5 Toā Thoân-oân
Tùi hit-jı̍t hu-hū tı̄ pı̄ⁿ-ı̄ⁿ sio jı̄n chhò liáu-āu, tāi-ke kúi-hun ū khah hó kám. Nā-sı̄ Teng-hû-só í-keng tit-tio̍h Chú ê kám-hoà, só͘-í chı̄n só͘-ē beh ēng Chú ê thiàⁿ lâi thiàⁿ i ê tiōng-hu. Só͘-í tùi hit-jı̍t í-āu ta̍k-jı̍t khı̀ khoàⁿ i, iā ta̍k-jı̍t bé koé-chí hó-piáⁿ khı̀ kā tiōng-hu māi- pēⁿ. Kai-chài pı̄ⁿ-sè chı̍t-jı̍t, chı̍t-jı̍t ū chiām-chiām khah-hó. Koh Siāng iàu- kín--ê, chiū-sı̄ Teng-hû-só tò-lâi nā tha̍k chı̍t kù Sèng-keng khah hó ı̀-sù--ê, chiū siá tiàm chı̍t-tiuⁿ choá, kā i thau-hē tiàm bı̂n-chhn̂g-thâu. Tiām-tiām chò i khı̀. Khí-thâu teng-hû-hiaⁿ bô lia̍h choè ı̀-sù lóng bô kā i tha̍k. Koè kúi-nā-jı̍t lah, I chiū kā i the̍h-khí-lâi tha̍k.
Ài ah ! Che sı̄ sím-mı̍h ? Thái ū chit-hō-choá, siá chit-hō-oē tı̄ bı̂n-chhn̂g- thâu. Chóng-sı̄ Teng-hû-hiaⁿ pêng-seng sı̄ chin léng-chēng ê lâng, iā lóng bô kóng, kàu chiâⁿ-cha̍p-jı̍t-āu chiū thè-ı̄ⁿ tò--lâi.
Tò-lâi lāi-bı̄n lóng oāⁿ sin khong-khı̀, bān-sū piàn-khoán. Teng-hû-hiaⁿ sū-sū kha-sang chhiú-liāng, chhùi chhiò-gı̄-gı̄, hoaⁿ-thâu hí-bı̄n, tùi toā tùi sè khin-siaⁿ-sè-soeh, oán-jiân chêng-āu chı̍t ê lâng. Teng-hû-hiaⁿ sim àm-àm chin toā ê kám-kek, chū án-ni lâng chin kú bô koh khı̀ Mûi-ki-teng chhoē Pó-chu-á. I chin ài kā i khoàⁿ Teng-hû-só sı̄ teh pı̀ⁿ siáⁿ-khoán, thài-ē chiah toā piàn. Teng-hû-só jêng-jiân ta̍k-jı̍t siá tú-hó ê Sèng-keng-kù kā i khǹg tı̄ i ê tiōng-hu beh khı̀ chhut-khı̂n só͘ chhēng goā-saⁿ ê tē-á-lāi. Teng-hû-hiaⁿ nā beh jı̂m ki-á-hun chiū jı̂m--tio̍h. Hòⁿ-kı̂, chiū kā i tha̍k, múi-pái to siū toā kám-kek.
Kàu ū chı̍t jı̍t, Teng-hû-hiaⁿ sim kı̂- koài tòng-bē-tiâu, chiū mn̄g Teng-hû- só só͘ siá tı̄ choá-phı̀ⁿ ê oē sı̄ tùi tó-ūi lâi. I chiah hó-táⁿ the̍h Sèng-keng hō͘ Teng-hû-hiaⁿ khoàⁿ.
Teng-hû-hiaⁿ put-kak, soà kóng, “Lí iā khı̀ kap lâng chia̍h-kàu, tio̍h-m̄ ?”
Teng-hû-só hit-sı̂ hó-táⁿ, chiah chiong tùi siak iâm-bí khí, kàu choè-kı̄n ê sū, lóng kóng chı̍t-piàn hō͘ i ê tiōng-hu thiaⁿ.
Kı̂-sı̍t Teng-hû só chū tùi Chheng- chúi tò-lâi chiū kap Oân-ché khı̀ pài-tn̂g lé-pài, pài-jı̄ hū-jı̂n-hoē iā chin jia̍t-sim, só͘-í chiah ū kin-á-jı̍t ê toā-piàn. Bo̍k- su kap Bo̍k-su-niû iā koh lâi chhoē I chin-chē pái, múi pái lâi tek-khak tio̍h kap i chò-hoé tha̍k Sèng-keng, kı̂-tó chiah beh pàng Bo̍k-su tò-khı̀.
Teng-hû-hiaⁿ thiaⁿ-liáu toā siū kám- kek, soà kóng i iā beh khı̀ lé-pài. Chin- chiàⁿ ū iáⁿ, keh bı̂n-á-jı̍t sı̄ lé-pài-jı̍t. Teng-hû-hiaⁿ, Teng-hû-só kap sè-kiáⁿ kap Oân-ché in chı̍t-ke lóng saⁿ-chhoā chò-hoé lâi lé-pài. Bo̍k-su, bo̍k-su-niû kap tng-chit, hiaⁿ-tı̄, chí-moē lóng toā hoaⁿ-hí, in-ūi kàu-hoē tùi thiaⁿ bo̍k-su kap Oân-ché kóng chit-chân-sū tāi-ke lóng siông thoè in kı̂-tó. Chiū tāi-ke kám-siā Siōng-tè ê toā koân-lêng kap thiàⁿ-thàng.
Tùi hit-sı̂ khí, Teng-hû-hiaⁿ iā toā jia̍t-sim, pháiⁿ lóng hiat-ka̍k. Chùi-goe̍h-lâu ê Pó-chu-á iā hō͘ i khı̀, hiah ê Pó-chu-a ēng ê mı̍h bē-bē-tiāu khı̀ hêng- chè. Siông khiàm lâng tām-po̍h, Teng- hû-só ê kim-khı̀ iā the̍h chhut-lâi bē khı̀ saⁿ-thiⁿ hêng--lâng. Iáu-khiàm tām-po̍h, ang-bó͘ tāi-ke khiām, ǹg-bāng bô kú thang hêng chheng-chhó.
U̍t--chı̍t-ê, nı̂-tau kàu la̍h. Só͘ khiàm ê chè lóng hêng chheng-chhó. Teng- hû-só chāi-lâi sin-thé bô tú-hó ê hū-jı̂n- lâng-pı̄ⁿ, iā khı̀ pı̄ⁿ-ı̄ⁿ thong-ı̄ⁿ, taⁿ iā oân-choân-hó. Chı̍t-ke chhiò gı̄-gı̄, pı̄- pān-sim beh ngiâ-chih Sin-chhun. Nā- sı̄ iáu-ū chı̍t-hāng boē chheng-sǹg, chiū- sı̄ boē tû ngó͘-siōng.
Só͘-í tı̄ 12 goe̍h hā-sûn, ū chı̍t-mı̂- hng Teng-hû-hiaⁿ chhiáⁿ bo̍k-su, bo̍k-su- niû kap Oân-ché in hu-hū khı̀ in tau chē, choè-hoé lé-pài. Teng-hû-só in hu- hū iā chē saⁿ pâi. Bo̍k-su hit-mı̂ tha̍k Í-hut-só͘ 5 chiuⁿ, hu-hū ê tō-lí khó͘- khǹg in. Nn̄g-lâng kám-khài bû-liōng, oán-jiân koh têng ha̍p-hun choè sin- chhòng-chō ê ka-têng.
Lé-pài-soah, Teng-hû-hiaⁿ the̍h pit kap choá, ài bo̍k-su kā i siá chı̍t pak Sió- tiong-tông choè kı̀-liām. Bo̍k-su bô kiàn-siàu ka-tı̄ ê jı̄ bái, chiū iā gia̍h-pit khí-lâi kā i siá.
“Hu-hū it-thé” Sı̀-jı̄ ê toā-jı̄ soà siá Sèng-keng-chat tı̄-hia. Siá liáu-āu tāi-ke kám-siā. Lé-pài-soah, chiū chiong pu̍t-toâⁿ téng ê pu̍t choè chı̍t-ē chhiáⁿ chhut-khı̀ goā-tiâⁿ lâm chúi-iû pàng-hoé sio-khı̀.
Kàu sin-chiaⁿ ê thâu-chı̍t-lé-pài, Thong-ke lóng-chóng khiam-pi siū Sé-lé lâi jı̍p tı̄ Chú ê Kàu-hoē. Tng siū sé-lé ê sı̂, Teng-hû-hiaⁿ, Teng-hû-só lóng khí--lâi kan-chèng in chá ēng kha- chiah ǹg Siōng-tè lâi kiâⁿ, lâi seng-oa̍h ê sı̂, sı̄ goā-toā ê khó͘-chhám. Iā chit sı̂ in ǹg Siōng-tè ê bı̄n lâi kiâⁿ, sı̄ goā-toā ê pêng-an kap siū chiok-hok. Tāi-ke bô m̄ kám-kek thoè in lâu ba̍k-sái kám-siā Chú.
Chí-ū chı̍t-tiâu lō͘
[ Tı̄ kū-nı̂ Phian-chhip-pō͘ ū chham-siông ài hō͘ lán ê Pò khah ū lūn-te̍k, só͘-í ū-sı̂ ài thok lâng siá chong-kàu siáu-soat. Kū-nı̂ í-keng ū chhiáⁿ Loā Jı̂n-seng Bo̍k-su siá chı̍t-tè “Ēng ka-chiah ǹg Siōng-tè”, tit-tio̍h tāi-ke ê hoan- gêng, kā lín seh-siā. Chóng-sı̄ hit-tè sı̄ i ê thâu- sū nā-tiāⁿ, i ê chóng tê-ba̍k sı̄ “Thiàⁿ ê sèng-lı̄”. Hun chò 4 pō͘ : ---
1.Ēng ka-chiah ǹg Siōng-tè.
2.Chí-ū chit-tiâu lō͘.
3.Lê-bêng.
4.Kok-kok-thaⁿ ê lō͘.
I ê biô-siá, kap i ê bûn-pit, bián goá koh tı̄- chia kóng sím-mı̍h, i bat siá “A-niâ ê ba̍k-sái” kap í-keng khiat-chài liáu ê “Ēng ka-chiah ǹg Siōng-tè”, kàu-gia̍h thang chèng-bêng lah. Tùi taⁿ khí, chı̄n só͘ ē beh koh liân-chài tē-jı̄ pō͘ “Chí-ū chit-tiâu lō͘”, só͘ beh biô-siá--ê sı̄ ka- têng chong kàu kàu-io̍k kap kàu-hoē, sı̍t-chāi kàu-gia̍h thang hō͘ lán kı̂-thāi. Phian-chhip-pō͘. ]
1. Kám-siā ê su̍t-hoâi
“Bo̍k-su pêng-an.”
“Pêng-an, Teng-hû só lâi chē, chá- khí hán-kiâⁿ.”
“Put-sı̂ hō͘ bo̍k-su kap bo̍k-su-niû chin thiàⁿ-thàng, sim siông siàu-liām, chhoē chı̍t ê ki-hoē ài lâi kā lín seh-siā. Nā-sı̄ sū-bū chin-chē, soà chin chhiân- ân. Taⁿ tú-hó tı̄ kin-á-jı̍t ū chı̍t ê ki- hoē, só͘-í thiâu-tı̂ beh lâi chhoē lí chē, chhim-chhim kā lí kap bo̍k-su-niû seh- siā. Iā ǹg-bāng bo̍k-su koh-khah chí- tō goá thâu-chêng ê lō͘.”
“Khí-kám, khí-kám, taⁿ chhiáⁿ chē. Bo̍k-su-niû, Teng-hû só lâi, chhiáⁿ phàu-tê.”
“Hó, Teng-hû só pêng-an.”
“Pêng-an, Bo̍k-su-niû, lí teh bô êng hō͘ⁿ ?”
“Sı̄, goá teh kā gín-ná pó͘-saⁿ. Taⁿ chhiáⁿ chē.”
“Bo̍k-su, goá nā siūⁿ-tio̍h kū-nı̂ ê sū, chiū chin kiàn-siàu, iā siū lín ê thiàⁿ hiah toā, beh cháiⁿ-iūⁿ tap-siā.”
“Teng-hû só, lūn kū-nı̂ ê sū, lán m̄- bián tiāⁿ koh khoà-sim, tı̄-hia, lán ê Sèng-keng kóng, bo̍h-tit khoàⁿ āu-bı̄n, to̍k-to̍k tı̀-ı̀ thâu-chêng, ǹg só͘ chhah ê pio lâi cháu. Lūn lí só͘ choè hiah ê kū ê tāi-chı̀, sı̄ tùi lí m̄-bat. Tùi m̄-bat lâi chò--ê, lán ê Chú bô khêng-khàm, to̍k- to̍k tùi chit-tia̍p khí, tio̍h kiâⁿ tı̄ kng- bêng, sin ê lō͘, thang hō͘ Chú hoaⁿ-hí. Iā lūn goán ū thiàⁿ lín ê ka-têng, che sı̄ tùi Chú ê thiàⁿ chiah ē, m̄-sı̄ goán thiàⁿ lín, sı̄ Chú ê thiàⁿ thàu-koè goán lâi thiàⁿ lín. Só͘-í lín tio̍h kám-siā Chú. Lín, goán pêⁿ-pêⁿ sı̄ hiaⁿ-tı̄ chí-moē, put-kò goán tı̍t-chiap siū Chú kau-tāi chò lô͘-po̍k, chiàu-sı̂ lâi pun lêng-kài ê bí-niû hō͘ lín nā-tiāⁿ. Iā-sı̄ chin bô lō͘- ēng ê lô͘-po̍k. Só͘-í lín m̄-thang kám- siā lâng, sı̄ tio̍h kám-siā Siōng-tè ê liap- lí kap Chú pó-huih ê sio̍k-hoê.
Teng-hû só, lí khoàⁿ ! Lūn lín ka- têng ê tit-tio̍h chín-kiù, m̄-sı̄ kan-ta goá kap bo̍k-su-niû chiū ē. Chhı̀-siūⁿ, nā m̄-sı̄ pêng-seng jia̍t sim thiàⁿ Chú ê Oân ché chı̍t-ke chò lí ê chhù-piⁿ, iā nā m̄-sı̄ Chheng-chúi ê thoân-tō sian-siⁿ ê chhian-kim kap sian-siⁿ-niû ê an-ùi bián- lē, lí chiū bô tit-kiù ê ki-hoē. Só͘-í bān- sū sı̄ Sı̂n ê liap-lí. I ê sèng-chhiú khan lí, I ê ba̍k-chiu khoàⁿ--lí. Thiⁿ-pē bô pàng-sak lí. Koh Sèng-sı̂n kàu-sı̂ ū khui lí kap Teng-hû hiaⁿ ê sim, hō͘ lín ê sim kàu-sı̂ ke̍k-ngē pı̀ⁿ-chò nńg, hō͘ lín kam-goān chiap-la̍p Chú Sı̍p-jı̄-kè ê kng. Tùi án-ni bat choē ê thang kiaⁿ, bat ka-têng hu-hū saⁿ-hô ê pit-iàu, soà chai ka-tı̄ sı̄ kai-sí ê choē-jı̂n, tû Chú Iâ-so͘ í-goā bô lō͘. Koh Sèng-sı̂n pang- chān lín hó-táⁿ sı̀n-khò Chú, chiū lín ê seng-gâi piàn-oāⁿ. Só͘-í m̄-sı̄ tio̍h kám- siā lâng. Tio̍h chheng-chheng kám-siā Chú.”
Nā koè-thâu kám-siā lâng, chiū ài pı̀ⁿ- chò jı̂n-chêng-tek ê sı̀n-tô͘. Tùi lín ê sı̀n-gióng bô lı̄-ek, ē pı̀ⁿ-chò pài bo̍k-su, i-lāi bo̍k-su. Soà bē-kı̀-tit kám-siā Siōng-tè, oá-khò Siōng-tè. Bo̍k-su pún-sin iā bô lı̄-ek, in-ūi hāi bo̍k-su ê sim tiòng-toā, ka-tı̄ chū-ko khí--lâi. Só͘-í tùi chia khí, bô-lūn lí, goá, lóng tio̍h kui êng-kng hō͘ Chú.”
Teng-hû só thiaⁿ chiah ê oē, thâu- khak chhih-chhih, the̍h chhiú-kin ng tı̄ bı̄n-nı̍h, kín chhit ba̍k-sái. Koh chı̍t-pái siūⁿ-tio̍h kū-nı̂ ê chhám-kéng, koh chı̍t pái sin-sin kám-kek Siōng-tè thiàⁿ- thàng ê an-pâi, kap Chú Sı̍p-jı̄-kè ê pó- huih. Iā siūⁿ bo̍k-su ê khiam-pi, in-ūi bo̍k-su kap sio̍k-jı̂n toā koh-iūⁿ, bô thó jı̂n-chêng, soà m̄-káⁿ êng-kng ka-tı̄. Só͘-í it-hoat kám-kek Chú ê thiàⁿ, chai Chú ê thiàⁿ ū chhui-pek lâng kàu án-ni, hō͘ lâng ē kàu seⁿ, sí, lóng ūi-tio̍h I. Ah ! Chú ê thiàⁿ, toā ah !
Tú teh siūⁿ chiah ê sū, bo̍k-su-niû phâng-tê kap piáⁿ chhut--lâi. Nā-sı̄ Teng-hû só ê bı̄n iáu-kú chhih-chhih. Bo̍k-su-niû lâi. “Ò͘ ! Ài-gio̍k-á, lí kap A-bú lâi. Chin koai, chin koai. Bo̍k- su-niû piáⁿ hō͘--lí.”
Cha-bó͘-gín-ná chin sè-jı̄, Teng-hû só kā sè-kiáⁿ kóng, kā bo̍k-su-niû the̍h, soà seh-siā. Ài-gio̍k-á chiū chhun siang-chhiú lâi the̍h, soà teng-lêng seh-siā. Bo̍k-su- niû chiū thı̂n-tê chhiáⁿ Teng-hû só.
Teng-hû só khiā khí--lâi, siang-chhiú chiap-tê, tāi-ke chiah chē lo̍h í, koh chiap-soà kóng oē.
Bo̍k-su hit-sı̂ ēng chhiò-chhiò ê bı̄n, khoàⁿ Ài-gio̍k-á kóng, “Ài-gio̍k-á, bo̍k- su chin sit-lé hō͘ⁿ ! Tha-tú-á kò͘ kap lí ê a-bú chhéng-an, soà bô kò͘ kap lí chhéng-an.”
Teng-hû só khan ài-gio̍k-á ê chhiú khí--lâi, kā bo̍k-su kóng, Bē. Khiā hó- sè kā bo̍k-su chhéng-an. Ài-gio̍k-á chiū khiā sı̀-chiàⁿ kā bo̍k-su chhéng-an. “Bo̍k-su pêng-an.” Tāi-ke chin hoaⁿ-hí, chiū chiap-soà koh kóng-oē.
Teng-hû só kóng, “Bo̍k-su, chiah kú goá hoat-kiàn chı̍t-hāng chin toā ê chin-lí.”
“Hò͘ⁿ ! Iáu khah hó. Lí kóng goá thiaⁿ khoàⁿ-māi.” “Tùi goá ê koè-khı̀ ê seng-oa̍h, goá chai chı̍t-hāng, chiū-sı̄ nn̄g ê o͘, bē pı̀ⁿ- chò chı̍t ê pe̍h ; nn̄g ê pháiⁿ, bē pı̀ⁿ- chò chı̍t ê hó.”
Bo̍k-su ı̀n kóng, “Che sı̄ sı̍t-chāi ê tāi-chı̀.”
Teng-hû só chiap-soà kóng, “Khí-thâu goá siūⁿ goá ê tiōng-hu hiah pháiⁿ, goá beh pí i koh khah pháiⁿ, lâi kap i tàu-hoat. Goá ka-tı̄ siūⁿ goá ū siong- tong ê ha̍k-būn, iā āu-thâu bē sàn-hiong. Lāu-phoê beh phoè i chhı̀n-bah-tàng. Àn-sǹg beh kā i pı̀ⁿ kàu bô bı̄n-phoê. Kàu lōng-ke-soàⁿ-the̍h, tāi-ke sí, chiah kam-goān. Kàu taⁿ chı̍t-ē siūⁿ, chin kiàn-siàu, chin gōng, chin-chiàⁿ sı̄ Mô͘- kúi jı̍p-sim. Kàu tit-tio̍h Chú kiù liáu- āu, m̄-nā chai nn̄g ê pháiⁿ, bē chiâⁿ-chò chı̍t ê hó. Soà chai beh hō͘ toā pháiⁿ hoán-hoé, tio̍h ēng toā hó iâⁿ--i. Hit ê toā hó, chiàu goá só͘ chai, chiū-sı̄ bû- hān ê thiàⁿ.” Bo̍k-su ı̀n kóng, “Chin-chiàⁿ sı̄ án-ni.”
I sı̄ goá ê tiōng-hu
Teng-hû só kóng kàu chin jia̍t, ka-tı̄ chin kám-kek ê khoán.
“Bo̍k-su ah ! Án-choáⁿ-iūⁿ nē. Boē sı̀n Chú ê sı̂ goá ê ta-po͘-lâng, i mē goá chı̍t-kù, goá chiū mē i 2, 3 kù. I nā mē goá sió-khoá ok-to̍k, goá chiū chhoē siāng tiòng-to̍k ê oē kā i mē tò-tńg. I sui-bóng bô mē goá, goá iā tiāⁿ mē ke mē káu ; mē gín-ná lâi khau-sé, gia̍t-siat chau-that--i. I boē jı̍p mn̂g goá ê bı̄n to chhàu piān lo̍h lah ; i jı̍p mn̂g goá ê bı̄n chiū koh khah chhàu. Sim chin gêng, tiāⁿ chı̍t-oân chhin-chhiūⁿ chio̍h- thâu tù-teh. Nā m̄-thang sio ı̀n 2, 3 kù oē, chiū hông-hoat. I lı̄ chhoh, goá iū lé, toā-ē oāⁿ sè-ē. Ū-sı̂ siak oáⁿ siak tı̄ ; put-kò ke-lāi bô chı̍t-sı̂ ê chēng- chēng. Ah ! Chin-chiàⁿ sı̄ oa̍h tē-ge̍k. Chit-sı̂ koh siūⁿ to sim sng, ē kiaⁿ. Án- choáⁿ hit-sı̂ ē án-ni.”
Bo̍k-su-niû ài kóng-chhiò, kóng “poh káⁿ sı̄ lí choè sin-niû ê sı̂, lín Teng-hû-hiaⁿ beh chhiáⁿ lí chhut kiō ê sı̂, kā lí that kiō mn̂g, iā lí to káⁿ iā kā i that chhut lâi--leh, m̄ chiah nn̄g-ê ē hiah gâu oan-ke.”
Teng-hû só kiàn-siàu, kiàn-siàu kóng, “Bô iáⁿ nē, lâng goán hit sı̂ chē chū- tōng-chhia, m̄-sı̄ chē kiō nē, koh nn̄g-ê chē lia̍h-pâi, saⁿ-sûi tùi chū-tōng-chhia lo̍h-lâi, chiah lâi kóng-ò͘.”
“Ū iáⁿ mı̄ ! Án-ni oan-ke sı̄ chiām-sı̂ lah. Taⁿ bē lah--lah.”
Tāi-ke lóng ài chhiò, chı̍t-sı̂ kheh- thiaⁿ lóng sı̄ chhiò siaⁿ. “Bo̍k-su-niû, taⁿ goán ū-iáⁿ bē oan-ke lah nē, tùi goá sı̀n Chú liáu-āu.”
Tú kóng chit kù teng-hû só ê bı̄n âng-âng chū án-ni thâu chhih-chhih, kiàn-siàu kiàn-siàu chiap-soà kóng, “Chū i jı̍p pēⁿ-ı̄ⁿ goá ka-tı̄ chı̍t ê khı̀ thàm i ê sı̂, goá kā i hoē sit-lé, i iā kā goá hoē sit-lé, liáu-āu goán chiū m̄-bat koh sio-mē lah nē.”
Kóng khı̀ pēⁿ-ı̄ⁿ thàm i, sı̄ chí kū-nı̂ i thâi i ê tiōng-hu bô sí, khı̀ jı̍p-ı̄ⁿ ê sū. Só͘-í ka-tı̄ kóng ka-tı̄ pháiⁿ-sè, chiah bı̄n âng-âng kiàn-siàu ê khoán.
Bo̍k-su-niû chhiò-chhiò kóng, “Chin kiong-hí, chin kiong-hí.” Teng-hû só iáu kiàn-siàu kiàn-siàu ê khoán, chiap- soà kóng, “Goá to tha̍k Sèng-keng kóng tio̍h thiàⁿ tùi-te̍k, iā kóng ang-bó͘ sı̄ siāng chı̍t-thé. Kóng nā siàn tò-pêng ê chhùi-phoé, liân chiàⁿ-pêng iā tio̍h oa̍t hō͘ i. Goá khí-thâu m̄-sı̀n, siūⁿ kóng che beh án-choáⁿ kiâⁿ. Āu-lâi siūⁿ kóng chit tiâu lō͘ nā m̄ kiâⁿ, to iā bat kiâⁿ kàu sí pō͘, iā-sı̄ chhoē bô pêng- an lah. Só͘-í chiū kiû Chú pang-chān, kā i chhı̀-kiâⁿ. Kai-chài kiâⁿ liáu chin sèng-lí.”
Bo̍k-su-niû thiaⁿ liáu chin ài chhiò, chin hoaⁿ-hí. Kóng kàu chia Teng-hû só ê bı̄n ka-tı̄ iā chin hoaⁿ-hí, chhin- chhiūⁿ ū kng leh. Bo̍k-su-niû kóng, “Án-choáⁿ sèng-lı̄, lí mā kóng koá hō͘ goán o̍h.” Teng-hû-só chhim-chhim kám-siā Chú ê pang-chān, khoa-kháu Chú ê khùi-la̍t ê khoán. Chiū kóng, “Chóng kóng chı̍t kù : Tāi-seng goá siūⁿ Chú sià-bián goá, goá taⁿ iā tio̍h sià- bián goá ê tiōng-hu. Án-ni siūⁿ ê sı̂, sim-koaⁿ-thâu hit-oân chiū bô-khı̀-lah. Hit oân bô khı̀ ê sı̂, sim kám-kak chin chheng. Phah-sǹg hit sı̂ bı̄n iā ū khah chheng. Tē-jı̄-pō͘ : Chú kóng tio̍h thiàⁿ tùi-te̍k, goá siūⁿ-tio̍h án-ni ê sı̂, chai m̄-nā tio̍h sià-bián i nā-tiāⁿ, tio̍h soà thiàⁿ i chiah hó. Án-ni goá ê sim í-keng khǹg kap i hô, ài thé-thiap i ê sim. Āu-lâi goá chai i m̄-sı̄ goá ê tùi- te̍k. I sı̄ goá ê tiōng-hu, sı̄ goá ê thâu, sı̄ goá ê tâng-thé--ê. Goá sı̄ i--ê, i sı̄ goá--ê, goá bô thang koh khò goā-ke, goá sı̄ tio̍h lı̄-khui pē-bú lâi kiat-liân tı̄ goá ê tiōng-hu. Kàu hit sı̂ goá kám- kak chêng lóng sı̄ m̄-tio̍h, taⁿ tio̍h tùi thiàⁿ têng chhut-hoat.
Ah ! Chí-ū sı̄ thiàⁿ. Chí-ū sı̄ thiàⁿ, í-goā bô lō͘. Goá chhim-chai beh têng kiàn-chō goá ê ka-têng, chí-ū sı̄ thiàⁿ chit tiâu lō͘. Tùi án-ni goá oāⁿ sim, oāⁿ choè bô tiâu-kiāⁿ ê thiàⁿ. Tùi hit jı̍t khí, goá ê sim seⁿ-chhut sin ê ǹg- bāng, seⁿ-chhut sin ê sı̀n-liām lâi tùi- thāi goá ê tiōng-hu. Tùi hit jı̍t khí, goá ê thài-tō͘, bı̄n-iông, siaⁿ-im lóng piàn khoán. Goá ê ka-têng ná-chún tı̄ khòng-hān chiap tio̍h kam-ú ê khoán- sit, hut-jiân ū lūn-te̍k, ū oa̍h-khı̀. Tı̄ chia̍h-pn̄g-toh ū chhiò siaⁿ, tı̄ thiaⁿ-nih ū chhiò siaⁿ.”
Tú kóng kàu chia, hut-jiân Teng-hû hiaⁿ tùi goā-bı̄n jı̍p-lâi. Teng-hû hiaⁿ jı̍p-lâi khoàⁿ tāi-ke lóng teh chhiò, i iā bô ı̀-sek kap lâng tāi-ke chhiò, iā tāi-ke khoàⁿ i jı̍p-lâi chiū lóng tùi í-nih peh- khí-lâi. Bo̍k-su kóng, “Teng-hû hiaⁿ chhiáⁿ lâi chē.” “Hó, to-siā.” Teng- hû hiaⁿ seh-siā iā chiū chē-lo̍h-í, chē kap Teng-hû só keh-piah-í. Ài-gio̍k-á khoàⁿ a-pa lâi, chiū chin hoaⁿ-hí cháu oá a-pa ê seng-khu piⁿ. Tāi-ke koh chiap-soà kóng-oē.
Teng-hû hiaⁿ jı̍p-lâi ê sı̂, khoàⁿ Teng- hû só kóng kah hiah jia̍t-sim, iā i jı̍p- lâi tāi-ke soà tiām-khı̀, chiū kı̂-koài mn̄g kóng, “Lín thâu-tú-á teh kóng sím- mı̍h, tāi-ke hiah sim-sek.”
Bo̍k-su-niû chiū ı̀n kóng, “Teng-hû só teh kóng lín ê ka-têng tùi Chú tit- tio̍h goā toā ê piàn-hoà, tāi-ke tı̄-chia saⁿ tâm-lūn lâi kám-siā Chú.”
Teng-hû hiaⁿ chhiò-chhiò kóng, “Sı̄ án-ni o͘h ! Sı̍t-chāi ū iáⁿ, chin kám-siā Chú. Iā-sı̄ chin kám-siā tāi-ke ê thiàⁿ- thàng, gâu chí-tō. Chóng-sı̄ goá chiah kú chin kám-kek goá ê hū-jı̂n-lâng sı̍t- chāi pí goá ke chin gâu.”
Teng-hû só thiaⁿ Teng-hû hiaⁿ kóng án-ni, thâu-khak chhih-chhih ēng liû- phàn (流盼 ēng ba̍k-boé) kā i thau-khoàⁿ, ı̀-sù sı̄ kóng mā m̄-thang án-ni kóng, iā che kóng goá khah gâu--ê.
Bo̍k-su-niû khoàⁿ Teng-hû só án-ni, chiū chòng Teng-hû hiaⁿ ê táⁿ, kóng, “Kan-ná bô iàu-kín chò lí kóng, khoàn Teng-hû só án-choáⁿ khah gâu”.
Teng-hû hiaⁿ thiaⁿ Bo̍k-su-niû án-ni kóng, koh khoàⁿ hū-jı̂n-lâng ê bı̄n to chhiò-chhiò, chai kóng bô iàu-kín chiū kóng.
