Sı̀ ge̍h 21 hō, Tâi-oân Tiong-pō͘ ê toā toē-tāng, hit-ê chhám-chōng tı̄-chia goá m̄-bián koh kóng-khí. Chiàu sin-bûn-choá siōng khoàⁿ khí-lâi, ūi-tio̍h chit pang ê toē-tāng, piáu-chhut tông-chêng lâi chiu-chō͘ chín-chai tiong ê tông-pau ê lâng chin-choē, koh-chài goá iā khak-sı̀n, iáu ū chin-choē chiu-chō͘, sū-sı̍t bô piáu-chhut tı̄ sin-bûn-choá siōng, chit khoán hêng-ûi sı̄ chin hó.
Taⁿ tı̄-chia goá ài sió-khoá khó-chhat,tùi chit-ê toē-tāng, sū-sı̍t lán tio̍h cháiⁿ-iūⁿ. Tı̄-chia ū sı̂n-pı̀, m̄-sı̄ lán lâng só͘ thang chai ê só͘-chāi, choân-jiân sio̍k tı̄ Siōng-tè ê sū. Tùi chit-ê chai-lān, goá khak-sı̀n, sui-jiân goá boē-oē bat, sı̄ Siōng-tè liap-lí ê keng-lûn ê piáu-hiān. Tı̄-chia Siōng-tè ū choē-choē ê ı̀-gı̄,chóng-sı̄ tùi chín-chai beh kiò-chhíⁿ lán koh séng-chhat jı̂n-seng ê chin ı̀-gı̄, chin hong-chiam, chit-ê ı̀-gı̄ tek-khak chham tı̄ choē-choē ı̀-gı̄ ê tiong-kan. Tùi chín-chai lán it-hoat kám-kak jı̂n-seng sı̄ bı̂n-bāng, jı̂n-seng sı̄ hâng-hái, jı̂n-seng sı̄ chhut-goā, jı̂n-seng sı̄ iu-khó͘. Tı̄-chia lán tio̍h bêng-pe̍k chı̍t hāng, chiū-sı̄ jı̂n-seng sui-jiân sı̄ iu-khó͘, iáu-kú lán boē-oe siám--tit.
Ū chı̍t-chióng ê lâng, tùi chı̀n-chai soah siⁿ-chhut ià-sè hiòⁿ-tēng jı̂n-seng ê kè-ta̍t, khı̀ chū-sat, che m̄-sı̄ lán só͘ ài chhú ê thāi-tō͘, koh ū chı̍t chióng ê lâng, tùi chı̀n-chai soah chı̀n-jı̍p tı̄ chùi-seng bāng-sí ê seng-oa̍h, chiàu in kóng, kin-ná-jı̍t lim-chia̍h, bı̂n-á-jı̍t sí khah hó. Tùi án-ni soah khı̀ hiōng-lo̍k, khang koh-chài khang ê khang-hi seng-oa̍h kan-ta chùi tı̄ bu̍t-chit-ê hióng-lo̍k, che iā-sı̄ kiat-kio̍k hiòⁿ-tēng jı̂n-seng ê kè-ta̍t, chū-jiân m̄-sı̄ lán só͘ ài chhú ê thāi-tō͘.
Koh chı̍t chéng ê lâng, tùi keng-giām á-sı̄ khoàⁿ-tio̍h chín-chai ê khó͘-thàng, soà siⁿ-khí tō-tek-tek ê kak-chhíⁿ, kám-kak chāi-lâi ê bô tō-tek, chhia-hoâ, bu̍t-chit-tek ê hióng-lo̍k m̄-hó, ài tı̀-ı̀ tı̄ jı̂n-tō-chiūⁿ ê seng-oa̍h. Chit khoán thài-tō͘ sı̄ chin hó ê chhut-hoat, m̄-kú nā kan-ta án-ni oá-khò ka-kı̄ ê kám-hùn,kiat-kio̍k sı̄ bô hó chiong-kio̍k. In-ūi lâng ê kám-hùn liâm-piⁿ oē léng, chiū koh ho̍k-goân chêng ê seng-oa̍h, iû-goân sı̄ tūi-lo̍h tı̄ chêng nn̄g khoán ê seng-oa̍h thài-tō͘. Tı̄-chia ū hoàn-bia̍t ê pi-ai.
Choè-āu ū chı̍t chéng ê lâng, tùi chín-chai ê khó͘-lān, kám-kak jı̂n-seng sı̄ chiām-sı̂, eng-kai tio̍h chhē chı̍t ê éng-oán ê só͘-chāi. Tùi án-ni, i chiū chı̍t bı̄n tı̄ jı̂n-seng chı̄n gı̄-bū, koh chı̍t bı̄n cheng-chı̀n tı̄ lêng-kài, éng-oán ê seng-bēng.
Lán choè Ki-tok-tô͘ tio̍h chhú choè-āu chit-ê thài-tō͘, in-ūi éng-oán ê lêng-kài, sı̄ lán ê hok-im choè tē-it kiông-tiau ê só͘-chāi, tùi lán ê Chú Ki-tok ê khé-sı̄, iā sı̄ lán choè tē-it bêng-ê. Iâ-so͘ ê kà-sı̄ sı̄ kiò lán “Chı̄n sim, chı̄n sèng,chı̄n la̍t thiàⁿ Chú lí ê Siōng-tè,” che sı̄ cheng-chı̀n tı̄ lêng-kài éng-oán ê seng-oa̍h. Koh kà-sı̄ kóng, “Tio̍h thiàⁿ lâng chhin-chhiūⁿ ka-kı̄,” che sı̄ chı̄n jı̂n-seng ı̀-gı̄ ê choè tē-it hó ê piáu-hiān. Lia̍t-ūi hiaⁿ-ché, lán m̄-bián kan-ta choa̍t-bāng, á-sı̄ hióng-lo̍k chiām-sı̂ ê sè-kan, á-sı̄ chı̍t-sı̂-tek ka-kı̄ kám-hùn ; lán tio̍h tiàm tı̄ Chú khǹg ǹg-bāng tı̄ lêng-kài éng-oán thiⁿ-téng ê chó͘-ke, iā sı̄ sè-kan ūi-tio̍h beh chiâⁿ tı̄ thâu-chêng éng-oán ê hi-bōng, lâi chı̄n ū ı̀-gı̄ ê jı̂n-seng.
Pó-lô Sian-siⁿ tı̄ kan-khó͘ tiong, tı̄ teh-beh gū-tio̍h sí ê sı̂, só͘ piáu-chhut ê ióng-kám, chiū-sı̄ tùi ū chit hō thiⁿ-téng ê chó͘-ke ê hi-bōng chin kiông tı̄ i ê sı̀n-gióng ê iân-kò͘. I kóng, “Só͘-í goán bô loé-chı̀ ; goán ê goā-thé sui-jiân pāi-hoāi, nā-sı̄ goán ê lāi-sim jı̍t-jı̍t oāⁿ-sin. In-ūi goán ba̍k-nih-kú khin-khin ê kan-khó͘, sı̄ kā goán chiâⁿ siōng-téng-siōng éng-oán ê toā êng-kng, in-ūi goán m̄-sı̄ khoàⁿ tı̄ só͘ oē khoàⁿ-kı̀ⁿ--ê, sı̄ khoàⁿ tı̄ só͘ boē khoàⁿ-kı̀ⁿ--ê : in-ūi só͘ oē khoàⁿ-kı̀ⁿ--ê sı̄ chiām-sı̂, só͘ boē khoàⁿ-kı̀ⁿ--ê sı̄ éng-oán. In-ūi goán chai, goán tı̄ toē-nih pò͘-pı̂ⁿ ê chhù nā húi-hoāi, chiū ū tùi Siōng-tè só͘ khí-chō, m̄-sı̄ lâng ê chhiú só͘ chō ê chhù, sı̄ éng-oán tı̄ thiⁿ-nih ê” (11 Lı̂m 4 : 16---). Koh kóng,“In-ūi taⁿ goá ê huih teh choè koàn-tiān, goá kè-sı̀ ê kı̂ kàu lah. Goá í-keng cheng-chiàn hó ê cheng-chiàn, í-keng chı̄n pháu-cháu ê lō͘-chām, í-keng siú só͘ sı̀n ê tō-lí. Taⁿ liáu-āu ū gı̄ ê bián-liû kā goá pı̄-pān hē-teh” (11 Thê 4 : 6---) Chit khoán thài-tō͘ sı̄ lán tio̍h chhú--ê. Tùi toā toē-tāng, lán nā ū thang koh-khah bêng thiⁿ-téng ê chó͘-ke, khah bêng-pe̍k jı̂n-seng ê ı̀-gı̄, ūi-tio̍h lán só͘ sı̀n--ê it-hoat lâi cheng-chı̀n ; án-ni lán chiū thang hoat-kiàn tām-po̍h Siōng-tè ê êng-kng tı̄ chín-chai ê sū-sı̍t. Bāng lán lóng ū Pó-lô Sian-siⁿ ê thài-tō͘. I kóng, “Oa̍h sı̄ ūi-tio̍h Ki-tok, sí sı̄ lı̄-ek.”
(Tâi-oân-kàu-hoē-kong-pò tē 603 hō, 1935 nı̂ 6 goe̍h)
