Chú tháu-pàng goá

Chhin-ài ê Chú Iâ-so͘, kám-siā Lí hō͘ goá tit-tio̍h Lí só͘ sù choè khoài-lo̍k ê éng-seng. Chú ah! koè-khı̀ goá m̄ bat Lí, goán choân-ke só͘ chông-pài ê sı̄ kúi-sı̂n, iáu-kú Lí lâi chín-kiù goá, kám-siā Lí! Khai-sí phoà-pı̄ⁿ: Kū-nı̂ 11 ge̍h 31 jı̍t goá phoà-pı̄ⁿ, hit sı̂ tú-hó teh liû-hêng kám-mō͘, goá chiū siūⁿ tāi-khài iā-sı̄ kám-mō͘, bô sím-mı̍h iàu-kín. Chóng-sı̄ keng-koè kúi-jı̍t pa̍t-lâng ê kám-mō͘ lóng í-keng hó, nā-sı̄ goá ê pı̄ⁿ ná giâm-tiōng, soà peh boē khí-lâi, sui-jiân ū chhiáⁿ 3, 4 ê i-seng khoàⁿ, iā lóng bô hāu, pē-bó kap goá ê bı̄-hun-hu chin tio̍h-kip, chiū sàng goá jı̍p Phêⁿ-ô͘ pı̄ⁿ-ı̄ⁿ, ı̄ⁿ-tiúⁿ kóng sı̄ koaⁿ-chéng chù-siā chiū oē hó, goá chiū jı̍p-ı̄ⁿ chı̍t lé-pài kú, chóng-sı̄ pı̄ⁿ-sè iā bô khah hó. Hit sı̂ kū-le̍k koè-nı̂ teh beh kàu, in-ūi m̄ ài tiàm pı̄ⁿ-ı̄ⁿ koè-nı̂ chiū chhut-ı̄ⁿ, chhut-ı̄ⁿ 4, 5 jı̍t āu, pı̄ⁿ hut-jiân siong-tiōng, só͘ chia̍h ê mı̍h lóng thò͘ chhut-lâi, koh koè 1,2 jı̍t liân tê iā boē lim, án-ni kè-sio̍k 2 lé-pài kú. Chò pē-bó ê khoàⁿ-tio̍h goá án-ni, chin m̄ koè-sim chiū chhiáⁿ hàn-i lâi khoàⁿ, i-seng chha-put-to chı̍t-tiám cheng lâi khoàⁿ chı̍t-pái, choè hó ê pān-hoat, i-seng lóng ēng koè, chóng-sı̄ pı̄ⁿ chí ū ná siong-tiōng. Ko͘-put-chiong chiū koh khı̀ jı̍p-ı̄ⁿ. Mô͘-kúi beh thó-chia̍h: Hit sı̂ goá lóng m̄-chai lâng, ı̄ⁿ-tiúⁿ kā goá kiám-cha giām bô pı̄ⁿ, kóng goá kiám-chhái sı̄ cheng-sı̂n-pı̄ⁿ. Goá ê lāu-bó kóng sı̄ Mô͘-kúi beh lâi thó chı̂ⁿ,thó mı̍h chia̍h, i chiū khai-sí toā pài-pài, i khı̀ chhiáⁿ chı̍t ê hu̍t-koaⁿ lâi khoàⁿ, hit ê lâng chiū chiong Mô͘-kúi só͘ chù-būn ê mı̍h kā goá ê lāu-bó kóng. Khó-lı̂n ê lāu-bó, i ūi-tio̍h ài hō͘ goá koáⁿ-kín hó, tùi chá kàu àm chiū chú chhe-chhau, pān chiú-chhài beh hō͘ Mô͘-kúi chia̍h. Khí-thâu i teh choè chiah ê sū goá lóng m̄-chai, kàu chı̍t-ē-po͘ chiah thiaⁿ-tio̍h chı̍t ê lāu a-pô teh kā goá ê lāu-bó kóng, Mô͘-kúi só͘ ēng ê mı̍h-kiāⁿ tio̍h chún-pı̄ chin choē, m̄-thang kiám chió. Goá thiaⁿ-tio̍h chiah ê sū, siūⁿ beh khui-chhùi kóng, m̄-bián khı̀ pài, chóng-sı̄ chhùi khui boē khí-lâi, chí ū ēng ba̍k-chiu gı̂n hit ê lâng. Hu̍t-koaⁿ boē oē i goá: Koè 2 jı̍t, ı̄ⁿ-tiúⁿ lâi khoàⁿ goá, goá ê lāu-bó ēng thı̂-khàu ê siaⁿ kiû i ēng hó-io̍h kā goá chù-siā. Īⁿ-tiúⁿ iô-thâu kóng, “Lí chit ê gín-ná sı̄ m̄-sı̄ ū siū chhı̀-kek.” Chóng-sı̄ nā bat goá ê lâng, chiū chai-iáⁿ goá sı̄ chı̍t ê chin khoài-lo̍k thian-chin ê lâng, m̄-bat khoà-lū sím-mı̍h. Goá ê lāu-bó, ū i-seng chhiáⁿ kàu bô i-seng, goá ê pı̄ⁿ lóng bô khah-hó. Āu-lâi bı̄-hun-hu khı̀ in ê pō͘-tūi chhiáⁿ chı̍t ê hu̍t-kàu ê sian-siⁿ lâi khoàⁿ goá, i mn̄g goá sím-mı̍h miâ, mn̄g kúi nā pái, tı̍t-kàu goá khùn-khı̀, hit ê lâng khoàⁿ goá bô ı̀n, chiū chhut-la̍t siàn goá ê chhùi-phé nn̄g-pái. Goá chiū háu chhut-lâi, in-ūi goá tùi soè-hàn kàu toā-hàn, thang kóng bô chò sím-mı̍h chhò-gō͘ lâi hō͘ pē-bó phah, hit ê lâng kóng goá sı̄ bô chèng-siông, kā goá phah. I-seng boē oē i-tı̄ goá: Keh 3 jı̍t ı̄ⁿ-tiúⁿ kiò goá chhut-ı̄ⁿ, in-ūi ı̄ⁿ-lāi bô i-seng oē-thang i goá ê pı̄ⁿ, sı̄ ke liáu chı̂ⁿ nā-tiāⁿ, koh ı̄ⁿ-tiúⁿ beh khı̀ Tâi-oân khui-hoē, só͘-í 3 ge̍h 6jı̍t goá chiū chhut-ı̄ⁿ. Chhut-ı̄ⁿ liáu pı̄ⁿ ná giâm-tiōng, pē-bó kap bı̄-hun-hu kò͘ goá kui-mı̂ bô thang khùn. In chiū koh khı̀ chhiáⁿ hit ê kā goá siàn chhùi-phé ê hu̍t-kàu sian-siⁿ, i bēng-lēng goá ê lāu-bó bé n̂g-choá, hiuⁿ, koh oē hû tah tı̄ tang-pêng sai-pêng ê thang-á kap thian-hoa-pán, i tah liáu chiū siūⁿ beh tńg--khı̀, āu-lâi koh lâi mn̄g goá ū khah hó bô, in-ūi goá ê pı̄ⁿ ū-sı̂ hó-hó, nā hoat-choh chiū kan-khó͘, hit sı̂ goá tú-hó hó-hó, i chiū chin hoaⁿ-hí, lia̍h chò sı̄ i ki-su̍t ko-bêng, goá ê lāu-bó chiū pān chiú-chhài beh chhiáⁿ i, chóng-sı̄ i iáu-boē khai-sí chia̍h ê sı̂, goá ê pı̄ⁿ koh hoat-choh, i chin pháiⁿ-sè ê khoán chiū bô chia̍h tńg-khı̀. Sè-kan bô lâng oē i goá: Āu-lâi goá ê lāu-bó koh khı̀ chhiáⁿ chı̍t ê Phêⁿ-ô͘ choè chhut-miâ ê hu̍t-koaⁿ lâi khoàⁿ goá. Hit ê lâng oē hû oē liáu, chiū chiong hit tiuⁿ n̂g choá chú poàⁿ-oáⁿ chúi kiò goá lim chı̍t-chhùi. Goá chiàu i ê oē lim, chóng-sı̄ i tńg-khı̀, goá chiū thò͘ chhut-lâi, goá ê pı̄ⁿ iû-goân kāng-khoán. Goá ê lāu-bó koh thiaⁿ-tio̍h ū chı̍t ê choan-bûn koáⁿ-kúi ê, chiū khı̀ chhiáⁿ lâi. I lâi peh chiūⁿ goá ê bı̂n-chhn̂g, lia̍h goá ê chhiú, chhut-la̍t chhı̍h goá ê toā-thâu-bú, goá ai thiàⁿ, i iáu-kú it-tı̍t chhih, i mn̄g goá ê miâ, goá kā i kóng, i kóng “m̄-tio̍h”, chiū gia̍h chiam chha̍k goá ê chhiú kàu lâu huih-sí. Goá it-tı̍t hoah kiù-lâng, chóng-sı̄ goá ê pē-bó, bı̄-hun-hu khiā tı̄ piⁿ-a iā lóng m̄-káⁿ lâi kiù goá, goá chí ū khoàⁿ thian-hoa-pán it-tı̍t lâu ba̍k-sái. Koh tia̍p-á-kú goá chha-put-to m̄-chai lâng là! Chí ū Iâ-so͘ oē kiù goá: Keh-jı̍t goá ê lāu-bó khı̀ bé chhài ê sı̂, ū lâng lâi thè goá kı̂-tó, goá chhin-chhiūⁿ teh chò-bāng. Goá ê lāu-bó tńg-lâi ê sı̂, goá koh put-ti put-kak tiong oē hiáu kā i kóng, An-tong chiàu-siōng-koán ê a-pô lâi kiò goá khı̀ sı̀n Iâ-so͘. Goá ê lāu-bó mn̄g goá beh sı̀n bô, goá tı̀m-thâu, i chiū koáⁿ-kín khı̀ chhiáⁿ kúi-ūi Ki-tok-tô͘ lâi thè goá kı̂-tó. 3 ge̍h 11 jı̍t, siōng-ngó͘ 10 tiám-cheng chó-iū, goá hoat-hiān ū chı̍t-ūi lāu-lâng khiā tı̄ goán chhù ê hāng-á-kháu, i choân-sin chhēng pe̍h-saⁿ, thâu-mn̂g hui-siông súi, chhiú-nı̍h koh ū the̍h sím-mı̍h, goá khoàⁿ bô chheng-chhó, i ê ba̍k-chiu it-tı̍t khoàⁿ goá kóng: “Khó-lı̂n ah! Khó-lı̂n ah!” I gia̍h-thâu khoàⁿ goán ê mn̂g-téng tah chı̍t-tiuⁿ Mô͘-kúi ê tô͘, i iô-thâu, i ê ı̀-sù chiū-sı̄ kóng mn̂g-téng ê hû nā thiah khí-lâi, i chiū kín-lâi, bô thiah khí-lâi, i chiū m̄ ài jı̍p-lâi, āu-lâi i chiū kiâⁿ khı̀ là! Lāu-lâng chhoā goá khoàⁿ thian-tông: Keh-jı̍t sı̄ 3 ge̍h 12 jı̍t, lāu-lâng koh lâi, mn̂g-téng ê hû í-keng thiah khí-lâi, lāu-lâng chiū lâi chē tı̄ goá sin-piⁿ. I kóng, I beh lâi kiù goá, i beh ēng sin-saⁿ hō͘ goá chhēng, beh chhoā goá khı̀ thian-tông kı̀ⁿ toā-koaⁿ. I koh kóng hó-lâng chiūⁿ Thian-tông, phái-lâng lo̍h Tē-ge̍k. Goá kā i kóng goá ū choē boē-thang khı̀, i kóng “Bô”, goá koh kóng, Chiūⁿ thian-tông hia oē lo̍h toâ-hō͘, i kóng, Boē. Chı̍t-ē-á, goá chhíⁿ khí-lâi, goá í-keng khı̀ thian-tông tńg-lâi, tı̄ hia ū chin choē chhiū-ba̍k, ū chhù, chhù-chêng ū chı̍t ê cha-bó͘ gín-ná khùn tı̄ chháu-po͘ téng, chhù-chêng koh ū 3 chiah iûⁿ; chı̍t-chiah teh chia̍h chháu, chı̍t-chiah tó tı̄ chháu-po͘, chı̍t-chiah teh cháu. Lāu-lâng koh kā goá kóng goá ê pı̄ⁿ m̄ eng-kai jı̍p-ı̄ⁿ 2 pái, koh kiò goá pı̄ⁿ hó, tio̍h soan-thoân hō͘ lâng thiaⁿ, kiò goá khı̀ pài-tn̂g tio̍h chē tı̄ choè thâu-chêng ê í-á, nā ū pháiⁿ-lâng beh khoàⁿ goá, lóng m̄-thang kā i khoàⁿ. Hit-jı̍t hit-ūi lāu-lâng kui-jı̍t lóng tı̄ goá ê sin-piⁿ. Í-āu ū chin choē Ki-tok-tô͘ lâi thè goá kı̂-tó, gı̂m-si, goá ê sin-thé chiū chiām-chiām ho̍k-goân, chóng-sı̄ chı̍t-lé-pài āu, Mô͘-kúi choè-āu chı̍t-pái koh-lâi, goá ū khoàⁿ tio̍h i khiā tı̄ goá ê chím-thâu-piⁿ, thâu-mn̂g o͘-o͘, chhēng chhíⁿ-sek ê saⁿ, ba̍k-chiu chin toā-lúi. Goá koáⁿ-kín kā lāu-bó kóng, i chiū kín khı̀ chhiáⁿ lâng lâi kı̂-tó, keng-koè pek-chhiat ê kı̂-tó, Mô͘-kúi chiah lı̄-khui khı̀. Tùi hit-jı̍t goá ê sin-thé chiah bān-bān ho̍k-goân, kám-siā Chú tháu-pàng goá thoat-lı̄ Mô͘-kúi ê khó͘-chhó͘. Goá beh hó-táⁿ tı̄ lâng ê bı̄n-chêng kiàn-chèng, goá beh hoaⁿ-hí chò I ê kang. Goān Chú chiok-hok chit-phiⁿ kiàn-chèng, hō͘ tha̍k ê lâng, siá ê lâng lóng pı̂ⁿ-pı̂ⁿ tit Chú ê pêng-an. A-men. (Oa̍h-miā ê Bí-niû tē 67 kı̂, 1959 nı̂ 11 ge̍h)