Nn̄g-chiah chài kui-chài hoè-bu̍t ê chûn-á thêng-tı̄ káng-kháu. Chı̍t-chiah tú beh chhut-káng, chı̍t-chiah tú beh jı̍p-káng. Toā-pō͘-hūn ê lâng tùi beh chhut-phâng ê chûn lóng kā sēng-tāi hoan-sàng; tùi jı̍p-káng tńg-lâi ê chûn, khiok chin-chió khı̀ hoan-gêng. Iû-thài-lâng kóng, che sı̄ chin gû-gōng ê sı̍p-koàn. Beh chhut-hái ê chûn, chiân-tô͘ oh liāu, bô tek-khak ē tú tio̍h po̍k-hong-ú, chûn tı̂m-lo̍h hái. Bô-hoat-tō͘ ū-liāu i-ê miā-ūn, ná ē beh jia̍t-jia̍t hoan-sàng i chhut-phâng neh? Hoán-tńg lâi kóng, chı̍t-chiah keng-koè iâu-oán kan-lân ê lú-thêng ê chûn, choè-āu pêng-an bû-sū jı̍p-káng, chiah sı̄ chin-chiàⁿ bô-hān ê hoaⁿ-hí, in-ūi i í-keng oân-sêng jı̄m-bū.
Jı̂n-seng ê lú-thêng iā-sı̄ án-ni. EN-á chhut-sı̀, tāi-ke lóng kā chiok-hok, khó-pí i beh sái jı̍p jı̂n-seng ê toā-hí, tān-sı̄ bô-lâng ē-tàng ū-liāu i-ê bı̄-lâi, bô tek-khak sió-sió ê nı̂-kí chiū sí--khı̀; bô tek-khak í-āu piàn-choè sat-jı̂n hiong-siú. Tān-sı̄, tng chı̍t-ê lâng bâi-chòng kui-thó͘ ê sı̂, tāi-ke lóng chai-iáⁿ i tn̂g-tn̂g ê it-seng ê só͘-kiâⁿ só͘-chò, só͘-í, tı̄ chit-ê sı̂-chūn, tāi-ke èng-kai kā i sek-tòng ê chiok-hok chiah tio̍h.
(Hong-hiòng Tē 16 kı̂, 1992 nı̂ 5 goe̍h)
