tio̍h Teng-hû-só bô tı̄ lāi-bı̄n. Iā chhoē bô hit ki to. Ū-ê kóng kiàm-chhái chhut- khı̀ chū-chı̄n, ū-ê kóng phah-sǹg sı̄ cháu tò-khı̀ āu-thâu. Tāi-ke sim chin hoân- ló, hun kúi-nā ūi khı̀ chhoē.”
Bo̍k-su kap Bo̍k-su-niû thiaⁿ chiah ê oē sim chin kan-khó͘, Bo̍k-su-niû kín koh mn̄g kóng, “Ia̍h chhoē ū á bô ?”
“M̄-chai leh, goá khoàⁿ-kı̀ⁿ án-ni liâm- piⁿ lâi kā lín kóng, taⁿ tàu-tí m̄-chai cháiⁿ-iūⁿ.”
