4 Bông-bo̍k Ga̍k-jı̂n Ê Sin-sè
Chit-ê lō͘-piⁿ teh gı̂m-si kiû-khit-ê chhiⁿ-mı̂ lâng sı̄ sím-mı̍h lâng, taⁿ lán tio̍h chiām-sı̂ tó-tńg khı̀ khoàⁿ i ê sū-chêng kap keng-koè.
Kı̄n 40 goā-nı̂ í-chêng ê sū, tı̄ Tâi-lâm ê × × ke ê tiong-chām ū chı̍t-chō hoâ-bí ê toā iûⁿ-lâu, chha-put-to sı̄ tong-sı̂ choè tông-hông ê kiàn-tio̍k.
Hit-ê iûⁿ-lâu ê chú-lâng kiò-chò Chhoà Péng-bûn, lâng phó͘-thong kiò i Péng-bûn-á-sià, sı̄ chı̍t-ūi ke̍k-kı̂ pù-ū ê gia̍p-chú.
I ê hū-jı̂n lâng ū seⁿ nn̄g ê hāu-siⁿ kap chı̍t-ê cha-bó͘ kiáⁿ.
Ū chı̍t-pái tē jı̄-kiáⁿ tı̄ Jı̍t-pún teh tha̍k tāi-ha̍k ê sı̂ soà tú-tio̍h toā-pı̄ⁿ. Lāu-bú, Chhoà hū-jı̂n chiap-tio̍h siau-sit chiū chhóng-chhóng pông-pông tà-chûn koè Jı̍t-pún khı̀ khoàⁿ i ê kiáⁿ.
Tı̄ hū-jı̂n lâng chhut-goā chiâⁿ-nı̂ ê sı̂, chit-ê hong-liû ê chú-lâng soà kap chı̍t-ê chhù-lāi ê lú-pı̄ hoat-seng koan-hē.
Pi-ke̍k tùi chia khai-sí. Kàu tı̄ hū-jı̂n lâng thiaⁿ-kı̀ⁿ chit-ê sū-chêng tùi Jı̍t-pún piàⁿ tńg-lâi ê sı̂, chit-ê lú-pı̄ í-keng seⁿ chı̍t-ê ta-po͘ eⁿ-á lah.
Keng-koè ge̍h-goā jı̍t āu, khó-lı̂n ê bú-kiáⁿ chiū siū koáⁿ-chhut chit-ê oàn-thàn ê toā-lâu.
Lāu-bú lâu ba̍k-sái phō i ê eⁿ-á khı̀ oá-khò toà tı̄ soaⁿ-lāi chhân-chng ê a-hiaⁿ.
Chit-ê soaⁿ-lāi ê chhân-chng chí-ū sı̄ pah goā-hō͘ chı̍p-ha̍p khiā-khí ê chı̍t-ê sió pō͘-lo̍k.
Khiok tı̄ chia ū chū-jiân-kài só͘ oē-thang hō͘ lâng lóng-chóng ê bí-sek kap khoài-lo̍k moá-moá, thang khoàⁿ-kı̀ⁿ sè-goā thô-hn̂g ê pêng-an tı̄ hia. Tı̄ chit-ê chng-siā ê téng-bı̄n, soaⁿ-kha ū chı̍t-keng Thian-chú kàu-tn̂g, toā-pō͘-hūn ê peh-sèⁿ nā kàu lé-pài jı̍t chiū hioh-khùn lóng-chóng ê kang-chok, kàu lé-pài-tn̂g khı̀ choè lé-pài, siú mı̄-sat.
Chit-ê siū-khó͘ ê lāu-bú khoàⁿ chit-ê só͘-chāi sı̄ choè thang hō͘ in bú-kiáⁿ tit-tio̍h siám-pı̄ sè-jı̂n ê ki-chhı̀ kap pâi-thek ê toē. Bô gı̂-gō͘ in bú-kiáⁿ chı̍t-ē ta̍h jı̍p chit-ê toē, choân-chng ê peh-sèⁿ lóng saⁿ-kap gı̄-lūn. “In sı̄ sím-mı̍h lâng?” Chit-ê gı̄-lūn bô-kú chiū seⁿ-chhut kiat-lūn.
“Ū chı̍t-ê hoān-choē ê hū-jı̂n lâng, phō i hoān-choē ê kiáⁿ jı̍p lâi chit-ê chng-siā!” Chit-ê siau-sit ū tín-tāng choân-chng. Sū-sı̍t chit-khoán ê sū tı̄ chit-ê chng-siā sı̄ chı̍t-ê thang-kiaⁿ thang-ùi ê tāi-chı̀.
Tı̄ khe-chúi piⁿ soé-saⁿ ê hū-jı̂n lâng chiong chit-ê kiaⁿ-lâng ê toā-sū lâi chò in ê oē-pèⁿ, saⁿ-kap kóng lâi chhiò.
Lāu hū-jı̂n lâng khoàⁿ-tio̍h chit-ê khó-lı̂n ê lāu-bú tùi in ê sin-piⁿ koè-khı̀, chiū phùi-noā, gia̍h keng-thâu, oē sı̍p-jı̄ tı̄ heng-chêng lâi piáu-sı̄ iàm-ò͘ⁿ.
“Ù-oè mı̍h!” In ê chhùi-lāi án-ni liām, in bú-kiáⁿ chiâⁿ-choè choân-chng ê thah-gāi. “Chit-ê choē-ok ê kiáⁿ tio̍h hiat-kak, m̄-thang chhı̄ chit-ê, tek-khak oē ín chai-lān!”
A-hiaⁿ ê ka-têng lóng bô hoaⁿ-hí in tı̄ chit-ê só͘-chāi, siông-siông ēng oē lâi kong-kek ki-chhı̀ in. Koh iā kiaⁿ-liáu ū sím-mı̍h liân-lūi. Chit-ê kong-kek kap ki-chhı̀ lóng bô léng-chēng, ná kú ná lı̄-hāi.
EN-á tı̄ chit-ê khoân-kéng ê lāi-bı̄n chiām-chiām toā-hàn lah. Lāu-bú chiū kā i hō miâ choè Pek-jím, chiū-sı̄ pah-poaⁿ ê jím-siū.
Bú-kiáⁿ hām-lo̍h tı̄ chin-toā-ê khùn-lân. Khiok iā kám-kak lóng bô pa̍t tiâu lō͘, chiū āiⁿ chit-ê khó-lı̂n siū iàm-ò͘ⁿ ê kiáⁿ khioh chhiū-hio̍h á-sı̄ ku̍t chháu-thâu chhut-lâi boē, lâi ı̂-chhı̂ in ê seng-oa̍h.
Ū-sı̂ lāu-bú siūⁿ-tio̍h bú-kiáⁿ ê kéng-gū kap o͘-àm ê chiân-tô͘ lâi chē tı̄ chhiū-kha háu. Pek-jím kàu tı̄ chin toā-hàn oē-hiáu ı̀n-siōng tio̍h khó͘-miā lāu-bú ê ba̍k-sái tih tı̄ i chia̍h-ni ê bı̄n.
Tı̄ chit-ê chhám-kéng koè liáu 10 goā-nı̂, Pek-jím í-keng kap pa̍t-ê gín-ná jı̍p tı̄ soaⁿ-ē ê sió-o̍h teh tha̍k-chheh lah!
Chóng-sı̄ Pek-jím khai-sí hoat-hiān tı̄ i ê sin-chiūⁿ ū chin-toā ê put-hēng kap ko͘-toaⁿ.
“Bô-pē kiáⁿ m̄-sı̄ lâng!Pek-jím khó-ò͘ thâng!”
Tông-ha̍k chò koa-khek lâi ki-chhı̀ pâi-thek i. Lâng nā khoàⁿ-tio̍h i chiū cháu-siám khı̀, iā bô lâng beh kap i tâng-toh.
“Ma-ma, lâng sı̄ án-choáⁿ kiò goá bô-pē-kiáⁿ, kiò goá khó-ò͘ thâng nè?” Pek-jím khai-sí chiong i ê khó͘-sū lâi chit-mn̄g i ê lāu-bú.
“Pek-jím, chhiáⁿ lí m̄-thang mn̄g goá sím-mı̍h! Lóng sı̄ ma-ma ê choē, chhiáⁿ lí tio̍h sià-bián goá, lóng sı̄ goá m̄-tio̍h!” Lāu-bú lám-oá kiáⁿ-jı̂ lâi toā-háu.
Chóng-sı̄ kàu Pek-jím pı̍t-gia̍p bô-kú, chit-ê siū-khó͘ ê lāu-bú chiū tài-pı̄ⁿ soah koè-sin. Pek-jím chū-jiân kui-sio̍k i ê a-kū, lâi pang-chān chhân-hn̂g í-kı̍p lóng-chóng khùn-khó͘ ê kang-chok. Pek-jím tı̄ chit-ê ka-têng ê seng-oa̍h sı̄ chin put-hēng. A-kū khoàⁿ i chò gû-bé lâi khó͘-chhó͘ iàm-chiān i. I ta̍k-jı̍t lóng tı̄ soaⁿ-iá teh kap thô͘-bê chò-hoé. Tı̄ hā-thiⁿ ū jia̍t-iām ê jı̍t, tı̄ koâⁿ-thiⁿ ū hân-léng ê pak-hong teh khó͘-chhó͘ i ê sin-khu.
Ū-sı̂ khoàⁿ-tio̍h pa̍t-ê ka-têng pē-bú kiáⁿ-jı̂ thoân-lo̍k ê chêng-hêng lâi thó͘-khùi. Iā ū chin-choē chheng-liân lâng chá-àm chhut-goā siōng-o̍h ê chêng-hêng, hō͘ Pek-jím ê sim seⁿ-chhut chin-toā ê sit-chı̀ kap oàn-chheh. I khai-sí thòng-oàn i ê miā-ūn. I ê put-hēng chiong-jı̍t chhiong-moá i ê sim, lâi hō͘ i sı̂-siông chin ut-chut.
I m̄-bat kiâⁿ-kàu lé-pài-tn̂g khı̀, lé-pài jı̍t choân-chng ê peh-sı̀ⁿ lóng bô chò-kang khı̀ lé-pài, khiok i ka-kı̄ cháu-kàu soaⁿ-iá ê chháu-po͘ khı̀ tó tı̄ chhiū-kha.
“Lí sı̄ choē-ok ê kiáⁿ, lí ê choân-sin lóng ū choē-ok ù-oè ê huih teh lâu, lí èng-kai tio̍h thòng-hoé iu-siong lâi kiû Thian-chú sià-bián lí ê choē, nā bô lí tek-khak tı̄ choē-ok tiong tı̂m-lûn!” A-kū siông-siông án-ni tùi i kóng. Chóng-sı̄ i kò͘-ı̀ hoán-tùi kàu lé-pài-tn̂g. Ū-sı̂ nā ko͘-put-chiong lâi tùi hia keng-koè, i chiū phùi-noā kóng, “Ū sím-mı̍h Thian-chú! I sı̄ put-gı̄ put-hoat ê sı̂n lah!”
Lâng-lâng iàm-ò͘ i, i iā iàm-ò͘ lâng, choân sè-kài pâi-thek i, i iā pâi-thek choân sè-kài. Kàu 18 hoè ê sı̂ Pek-jím chiū khai-sí ka-kı̄ kè-sio̍k tha̍k-chheh. Ta̍k-mı̂ lóng tı̄ i ê pâng-keng lâi àm-chı̄ⁿ gián-kiù. I ê sin-thé iā í-keng chin sêng-se̍k kiat-sı̍t lah. Tı̄ chit-ê chng-siā chha-put-to bô lâng oē-thang kap i pí-phēng. I chiâⁿ-chò chı̍t-ê hán-tit khoàⁿ-tio̍h ê eng-chùn, chheng-siù ê chheng-liân. I ê io̍k-bōng iā khai-sí sio-to̍h tı̄ i ê sim-lāi.
“Goá tio̍h ló͘-le̍k, lâi soé goá lóng-chóng ê kiàn-siàu. Goá tio̍h tùi-khòng choân sè-kài, tio̍h cheng-ho̍k i!”
I siông-siông chiūⁿ kàu soaⁿ-niá téng khoàⁿ lo̍h pêng-iûⁿ ê to͘-chhı̄ lâi án-ni koat-sim.
Kó-jiân bô-kú i ū tit-tio̍h chı̍t-ê ki-hoē thang lı̄-khui chit-ê hoán-kám ê chng-siā, khı̀ ho̍k-bū tı̄ Tâi-lâm chhı̄-lāi chı̍t-keng choè-toā ê pah-hoè kong-si. I chı̍t hong-bı̄n kong-chok chı̍t hong-bı̄n khûn-khûn tha̍k-chheh. Āu-lâi Pek-jím chiū chı̀n-jı̍p tı̄ chı̍t-keng chhı̄-lı̍p ê iā-ha̍k tha̍k tiong-ha̍k ê khò-thêng. I hui-siông jı̄n-chin khı̂n-bián, tı̀-kàu lóng kap pa̍t-lâng ū chin toā ê hun-piat. 4 nı̂ āu iā-ha̍k pı̍t-gia̍p ê sı̂ i chiū tit-tio̍h chu-keh khı̀ khó-chhı̀ Tâi-pak ê ko-téng ha̍k-hāu. I put-toān ê ló͘-le̍k kap jia̍t-jia̍t ê sim-chı̀ pang-chān i, hō͘ i chin hó ê sêng-chek lâi kı̍p-keh, koh soà oē-thang tit-tio̍h kai-hāu ê chióng-ha̍k-kim.
Pek-jím ê ló͘-le̍k chin-toā sêng-kong lah! Khiok i bô lia̍h chit-ê choè kàu-gia̍h lâi sit-lo̍h kín-sı̄n, sı̄ tit-tio̍h chhut-la̍t ê tē-pō͘ lâi it-hoat ke-thiⁿ ló͘-le̍k. I liân khùn ê sı̂-kan iā kiám-chió, bô-lūn tı̄ sím-mı̍h só͘-chāi, chheh lóng bô lı̄-khui i ê chhiú. I iā chhim-chhim pó-siú ko͘-toaⁿ ê seng-oa̍h. Só͘-í i ê sêng-chek sı̄ te̍k-piat chhut-kûn. Sı̄m-chı̀ i ū chin te̍k-piat bûn-ngá ê goā-māu hō͘ lâng boē-thang khoàⁿ-chhut ū sím-mı̍h o͘-àm ê cheng-sı̂n.
Tı̄ chiah-ê sū, chū-jiân hō͘ Pek-jím ê sim hoat-seng chin toā ê iu-oat, kiau-ngō͘. I ê io̍k-bōng it-hoat chı̀-lia̍t sio-to̍h. Tı̄ i ê sim-lāi ū chin toā ê chū-sı̀n.
Chóng-sı̄ i tha̍k-kàu tē-jı̄ nı̂ boé ê sı̂ hut-jiân hoat-kak ū jiám-tio̍h hı̀-pı̄ⁿ. Sin-thé jı̍t-jı̍t siau-sán soe jio̍k khı̀.
Chit-ê sū tú-tú sı̄ sí-hêng ê thih-thûi kòng tı̄ i ê thâu-khak chı̍t-iūⁿ, hō͘ i it-chhè lóng toā iô-tāng. I khai-sí pàng-sak i ê chheh lah. I chhin-chhiūⁿ tùi koâiⁿ-koâiⁿ ê poàⁿ-thiⁿ koh siak-lo̍h kàu tı̄ o͘-àm choa̍t-bāng ê chhim-ian. Hit-ê koâiⁿ-koâiⁿ ê poàⁿ-thiⁿ sı̄ ēng hô-téng kè-chı̂ⁿ lâi tit-tio̍h ê, hō͘ i kám-kak bô hoat-tō͘ thang jím-siū chit-ê sū-sı̍t.
“Goá lóng-chóng ê ló͘-le̍k kap siū-khó͘ tı̄ tó-ūi?” I tı̄ ha̍k-hāu hù-siat ê pēⁿ-ı̄ⁿ lāi, chhin-chhiūⁿ sit-sı̂n bô lêng-hûn ê lâng chē tiām-tiām, lóng bô tín-tāng. I kúi-nā-jı̍t lóng bô chia̍h-pn̄g, mı̂-sı̂ iā m̄-chai i ū khùn-khı̀. Oàn-thàn kap choa̍t-bāng ê toā-hûn pau-ba̍t i ê choân-sin.
“Taⁿ beh án-choáⁿ?!” I chı̀n-chêng siūⁿ iā siūⁿ bô, tò-tńg siūⁿ iā siūⁿ bô ū sím-mı̍h, it-chhè lóng sı̄ bông-bông biáu-biáu. Āu-lâi i chiū chin chhiⁿ-chhı̀n ê khoán lâi ka-léng-sún soà khiā khí-lâi kiâⁿ-kàu thang-á piⁿ khı̀.
“Choa̍t-kéng! Choa̍t-kéng!” I chí-ū soè-siaⁿ lâi án-ni liām tı̄ chhùi-lāi.
“I phah-hoāi, chhiúⁿ-toa̍t goá ê it-chhè!” Pek-jím chhiⁿ gı̂n-gı̂n ê ba̍k-chiu gia̍h koâiⁿ khoàⁿ thiⁿ. “It-chhè lóng liáu lah!” I chiū koh kiâⁿ kàu i ê chhn̂g lâi phak tı̄ chhn̂g-téng.
“Chai-lān, goá kap lí ū sím-mı̍h koan-hē!” I ka-gê, chhiat-chhí, gı̄m chhiú lâi phah chím-thâu. Āu-lâi chiū siang-chhiú lám i ê thâu-khak lâi háu.
Keng-koè chı̍t-jı̍t, nn̄g-jı̍t, saⁿ-jı̍t ê hoán-būn, siong-pi tı̀-kàu hō͘ i ê ba̍k-chiu chhut-huih lah. Khiok Pek-jím bô koán it-chhè, i chiong-jı̍t koaiⁿ-ba̍t tı̄ i ê pı̄ⁿ-pâng, bô ài kı̀ⁿ lâng ê bı̄n. I ê sin-thé oân-choân soe-pāi lah. Ba̍k-chiu iā khai-sí bông-bū lah.
Kàu tı̄ chiâⁿ lé-pài āu ū chiap-tio̍h ha̍k-hāu thè-ha̍k ê soan-kò ê sı̂, Pek-jím chiū thǹg i ê pı̄ⁿ-saⁿ, loa̍h i ê thâu-mn̂g, chéng-lí i ê mı̍h-kiāⁿ, tán-hāu hông-hun-àm ê sı̂ chiah àm-chı̄ⁿ cháu-chhut pēⁿ-ı̄ⁿ.
I tı̍t tı̍t kiâⁿ tùi tong-sı̂ choè lāu-jia̍t ê Éng-lo̍k ke lo̍h-khı̀, āu-lâi chiū oat tùi Tâi-pak toā-kiô kiâⁿ-khı̀.
Nā siat-sú ū lâng siông-sè khoàⁿ-kı̀ⁿ i ê bı̄n-iông á-sı̄ thāi-tō͘, lâng beh kám-kak chin-toā ê kı̂-koài lâi kóng:
“Chit-lâng sı̄ tùi bōng-lāi chhut-lâi ê sin-si mah?”
Khiok tong-sı̂ ê Tâi-pak sı̄ tı̄ tāi-chiàn ûi-ba̍t ê ē-bı̄n chin léng-chēng, hi-bı̂.
Tāi Tang-a-chiàn í-keng ián-piàn kàu tı̄ sè-kài jı̄-chhù tāi-chiàn, chhù-chhù chhiong-moá chiàn-cheng ê khı̀-hun kap bu̍t-chit seng-oa̍h siōng chióng-chióng ê thóng-chè. Tâi-pak chiâⁿ-choè chı̍t-ê im-tı̂m, àm-ut, kín-tiuⁿ ê to͘-chhı̄.
Mı̂-kan ê tiān-teng siū koán-chè í-lâi ke-lō͘ siōng hán-hán ū lâng, chí-ū sı̄ kun-tūi ê oa̍h-tāng put-chí hián-jiân nā-tiāⁿ.
Khiok Pek-jím ê sim lóng thoat-lı̄ liáu chiah-ê sū-chêng. I chı̍t-pō͘ chı̍t-pō͘ lâi peh-chiūⁿ hit-ê chhu-koâiⁿ ê toā-kiô téng khı̀. Kiô-téng ke-lō͘ lóng chin chió lâng teh óng-lâi, nā ū iā sı̄ chin kín-kip ê khoán.
Tong-sı̂ lâng kiaⁿ-liáu siū hiâm-gı̂, koh lóng-chóng ê khong-khı̀ hō͘ lâng chin kín-tiuⁿ.
“Goá iáu-ū chı̍t-tiâu tùi-khòng ê lō͘,” i kiâⁿ-kàu kiô ê tiong-chām chiū oá tı̄ hit-ê kiô-lân, lâi khoàⁿ lo̍h kiô-kha ê chúi. Tùi Pang-kiô hong-bı̄n ū chiò thiⁿ-téng ê kng-soàⁿ gō͘ la̍k tiâu tı̄ hit-ê o͘-àm kiaⁿ-hiâⁿ ê khong-tiong teh cháu-lâi cháu-khı̀. Hit-ê kng-soàⁿ ū hoán-chiò tı̄ an-chēng seh-seh lâu ê tām-chúi khoe-bı̄n. Hán-hán ū chhia kap lâng tı̄ āu-bı̄n teh koè. Hiah-ê lâng ê ba̍k-chiu lóng tâng chı̍t-iūⁿ ê kı̂-koài teh kóng.
“Tı̄ chit-ê sı̂-kı̂ chit-ê lâng tiàm chia teh chò sím-mı̍h? Kiám ū hit-ê pàng-sim mah?!”
Khiok Pek-jím lóng bô teh koán in ê sū. I ê ba̍k-chiu chí-ū ki-hâi-tek toè hit-ê tı̄ chúi-bı̄n teh iô-choah, siû-lâi siû-khı̀ ê kng-soàⁿ.
“Put-hēng ê pháiⁿ-sı̂n, goá kiám bô hoat-tō͘ thang tùi-hù lí mah?! Khó-ò͘ siū chiù-chó͘ ê miā-ūn, goá kiám bô hoat-tō͘ thang kái-koat lí ê khu-sok mah?! Goá siū-chı̄n lí ê ge̍k-thāi lah!! Goá su-iàu kái-koat lah!”
Ba̍k-sái ê chúi-choâⁿ moá-lâu i ê bı̄n. Koè-khı̀ lóng-chóng ê pi-chhám lóng chhut-hiān tı̄ i ê thâu-náu lāi.
“Goá tek-khak bô beh khut-ho̍k lí!” I kín-kín tòng-tiām ba̍k-sái lâi gı̂n bı̄n-chêng ê thiⁿ.
Tâi-pak chhı̄ ê o͘-iáⁿ phû-chhut tı̄ khoe ê tang-pêng-hoāⁿ. An-chēng bô choè-siaⁿ teh khùn. Chòng-toā ê Tâi-oân soaⁿ-me̍h iā chiàm-moá khong-tiong ê chı̍t-poàⁿ.
“Sè-kài ah, goá ài-bō͘ lí ê bí-lē, lí ê gē-su̍t, lí it-chhè ê pù-ū kap khoài-lo̍k, khiok kiat-kio̍k goá sit-lo̍h lí, éng-oán kap lí so͘-oán lah! Goá lo̍k-ngó͘ tı̄ lí ê kha-ē......”
Ba̍k-sái koh lâu chhut, pi-siong koh tín-tāng i ê choân-sin.
“Khó-ò͘ ê miā-ūn, lí thài lı̄-hāi lah! Lí toān-choa̍t goá ê oa̍h-lō͘! Lí chiâⁿ-chò goá ê kiû-siû!”
“Goá ià-siān lah, goá su-iàu an-hioh!” I tı̄ chhùi-lāi soè-siaⁿ lâi thò͘-lō͘ moá-pak ê choa̍t-bāng kap oàn-hūn. I ê ba̍k-sái tı̍t-tı̍t lâu-chhut.
“Tı̄ chit-ê chúi-té ê sè-kài ū éng-kiú ê an-chēng bông-khiok. I beh tùi goá ê thâu-náu lāi chhat-siau lóng-chóng put-hēng ê pháiⁿ-bāng.”
“Hit-ê léng-chēng chúi-té ê sè-kài sı̄ tú-tú hō͘ pāi-pok chiá thang éng-oán siám-bih ê só͘-chāi.”
“Put-hēng ê chhiú ah, lí ū sím-mı̍h hoat-tō͘ thang khó͘-chhó͘ goá!”
I ê ba̍k-chiu khoàⁿ-lo̍h hit-ê chúi-té. Koh khoàⁿ hit-ê khong-tiong. Ū hái-hong chhin-chhiūⁿ kúi-sı̂n ê siaⁿ, hiu-hiu háu. Hiah-ê kng-soàⁿ hō͘ i ê ba̍k-chiu o͘-n̄g, i chiū khı̂ⁿ-oá tı̄ hit-ê kiô-lân, i kám-kak i ê ı̀-sek ū chiām-chiām beh cháu bô-khı̀, iáu-kú i ló͘-le̍k bán-hoê, lâi poâⁿ-koè kiô-lân, chiū chhut-la̍t chiong i loán-jio̍k ê sin-khu hiat tùi hit-ê chhim-chhim ê chúi-té lo̍h-khı̀. “Ah!!” Léng-chēng ê chúi chiong Pek-jím ê sin-khu thun lo̍k-khı̀.
