Ū chı̍t-ūi Bo̍k-su Kóng

Ū chı̍t-ūi Bo̍k-su kóng, "Siūⁿ-kı̀ⁿ goá khah-chá, Sı̂n-ha̍k beh chut-gia̍p ê sı̂, tâng-phoāⁿ ta̍k-ê chin hoaⁿ-hí, to̍k-to̍k goá chı̍t-ê chiū bô án-ni. In-ūi goá sı̄ tâng-phoāⁿ-tiong tē-it hâm-bān. Kàu beh chut-gia̍p hit-sı̂, bô-lūn ha̍k-hāu, á-sı̄ pài-tn̂g lóng lâi chù-bûn, goá ê tâng-phoāⁿ lóng ū thâu-lō͘, to̍k-to̍k goá chı̀n-thè bô pō͘. Sian-siⁿ bô khoàⁿ-kò͘, pêng-iú bô beh saⁿ pang-chō͘. kok lâng lóng khı̀ kiâⁿ in ê lō͘. Chut-gia̍p liáu keng-kè gō͘ ge̍h-jı̍t, iā bô lâng chhiáⁿ. Chóng-sı̄ goá lóng bô sit-bāng, choan-choan oá-khò Chú. I tek-khak te̍k-pia̍t beh chiong goá chı̍t-ê ke̍k hâm-bān, ke̍k bô lō͘-ēng ê lâng lâi êng-kng I ê sèng-miâ. Goá pek-chhiat ê kı̂-tó Chú ū thiaⁿ-tio̍h. Āu-lâi ū chı̍t-ūi soè-soè keng ê káng-gı̄-só͘ siá chı̍t tiuⁿ phoe lâi chhiáⁿ. Hit-sı̂ goá toā hoaⁿ-hí. Che sı̄ Siōng-tè teh chhe goá, lóng bô mn̄g sok-kim joā-choē; sûi-sı̂ khoán hêng-lí chiū khı̀. Chı̍t-ē kàu-ūi, in kóng, in-ūi kàu-hoē bô khùi-la̍t, sian-siⁿ ê sok-kim sı̄ ta̍k ge̍h-jı̍t cha̍p-it kho͘-poàⁿ. Chóng-sı̄ goá sı̀n Siōng-tè tek-khak boē hō͘ goá gō͘--tio̍h, choè goá an-sim chhut-la̍t choè-kang. Chóng-sı̄ tı̄ hit ê tiong-kan, goá khoàⁿ-kı̀ⁿ bó͘ hoē-iú pí goá khah gâu tha̍k Sèng-keng, bó͘ chí-bē pí goá khah gâu kı̂-tó, bó͘ lâng pí goá khah jia̍t-sim. In ê sı̀n-gióng pí goá khah kian-kò͘, ū lâng pí goá khah phok-ha̍k. Ah ! Goá sı̍t-chāi sı̄ bô lō͘-ēng lah. Sı̍t-chāi kàu-ke̍k m̄-chiâⁿ-mı̍h ê lâng lah ! Goá kiám thang khah-su sı̀n-chiá ? Goá tio̍h cháiⁿ-iūⁿ choè ? Thoân Khóng-chú kóng ê tō-lí ê lâng, sı̄ hit-ê chhang-miâ, bûn it í ti sı̍p ê Gân Hoê, á-sı̄ hit-ê tūn-tūn ê Cheng-chú ah ? Sèng-keng kiám m̄-sı̄ kóng, Siōng-tè ê chin-lí tùi gâu-lâng ún-ba̍t, iā hián-chhut tı̄ gû-gōng ê lâng mah ? Koh Chú kiám m̄-sı̄ o-ló hit-ê koáⁿ-hū só͘ hiàn sió-khoá ê chı̂ⁿ choè hoaⁿ-hí mah ? Lâng khoàⁿ sı̄ sió-khoá, Chú khoàⁿ sı̄ toā. Chú tek-khak beh chiong goá chı̍t ê sió-khoá lâng lâi choè lō͘-ēng. Hit-tia̍p liáu-āu jú kám-tio̍h goá ê sú-bēng. Goá it-seng kam-goān hō͘ Chú ēng. Goá m̄-bat kéng kàu-hoē, goá m̄-bat iau-kiû ge̍h-kip, goá m̄-bat sàn-hiong, in-ūi goá Thiⁿ-nı̍h ê Pē sı̄ pù-ū, Pē só͘ ū-ê chiū-sı̄ goá-ê." Tâng tio̍h-boâ ê hó pêng-iú ah ! "Kiông lí ê chı̀, chòng lí ê sim; m̄-sái kiaⁿ, bô-lūn tó-lo̍h khı̀, lí ê Siōng-tè Iâ-hô-hoa pı̀-iū lí" (Iok-su-a-kı̀ 1:9 ) ( Tâi-oân Kàu-hoē-pò tē 506 koàn,1927 nı̂ 5 ge̍h)