5 Pek-jím Khoàⁿ-kı̀ⁿ Bı̂-kng
“Sin-khu ū khah sio-lō lah!” Ū hū-jı̂n-lâng ê siaⁿ teh kóng. “Í-keng ū cha̍p-tiám goā-cheng kú ê keng-koè lah, thêng chı̍t-sı̂-á nā-bô chhéⁿ khí-lâi chiah koh chù-siā.” Ū ta-po͘ lâng ê siaⁿ teh kóng.
“Khiā tı̄ hit-ê kiô-téng iok-lio̍k ū 30 hun, jiân-āu chiū poâⁿ hit-ê kiô-lân lâi thiàu-lo̍h khoe-té, o͘-àm mı̂ lóng bô khoàⁿ-kı̀ⁿ, nā m̄-sı̄ tú-tú ū chûn-á tı̄ khoe-téng teh hioh-mı̂ chiū bô hoat-tō͘ thang kiù i.” Ū chı̍t ê Jı̍t-pún chheng-liân teh kóng.
“Sin-thé ū pı̄ⁿ, tùi án-ni pi-koan chū-sat ê khoán.” Iā ū pa̍t ê lâng án-ni kóng. Í-goā iáu-ū chin-choē siaⁿ-im, hiah-ê ū-sı̂ tio̍h ū thiaⁿ-kı̀ⁿ, ū-sı̂ tio̍h bô thiaⁿ-kı̀ⁿ. Chiah-ê kóng-oē ê siaⁿ sı̄ tē-it pái hoê-ho̍k tı̄ Pek-jím ê thâu-náu só͘ thiaⁿ-kı̀ⁿ ê khiok sûi-sı̂ koh m̄-chai lâng khı̀. Kàu i koh chhéⁿ ê sı̂, ta̍k-hāng lóng chin an-chēng, chí-ū thiaⁿ-kı̀ⁿ sı̂-cheng teh khok! khok! ê siaⁿ nā-tiāⁿ. “Hoê-ho̍k lâi ê khoán lah, sin-khu teh tín-tāng lah!” Keng-koè chin-kú ū hū-jı̂n-lâng ê siaⁿ lâi kiò-chhéⁿ Pek-jím, i chiah bêng-bêng ho̍k-tò i ê ı̀-sek. Sı̂-kan tú-tú sı̄ koè-jı̍t ê ē-po͘ sı̂ lah.
Pek-jím hoat-hiān i tó tı̄ chı̍t-keng pı̄ⁿ-ı̄ⁿ sek ê lāi-bı̄n. Tı̄ i ê bı̄n-chêng ū chı̍t-ūi tiong-liân ê i-seng kap i-seng niû, in oá-kı̄n tı̄ i ê sin-khu teh kā i ù-peng. Pek-jím ba̍k-chiu khui ê sı̂ ū khoàⁿ-kı̀ⁿ in nn̄g-lâng hoaⁿ-hí teh chhiò ê bı̄n, tú-tú chhin-chhiūⁿ pau tı̄ hûn-bū ê lāi-bı̄n chı̍t-iūⁿ chin bô-bêng.
I thiap ba̍k-chiu beh khoàⁿ khah-bêng, chóng-sı̄ hoat-kak tio̍h ba̍k-chiu í-keng ū sit-siông.
“Siàu-liân lâng ah, lí chhéⁿ lah hòⁿ! Chin kai-chài! Goán tùi cha-mı̂ chiū lóng bô khùn teh khoàⁿ lí ê chêng-hêng. Taⁿ í-keng bô iàu-kín lah!” I-seng chû-pi ê bı̄n chin hoaⁿ-hí chhiò-iông lâi tùi i án-ni kóng.
“Chin-chiàⁿ hó kai-chài! Chin kám-siā! Nā m̄-sı̄ Siōng-tè ê pang-chān, lí chiū í-keng sit-lo̍h sı̀ⁿ-miā lah. Chin thang kám-siā! Chhiáⁿ lí tio̍h pàng-sim tı̄ chit-ê só͘-chāi lâi hiu-ióng, lóng m̄-thang koh siūⁿ sím-mı̍h. Kiû Chú tam-tng lí só͘ ū ê tāng-tàⁿ kap khùn-khó͘.”
I-seng niû chin tông-chêng ê piáu-chêng lâi tùi i kóng.
“Lán m̄-thang koh kiáu-jiáu i, in-ūi i tio̍h an-chēng hioh-khùn.” I-seng tùi hū-jı̂n-lâng kóng chiū koh oa̍t koè-lâi.
“Chhiáⁿ lí an-chēng, nā ū ài sím-mı̍h chiah jı̍h chit-ê tiān-lêng, tio̍h ài choa̍t-tùi ê an-chēng chiah oē ēng-tit.” I án-ni hoan-hù chiū chhut-khı̀.
Hu-hū lı̄-khui pı̄ⁿ-ı̄ⁿ-sek ê sı̂ Pek-jím chiah bêng-pe̍k i ê sı̀ⁿ-miā ū koh oa̍h-teh. I ēng chhiú lâi bong i ê thâu-khak kap sim-koaⁿ.
“Goá bô sí tio̍h-m̄!” Ba̍k-sái hut-jiân ong-moá i ê bı̄n. “Goá ê chhiⁿ-chhám iáu tı̂ⁿ-toè goá! Pháiⁿ-bāng iáu teh kè-sio̍k!”
Sū-sı̍t chit-ê be̍k-kiù tı̄ i lóng bô hoaⁿ-hí, hoán-tńg sı̄ chai-lān, toā sit-pāi. I ê cheng-sı̂n ke̍k-kı̂ soe-jio̍k lah.
“Goá iáu-ū sím-mı̍h ǹg-bāng!” I chí-ū lâu ba̍k-sái thı̂-khàu chiū koh khùn-khı̀.
Pek-jím thiàu-chúi liáu-āu, kiô-téng chhàu-khám ū lâng tı̄ hia. Koh tı̄ kiô-ē iā ū thó-hı̂ ê chûn tı̄ hia koè-mı̂. Só͘-í sûi-sı̂ hō͘ lâng kiù kàu tı̄ hū-kı̄n ê chit-keng goā-kho pı̄ⁿ-ı̄ⁿ khı̀.
Chit-keng pı̄ⁿ-ı̄ⁿ ê chú-lâng Hoâ sian-siⁿ kap sian-siⁿ niû sı̄ jia̍t-sim kèng-ùi Siōng-tè ê Ki-tok-kàu tô͘. In siông-siông ín-chhoā hoān-chiá lâi bat Siōng-tè ê thiàⁿ, iā choē-choē pang-chān pı̂n-khùn ê lâng. Beh khui-to chhiú-su̍t ê tāi-seng lóng kı̂-tó gióng-bōng Siōng-tè ê pang-chān.
In chih-tio̍h Pek-jím ê sı̂ chiū kín-kín ūi-tio̍h chit-ê put-hēng, siū-khó͘ ê chheng-liân lâi cháu-chông, si-io̍h, chù-siā. Ū Jı̍t-pún chheng-liân chiong it-chhè só͘ khoàⁿ-tio̍h ê sū lâi soat-bêng hō͘ in chai. Pek-jím kàu tı̄ poàⁿ-mı̂ ū kúi-nā-pái chhin-chhiūⁿ beh hoê-hûn lâi, chóng-sı̄ tio̍h koh khùn-khı̀. Hit tiong-kan hiah-ê kiù i ê lâng lóng kun-sûi tı̄ sin-piⁿ, kàu thiⁿ-kng chá ta̍k-lâng chiah sı̀-soàⁿ tńg-khı̀. Chí-ū Hoâ sian-siⁿ hu-hū tı̄ i ê sin-piⁿ, teh siông-sè kám-chhat i ê chêng-hêng. In ēng chhiú hoāⁿ tı̄ i ê me̍h, chóng-sı̄ tı̄ in ê sim-lāi teh ūi-tio̍h chit-ê khó-lı̂n ê lâng pek-chhiat kı̂-tó. Kàu hit ē-pō͘ Pek-jím cheng-sı̂n khí-lâi ê sı̂, in chiah pàng-sim hoaⁿ-hí kám-siā Siōng-tè lâi lı̄-khui khı̀ hioh-khùn.
Ū pang-chān ê siàu-liân lâng the̍h chia̍h-mı̍h hō͘ Pek-jím, iā ū kè-sio̍k ù-peng, chù-siā, chia̍h-io̍h.
Khiok Pek-jím chin oh-tit thóng-it i ê ı̀-sek, bāng kap hiān-sı̍t lóng bô ū kài-hān chin hūn-cha̍p tı̄ i ê náu-hái. I lóng teh khùn, ū-sı̂ chhíⁿ ê sı̂ chhin-chhiūⁿ keng-koè kúi-nā sè-tāi ê khoán. Ū-sı̂ iā kám-kak i sı̄ tó tı̄ hit-ê o͘-àm, chhiⁿ-chhı̀n, kiaⁿ-hiâⁿ ê im-kan. Ū-sı̂ thí-khùi ba̍k-chiu ê sı̂ só͘ khoàⁿ ê mı̍h lóng bông-bū. Ū-sı̂ iā chai-iáⁿ lâng tı̄ i ê sin-piⁿ teh chò sím-mı̍h. Ū-sı̂ chiū hoat-hiān i sı̄ ko͘-to̍k chı̍t-lâng tı̄ pı̄ⁿ-chhn̂g. Ū-sı̂ kám-kak sı̄ jı̍t-sı̂, ū-sı̂ kám-kak sı̄ mı̂-kan.
Chiah-ê sū hoan-hoan ho̍k-ho̍k tı̄ i ê ı̀-sek ê lāi-bı̄n.
Keng-koè kúi-jı̍t Pek-jím ê ı̀-sek ū hoê-ho̍k lah. Sin-thé ê khùi-la̍t iā hoê-ho̍k lâi. I chiah kám-kak i ê ba̍k-chiu hō͘ lâng am khí-lâi, o͘-thiⁿ toē àm lóng bô khoàⁿ-kı̀ⁿ sím-mı̍h.
“Goá kiám oē chhiⁿ-mı̂ mah?!” I hut-jiân siūⁿ-tio̍h chit-ê sū lâi tio̍h-kiaⁿ.
“Miā-ūn ah, lí kiám tio̍h hiah chân-jím! Lí khó͘-chhó͘ ê chhiú iáu bô thêng-chí mah?!” I ê pi-siong thòng-khó͘ iā hoê-ho̍k lı̂m-kàu i ê sim-lāi.
“Siàu-liân lâng ah, lí ū khah hó-sè bô?” Ū chı̍t-jı̍t Hoâ i-seng oāⁿ i ba̍k-chiu ê io̍h, khoàⁿ-kı̀ⁿ Pek-jím cheng-eng ê khoán-sit, chiū chhiò-chhiò lâi mn̄g i.
“Sian-siⁿ, hō͘ lí chin to-siā!” Pek-jím án-ni seh-siā i.
“M̄-bián kheh-khı̀, lí tio̍h ài tàu chhut-la̍t kap goán saⁿ-kap chiàu-kò͘ lí ê sin-thé, choa̍t-tùi m̄-thang khoà-lū, tio̍h pàng-sim, nā bô lí ê ba̍k-chiu ū gûi-hiám!” Chit-kù oē chhin-chhiūⁿ to chhı̀-jı̍p Pek-jím ê sim-lāi. “Sian-siⁿ ah, goá oē chhiⁿ-mı̂ tio̍h-m̄?!” Pek-jím khí-sin khí-lâi beh mn̄g i-seng.
“Chhiáⁿ lí choa̍t-tùi an-chēng, m̄-thang tín-tāng!” I-seng koh hō͘ i tó lo̍h-khı̀.
“Nā ū pàng-sim chiū bô tāi-chı̀.”
“Goá beh án-choáⁿ pàng-sim neh?!” Pek-jím thó͘ chı̍t-ê toā-khùi.
“Lí sı̄ chı̍t-ê chiân-tô͘ liâu-oán ê chheng-liân lâng, m̄-thang ūi-tio̍h sió-khoá ê sū lâi chhoē sí-lō͘, án-ni sı̄ chin kiàn-siàu ê sū.” I-seng ê chhiò-iông chin kong-bêng.
“Sím-mı̍h lâng chai goá ê sū, nā oē chai iā bô chit-ê tāi-chı̀.” Pek-jím, tı̄ sim-lāi án-ni kóng. I ê ba̍k-chiu ū ba̍k-sái ê iáⁿ.
“Hı̀-pı̄ⁿ, tı̄ koè-khı̀ sı̄ chı̍t-chióng sí-pı̄ⁿ, lâng-lâng chin kiaⁿ, chóng-sı̄ hiān-chāi chiū m̄-sı̄ án-ni. Siōng-tè hō͘ lâng ū chin-toā ê tı̀-hūi, ū chin-choē i-hoat kap te̍k-hāu io̍h thang hō͘ lán tùi-hù chit-ê pı̄ⁿ lah. Sı̍t-chāi hı̀-pı̄ⁿ sı̄ bô būn-tê ê sū. Ūi-tio̍h án-ni chiū lâi chhoē sí-lō͘, sı̄ chı̍t ê gû-gōng ê sū.”
I-seng soà chhiò chhut-lâi. Hit-sı̂ i-seng niû iā jı̍p lâi khiā tı̄ i ê chhn̂g-piⁿ.
“Ū khah hó-sè bô? M̄-thang hoân-ló, tio̍h pàng-sim kau-thok Siōng-tè, in-ūi bān-hāng sū lóng sı̄ chhut tı̄ Siōng-tè ê hó ı̀-sù. Lán chí-ū tio̍h sūn-ho̍k i.” Sian-siⁿ niû ê siaⁿ chin ngá-khı̀.
“Nā ū Siōng-tè, i sı̄ chı̍t-ê chân-jím, put-gı̄ ê Siōng-tè.” Pek-jím tı̄ sim-lāi án-ni ı̀n-tap, chóng-sı̄ chhùi-lāi chí-ū soè-siaⁿ kóng. “Goá bô sı̀n Siōng-tè, goá m̄-sı̄ Ki-tok-tô͘!”
“Sı̀n Siōng-tè m̄-sı̄ hān tı̄ chı̍t-pō͘-hūn ê lâng nā-tiāⁿ, sı̄ ta̍k-lâng tek-khak tio̍h sı̀n ê sū, in-ūi lán lóng sı̄ I ê chú-bı̂n, I ê peh-sı̀ⁿ,” I-seng niû soà-chiap koh kóng.
“Siōng-tè bô su-iàu goá. I iā bô su-iàu goá chûn-chāi.” Pek-jím ê siaⁿ kap bı̄n lóng chin hùn-khài. “Siōng-tè chin su-iàu lí! I te̍k-piat koan-sim tı̄ lí, in-ūi sı̄ chı̍t-ê ge̍k-kéng siū-khó͘ ê lâng. Lí èng-kai tio̍h jı̄n-bat hit-ê koan-sim lí ê Siōng-tè.” I-seng niû ê siaⁿ koh-khah jia̍t-chhiat.
“Lán lâng lóng ū choē, lóng sı̄ pāi-hoāi, só͘-í su-iàu Siōng-tè ê kiù-un, tú-tú chhin-chhiūⁿ i-seng su-iàu hoān-chiá, hoān-chiá su-iàu i-seng chı̍t-iūⁿ.” Hoâ i-seng án-ni kóng lâi kha̍h-kha̍h chhiò, chóng-sı̄ hut-jiân koh pı̀ⁿ giâm-siok ê bı̄n.
“Khiok ū hoān-chiá sı̄ chit-khoán ê, ka-kı̄ ū tāng-pı̄ⁿ khiok m̄-chai i ê pı̄ⁿ-chèng. Hit khoán ê hoān-chiá sı̄ choè hō͘ i-seng mâ-hoân.” I-seng kóng liáu chiū koh chhiò.
Pek-jím kat-ba̍k boē bêng-pe̍k hiah-ê ı̀-sù.
“Lán lâng lóng sı̄ chı̍t-ê choa̍t-bāng bô chín-kiù ê choē-jı̂n. Choē-ok pāi-hoāi chit-ê sè-kan í-lâi, lâng bô ū chin-sı̍t ê pêng-an, bô ū oa̍h-miā ê ǹg-bāng, bô ū chin-lí ê lō͘. Goân-lâi ê lo̍k-hn̂g hiān-sı̂ sı̄ chiâⁿ-choè pāi-hoāi sí-hiat ê sè-kài. Choē-ok m̄-sı̄ tiàm tı̄ goā-kháu, sı̄ tı̄ lâng ê sim-lāi.” I-seng niû ēng chhiú pí i ê sim.
“Sè-kài só͘-ū ê put-hēng, pi-chhám, thòng-khó͘, iu-siong lóng sı̄ choē-ok só͘ sán-seng ê mı̍h. Lán lóng sı̄ choa̍t-bāng ê choē-jı̂n, in-ūi ū choē-ok ê kun hoat-seng tı̄ lán ê sim-lāi.”
I-seng niû ê bı̄n chin jı̄n-chin.
“Tú-tú chhin-chhiūⁿ gâm-hoe ê kun tı̄ lâng ê sin-thé siⁿ-thoàⁿ, kàu-boé chiū pāi-hoāi lâng ê sı̀ⁿ-miā chı̍t-iūⁿ.” Hoâ i-seng soà-chiap sian-siⁿ niûⁿ án-ni kóng.
“Goá ê kéng-gū chin te̍k-piat, sè-kan bô ū lâng chhin-chhiūⁿ goá, goá chū-jiân bô ū ki-hoē thang hòng chhiòng su-io̍k chhin-chhiūⁿ sè-kan it-poaⁿ ê khoán-sit.” Pek-jím ê sim chin kan-khó͘, i ê ı̀n-tap chin thiu-siōng-tek, chóng-sı̄ Hoâ i-seng kap i-seng niû lóng bêng-pe̍k i ê sim-su.
“Choē-ok lóng bô hun-piat sím-mı̍h khoán lâng, á-sı̄ sím-mı̍h khoán seng-oa̍h. Choē-ok iā oē hō͘ lâng ê io̍k-bōng oai-chhoa̍h khı̀, lâng io̍k-bōng Siōng-tè ê io̍k-bōng pı̀ⁿ-chiâⁿ kàu tı̄ io̍k-bōng sè-kan khı̀, chit-ê chiū-sı̄ choē-ok pāi-hoāi ê kang-chok.” I-seng niû khoàⁿ-kı̀ⁿ Pek-jím ū bêng-pe̍k chit-ê chiū sim-lāi hoaⁿ-hí lâi bı̂-chhiò. Khiok Pek-jím ê sim kám-kak toā ê ap-pek lâi kan-khó͘.
“Goá sı̄ chı̍t-ê sè-kài ê pāi-pok-chiá, goá sit-lo̍h sè-kài it-chhè ê khoài-lo̍k kap hēng-hok.”
“Tham-ài sè-kài ê kiat-kio̍k siông-siông sı̄ tio̍h sí tı̄ sè-kài ê ē-bı̄n, chhin-chhiūⁿ ióng-sū teh loân-bō͘ bí-jı̂n, siông-siông lóng sı̄ in-ūi bí-jı̂n lâi sí tı̄ bí-jı̂n ê kha-ē.” Hoâ i-seng koh chhap-chhùi.
Chiah-ê oē ta̍k-kù lóng chhı̀-chha̍k tı̄ Pek-jím ê sim hō͘ i kám-kak chin lân-koè, i chiū bô ài koh thiaⁿ chit-khoán ê oē, chhin-chhiūⁿ jím-siū boē-tiâu ê khoán lâi tín-tāng i ê thâu-khak.
I-seng, i-seng niû sui-jiân khoàⁿ-chhut chit-ê sū, iáu-kú tı̍t-tı̍t ài beh ín-chhoā i bat chin-lí. “Siōng-tè tek-khak bô pāi-hoāi I ka-kı̄ ê kang-chok, bô lêng-jio̍k ka-kı̄ ê só͘-choè. Lóng sı̄ lâng ê poē-ge̍k, choē-ok ê hām-hāi.”
“Iáu-kú Siōng-tè bô choa̍t-bāng, sui-jiân choân sè-kài lóng poē-ge̍k I, I iáu-kú sı̄ teh thiàⁿ lán. I ū chiong I to̍k-siⁿ-kiáⁿ Iâ-so͘ siúⁿ-sù sè-kan, lâi beh kiù-sio̍k lán ū choē ê lâng.”
“Iâ-so͘ ê chhiú put-sı̂ chhun tn̂g-tn̂g teh tán-hāu lán, kóng, hoān-choē ê lâng ah, tńg-lâi o͘h! Chí-ū lán nā hoaⁿ-hí chhun lán ê chhiú lâi chiap-la̍p I ê chhiú, lán chiū ū oa̍h-miā ê ǹg-bāng.”
“Siōng-tè ê kiù-un chiū-sı̄ án-ni, m̄-sı̄ tı̄ lán ū sím-mı̍h hó thang tit-kàu tit-kiù, sı̄ chhim-chai ka-kı̄ sı̄ chı̍t-ê bô ǹg-bāng pāi-hoāi ê choē-jı̂n tı̄ choē-tiong gia̍h thâu beh gióng-bōng I ê lâng oē-thang pe̍h-pe̍h tit-tio̍h I ê kiù-un.”
“Só͘-í lâng tio̍h tı̄ Iâ-so͘ lâi chai ka-kı̄ sı̄ choē-jı̂n, lâi hoán-hoé, jı̄n-choē, nā bô hoán-hoé chiū bô ū chín-kiù, nā bô jı̄n-bat ka-kı̄ ê chêng-hêng, chiū bô ū sı̀n-sim gióng-bōng, nā bô gióng-bōng chiū bô ū kiù-un.”
“Siōng-tè m̄-bat hāi lán lâng chhiⁿ-chhám, á-sı̄ hoaⁿ-hí lâng put-hēng. Lóng sı̄ choē-ok ê hām-hāi. Só͘-í tı̄ chit-ê sè-kài lóng bô ū sím-mı̍h pa̍t ê ǹg-bāng, tû-liáu Chú Iâ-so͘ beh hō͘ lán ê ǹg-bāng í-goā.”
“Lâng tio̍h khoàⁿ bô it-chhè, lâi tui-kiû Iâ-so͘ kap I só͘ èng-ún ê kok. Chiū-sı̄ chin-sı̍t pêng-an, khoài-lo̍k ê kok. In-ūi tı̄ hit-ê kok chí-ū thiàⁿ sı̄ in ê tiong-sim, in ê goân-thâu.”
“Tû-khı̀ chit-ê sū, tı̄ sè-kan lâng lóng pı̂ⁿ-pı̂ⁿ tio̍h hióng-siū choē-ok ê koé-chí, chiū-sı̄ choa̍t-bāng, thòng-khó͘, sí-sit.”
“Lâng nā bô tı̄ Iâ-so͘ lâi hoán-hoé têng-thâu-siⁿ, tek-khak sı̄ kap chit-ê sè-kài pı̂ⁿ-pı̂ⁿ bia̍t-bông.”
“In-ūi CHOĒ-OK ê kang-chı̂ⁿ chiū-sı̄ SÍ! Lâng chí-ū chit-ê tông-it ê miā-ūn, hit-ê miā-ūn kiò-choè SÍ!”
“Tı̄ sí ê lāi-bı̄n bô ū sím-mı̍h hēng-hok put-hēng, sūn-kéng ge̍k-kéng, lóng sı̄ pı̂ⁿ-pı̂ⁿ siū thun-bia̍t, kàu tı̄ bô ū sím-mı̍h chha-piat.”
“Ki-tok-tô͘ lia̍h sı̍p-jı̄-kè choè i ê êng-iāu khoa-kháu. Sím-mı̍h kiò-choè sı̍p-jı̄-kè, chiū-sı̄ hi-seng, lêng-jio̍k, siū-khó͘.”
“In-ūi tı̄ hit-ê èng-ún ê kok, lán lâng ê siū-khó͘ beh pı̀ⁿ-chiâⁿ lán ê êng-iāu. Siōng-tè ê thiàⁿ beh am-moá it-chhè ê put-hēng, tı̄ hia ū moá-moá ê an-ùi.”
Tùi i-seng niû ê chhùi só͘ kóng chhut-lâi chiah-ê oē, chhin-chhiūⁿ chhèng-chhut ê chúi-choâⁿ, tı̍t-tı̍t koàn-jı̍p tı̄ Pek-jím ê sim-lāi, hō͘ i siⁿ-chhut chin-toā ê hoán-būn kap pé-pak.
I kàu-boé soà ēng siang-chhiú lâi lám i ê thâu-khak, piáu-bêng sim-lāi ê toā iô-tāng.
I-seng niû ê oē lóng bô lún-neh, chı̍t-kù chı̍t-kù chhı̀-jı̍p i ê sim lâi phoà-khui i ê ı̀-liām.
“Só͘-thiàⁿ ê hiaⁿ-tı̄ ah, lí tio̍h sı̀n Iâ-so͘ kap i ê chín-kiù! In-ūi lí te̍k-piat su-iàu kiù-un. Siōng-tè iā te̍k-piat su-iàu lí, lí tio̍h chiap-siū Iâ-so͘ chò lí ê Kiù-chú lâi kái-piàn lí it-chhè ê sim-su liām-thâu, chiū-sı̄ oàn-thàn, choa̍t-bāng, pi-siong ê sim, chiah-ê sı̄ tı̄ lí ê lāi-bı̄n oē tı̀-kàu lí sí ê.... Lí nā chiap-siū, lí ê hok-khı̀ tek-khak chin-chiàⁿ toā tı̄ thiⁿ-nı̍h!”
I-seng niû ê siaⁿ-im in-ūi koè-thâu ê pek-chhiat kap heng-hùn chiâⁿ-choè chin-koân. Sı̍t-chāi i ê sim moá-moá lı̂n-bín tông-chêng chit-ê chheng-liân lâng ê lêng-hûn. I chhun i ê siang-chhiú lâi khı̂ⁿ-oá Pek-jím ê chhiú, tı̍t-tı̍t chhui-pek i tio̍h chiap-siū, i ka-kı̄ ê ba̍k-chiu iā ū ba̍k-sái teh sûi-lo̍h.
Pek-jím ê sim chhin-chhiūⁿ beh piak-lı̍h chı̍t-iūⁿ ê thòng-khó͘, i ê ba̍k-chiu tı̍t-tı̍t chhoē tang chhoē sai, i ê chhùi ngia̍uh-ngia̍uh-chhoah, kàu boé soà pàng-siaⁿ toā-háu. I chı̄n i lóng-chóng ê siaⁿ-liōng lâi toā-háu, tı̀-kàu i chhám-chheh ê khàu-siaⁿ lóng tín-tāng pēⁿ-ı̄ⁿ lāi.
“Choân sè-kài ah, lí tio̍h thiaⁿ goá ê siaⁿ! Chèng thiⁿ ah, lí tio̍h thiaⁿ goá ê siaⁿ!” I ê khàu tú-tú chhin-chhiūⁿ chit-ê khoán-sit, toā-toā kái-hòng.
I-seng tı̍t-tı̍t kiông-pek i an-chēng, khiok i-seng niû khiā tı̄ piⁿ-á lâi khai-sí ūi-tio̍h i kı̂-tó.
“Siōng-tè ah, lí khó-lı̂n chit-ê lâng! Siōng-tè ah, lí tio̍h ēng lí bı̄n ê kng lâi kng-chiò i, hō͘ i chá chı̍t-jı̍t tit-tio̍h Lí ê lı̂n-bín, in-ūi i sı̄ te̍k-piat su-iàu Chú lí ê lâng.” I-seng niû ê ba̍k-sái hō͘ i bô hoat-tō͘ thang koh kè-sio̍k kı̂-tó, i chí-ū the̍h i ê chhiú-kin khí-lâi chhit i ê ba̍k-sái.
Pek-jím ê thı̂-khàu chiām-chiām soe-bı̂ khı̀. I-seng niû hut-jiân gı̂m-si chhut-lâi, hit-ê an-chēng ê siaⁿ-im hō͘ Pek-jím ê siaⁿ lóng tiām-khı̀.
“Siōng-tè chai lí ê iu-siong,Khoàⁿ-kı̀ⁿ lí ê ba̍k-sái.Soè-siaⁿ kóng, Goá kap lí tı̄-teh, Lí bo̍h-tit sit-bāng.
I chai-iáⁿ lí ê ko͘-toaⁿ, Kap lí saⁿ-kap siū-khó͘, I tam-tng lí ê tāng-tàⁿ, I tek-khak khoàⁿ-kò͘ lí. Siōng-tè chai lí ê sim siong, Chai lí sin-chiūⁿ khó͘-thàng, Tı̄ o͘-àm tiong gia̍h-ba̍k khoàⁿ I, I bô pàng-sak lí.”
I-seng niû ê siaⁿ-im chhin-chhiūⁿ hiân ê hiáng-liāng thàng-kàu pı̄ⁿ-ı̄ⁿ sek ê múi chı̍t-ê kak-thâu, sı̄m-chı̀ chhin-chhiūⁿ thàng-kàu tı̄ lâng sim-lêng ê lāi-bı̄n.
Pek-jím o͘-hûn bı̍t-pò͘ ê sim kám-kak chin khui-khoah, chheng-bêng khí lâi, chhin-chhiūⁿ ū chı̍t-tiâu ê bı̂-kng khai-sí chiò tı̄ i am-ut tı̂m-tāng ê sim-lāi.
