Chúi-sa-liân

“Chúi-sa-liân”, 1-ê beh khı̀ hō͘ lâng pàng bē kı̀ ê tē-miâ, tō chhin-chhiūⁿ Sao-cho̍k ê ūn-miā kāng-khoán, hō͘ goā-lâi thóng-tı̄-chiá kap o͘-kim chu-pún-siā-hoē am-khàm--khı̀, bô lâng ē kı̀-ê ū lâng bat tı̄ chia seng-oa̍h--koè, kan-taⁿ ū 1-koá koan-kong-kheh lâi hiáng-siū té-sı̂-kan ê kéng-tı̀. Àm-sı̂ ê Chúi-sa-liân, sı̄ àm-àm ê thiⁿ-sek, hiah-nı̄ súi ê ô͘, hiah-nı̄ súi ê soaⁿ, tiān-hoé ê kng tı̄ ô͘--nih siám-sih, ná-chhiūⁿ teh kā goán sio-chio, kā i ê sı̂n-pı̀ hām bí-lē tián--chhut-lâi; thâng teh kiò ê siaⁿ kap i tiⁿ-būn-būn ê koa-siaⁿ, thoân tùi goá ê hı̄ⁿ-khang lâi, ba̍k-chiu 1-nih khoàⁿ-tio̍h Sao-cho̍k ê ióng-sū teh kap lo̍k-á cháu-sio-jiok, cha-bó͘-gín-á teh hoaⁿ-hí chhiùⁿ-koa thiàu-bú, tı̄ goá ba̍k-chiu-chêng it-chài chhut-hiān, ba̍k-chiu koh 1-nih, tō kan-taⁿ chhun Chúi-sa-liân kap i. Thàu-chá ê Chúi-sa-liân, tah-bâng ê soaⁿ, ô͘-bı̄n pe̍h-bâng-bâng ê chúi-khı̀, goá hām i khiā tı̄ bé-thâu-piⁿ, jı̍t-thâu chhiò tı̄ ô͘-bı̄n, kim-kong siám-siám, tòng-bē-tiâu siūⁿ beh thiàu-jı̍p-khı̀ ô͘--nih lia̍h kim-kong, hiông-hiông, ū 1-chiah chûn-á sái-lâi mn̄g goán “ū beh chē chûn--bô? sǹg lín khah sio̍k--ê!” Chē tı̄ chûn-téng, khoàⁿ-tio̍h hō͘ chûn liâu--khí-lâi 1-chân 1-chân ê chúi-pho, chûn-á mā bān-bān-á sái tùi pe̍h-bâng-bâng ê ô͘ tiong-ng khı̀, 『光華島』『玄奘寺』『德化社』, 1-chām 1-chām koan-kong-tiám, 1-ê 1-ê chhin-chhiūⁿ beh sí--khı̀ ê só͘-chāi, bô oa̍h-la̍t, bô sı̀ⁿ-miā, kiâⁿ-koè kúi 10-tang ê hoân-hoâ, tō án-ne, chhun--ê sı̄ loān-chau-chau ê tiàm-á kap lú-siā. Kap lo̍k-á cháu-sio-jiok ê ióng-sū bô--khı̀-a, oa̍h-phoat chhiùⁿ-koa ê cha-bó͘-gín-á mā bô--khı̀-a, kan-taⁿ ū koan-kong-kheh lâu--lo̍h-lâi ê phû-hoâ kap pùn-sò! Le̍k-sú ê choán-piàn chiàu-siông teh kè-sio̍k, Chúi-sa-liân ê chú-lâng ---- Sao-cho̍k, m̄-koán thóng-tı̄-chiá sı̄ Chi-na-lâng iah sı̄ jı̍t-pún-lâng, in ê ūn-miā lóng bô kái-piàn! Thó͘-tē ê chú-lâng--a, tang-sı̂ lán chiah beh lâi koat-tēng ka-tı̄ ê ūn-miā, chò chin-chiàⁿ ê chú-lâng--leh? (TGB Thong-sı̀n tē 16 kı̂, 2001 nı̂ 1 goe̍h)