Tiat-chong chhut-kok káu-nı̂ goā,
chin kú bô sio khoàⁿ.
Saⁿ-iok chē A-tang ê chhia,
khı̀ hō͘ Chheng-chiu chhiáⁿ.
Kiâⁿ-á-kiâⁿ,
chı̍t-kiâⁿ kiōng la̍k-miâ.
Tiat-chong, Siok-iông, Bēng-thiat, Sı̀n-seng,
A-tang chhoā bó͘ chò thâu-chêng.
A-tang sái-chhia bān-thun-thun,
kóng he kiò-chò ún.
Siok-iông toè āu tòng-boē-tiâu,
poàⁿ lō͘ tı̍t-tı̍t chhiau.
Chhiau--á-chhiau,
A-tang chhùi-chhiu khiàu.
Chı̍t-ē kàu ūi, koáⁿ-kín cheⁿ kóng,
sái-chhia m̄-bián hiah chheⁿ-kông.
Chheng-chiu chò lâng chin-chiàⁿ chán,
chhiáⁿ goán chia̍h hái-sán.
Toh pâi Pò͘-tē Êng-pin koán,
chhut miâ lâm Tâi-oân.
Chē-á-chē,
chı̍t-toh chē peh-ê.
Chheng-chiu, Lē-eng, A-tang, Siù-koan.
chhun--ê sı̀-ê chiū-sı̄ goán.
O-á-mı̄-soàⁿ, “Sa-si-mih”,
chháu-hê chhèng kiuⁿ-si.
Hoe-tiâu chú thng, ô͘-á chı̀ⁿ,
chheⁿ chhá Sı̀-kha-hı̂.
Chhài jı̍p chhùi,
sûi-ê sim-hoe khui.
Sè-sū, jı̂n-chêng, bo̍k-hoē, kiáⁿ-jı̂,
hap-sian hap kah hit-pêng khı̀.
Kóng tio̍h Sūi-ian kap Tiông-hiàn,
kám-thàn siaⁿ liân-liân.
Kóng tio̍h Hong-soan kap Chùn-gı̄,
siūⁿ khí hit-tong-sı̂.
Kiû seng kàu,
á-sı̄ lâng seng-kàu.
Chhian-kó͘ chi bê, siáⁿ lâng “chu-táu,”
jı̂n-seng hái-hái mài kè-kàu.
Chia̍h liáu Tiat-chong ǹg pak-bı̄n,
jı̍p soaⁿ hoē siang-chhin.
Goán koh chē A-tang ê chhia,
lo̍h lâm hoê Hú-siâⁿ.
Kiâⁿ-á-kiâⁿ,
kiâⁿ kàu Ka-tang-kha.
Tâi-oân tē miâ phoè-hap tē-lí,
ná-khoàⁿ ná tha̍k ná ū bı̄.
Bô-kú keng koè “Hēng-hoa-koh”,
goá kiò sı̄ hoe-phó͘.
Hoah kóng A-tang tán chı̍t--ē,
lán lâi-khı̀ khoàⁿ hoe.
Chhiò-á-chhiò,
A-tang hiám oai-io.
Siàu-liân-ê! lí mā pài-thok-lè,
he sı̄ “tê-tiàm-á” neh.
Tiàm miâ hō kah hiah hó thiaⁿ,
goá nā oē chai-iáⁿ.
Ka-chài Bēng-thiat lâng boē bái,
thè goá lâi pâi-kái.
Mài-lā-chhàu,
lâng bô ta̍k-hāng gâu.
Tē-thâu chhiⁿ so͘, châi-sek iū chhián,
lí mài tı̍t-tı̍t kā siau-khián.
Eh! Iông! lí kā thiaⁿ khoàⁿ-māi,
oē-thâu kâⁿ oē-sái.
Chit-hō pêng-iú iā teh kau,
goá ná chia̍h oē lāu.
Bô tōng chēng,
koân-kē hun chin bêng.
Siông-sè chı̍t khoàⁿ, chiah chai in-toaⁿ,
chá chiū kún kah hit-pêng soaⁿ.
A-tang iū koh ū oē kóng,
m̄-sı̄ teh phòng-hong.
Nā bô sái-chhia chiah-nih ún,
ná oē hiah hó khùn.
Chhut-chāi i,
m̄-kiaⁿ kā tio̍h chı̍h.
Toā-lâng bô kap gín-á kè-kàu,
lêng-khó oa̍t-thâu khoàⁿ goā-kháu.
Sûi hong phiau-tōng ê tiū-sūi,
kim-n̂g koh pá-chúi.
Hâm-chhiàu chhiⁿ-le̍k ê chháu-po͘,
siám-kng iāu hiong-thó͘.
Pı̂ⁿ-goân ah!
Ka-lâm ê pı̂ⁿ-goân.
Bāng lí tı̀-ı̀m tāi-tāi kiáⁿ-sun,
hó-khùn hó-chia̍h hó-chhun-lun.
(Tâi-oân Kàu-hoē Kong-pò tē 2029 kı̂, 1991 nı̂, 1 goe̍h)
