Chân jím ê tâng-ki
Lūn Tiong-lō͘ ê kàu-hoē, tùi siat kàu-taⁿ oá ū 8,9 nı̂ kú; chêng bô pài-tn̂g, só͘ chū-chı̍p chiū-sı̄ hiaⁿ-tı̄ ê chhù:iā bô thoân-tō, sı̄ Toā-o̍h ê pêng-iú lûn-liû teh lâi lé-pài; kàu kin-nı̂ Kàu-sū phài goá lâi toà. Iā bô tiúⁿ-ló, chí-ū chı̍t-ê chip-sū; chit-ê kàu-hoē sı̄ sio̍k Tâi-lâm ê chi-hoē, lı̄ Tâi-lâm-siâⁿ 2 phò͘ tn̂g-tn̂g, sio̍k Hōng-soaⁿ-thiaⁿ koán; oá tı̄ Kong-soaⁿ ê só͘-chāi. Múi lé-pài khah siông ū 60 goā lâng lé-pài. Kàu kin-nı̂ chiū khí chı̍t-keng pài-tn̂g, khai chheng-goā-kho͘, sı̀-ûi ê chng-thâu lóng chai. Hiān-sı̂ iā ū chē-chē lâng ài lâi khoàⁿ. Iā ū sin thiaⁿ ê lâng lâi-lâi khı̀-khı̀.
Kı̂-tiong lı̄ Tiong-lō͘ oá 6 lí, ū chı̍t chng miâ Ka-tang-kha, ū 3 lâng lâi sin thiaⁿ, in-ê miâ chiū-sı̄ Toā-chhêng, Hoê-siūⁿ, Lí Choâⁿ. In lâi thiaⁿ 2 lé-pài, chiū tú-tio̍h in chng-tiong ê tâng-ki,chiūⁿ-tâng, lóng bô koè kū-le̍k 9 goe̍h 10 jı̍t chiū beh sio in-ê chhù, kóng in khı̀ jı̍p kàu; taⁿ i m̄ koán in 3 lâng khı̀ jı̍p kàu, tek-khak beh sio in-ê chhù, tùi hit-tia̍p in chiū m̄-káⁿ lâi lé-pài.
Kàu kū-le̍k 9 goe̍h 7 jı̍t chiū-sı̄ lé-pài-jı̍t, hit ē-po͘ goá chiū khı̀ chhoē in, khó͘-khǹg in tio̍h koh lâi; in kóng, Pu̍t beh sio goán ê chhù. Goá chiū kā in kóng bô-iáⁿ, nā chò ū-iáⁿ chiū-sı̄ lâng sio, pu̍t bē sio. Āu-lâi tâm-lūn khó͘-khǹg kàu jı̍t beh lo̍h, goá chiū koh tńg-lâi kàu Tiong-lō͘ chia̍h ê-hng; chia̍h pá bô loā-kú chha-put-to oá 9 tiám cheng, in-ê chhù chiū hō͘ hoé sio khı̀. Chin-chiàⁿ toā khó-lı̂n. In-ūi hiah-ê lâng sı̄ sàn-hiong, koh lóng bô the̍h poàⁿ hāng mı̍h chhut--lâi. Sim siūⁿ liáu put-chí kan-khó͘, goá chiū thàm-thiaⁿ khoàⁿ sı̄ án-choáⁿ sio.
Ū lâng kā goá kóng, sı̄ tâng-ki pàng-hoé. I chiong hiuⁿ chat hoé-chhâ kā i hē tı̄ chhù-téng ê hm̂-chháu sio. In chhù-chú iā chai sı̄ tâng-ki pàng-hoé, chóng-sı̄ m̄-káⁿ kā chhut-só͘ kóng. Āu-lâi goán ū chham-siông tek-khak tio̍h siat-hoat, tú-hó chip-sū ū tng chòng-teng thoân-tiúⁿ, hit-tia̍p chip-sū ū kap kúi-nā ê hiaⁿ-tı̄ khı̀ lia̍h hit-ê tâng-ki, kā i lia̍h ê sı̂ ū kā i kóng, kah i tio̍h poê, nā bô beh lia̍h hō͘ Chhut-só͘. Hit-tia̍p i ū jı̄n, iā ı̀n beh poê 20 kho͘. Āu lâi lia̍h hō͘ Chhut-só͘; Chhut-só͘ chiū tiàu in-ê pó-chèng, kap hō͘ hoé sio chhù ê lâng; khó-sioh hō͘ hoé sio-chhù ê lâng kiaⁿ tâng-ki ē koh-chài hāi i, soà m̄-káⁿ kóng sı̄ tâng-ki sio, kóng sı̄ sio chháu-sap tò͘--tio̍h. Pó-chèng iā-sı̄ kiaⁿ án-ni; iā thè tâng-ki pó bô-sū .Liân-āu phah-phah pàng i khı̀, kah i hit keng chháu ê pu̍t-biō tio̍h pàng-hoé sio, m̄-thang koh chò tâng-ki. Hàiⁿ ah ! Hiān-sı̂ iáu ū chit hō lâng oàn-hı̄n tō-lí án-ni, sı̍t-chāi chin thang hoân-ló. Taⁿ chhiáⁿ lín tio̍h thè chiah-ê kàu-hoē kiû Siōng-tè; hō͘ chiah-ê lâng ē tit-chhéⁿ-gō͘, chai in pài pu̍t ê chhò; in-ūi Siōng-tè tek-khak ē iâⁿ ta̍k téng ê sı̂n-bêng. (Khoàⁿ 10 goe̍h 20 hō ê Chú-jı̍t Sı̂n-liông).
(Tâi-lâm Hú-siâⁿ Kàu-hoē-pò Tē 272 koàn, 1907 nı̂ 11 ge̍h)