Chín-chai ê Chhám-kéng

Ùi Wiki Tô·-su-kóan
Sı̀ goe̍h 21 jı̍t chá-khí 6 tiám kòng-cheng, hut-jiân toē toā tāng, hit jı̍t goá tı̄ Sai-thâm, toà tı̄ So͘ Chhun-sēng Chip-sū tau, i ê chhù sı̄ nn̄g-chàn ê chhù, goá tı̄ lâu-kha khùn, tú beh khí-chhn̂g, tú-tio̍h toē toā tāng, i ê chhù liâm-piⁿ tó--lo̍h-lâi, goá kín bih tı̄ mn̂g-khiā, chiah bián siū-sí, i ê ke-lāi kap goá kiōng 11 lâng, chí-ū goá kap Chhun-sēng ê toā-kiáⁿ 12 hè siū-siong, kı̂-û--ê 9 lâng lóng bô siū-siong, che bêng-bêng sı̄ Siōng-chú ê pó-hō͘. Sai-thâm ê chng ū kúi-cha̍p hō͘ nā-tiāⁿ, thang kóng chhù lóng tó--khı̀, lán ê pài-tn̂g iā tó--khı̀. Hit só͘-chāi ū hiān sí kúi-nā lâng, goá ū siū-siong tı̄ thâu-khak kap chhiú,Chhun-sēng ê kiáⁿ iā-sı̄ tı̄ thâu-khak kap seng-khu siū-siong, jı̂n-sū put-séng.Chhù tó ê sı̂, goá tı̄ lâu-kha oa̍h-tâi,toē-tāng soah, chiah tùi chhù-khang pê--chhut-lâi, goá ê siong keng-kè cha̍p-goā jı̍t, chiū lóng hó, chin kám-siā Siōng-tè. 
Toē-tāng āu tiám-goā cheng, lio̍h-á khah chū-chāi, teh khoà-lū Kong-koán-chng ê kàu-hoē kap ke-lāi, chiū thoa-miā kiâⁿ-lō͘ poâⁿ-soaⁿ tńg-khı̀, kiâⁿ-lō͘ 5 tiám cheng kú, in-ūi iáu-bē khí-chhn̂g, goá ê saⁿ-khò͘, bō-á, sı̂-pió, oê, Sèng-keng, Sèng-si, it-khài tâi tı̄ goá khùn ê só͘-chāi, kan-ta chhēng lāi-saⁿ lāi-khò͘ pê--chhut-lâi, seng-khu bô chı̍t-sián, bô io̍h thang kô͘, ài kiâⁿ-lō͘, bô chhēng oê boē kiâⁿ, chiah kā lâng pun chı̍t-siang ūn-tōng-oê lâi chhēng. Bô io̍h, bô io̍h-pò͘ thang pau, chiah kā lâng pun bı̄n-kun lâi pau.
Hit jı̍t bô lo̍h-hō͘, sı̀-kè pang-soaⁿ, tı̀-kàu bô lō͘ thang kiâⁿ,khoe-chúi iā lô-lô, chhin-chhiūⁿ choè hong-thai ê lô-chúi, che sı̄ boē-bat khoàⁿ-kı̀ⁿ ê sū. Chı̍t-ē tńg kàu-ūi, khoàⁿ-kı̀ⁿ Kong-koán ê chhù choân-bia̍t, khoàⁿ-kı̀ⁿ pài-tn̂g lóng phoà-liáu-liáu, goá ê ka-cho̍k khiā tı̄ hū-kūn ê thiⁿ-tiong-ng, boē kı̀m-tit chhut-siaⁿ thı̂-khàu; goá ê cha-bó͘-kiáⁿ Chhun-kiau chhoā goá khı̀ Kong-ha̍k-hāu hō͘ kiù-hō͘-pan ho̍k-io̍h. Chhù tó, koe-lō͘ bô lō͘ thang kiâⁿ, tio̍h kiâⁿ chhân-hoāⁿ kàu Kong-ha̍k-hāu, khoàⁿ-kı̀ⁿ tı̄ ūn-tōng-tiâⁿ ê siū-siong-chiá moá-tiâⁿ, sí--ê iā kui-tui, koan-bo̍k iā chin-choē, ū-ê bô koan-bo̍k thang toé, ēng pang tèng choè koan-bo̍k, iā ū-ê ēng chháu-chhio̍h pau,thı̂-khàu ê siaⁿ, ai-chhan ê siaⁿ moá hı̄-khang kı̀ⁿ-tio̍h pêng-iú chhin-lâng lóng lâu ba̍k-sái. Chit pái goá só͘ lâu ê ba̍k-sái, pí sí pē-bú só͘ lâu--ê khah choē, só͘-ū ê chhám-kéng, m̄-sı̄ ēng pit siá oē chı̄n. Kong-koán-chng só͘ sún-sit ê châi-sán sǹg boē liáu, lâng siū-siong--ê 1000 goā, sí--ê oá 300 lâng, kàu kin-á-jit (5: 14 ), siong-tiōng ê siū-siong-chiá iáu chin-choē, lı̂m-sı̂ pı̄ⁿ-ı̄ⁿ iáu kúi-nā ūi,hiān-sı̂ ta̍k lâng iáu toà tı̄ lı̂m-sı̂ ê liâu-á. 
Lán ê kàu-hoē iā toā sún-hāi, hoē-iú jı̄-cha̍p goā hō͘, chí-ū nn̄g-hō͘ toà tı̄ khah lāi-soaⁿ ê, chhù bô tó, ū jı̄-cha̍p hō͘ chhù tó, bô chhù thang toà; hoē-iú siū teh-sí ê chı̍t miâ, siū-siong ê gō͘ miâ, hiān-sı̂ nn̄g-miâ tiōng-tiong ê, iáu-boē hó, tı̄ lı̂m-sı̂ pı̄ⁿ-ı̄ⁿ tı̄-liâu, sui-sı̄ án-ni, lán hoē-iú ê sí-siong-sò͘ khah chió, che-sı̄ Siōng-chú ê te̍k-pia̍t un-kò͘.
Goán siū chai-hāi, ū tit-tio̍h lia̍t-ūi ê thiàⁿ chin choē, ū Úi bo̍k-su, Kai sian-siⁿ, Tè i-seng, Chhı̂ bo̍k-su, Jı̍t-ki Chheng-liân-hoē, Tâi-lâm Ki-tok-kàu Chheng-liân-hoē, Tâi-lâm Sı̂n-ha̍k-hāu sian-siⁿ kap ha̍k-seng, iā Khó͘ Hông-bô͘ sian-siⁿ, Tēⁿ Chhong-kok sian-siⁿ, Tâi-pak Sı̂n-ha̍k-hāu sian-siⁿ kap ha̍k-seng, Koa sian-siⁿ-niû téng, kok thoân-thé ló͘-la̍t kàu chai-hāi-toē lâi ūi-mn̄g goán, iā-ū choē-choē hē-sù kiàn-hú-kim kap bu̍t-phín, iā tit-tio̍h Má-kai pı̄ⁿ-ı̄ⁿ Sû i-seng sàng i-phín lâi pang-chān goán, iā ū tit-tio̍h choē-choē ūi-būn ê phoe.
Taⁿ goá choè pı̀-hoē ê tāi-piáu, siá kúi-jı̄ kèng-ı̀ lâi kā lia̍t-ūi soah-siā, goá hiān-sı̂ iáu toà tı̄ chhit, peh chhioh khoah ê liâu-á, ū tit-tio̍h kàu-sū-hoē ê thiàⁿ, thoè goá siat-hoat khí lı̂m-sı̂ a-iân, pang-á ê sok-siā kap lé-pài-só͘, ǹg-bāng koh bô kúi-jı̍t, hoē khí hó, iā ǹg-bāng lia̍t-ūi oē thoè goán kı̂-tó, kiû Siōng-chú khui-lō͘, hō͘ goán ū ho̍k-heng ê kı̂.
(Koà-chhài-chí tē 113 hō (Kong-pò tē 603 hō), 1935 nı̂ 6 goe̍h)