7 Sió Thiⁿ-sài Ê Chhut-hiān
Chit-ê sū koè bô kú Jı̍t-pún kun chiū hâng-ho̍k pāi-chiàn. Tùi án-ni chiâⁿ cha̍p-nı̂ lâi ê chiàn-sū kap khùn-khó͘ o͘-àm ê seng-oa̍h chiū kiat-sok.
Jı̍t-pún ê kun-bı̂n chiū chún-pı̄ hoê-kok, ke-thâu hāng-boé lóng chhiong-moá lı̄-piat ê ai-siû.
Hiah-ê hong-hoè pha-hng ê khı̀-siōng ke-thiⁿ chı̍t-chióng bû-hān ê kám-sióng.
Soà-chiap kok-kun lı̂m Tâi, chhù-chhù ū hoan-gêng ê ho͘-siaⁿ kap koa-im, khiok hiah-ê hoan-gêng ê siaⁿ iáu boē soah ê sı̂, Tâi-oân chiū hām-lo̍h tı̄ chı̍t ê koh-khah giâm-tiōng ê keng-chè gûi-ki.
Choa̍t-bāng kap o͘-àm khai-sí pò͘-moá choân Tâi. Tùi án-ni ū siⁿ-chhut jı̄-jı̄-pat sū-kiāⁿ.
Āu-lâi chiū chiâⁿ-chò kiōng-sán chú-gı̄ ê ūi-hat kap chhim-hoān. Soán-te̍k chū-iû lâi tô-thoat chhia-hoa ê Tāi-lio̍k ê peh-sı̀ⁿ, lio̍k-siok cháu kàu Tâi-oân.
Hiah-ê kun-koaⁿ bı̂n-chiòng toà-tio̍h chū-iû Tiong-kok to̍k-chū ê bı̂n-chú hong-khı̀ lâi Tâi-oân tiông-sin khai-sí, Tâi-oân tùi án-ni chiū pō͘-jı̍p tı̄ chı̍t ê oân-choân kng-bêng, chū-iû, hoan-êng ê sin sè-tāi.
Hiah-ê siū-siong phoà-hāi lóng koh siu-chéng, tı̍t-tı̍t hiòng kiàn-siat sin kı̂-oē ê Tâi-oân lâi teh chı̀n-hêng. To͘-hoē ê hoan-hoa, kau-thong ê pō͘-siat, seng-sán ê kèng-cheng, seng-oa̍h ê hióng-siū lóng sı̄ chiām-chiām teh tò-ta̍t tı̄ chı̍t-ê oân-sêng ê n̂g-kim sı̂-tāi.
Sui-jiân tı̄ goā-tek ū chiah-ê hián-jiân ê hoat-ta̍t, chóng-sı̄ lāi-tek ū ho̍k-cha̍p ê piàn-chhian, í-kı̍p koè-khı̀ hiah-ê chiàn-cheng kap koè-tō͘ sı̂-kı̂ o͘-àm khùn-khó͘ ê sı̂-tāi só͘ siū ê siong-hûn iáu lâu tı̄ lâng ê sim-lāi teh thàng-thiàⁿ.
Pek-jím tı̄ chit-ê piàn-hoà to-toan ê sı̂-kı̂, i iā sûi siā-hoē tiâu-liû lâi kè-sio̍k i liû-lōng phiau-liû ê hong-tı̂n seng-oa̍h.
Lán koh khoàⁿ-kı̀ⁿ i ê sı̂ sı̄ í-keng keng-koè kong-ho̍k cha̍p-goā nı̂ ê sı̂-kan lah. I hut-jiân chhut-hiān tı̄ hit-ê hoan-hoa bû-siông ê Tâi-pak chhı̄. Lán khoàⁿ-kı̀ⁿ i chha-put-to beh koh jı̄n boē-chhut i. Tı̄ Tâi-lâm hit-ê chhám-tām léng-lo̍h ê Pek-jím lóng kap hit-ê sı̂-tāi koè liáu lah. Hiān-chāi ê Pek-jím sı̄ chı̍t-ê chho͘-lāu ê sin-sū, i-ho̍k chéng-chê, khoán-sit bûn-ngá ê lâng. I ê thâu-mn̂g khai-sí teh tńg-pe̍h lah, i ê bı̄n-māu chin chòng-giâm, put-hēng siông-siông oē hō͘ lâng hām-lo̍h tı̄ chit-chióng bû-giân ê giâm-siok. Khoah-toā ê thâu-hia̍h ū hián-chhut eng-chùn, kùi-khı̀. Koân-tı̍t ê phı̄ⁿ piáu-bêng kiông-ngı̄ ê ı̀-chı̀. Thap-thap ê ba̍k-chiu ū àm-sı̄ chhim-ò ê su-siúⁿ.
I ê hong-chhái nā it-khoàⁿ put-chí ū chı̀n-pō͘, khiok nā khoàⁿ khah kú chiū chai kı̂-sı̍t ū toà tio̍h chin tāng ê ko͘-to̍k kap soe-pāi tı̄-teh. Ū-sı̂ lâng ê goā-māu oē kap lāi-sim tú-tú tùi-hoán, Pek-jím sı̄ it-lē. Lâng tı̄ ke̍k-kı̂ ko͘-toaⁿ, soe-pāi ê sı̂, i oē ēng goā-māu ê chng-thāⁿ lâi am-moâ lâng ê ba̍k-chiu.
Kong-ho̍k tong-chho͘ i ū tùi hoê-kok ê Jı̍t-pún lâng lâi tit-tio̍h chı̍t-ki chhiú-thê-khı̂m. Chit-ki khı̂m sı̄ i só͘ ū ê it-chhè. Chit-ki khı̂m iā hō͘ i ê seng-oa̍h ū chı̍t-ê sek-chhái kap chhù-bı̄. I ēng choân cheng-sı̂n koàn-jı̍p tı̄ i ê khı̂m. I tı̄ i ê seng-oa̍h chhoē-chhut chı̍t-ê ı̀-gı̄. I kóng chit-ki khı̂m sı̄ goá ê lêng-hûn, in-ūi i thoè goá kóng chhut choē-choē sim-lāi ê giân-gú. Pek-jím kiò chit-ki khı̂m chò Ni-ná. I toà Ni-ná kàu tı̄ lō͘-piⁿ lâi gı̂m-si. I chiong i ê bō-á khǹg tı̄ kha-chêng lâi kiû-khit tām-po̍h chı̂ⁿ chò i ê seng-oa̍h.
Sui-jiân hoán-kong Tāi-lio̍k ê siaⁿ tı̍t-tı̍t hán-hoah, iáu-kú siā-hoē jı̍t-jı̍t hoat-ta̍t, chı̀n-tián. Jı̂n-kháu ê chēng-ka oē hō͘ lâng siⁿ-chhut put-an ê thêng-tō͘ teh chhèng-koân, khiok tı̄ seng-oa̍h siōng iā khoàⁿ-kı̀ⁿ chin hán-tit ū hēng-jū, an-tiāⁿ. Tùi án-ni lâng-lâng tui-kiû hióng-lo̍k ê hong-khı̀ chin ōng-sēng.
Pek-jím tı̄ chit-ê sin sı̂-tāi ê khoân-kéng ū put-chí khah chı̀n-pō͘. I ê goā-tek seng-oa̍h ū sûi chit-ê siā-hoē ê hoat-tián khah hó-sè, khiok tı̄ i ê sim-lāi, hiah-ê koè-khı̀ chhiⁿ-chhám pāi-lo̍h ê chō-gū, chhin-chhiūⁿ sí-pı̄ⁿ ê pâi-hoê chiâⁿ-chò pháiⁿ-bāng tiong ê pháiⁿ-bāng, hō͘ i siū chin-toā ê koán-hat chi-phoè.
Hit-ê ko͘-toaⁿ, iu-chhiû ê iáⁿ lóng bô lı̄-khui i ê sin-chiūⁿ, hoán-tńg ke-thiⁿ sin ê hêng-thé, ná hián-bêng chhut-lâi.
Nā-sı̄ i ê oàn-thàn pí í-chêng ū khah léng-lo̍h, i ê io̍k-kiû bāng-sióng chha-put-to lóng siau-bia̍t bô iáⁿ lah. I ê hiān-sı̍t chí-ū beh án-choáⁿ lâi tùi-hù ko͘-to̍k kap pi-ai chiū í-keng kàu-gia̍h lah. Tı̄ chit-ê sı̂ Ni-ná sı̄ i choè-toā ê an-ùi, i ū-sı̂ kap i kóng-oē, ū-sı̂ iā chim i.
Pek-jím boē kàu Tâi-pak ê í-chêng lóng sı̄ phiau-iû tı̄ tiong-pō͘ ê kok toē-hng, toā-pō͘-hūn sı̄ Tâi-tiong, Chiong-hoà choè kin-kù-toē lâi khai-sí i ê iû-gı̂m seng-oa̍h. Tı̄ hit-ê tiong-kan, i ū ǹg-bāng oē-thang koh kàu kú-kú lı̄-pia̍t ê Tâi-pak khı̀. Tùi tı̄ Tâi-pak kiô-téng sí bô sêng í-lâi í-keng ū keng-koè cha̍p-goā nı̂ ê jı̍t-chí lah. Hoâ i-seng, i-seng niû tı̄ hit-jı̍t tùi i kóng hiah-ê oē lóng chhin-chhiūⁿ ı̀n-siōng tı̄ i ê sim-lāi.
Hit-sı̂ kàu chit-sı̂, nā hoê-kò͘ lâi khoàⁿ, ū hô-téng ê piàn-hoà tı̄ i ê sim-lāi. Ki-tok-tô͘ tùi i sı̄ chı̍t-chióng kı̂-biāu, oh-tit lí-kái ê lâng. Sui-jiân sı̄ án-ni i kám-kak i su-iàu in ê oē. In-ūi in ū kı̂-biāu ê gán-kong, kı̂-biāu ê thàu-thiat, sı̄m-chı̀ ū kı̂-biāu ê ǹg-bāng. In ê oē chhin-chhiūⁿ liāng-kng hō͘ i bêng-pe̍k ka-kı̄ ê toē-ūi, kong-kéng. I ê lí-tı̀, ı̀-chı̀, lóng tı̄ chiah-ê kı̂-biāu ê lêng-la̍t ê bı̄n-chêng thè-pāi lah, i chū-sı̀n ê kin-goân ū toā iô-tāng. I kám-kak i tio̍h khut-ho̍k tı̄ hit-ê sı̂n-pı̀ ê ē-bı̄n, chiū-sı̄ Ki-tok-tô͘ só͘ chhim-sı̀n hit-ê tō-lí ê ē-bı̄n.
I àm-chı̄ⁿ siūⁿ ài koh khı̀ chhoē Hoâ i-seng, i-seng niû. Tâi-pak í-keng chiâⁿ-chò chı̍t-ê jia̍t-khai ê kok-chè to͘-chhı̄! Pek-jím kàu Tâi-pak ê sı̂ khoàⁿ-tio̍h Tâi-pak ê toā piàn-oāⁿ lâi tio̍h-kiaⁿ. I tı̄ ke-lō͘ ū tú-tio̍h kúi-nā pái hiám-hiám hō͘ chhia kauh-sí. Tı̄ chit-ê só͘-chāi i ê sim kám-kak koh khah toā ê ko͘-to̍k, hiah-ê jia̍t-kún ê siaⁿ-im hō͘ i siⁿ-chhut kiaⁿ-hiâⁿ kap chhiⁿ-so͘. Keng-koè kúi-jı̍t ê ún-ba̍t i chiah chhut-lâi thàm-mn̄g Hoâ i-ı̄ⁿ.
Tâi-pak ê chhı̄-iông lóng toā kái-piàn lah. Ta̍k-hāng lóng piàn-chhian, hō͘ i chhoē lóng bô.
“Hoâ i-seng! Goán m̄-bat i!” I khiā tı̄ jı̂n-ke tiàm-thâu lâi mn̄g lâng, in lóng án-ni ı̀n lâi chò in jı̍p-khı̀. I kui chá-khí lâi chhoē mn̄g Hoâ i-ı̄ⁿ, khiok ū lâng kóng so͘-khai khı̀ Hoa-liân-káng chiū lóng bô koh tńg lâi lah.
Pek-jím thiaⁿ-tio̍h chit-ê siau-sit sim-lāi chin siong-pi, choa̍t-bāng lâi lı̄-khui hit-ê só͘-chāi.
I sūn hit tiâu-lō͘ lâi kiâⁿ kàu oá tı̄ Tām-chúi khoe-piⁿ ê chúi-mn̂g lō͘ khı̀. Sui-jiân sı̄ jı̄-ge̍h thiⁿ, chóng-sı̄ hit-jı̍t te̍k-piat sio-joa̍h. Lâng-lâng lóng chhut-lâi tı̄ khoe-piⁿ teh pha̍k-sio, chhut-goā óng-lâi ê lâng tı̄ chit-ê só͘-chāi iû-goân chhin-chhiūⁿ teh sio-kheh, chin nāu-jia̍t. Thài-iông ê kng hoán-siā tı̄ khoe-chúi ê bı̄n, hoat-chhut chin pe̍h-kng. Hn̄g-hn̄g ū khoàⁿ-kı̀ⁿ Tâi-pak toā-kiô. Kiô-téng ū bû-sò͘ ê lâng kap chhia teh kau-óng.
Pek-jím kiâⁿ kàu chı̍t-ūi khah khoah koh an-chēng ê só͘-chāi, chiū khai-sí beh chò i ê kang.
I chiū thoat bō-á, khǹg tı̄ kha-chêng, pı̄-pān i ê khı̂m, chiū oe-khı̂m chhut-lâi. Āu-lâi chiū soà soè-siaⁿ lâi gı̂m-si. Ū ke-lō͘ ê lâng thêng-tiām in ê kha-pō͘ lâi kiâⁿ-oá tı̄ Pek-jím ê bı̄n-chêng. Chı̍t-ê..., nn̄g-ê..., bô loā-kú chiū chin-choē lâng ûi-lûi tı̄ i ê sin-piⁿ.
Hit-sı̂ A-hoa tú-tú kiâⁿ kàu hit só͘-chāi. I chiū kheh lâng ê kha-phāng lâi chı̀ⁿ kàu siāng thâu-chêng khı̀. Pek-jím oe-khı̂m gı̂m-si ê khoán-sit, tı̄ chit-ê siā-hoē siōng put-chí sı̄ ı̄ⁿ-chhái hi-kı̂.
I gı̂m-si liáu ê sı̂ chiū ǹg lâng tàm-thâu, piáu-sı̄ oân-pit kap kiû-khit. Ū kúi-lâng sûi-sı̂ lı̂m chı̂ⁿ lâi hiat tı̄ bō-á lāi.
Āu-lâi lâng lóng sı̀-soàⁿ, Pek-jím chiū khut-sin lâi siu i ê chı̂ⁿ.
A-hoa lóng bô lı̄-khui hit-ê só͘-chāi, lâi kè-sio̍k khoàⁿ Pek-jím ê hêng-tōng, in-ūi tı̄ i soè-soè ê sim ū kám-kak chı̍t-chióng hi-kı̂, chhin-bı̍t tı̄ chit-ê lâng ê sin-chiūⁿ. A-hoa ū khoàⁿ-kı̀ⁿ chı̍t-ê gûn-á ka-la̍uh tı̄ toē-nı̍h, chiū kín-kín khioh khí-lâi hêng hit-ê kap i pún-sin ū chı̍t-chióng liân-hê ê lâng.
“Iâ-so͘ kap thiⁿ-sài lóng ū khoàⁿ-kı̀ⁿ, in bô ài lâng ū àm-sàm bô kng-bêng ê sim.”
Pek-jím kàu taⁿ m̄-bat tú-tio̍h gín-ná sêng-sı̍t beh khioh chı̂ⁿ hêng i, hoán-tńg lóng sı̄ tùi bō-á lâi thau-the̍h khı̀, chóng-sı̄ A-hoa ê só͘ choè kap ı̀n-tap hō͘ Pek-jím chin kı̂-koài.
“Chit-ê gín-ná sı̄ Ki-tok-tô͘ mah? Chí ū Ki-tok-tô͘ chiah ū chit-chióng sı̂n-pı̀ ê hêng-tōng.”
I lı̄-khui A-hoa ê sı̂, koh siūⁿ-tio̍h Hoâ i-seng, i-seng niû só͘ tùi i kóng hiah-ê oē. I iā bêng-pe̍k tùi hit-sı̂ kàu taⁿ tı̄ i ê lāi-bı̄n ū chin-toā ê kái-kek lah. I ǹg-bāng Ki-tok-tô͘ oē-thang hō͘ i ta-sò iau-gō ê sim tit-tio̍h pá-chiok. Tı̄ i ê sim-lāi só͘ khat-bōng ê Ki-tok-tô͘ tek-khak ū.... I ê sim khai-sí ài beh chhoē-kiû hiān-sè í-goā ê, jı̂n-seng būn-toê. Chiū-sı̄ chin-lí, oa̍h-miā.
I kám-kak lâng khiā-khí tı̄ chit-ê bô chin-lí bô oa̍h-miā ê sè-kài sı̄ hô-téng ê pi-chhám.
Chóng-sı̄ Ki-tok-tô͘ tùi chiah-ê būn-toê ū chin-toā pá-ak kap sı̀n-sim. Ki-tok-tô͘ oē-thang kái-tap hiān-sè ê khùn-lân soà chí-ǹg chı̍t-ê hēng-hok ê lâi-sè, í-kı̍p beh chı̀n-jı̍p hit-ê lâi-sè ê hoat-tō͘.
Pek-jím tı̄ sim-lāi kám-kak i su-iàu Hoâ i-seng,i-seng niû. Khiok í-keng bô ǹg-bāng thang koh kı̀ⁿ in ê bı̄n lah. Nā sı̄ tı̄ hit-ê sit-bāng tiong i ū koh tú-tio̍h lēng-goā chı̍t-chióng ê Ki-tok-tô͘. I chiū koh siūⁿ hit-ê cha-bó͘ gín-ná tùi i só͘ kóng ê oē.
“Lóng sı̄ chin sı̂n-pı̀! Tek-khak tı̄ sı̂n-pı̀ tiong ū chin-lí!”
“Hit-ê cha-bó͘ gín-ná sı̄ sím-mı̍h khoán ê Ki-tok-tô͘, in-ūi i iā chai-iáⁿ i sı̄ Ki-tok-tô͘ á m̄-sı̄.” I kàu tı̄ chhiū-kha, chē lo̍h-khı̀, chia̍h tiong-sı̍t ê sı̂ iáu-kú teh siūⁿ chit-ê sū bô soah. Hut-jiân thiaⁿ-kı̀ⁿ ū gín-ná teh háu ê siaⁿ. “Kiám sı̄ hit-ê gín-ná?” I sûi-sı̂ siūⁿ án-ni lâi mn̄g i.
Tùi A-hoa ê chhùi só͘ kóng ê oē kap khoàⁿ i ê chêng-hêng hō͘ Pek-jím ê sim it-hoat hi-kı̂ chit-ê gín-ná. I chai-iáⁿ tı̄ chit-ê gín-ná ê sin-chiūⁿ ū chin-toā ê put-hēng, sı̄ tú-tú oē-thang kap i tâng-lia̍t saⁿ-pí ê , chóng-sı̄ gín-ná lóng bô hō͘ put-hēng lâi thun-bia̍t i. I ū kóng koh chı̍t-ê put-hēng ê kò͘-sū, chiū-sı̄ Lia̍p-sat-lō͘ pi-chhám ê it-seng.
Pek-jím chhoē-tio̍h lēng-goā nn̄g lâng sı̄ thang pí-kàu i pún-sin ê sū. Ū chı̍t ê hiān-chāi tı̄ i ê bı̄n-hêng teh kóng iáu hit ê ê sū. Tı̄ chiah-ê choa̍t-bāng pi-chhám ê lāi-bı̄n put-hēng ê tông-chı̀ teh gia̍h-ba̍k ǹg thiⁿ. Iā ū tông-chı̀ teh him-soān i ê put-hēng. Tı̄ in ê sim-lāi ū chı̍t-ê lí-sióng sim-su ê kok, sı̄ oē-thang kàu-gia̍h an-ùi, tû-siau in lóng-chóng ê put-hēng ê. Chit-ê ǹg-bāng ê kng í-keng khai-sí chiò tı̄ in ê sim. Só͘-í tı̄ in ê sim-lāi ū hoaⁿ-hí. Che sı̄ m̄-sı̄ choa̍t-bāng chiá ê chū-ùi?!
Pek-jím bô hoat-tō͘ thang jím-siū chiah-ê su-siúⁿ lâi hoán-būn. I chiū lı̄-khui cha-bó͘ gín-ná khı̀.
Pek-jím phō-tio̍h choa̍t-bāng khó͘-thàng ê chêng lâi chı̍t-pō͘ chı̍t-pō͘ kiâⁿ kàu Tâi-pak toā-kiô hong-bı̄n khı̀.
Siong-pi, o͘-àm tà-oá i ê sim.
“Éng boē-thang boē kı̀-tit ê toā-kiô!” I ê kha ta̍h-jı̍p kiô-téng ê sı̂, i chin kám-hùn. Koè-khı̀ ê hoê-sióng hō͘ i kám-kak oh-tit thun-lún, i bô ài koh siūⁿ hiah-ê sū, lâi iô-thâu koáⁿ-cháu hiah-ê ı̀-liām. Sı̍t-chāi i bô khùi-la̍t thang koh tùi-hù hiah-ê pi-chhám, khó͘-thàng ê jı̍t-chí. “Pháiⁿ-bāng! Pháiⁿ-bāng!” Khiok i ê sim kı̀m boē-tiâu siong-pi ê kám-chêng, i chí-ū iô-thâu lâi án-ni kóng. I kiâⁿ kàu hit-ê kiô-téng, chiū-sı̄ tı̄ cha̍p-goā nı̂ chêng i só͘ khiā ê só͘-chāi, i chiū tòng-tiām i ê kha. I kiâⁿ-oá tı̄ hit-ê kiô-lân. I ê siong-pi tı̀-kàu beh hō͘ i o͘-àm-hı̂n ê khoán.
“Tú-tú sı̄ cha̍p-saⁿ nı̂ chêng!” I án-ni liām lâi khı̂ⁿ-oá kiô-lân. “Khiok pháiⁿ-bāng iáu-teh kè-sio̍k!” Ū hái-hong lâi chhoe i ê thâu-mn̂g. Choē-choē lâi-óng ê chhia kap lâng tı̄ hit-ê kiô-téng bô sı̂-tiāⁿ teh hoat-chhut chı̍t-chióng pháiⁿ-thiaⁿ, thó-iàm ê cha̍p-hiáng.
“Í-chêng hit-ê ióng-kám, chū-sı̀n ê Pek-jím tı̄ to-loh?! Liân hit-ê iáⁿ iā bô-thang koh chhoē-tio̍h!”
I gia̍h i ê keng-thâu lâi ka-léng-sún.
“Pek-jím sı̍t-chāi sí khı̀ lah! Hiān-chāi só͘ ū ê Pek-jím sı̄ chı̍t-ê oân-choân phoà-chhùi pāi-lo̍h ê lâng! Taⁿ iáu ū sím-mı̍h thang bán-hoê chit-ê tó-hoāi!” I lâu ba̍k-sái chhut-lâi.
“Goá ê loán-jio̍k, khang-hi ū sím-mı̍h thang koh saⁿ pí!
Goá ê hiān-sı̍t khiám m̄-sı̄ hō͘ iu-siong, ko͘-toaⁿ saⁿ-chiap khó͘-chhó͘ kàu tı̄ chiām-chiām teh tı̂m-bia̍t ê lâng mah! Ah, goá su-iàu an-ùi! Chóng-sı̄ ū sím-mı̍h oē-thang sı̍t-chāi an-ùi lâng, koh sit-lo̍h an-ùi ê lâng beh tı̄ tá-lo̍h lâi chhoē ū oa̍h-miā ê lō͘! Lóng-sı̄ choa̍t-bāng!” Ū khó͘-náu ê sek hián-chhut tı̄ i ê thâu-hia̍h.
“Chóng-sı̄ sui-jiân án-ni, goá iáu-kú su-iàu sím-mı̍h! Nā bô goá ê oa̍h hō͘ goá tam-tng boē-khí.”
Pek-jím tùi i ê thâu-náu lâi iô-khui hiah-ê mı̂-bat ê su-siúⁿ. I koh siūⁿ hit-ê cha-bó͘ gín-ná ê oē.
Pek-jím hán-jiân siūⁿ kàu m̄-chai lâng khı̀.
“A-peh ah, A-peh ah!” A-hoa ê siaⁿ hut-jiân ū kiò chhíⁿ i.
“A-peh ah, lí sím-mı̍h sı̂ beh koh lâi? Goá beh tiàm chia tán-hāu lí!”
I ū koh thiaⁿ-tio̍h lēng-goā chı̍t ê choa̍t-bāng put-hēng ê lâng ê siaⁿ-im. Hiah-ê oē tāi-seng hō͘ i kiaⁿ, chhin-chhiūⁿ koh-chài tú-tio̍h chı̍t-ê sin ê chai-lān chı̍t-iūⁿ. I kín-kín beh lâi thoat-lı̄ hit-ê, chóng-sı̄ A-hoa koh chı̍t-pái ê siaⁿ hō͘ i m̄-káⁿ cháu-khı̀. “Chhin-chhiūⁿ goá su-iàu sím-mı̍h, chit-ê oa̍h-miā su-iàu goá. Goá kiám thang tô-thoat i mah?”
A-hoa ê sim khui-khoah khí-lâi, i ê sim ū tián-khui chit-ê kı̂-biāu ê sè-kài tı̄ Pek-jím ê bı̄n-chêng. Sûn-chin, kng-bêng, bí-biāu ê sè-kài.
I tı̄ A-hoa ê lāi-bı̄n ū hoat-kiàn tio̍h chı̍t-ê chin-toā ê tùi-chiò, sı̄ í-chêng m̄-bat kám-kak, m̄-bat siūⁿ-tio̍h ê tùi-chiò. Chı̍t ê sı̄ sio̍k thiⁿ, kng-bêng khoài-lo̍k, chı̍t ê sı̄ sio̍k toē, o͘-àm choa̍t-bāng.
Te̍k-piat A-hoa só͘ gı̂m chhut-lâi ê si, hō͘ i chin kám-tōng. I khai-sí khó-chhat A-hoa ê sū-chêng, ū ı̀-sù beh toà A-hoa kap i khı̀. I ka-kı̄ ê put-hēng tı̄ choân-sin ê tiong-kan í-keng thè kàu thiⁿ-piⁿ hái-kak khı̀ lah.
Pek-jím chiām-chiām chı̀n-jı̍p tı̄ chit-ê kı̂-biāu ê sió-lú só͘ toà lâi ê sè-kài jı̍p-khı̀.
In nn̄g-lâng ê hoē-gū sı̍t-chāi sı̄ thiⁿ-nı̍h kı̂-biāu ê chí-ı̀. Chı̍t ê sı̄ siū-chı̄n liáu put-hēng ê tiong-liân lâng, phāu-tio̍h choa̍t-bāng oàn-thàn, chı̍t ê sı̄ tı̄ ge̍k-kéng tiong m̄-chai ge̍k-kéng, thian-chin oa̍h-phoat ê sió ko͘-lú.
Chit nn̄g-ê sè-kài ê tí-chhiok só͘ beh hoat-seng ê im-hiáng nā m̄-sı̄ in nn̄g-lâng iā tek-khak boē-thang bêng-pe̍k hit-ê bí-biāu.
