Kò͘ Gô͘ Chiu--sı̄ Chû-ài, sı̄ chá-nı̂ ê thoân-tō kò͘ Chiu Pō͘-hâ Sian-siⁿ ê cha-bó͘-kiáⁿ. Sè-hàn tit-tio̍h lāu-pē ēng tō-lí gâu poê-iúⁿ, ū tit-tio̍h chin hó ê sı̀n-sim. I ê hiaⁿ chiū-sı̄ Chiu Sek-eng Tiúⁿ-ló kap Chiu Hok-choân Sian-siⁿ. Tı̄ 22 hoè ê sı̂ chò kheh, kè Gô͘ Liông-bûn Sian-siⁿ, kap tiōng-hu toà 12 nı̂ kú; kàu 34 hoè ê sı̂, put-hēng tiōng-hu koè-sin, ū pàng 3 ê hāu-seⁿ, chı̍t ê cha-bó͘-kiáⁿ kau-tāi i iúⁿ-chhı̄. Ū tú-tio̍h chē-chē ê pháiⁿ kéng-gū, chóng-sı̄ i oá-khò Siōng-tè lâi poê-iúⁿ i só͘ siū kau-tāi ê châi-sán. Toā hāu-seⁿ Chú-hūi, hiān-sı̂ tı̄ Tang-kiaⁿ Chó-tiū-tiân Tāi-ha̍k chò kàu-siū; tē 2 hāu-seⁿ chiū-sı̄ hiān-jı̄m Sin-hāng kàu-hoē ê Thoân-tō-su Gô͘ Gı̄-ióng kun; tē 3 hāu-seⁿ hiān-chāi Khí-kho chāi-ha̍k-tiong, iā cha-bó͘-kiáⁿ sı̄ kè i-seng. Ē kham-tit kóng, Siōng-tè ū pang-chān i, hō͘ i tit-tio̍h sêng-kong. Kó͘ lâi ê sio̍k-gú kóng, Ióng-jı̂ thāi-ló, hit ê sı̂-chūn í-keng kàu lah ! Bô phah-sǹg Siōng-tè m̄-chún i koh tı̄ sè-kan lâi kan-khó͘, khah hoaⁿ-hí i tńg-khı̀ kap Pē saⁿ-kap toà. Só͘-í tı̄ 4 goe̍h 16 jı̍t, tı̄ loán-jio̍k ê sin-thé ê tiong-kan, Pē ū tháu-pàng i ê tio̍h-boâ, chhoā i tńg-khı̀ I tau, hióng-siū 57 hoè. I taⁿ tı̄-hia bô koh iu-būn, bô koh siong-pi, chhin-chhiūⁿ Si--nih só͘ gı̂m kóng,
Siū Chú só͘ sio̍k chèng hiaⁿ-chí,
Tiàm tı̄-hia khiā-khí;
Sı̂-sı̂ o-ló goá ê Chú,
Siông gı̂m-si (Sèng-si 249 siú).
Chóng-sı̄ i it-seng ū 3 tiám hō͘ lán tāi-ke thang o̍h.
1.Gâu kàu-io̍k chú-tē. Tùi tiōng-hu koè-sin liáu-āu, i ê tàⁿ chiū kám-kak chin tāng. Ū-sı̂ hiám-hiám taⁿ bô hoat-tit, nā-sı̄ i ū oá-khò Siōng-tè, ēng un-jiû, khiam-pi kap kı̂-tó tı̄ i ê bó-sèng-ài lâi kàu-io̍k kiáⁿ-jı̂. Ū-sı̂ chiū bián-lē, ū-sı̂ chiū chek-pı̄, ū-sı̂ chiū ēng ba̍k-sái lâi kek-lē kiáⁿ-jı̂. Kàu kin-ná-jı̍t khoàⁿ-tio̍h in ê sêng-kong, chiū chai lah.
2. Gâu khı̂n-khiām. Sui-jiân m̄-sı̄ chin sàn ê lâng, chóng-sı̄ i chin khiām-iok. Gâu kè-e̍k tio̍h cháiⁿ-iūⁿ lâi ēng chı̂ⁿ, chiah ē thang ı̂-chhı̂ ka-têng kap kàu-io̍k chú-tē. Nā khoàⁿ i ê khiām-iok, chin-chiàⁿ sı̄ chı̍t ê hó ê chú-hū, gâu ê lāu-bó lah !
3. Gâu ho̍k-sāi Siōng-tè. Hán-tit khoàⁿ i bô kàu pài-tn̂g, sui-jiân ū sím-mı̍h chó͘-tòng, i iā sı̄ poah sı̂-kan kau-poê Siōng-tè. Ūi-tio̍h kiáⁿ-jı̂ ê sêng-kong, ū sím-mı̍h oh-tit ê sū, chiū tùi Siōng-tè kiû. Siông-siông ài thiâm-chēng kau-poê Siōng-tè, i lia̍h kı̀ⁿ Siōng-tè ê bı̄n, chò i tē-it hó ê kang.
Chóng-sı̄ taⁿ i tit-tio̍h hó ê siúⁿ-sù, éng-oán thang khiā-khí tı̄ Pē ê tau. Goān i ê kiáⁿ-jı̂ o̍h lāu-bó ê hó bô͘-iūⁿ, gâu ho̍k-sāi Chú bô soah.
(Tâi-oân Kàu-hoē Kong-pò tē 651 hō, 1939 nı̂ 6 ge̍h)
