Ū thiàⁿ-sim ê o͘-a

Tı̄ chı̍t châng toā châng chhiū téng-bı̄n chı̍t chiah o͘-a, i kap ma-ma toà tı̄ in só͘ choè ê siū ê lāi-bı̄n. Ū chı̍t jı̍t soè chiah o͘-a chhut-khı̀ thit-thô kàu thiⁿ beh àm chiah tńg-khı̀, kàu poàⁿ-lō͘ i siūⁿ kóng, goá tio̍h ài the̍h chı̍t lia̍p ê phōng-kó hō͘ ma-ma chia̍h, i tio̍h khı̀ chhē, sı̀-koè khı̀ chhē. Āu-lâi chhē tio̍h chı̍t lia̍p chin âng, chin súi ê phōng-kó, chin hoaⁿ-hí pe tńg-khı̀ in tau. Kàu in tau í-keng chin àm, ge̍h-kiû iā chhut-lâi lah! Ma-ma khoàⁿ i hiah àm chiah tńg-lâi, sı̄ in-ūi chhē phōng-kó beh hō͘ i, sim chin hoaⁿ-hí, in nn̄g chiah chiáu-á chiū chē tı̄ chhiū-téng chhiùⁿ-koa khoàⁿ ge̍h. Tú tı̄ hit sı̂, tı̄ chhiū-á kha ū siaⁿ teh háu “me, me, me...” soè chiah o͘-a thiaⁿ-kı̀ⁿ, kā ma-ma kóng, “Goá beh lo̍h-khı̀ khoàⁿ.” Chiū pe lo̍h-khı̀, khoàⁿ tio̍h chı̍t chiah iûⁿ-á-kiáⁿ tı̄ hia chhē bô in tau, soà khui siaⁿ háu. Ou-a chiū mn̄g iûⁿ-á kóng, “Lín tiàm tı̄ tó-ūi?” Iûⁿ-á-kiáⁿ kóng, “Goá boē jı̄n-tit lō͘ thang tńg-khı̀, chóng-sı̄ goá chai, goán tiàm tı̄ chı̍t keng lé-pài-tn̂g ê piⁿ-á.” Ou-a an-ùi kóng, “Hó! Lí m̄-thang háu, koai-koai tı̄ chia, goá lâi mn̄g goá ê ma-ma khoàⁿ tio̍h cháiⁿ-iūⁿ?” Chiū pe khı̀ chhiū-téng kā ma-ma kóng, “Ū chı̍t chiah iûⁿ-á-kiáⁿ chhē bô in tau.” Ma-ma kóng, “Lí kiò i tiàm lán ê chhiū-kha hioh mı̂, bı̂n-á chá-khí chiah khı̀ chhē chı̍t lia̍p phōng-kó soà the̍h khı̀ hō͘ i chia̍h.” Soè chiah o͘-a chiū pe lo̍h-khı̀, chiàu án-ni kóng, iûⁿ-á-kiáⁿ the̍h phōng-kó chin hoaⁿ-hí, koh ū chı̍t keng chin hó-sè tiàm ê chhù thang tı̄ hia hioh mı̂, chiū bô háu, o͘-a chiū pe tńg-khı̀ chhiū-téng khùn. Keh chá-khí chin chá, soè chiah o͘-a chiū khí-lâi, pe chin hn̄g ê lō͘ thoè iûⁿ-á chhē in tau, pe kè soè tiâu khoe koh kè soaⁿ, chı̍t-keng chı̍t-keng ê chhù. Āu-lâi khoàⁿ tio̍h ū chı̍t keng lé-pài-tn̂g, lé-pài-tn̂g ê piⁿ-á ū chı̍t chiah iûⁿ ê ma-ma khiā tı̄ hia teh chhē mı̍h ê khoán, o͘-a chiū pe lo̍h-khı̀ mn̄g, “Lí ū iûⁿ-á-kiáⁿ phah-m̄-kı̀ⁿ bô?” “Ū, lí chai mah?” “Cha-àm tı̄ goán tau hioh mı̂, in-ūi chhē bô lō͘ thang tńg-lâi, án-ni hó, goá koáⁿ-kín lâi-khı̀ chhoā i tò-tńg-lâi.” Iûⁿ-á ma-ma kóng, “Pài-thok leh.” Ou-a pe tńg-khı̀, chiū kā iûⁿ-á-kiáⁿ kóng beh chhoā i tńg-khı̀, koh kóng lí tè goá cháu, goá pe kàu hia, lí tio̍h cháu kàu hia, soè chiah o͘-a chiū koh pe-khı̀, iûⁿ-á-kiáⁿ iā tè o͘-a cháu. Chhoā kàu ūi, iûⁿ-á ê ma-ma chin hoaⁿ-hí, oē thang khoàⁿ tio̍h kó͘-chui ê iûⁿ-á-kiáⁿ, in chiū lóng kā soè-chiah o͘-a to-siā, í-āu o͘-a iā siông-siông pe lâi chia kap in thit-thô. （Lú-soan Ge̍h-khan Tē 64 kı̂, 1965 nı̂ 4 ge̍h)