A-jia̍t-tāi Hoe-lúi Hō͘ Pek-hāi Tâi-gí ê Àu Tiong-kok-á

 Lín kóng 
  Goá sı̄ chı̍t-phō bô-kàu-khoàⁿ ê hoe-châng, 
  N̂g-sng phú-phú ê hoe-lúi boē phang, 
  Chhàng-chhàng lian-lian ê hio̍h bô chhiⁿ-chhùi, 
 Tı̄ A-jia̍t-tāi iām-mé ê jı̍t-thâu-kha, 
  Tı̄ ta-khok-khok ê chio̍h-thâu-phāng, 
  Goá tiām-tiām kā thâu tàm--lo̍h, 
  Khiam-pi kā hio̍h-á sûi--lo̍h, 
  Ūi-tio̍h beh khı̂ⁿ-tiâu 
  Thô͘-kha-té múi-chı̍t-tih chúi-hūn, 
  Ūi-tio̍h beh oa̍h--lo̍h-khı̀, 
  Kut-la̍t thoàⁿ--chhut-khı̀. 
 M̄-kú 
  Lín nā khoàⁿ goá lám-lám, 
  Siàu-siūⁿ beh kha̍p--goá, chiān--goá, bán--goá, 
  Lín chiū ē chhoah-chı̍t-tiô, 
  Sûi kā chhiú kiu--tńg-khı̀, 
  In-ūi lín m̄-bat khoàⁿ-tio̍h goá ê seng-khu, 
  Moá-moá-sı̄ kāu-kāu ê àm-chhı̀, 
  Pí mûi-kùi--ê khah lāi, khah tēng, khah chha̍k. 
 Lín nā beh kā goá chhoah-tn̄g, 
  Hoán-tńg ka-kı̄ seng tò-siàng. 
  In-ūi goá sı̄ chı̍t-châng 
  Tèng-kin tı̄ A-jia̍t-tāi hái-tó ê hoe-lúi, 
  Goá ê kha khiā-chāi-chāi, 
  Tı̄ lín khoàⁿ-boē-tio̍h ê thô͘-kha-té, 
  Keng-koè jı̍t-pha̍k, hong-thai kap toā-chúi, 
  Iû-goân m̄-goān pàng-lı̄. 
 Liáu-āu 
  Lín ē kóng 
  Goá sı̄ chı̍t-khoán m̄-chai hó-pháiⁿ 
  A-jia̍t-tāi goân-seng sin hoe-chéng, 
  Ū áu-boē-chı̍h ê hoe-m̂, 
  Jūn-pó͘-pó͘ ê kin, 
  Ngē-khiak-khiak ê chhı̀. 

（Tâi-bûn Thong-sı̀n Tē 115 kı̂, 2003 nı̂ 9 goe̍h）