Chı̀-hó Pêng-iú
Ū thiaⁿ-kı̀ⁿ chı̍t ê kò͘-sū teh kóng kúi-nā cha̍p nı̂ chêng Eng-kok ê Lú-ông ū khı̀ thàm So͘-kiat-lân ê kiaⁿ-siâⁿ. Lı̄ hit-ê siâⁿ bô loā hn̄g, ū sió só͘-chāi kı̄n tı̄ hái-kı̂ⁿ. Lâng tı̄ hia khah chē sı̄ thó-hái-ê, chin bô êng, chin mı̂-noā thàn-chı̂ⁿ. Hut-jiân chı̍t jı̍t thiaⁿ-kı̀ⁿ Lú-ông bı̂n-á-chài beh khı̀ in hia khoàⁿ-khoàⁿ. O--ah! Ta̍k-ê thiaⁿ-tio̍h, chı̍t bı̄n toā hoaⁿ-hí, chı̍t bı̄n teh chhoah, in-ūi siūⁿ in bē kham-tit Lú-ông kàu in hia, in sı̄ sàn-hiong ê chho͘-kang lâng, só͘-chāi iā m̄ chiâⁿ mı̍h. M̄-kú thiaⁿ liáu tāi-ke kín-kín pı̄-pān, ke-lō͘ sàu chheng-khı̀,chhah Eng-kı̂, chhòng chhêng-siâⁿ,chheng-kiat lāi-goā, ta̍k-ê lóng thêng-khùn, liân thó-hı̂ chûn-á iā sé chheng-khı̀, bāng iā siu khí-lâi, sı̀-kè chhòng kàu chin léng-lı̄. Keh chá-khí ta̍k-ê chá-chá khí-lâi chia̍h pn̄g, lóng chhēng súi saⁿ, gín-ná ê thâu-mn̂g iā se kàu kim-kim, kha iā chhēng ê, tāi-ke chin koai. Taⁿ m̄ chai téng-po͘ á sı̄ ē-po͘ Lú-ông beh kàu, kan-ta piān-piān thèng-hāu beh ngiâ-chih i.Téng-po͘ tán kui po͘ lóng bô lâi, kàu tàu chiū chia̍h pn̄g. Chia̍h pn̄g ê sı̂ ta̍k-ê teh kóng, Taⁿ ē-po͘ tek-khak ē lâi lah. Hit ē-po͘ iû-goân piān-piān teh chih-chiap in ê Lú-ông, gín-ná iā ná hoaⁿ-hí beh khoàⁿ. Í-keng kàu 4, 5tiám iáu-boē lâi, ta̍k-ê teh siūⁿ m̄ chai án-cháiⁿ-iūⁿ. Taⁿ í-keng 6 tiám beh àm, chha-put-to choa̍t-bāng, gín-ná long siān-siān, ta̍k-ê iā chiū iau, chiū chia̍h ê-hng-tǹg. Tāi-ke iā hoân-ló Lú-ông bô lâi, in-ūi í-keng thiaⁿ beh lâi, chiū toā him-bō͘. Kàu 7 tiám chai bô ǹg-bāng, ta̍k-ê thǹg súi saⁿ, toā-lâng teh siūⁿ i káⁿ sı̄ tú-tio̍h sím-mı̍h chó͘-tòng,gín-ná lio̍h-á siū-khı̀ kóng, Lú-ông teh phiàn in. Bı̂n-á-chài ta̍k kháu-chàu iû-goân chò kang, ta-po͘-lâng khı̀ hái-nı̍h thó-hı̂,cha-bó͘-lâng hâ chho͘-chho͘ ê ûi-sin-kûn teh thâi hı̂, gín-ná chhēng phoà saⁿ, tı̄ ké-á-lō͘ teh thit-thô, bı̄n kap chhiú kiaⁿ-lâng, thâu iā bô chng súi. Hut-jiân ū bé-chhia ê siaⁿ khı̍h-khia̍uh-háu tı̄ lō͘-nı̍h, ta̍k lâng kia̍h-thâu beh khoàⁿ sím-mı̍h lâng lâi. Gín-ná khoàⁿ súi-súi ê bé-chhia lâi, chiū toā siaⁿ kiò, “Sı̄ Lú-ông lah! Sı̄ Lú-ông lah!” Taⁿ hāi lah! Lú-ông khoàⁿ-tio̍h lán chhēng phoà saⁿ, hâ pháiⁿ ûi-sin-kûn,thâu-mn̂g làng-làng, chhiú bak-tio̍h chhàu-chhò, chin kiàn-siàu, chin bô lé,bô sò͘. Hāi lah! Hāi lah! M̄-kú Lú-ông thêng-chhia lo̍h-lâi beh kā i ê peh-sı̀ⁿ chhéng-an, beh khoàⁿ in ê kang, chiū sı̀-kè kiâⁿ kap hit só͘-chāi ê lâng kau-poê, iā ū hoāⁿ gín-ná ê thâu-khak, iā ū o-ló lāu-bú só͘ phō ê eⁿ-á súi. Ta-po͘-lâng tùi hái-kı̂ⁿ kín-kín tńg-lâi, Lú-ông iā mn̄g ū thó loā-chē hı̂, iā beh bē loā-chē chı̂ⁿ, chin hó-ı̀, chin chhin-chhiat. Khoàⁿ-khoàⁿ liáu, āu-lâi chiū koh chē bé-chhia tò-tńg-khı̀. Taⁿ i tiâu-kò͘-ı̀ bô chā-hng khı̀, i ê ı̀-sù chiū-sı̄ beh tı̄ pêng-siông sı̂ khı̀ thàm i ê peh-sı̀ⁿ, ài khoàⁿ in ê kang, ài ē-hiáu thé-thiap in ê sàn-hiong, á-sı̄ in chò kang ê kan-khó͘, ài kap i só͘ thiàⁿ ê peh-sı̀ⁿ se̍k-sāi, ài i ê peh-sı̀ⁿ khoán-thāi i chhin-chhiūⁿ pêng-iú, bô chhin-chhiūⁿ lâng-kheh. Goá siūⁿ Siōng-tè chiū-sı̄ lán ê Ông, I ia̍h beh án-ni. I m̄-nā ài lán kap I kau-poê tı̄ lé-pài-tn̂g, á-sı̄ tı̄ chhù-nı̍h lé-pài. I koh khah ài, chiū-sı̄ tı̄ pêng-siông jı̍t lán teh chò kang ê sı̂-chūn ài chhoē lán, ài kap lán kau-poê, ài thé-thiap lán chò kang ê kan-khó͘, ài khoàⁿ lán ê chho͘-saⁿ, ài kap só͘ thiàⁿ ê peh-sı̀ⁿ se̍k-sāi, ài tı̄ bô phài-phoe ê sı̂-chūn lâi chhoē lán, ài lán tio̍h khoán-thāi I bô chhin-chhiūⁿ lâng-khah, ài lán khoán-thāi I chhin-chhiūⁿ pêng-iú. “Goá í-keng kiò lín chò pêng-iú”.
(Tâi-lâm Kàu-hoē-pò, Tē 4359koàn, 1921 nı̂ 10 ge̍h)