Chı̄n-tiong kàu sí
Chiông-chêng tı̄ A-bí-lı̄-ka hit chiu ê peh-sèⁿ put-chí pháiⁿ hong-sio̍k, chiū-sı̄ in bat bé lâng chò lô͘-châi. Chiah-ê lô͘- châi ū-ê chin kan-khó͘, in-ūi in chú-lâng ok-sim pháiⁿ khoán-thāi in.
Taⁿ tı̄ bó͘-só͘-chāi ū chı̍t-ê cha-po͘ gín- ná hō͘ lâng chò lô͘-châi. Ū chı̍t jı̍t i ū thiaⁿ-kı̀ⁿ chı̍t-ūi Bo̍k-su teh kóng khí Iâ-so͘ ê tō-lí; sim liâm-piⁿ siū kám-kek, him-soān ı̀-ài chit-ê Iâ-so͘ chò i-ê Kiù- chú. I bô sím-mı̍h bêng-pe̍k tō-lí ê ı̀-sù; put-kò ū siū Bo̍k-su ê khó͘-khǹg, chiū- sı̄ kóng tio̍h thiàⁿ Iâ-so͘, ta̍uh-ta̍uh kı̂- tó Siōng-tè, kiû i pang-chān. Thiaⁿ-liáu hit-ê gín-ná sim-lāi teh siūⁿ beh chiàu án-ni kiâⁿ, sim chiū tit-tio̍h an-ùi, in-ūi chai tı̄ Thiⁿ--nı̍h ū chı̍t ūi pêng-iú ē thé- thiap i-ê kan-khó͘.
Tùi hit-tia̍p í-āu hit-ê gín-ná gâu kı̂- tó, ná-kú ná thiàⁿ Iâ-so͘, siông-siông siàu-liām i, kap i kau-poê. Chóng-sı̄ i-ê chú-lâng put-chí m̄ hoaⁿ-hí, m̄-chún i lâi thàn tō-lí, pàng-tiau pàng-tńg kóng, “Lí nā khı̀ kı̂-tó, goá chiū beh phah lí.”
Tùi án-ni-siⁿ gín-ná sui-jiân sı̄ loé-chı̀, m̄-kú m̄-káⁿ pàng-sak kı̂-tó; hoán-tńg sı̄ ná jia̍t-sim thiàⁿ Iâ-so͘. Ta̍k jı̍t chia̍h ē-tàu liáu, i chiū khı̀ phian-phiah só͘- chāi àm-chēⁿ khı̀ kı̂-tó, kiû Siōng-tè pang-chān i.
Ū chı̍t jı̍t teh kı̂-tó ê tiong-kan i-ê chú-lâng tùi hit tah koè, ū thiaⁿ-kı̀ⁿ hit- ê gín-ná koh-chài teh kı̂-tó, chiū chin siū-khı̀, kı̄n-oá lâi hoah i, lâi mē, soà kóng,” Lí m̄-thang kı̂-tó, goá kiám bô kı̀m lí ? Lí nā koh kı̂-tó , goá beh phah kàu hō͘ lí sí. “
Hit-ê gín-ná thiaⁿ-kı̀ⁿ,sim iû-goân sı̄ chip-koat,tek-khak beh thiàⁿ Iâ-so͘, beh chò i ê ha̍k-seng, ka-tı̄ siūⁿ nā phoe sèⁿ- miā ia̍h káⁿ, chóng-sı̄ bô beh pàng-sak Iâ-so͘.
Só͘-í ta̍k jı̍t chiàu kū ê khoán-sit khı̀ hit só͘-chāi kı̂-tó; iū-koh hō͘ chú-lâng thiaⁿ-kı̀ⁿ, hō͘ i phah kàu put-chí siong- tiōng. Hit-ê lâng soà ki-chhı̀ i kóng, “ Iâ-so͘ thài-ē bô lâi pang-chān lí, m̄- thang hō͘ goá phah? Che sı̄ àn-cháiⁿ-iūⁿ leh? ”
Gín-ná ı̀n kóng, “ Thâu-ke ah ! goá thang chhut-chāi lí phah. Goá chiū hō͘ lí phah kàu sí; kah goá m̄-thang toè Iâ-so͘, goá ia̍h sı̄ bē-chò-tit; goá sı̍t-chāi beh thiàⁿ Iâ-so͘, sı̍t-chāi beh thiàⁿ Iâ-so͘.” Hit kù liân-liân kóng nn̄g koè.
Chú-lâng thiaⁿ-kı̀ⁿ che oē koh khah toā siū-khı̀, phah khah siong-tiōng; koh lâu-hoeh, gín-ná poa̍h-tó tı̄ thô͘-kha chhin-chhiūⁿ teh-beh sí ê khoán-sit. Chú-lâng koh ki-chhı̀ kóng, “ Iâ-so͘ thài ē bô lâi pang-chān lí, m̄-thang hō͘ goá phah, che sı̄ àn-cháiⁿ-iūⁿah?”
Hit-tia̍p gín-ná hūn--khı̀, liân-chún bē kóng-oē, kan-ta ēng sè-á-siaⁿ ı̀n kóng, “ Thâu-ke ah ! goá iáu-kú beh thiàⁿ Iâ- so͘, iáu-kú beh thiàⁿ Iâ-so͘. ” Kóng-liáu, tùi hit-tia̍p chiū sí--khı̀.
Taⁿ mn̄g-khoàⁿ tı̄ kàu-hoē-lāi ū sím- mı̍h gín-ná, á-sı̄ toā-lâng thiàⁿ Iâ-so͘ kàu án-ni mah ?
Lán ê Chú Iâ-so͘ ū bat kóng, “ Hoān- nā ài kiù sèⁿ-miā--ê, chiū tek-khak ē sit-lo̍h; in-ūi goá, lâi sit-lo̍h sèⁿ-miā--ê, tek-khak ē kiù i. ” Lō͘-ka 9:24. Iū-koh kóng, “Nā-sı̄ lín sui-bóng siū kan-khó͘, bo̍h-tit kiaⁿ-hiâⁿ, tio̍h chı̄n-tiong phoe- sí; goá tek-khak beh hō͘ lí éng-oa̍h ê pò-siúⁿ, chhin-chhiūⁿ tı̀ bián-liû. ” Be̍k- sı̄-lio̍k 2:10
Chiàu án-ni khoàⁿ, chit-ê chò lô͘-châi ê gín-ná, i ūi-tio̍h Iâ-so͘ sit-lo̍h i-ê sèⁿ- miā, só͘-í ún-tàng tit-tio̍h pò-siúⁿ, chhin- chhiūⁿ tı̀ bián-liû ê khoán-sit. Bāng Siōng-tè pang-chān lán tāi-ke chò chı̄n- tiong chhin-chhiūⁿ án-ni-siⁿ.
(Tâi-lâm Kàu-hoē-pò, tē 66 koàn, 1890 nı̂ 10 ge̍h)