Ī--ā

“Ī--ā” chit-ê miâ-sû, m̄-sı̄ beh hō͘ goá kiò--ê, sı̄ kan-nā beh hō͘ goá chheng-ho͘, hō͘ goá siàu-liām--ê, tı̄ goá kı̀-tı̀ lāi-té, chiông-lâi tiō m̄-bat tng-bı̄n kiò i 1 siaⁿ “Ī--ā”. In-ūi Ī--ā i ūn-khı̀ bái, put-hēng goe̍h-lāi-hong soah lâi koè-sin, mā chhoā cháu tâⁿ chhut-sı̀ bô goā-kú ê sió-moāi, pàng-sak goá chit-ê khó͘-miā ê pháiⁿ-miā ban-á-kiáⁿ. Hit-nı̂ goá 5 hoè, to iáu-boē 4 chiok-hoè--leh, thiaⁿ kóng Ī--ā mā-chiah 40 thóng hoè--niâ . Ūi-tio̍h beh kā Ī--ā ê hàn-chháu, bı̄n-bō͘, khǹg-tiàm kı̀-tı̀ lāi-té, thang hó sı̂-sı̂ siàu-liām, tiō khai-sí sı̀-kè péng toh-kūi-á, hian chhù-lāi ê hō͘-kháu-miâ-phō͘, sin-hūn-chèng, A-hiaⁿ tha̍k-koè ê chheh, sui-jiân bô goā-chē mı̍h thang péng, iû-goân chhiau kúi nā piàn, lóng chhoē bô Ī--ā ê siòng-phı̀ⁿ, mā bô Ī--ā ê kè-chng, a̍h-sı̄ hoe-hún hit-lūi ê cha-bó͘-lâng mı̍h-kiāⁿ. Bô siòng thang khoàⁿ, iōng mn̄g--ê, mn̄g A-pa, mn̄g A-hiaⁿ, mn̄g A-peh A-ḿ, mn̄g chhù-piⁿ keh-piah, tit-tio̍h ê kiat-lūn sı̄: seⁿ-chò lò-lò, hàn-chháu bē-bái, kha-chhiú liú-lia̍h, hó chò-hoé, ài pang-chān--lâng.... sêng chiâ ? Che sı̄ goá siōng-beh chai-iáⁿ--ê: sêng jı̄-hiaⁿ, lâng lò-lò ; sêng lín jı̄-ché--lah, bı̄n-á ı̂ⁿ-ı̂ⁿ ; kán-ná sêng lín A-kū, ba̍k-chiu chhim-o chhim-o ; siōng-kài-sêng lín kè hái-kháu hit-ê A-ı̂..... A-ı̂ leh A-ı̂ leh, “Sí lāu-bú, lō͘-thâu tn̄g”, hn̄g tı̄ hái-kháu, iā m̄-bat lâi-khı̀. thâu-khak-lāi iû-goân bô hêng-iáⁿ, kı̀-tı̀ ê chhng-khò͘, Ī--ā ê hit-keh ūi-tı̀, iû-goân sı̄ khang-pe̍h, bāng-tiong ê bó-chhin, sı̄ bông-bông chı̍t-phiàn, chí ū lêng-hûn toè sin-piⁿ. Ī--ā phái-miā, sè-hàn tiō hō͘ A-má phō lâi io, phiau-chún ê sim-pū-á miā, sui-jiân bô-lâng ge̍k-thāi--i, chóng--sı̄ bô-thang hióng-siū chò lâng cha-bó͘-kiáⁿ ê chū-iû, lâng kóng “Kam-goān chò sàn-hiong-lâng ê cha-bó͘-kiáⁿ, m̄-chò hó-gia̍h-lâng sim-pū”, hô-hóng Lán Siau--ka kāng-khoán sı̄ sàn-phí-phí ê chng-kha-lâng. Ī--ā tı̄-sı̂ kap A-pa kat-pâng sak-chò-tui, goá m̄-chai-iáⁿ, 40 thóng hoè ê jı̂n-seng, seⁿ la̍k-ê hāu-seⁿ, saⁿ-ê cha-bó͘-kiáⁿ, phah-sńg nn̄g--ê, chhun--ê gō͘-ê hāu-seⁿ, nn̄g--ê cha-bó͘-kiáⁿ lóng ū hó ke-kà, kiàn-lı̍p bí-moá ka-têng, sui-jiân m̄-sı̄ toā-hù toā-kùi, chóng--sı̄ láu-sı̍t phah-piàⁿ koè-jı̍t, m̄-bat chò pháiⁿ tāi-chı̀, sǹg sı̄ ū hó ûi-thoân, bô pāi-hāi tio̍h pē-bó ê miâ-siaⁿ, Ī--ā ê it-seng, sı̍t-chāi bô óng-hùi i lâi sè-kan kiâⁿ chit-choa̍h. Ī--ā ! Lí tı̄ toh-ūi ? kám bē su-liām lí ê ban-á-kiáⁿ, i í-keng 60 hoè, jı̍t-jı̍t siūⁿ beh kap lí siong-hoē, ǹg-bāng Ī--ā lí lâi thok-bāng, a̍h-sı̄ tán-thāi lí ê ban-á-kiáⁿ, sè-kan chek-jı̄m oân-moá, chiah lâi sio-chhoē.