Ū chı̍t-ê chò-chhân-lâng khı̀ pa̍t-lâng ê chhài-hn̂g thau-bán chhı̀-koe-á.
I ná thau-bán ná siūⁿ: Goá beh kā chit-tē-á thau-bán ê chhı̀-koe-á the̍h-khı̀ bē-chı̂ⁿ. Liáu-āu tio̍h iōng chiah-ê chı̂ⁿ khı̀ bé chı̍t-chiah gâu-siⁿ koh gâu-pū ê ke-bó. Ke-á-kiáⁿ chhı̄ toā-chiah bē ê chı̂ⁿ chiū ē-sái khı̀ bé chı̍t-chiah bó-ê ti-á-kiáⁿ. Chhı̄ kàu i toā-chiah thang phah-chéng, tio̍h ē siⁿ chı̍t-tiâu ê ti-á-kiáⁿ. Chiū kā ti-á-kiáⁿ bē-bē leh. Chiong bē ti-á-kiáⁿ ê chı̂ⁿ koh the̍h-khı̀ bé chı̍t-chiah bó ê bé. Tán i ū-sin siⁿ bé-á-kiáⁿ, chiū chhı̄ hō͘ i toā-chiah thang bē-chı̂ⁿ. Án-ni goá chiū ū chı̂ⁿ thang bé chı̍t-keng ū chhân-hn̂g ê chhù. Goá beh tı̄ hia chèng chin-chē chhı̀-koe-á. Goá ē kò͘-tiâu-tiâu. Án-ni koh bô sím-mı̍h thò-tòng. Koh ài chhiàⁿ chı̍t-ê hàn-chháu chin hó ê kéng-ūi lâi kò͘ chiah-ê chhı̀-koe-á. Goá mā ē tiāⁿ-tiāⁿ khı̀ chhân-piⁿ tùi i toā-siaⁿ hoah, “Eh! Khah chim-chiok leh. ”
Chit-ê chò-chhân-lâng siūⁿ-kàu sı̂n-sı̂n--khı̀, soà bē kı̀-tit i chit-má tı̄ pa̍t-lâng ê chhân-hn̂g teh chò-chha̍t. Hiông-hiông toā-siaⁿ hoah--chhut-lâi, “Eh! Khah chim-chiok leh.” Hit-ê kò͘-chhân ê kéng-ūi thiaⁿ-tio̍h siaⁿ, chông--chhut-lâi, chhiáⁿ i chia̍h chı̍t-tǹg chhâ-á-ki phoè chhiah-bah. Chia̍h kàu chho͘-pá chho͘-pá.
(Tâi-oân Hiong-thó͘ cha̍p-chı̀ tē 30 kı̂, 1999 nı̂ 1 goe̍h)
