Ba̍k-kiàⁿ

Toā-lâng ê sè-kài
 Bô lâng bô koà ba̍k-kiàⁿ
 Bô lâng koà ê ba̍k-kiàⁿ bô chhái-sek
Lí koà kı̄n-sı̄ ba̍k-kiàⁿ
 Goá koà ê pí lí ê
 Koh khah kı̄n-sı̄
Lí koà thài-iông ba̍k-kiàⁿ
 Goá koà goe̍h-niû
 Lán ū thài chē siong-jiah
 Pha̍k-tio̍h jı̍t chiū thiàⁿ
Lí koà o͘-jı̂n ba̍k-kiàⁿ
 Goá koà pe̍h-jı̂n
 Ou-jı̂n kàng pe̍h-jı̂n
 Chêng-jı̂n piàn siû-jı̂n
Lí koà kim-kheng ba̍k-kiàⁿ
 Goá koà ê m̄-sı̄ kim, kheng mā-sı̄
 Sı̀-kak sı̀-kak
 Chı̍t-ê chhùn-chhioh ha̍h kui sè-kài
Lí koà n̂g-sek ba̍k-kiàⁿ
 Ba̍k-chiu kek bui-bui
 Goá koà ê phú-sek
 Ta̍k-sı̂ o͘-im-thiⁿ
Chı̍t-iūⁿ bí chhı̄ pah-iūⁿ lâng
 Chı̍t-iūⁿ lâng koà pah-iūⁿ ba̍k-kiàⁿ
 Múi-kang bô-êng chhih-chhih
 Chı̍t-ki ba̍k-kiàⁿ oāⁿ koè chı̍t-ki
Ba̍k-kiàⁿ kap ba̍k-kiàⁿ
 Ū-sı̂ ē it-kiàn-chiong-chêng
 Ba̍k-chiu bông-bông tah bông-bū
 Sè-kài chhun nn̂g ê lâng
Nn̄g ê lâng ê sè-kài
 Seⁿ-chhut chı̍t ki chı̍t ki
 Sè-sè ki ê ba̍k-kiàⁿ
Sè-ki ba̍k-kiàⁿ chiām-chiām toā
 Ū-ê jı̄n-chin khoàⁿ jı̂n-seng
 Jú lâi jú ū chhim-tō͘
 Kı̄n-sı̄ piàn oán-sı̄
 Jú khoàⁿ jú hn̄g
Ū-ê jú khoàⁿ jú hoe
 Piàn-chò lāu-lâng ke-á-ba̍k
 Ū-ê jú khoàⁿ jú chheng-chhó
 Jú kiaⁿ
 Soah khoàⁿ-phoà jı̂n-seng
 Piàn-chò chı̍t ki ún-hêng ba̍k-kiàⁿ