Chı̂ⁿ ēng--chhut-khi chiah ū kè-ta̍t

Ū chı̍t pái, tı̄ chı̍t ê ián-káng-hoē, ián-káng-chiá kài-siāu chin-choē thàn-chı̂ⁿ ê hong-hoat; ián-káng soah, thiaⁿ-chiòng ū lâng gia̍h chhiú kóng, “Goán í-keng lóng chin-gâu thàn-chı̂ⁿ, lóng í-keng chin ū chı̂ⁿ, kiám ē-sái chhiáⁿ lí kà goán, beh án-choáⁿ ēng chı̂ⁿ? ” Ū-iáⁿ, lán í-chêng hoân-ló beh án-choáⁿ thàn-chı̂ⁿ, chit-má Tâi-oân-lâng chı̂ⁿ choē, tian-tò ài hoân-ló beh án-choáⁿ ēng. Ū lâng chhiò hiah-ê bē-hiáu beh ēng chı̂ⁿ ê lâng, in-ê chı̂ⁿ sı̄ ná-chhiūⁿ a-má chhàng tı̄ chím-thâu-ē ê chı̂ⁿ. Koh chhin-chhiūⁿ Iâ-so͘ ê phı̀-jū lāi-bı̄n hit-ê niá chı̍t-chheng--ê, chiong chı̂ⁿ tâi toà thô͘-té, bô siáⁿ -mı̍h kè-ta̍t. Chı̂ⁿ pún-sin sı̄ choá, sı̄ gı̂n-kak-á nā-tiāⁿ, ài ēng--chhut-khı̀ chiah ū sán-seng kè-ta̍t. Só͘-í, lán ài ēng-chı̂ⁿ, ēng-chı̂ⁿ, ēng-chı̂ⁿ, ēng tı̄ ka-kı̄ ê sin--siōng, ēng tı̄ pa̍t-lâng ê sin--siōng, sı̄m-chı̀ chhiáⁿ lâng thè lán ēng tı̄ ū kè-ta̍t ê lō͘-ēng. Sū-sı̍t, lán pún-sin ēng-chı̂ⁿ chin iú-hān, só͘-í, ài sàng hō͘ ū ta̍k-chióng khiàm-khoeh ê lâng ēng. Koh ū chin-choē lâng, chin gâu siān-iōng kim-chı̂ⁿ, kā chı̂ⁿ ēng tı̄ chin hó ê tô͘-kèng, chhin-chhiūⁿ chiong kim-chı̂ⁿ ēng tı̄ chín-kiù pı̄-chhut-bē ê siàu-lú, ēng tı̄ pān bûn-hoà sū-gia̍p, ēng tı̄ pang-chān chı̍t ê lâng tha̍k sı̂n-ha̍k-ı̄ⁿ, ēng tı̄ ko͘-jı̂-ı̄ⁿ, ēng tı̄ pò͘-tō-hoē, ēng tı̄ pang-chān tāng-pı̄ⁿ bô chı̂ⁿ chhē i-seng ê lâng, ēng tı̄ lán-ê chóng-hoē ê sū-kang....téng. Lán ài chhiáⁿ téng-bı̄n só͘ kóng chiah-ê gâu siān-iōng kim-chı̂ⁿ ê lâng thè lán ēng chı̂ⁿ, chiong chı̂ⁿ hiàn hō͘ in teh thui-tōng ê sū-kang. Án-ni, lán ê chı̂ⁿ chiū bô pe̍h-pe̍h lōng-hùi, thàn--lâi ê chı̂ⁿ, ēng liáu ū kè-ta̍t. Kàu-hoē ê chı̂ⁿ, koh khah sı̄ án-ni. Ū-ê lâng chin-ài thè kàu-hoē chek-chū châi-pó, sı̍t-chāi sı̄ chin bô ı̀-sù. Tû-liáu ū siáⁿ-mı̍h kè-oē beh khai toā-tiâu chı̂ⁿ, chiah tio̍h phah-piàⁿ chek-chū í-goā, kàu-hoē iā m̄-sı̄ kiaⁿ kóng ē tio̍h gâm-chèng, tio̍h jiō-to̍k, ài ū-sian chún-pı̄ ū-hông bān-it. Só͘-í, kàu-hoē ū chı̂ⁿ tio̍h-sı̄ ài khai, ài chò-kang. Kàu-hoē hó-gia̍h, tı̄ gı̂n-hâng kià chin-choē chı̂ⁿ, bô siáⁿ-mı̍h ı̀-gı̄, óng-óng piáu-sı̄ lán bô kè-oē, bô chı̄n Siōng-tè só͘ hō͘ lán ê un-sù teh chò-kang nā-tiāⁿ. (Hong-hiòng siang-ge̍h-khan tē 4 kı̂, 1990 nı̂ 5 ge̍h)