Bí-kùi tı̄ 9 ge̍h chiū beh seng 3 nı̂-kip lah, i ê ma-ma Tùi i kóng, “Lí í-keng toā-hàn lah, tio̍h ka-kı̄ chéng-lí lí pâng-keng. Tùi kin-á-jı̍t khí, ta̍k lé-pài chı̀-chió tio̍h ū Chı̍t pái chheng-sàu lí ê pâng-keng, chéng-lí só͘ ū ê mı̍h, bı̂n-chhn̂g kha ê siuⁿ-á tio̍h lóng the̍h chhut-lâi sàu hō͘ i chheng-khı̀, iā hiah ê saⁿ tio̍h chéng-lí siu khí-lâi.”
Bí-kùi thiaⁿ liáu bô sóng-khoài, in-ūi hián-jiân chia ê Tāi-chı̀ ē hi-seng tio̍h i chiu-boa̍t thit-thô ê sı̂-kan.
Ma-ma kā i kóng, “Goá chai-iáⁿ chia ê tāi-chı̀ oē hi-seng tio̍h lí ê thit-thô sı̂-kan, só͘-í tı̄ tē-it ge̍h-jı̍t, goá beh hō͘ lí chı̍t ê pò-siúⁿ. Lí ài sím-mı̍h?”
Bí-kùi ba̍k-chiu toā-lúi khí-lâi hoah kóng, “Chı̍t-koāⁿ san-ô͘-chu!” Kàu pài-la̍k, Bí-kùi chin-chiàⁿ phah-piàⁿ chéng-lí pâng-keng kap i-ho̍k, liân-liân 2 lé-pài to chin ū chhù-sū khı̀ choè, ūi-tio̍h án-ni khak-sı̍t ū chiàm Bí-kùi thit-thô ê toā pō͘-hūn sı̂-kan. Só͘-í kàu tē 3 lé-pài, Bí-kùi chiū chí-ū sàu pâng-keng tiong-ng ê tē-pán, in-ūi i siūⁿ beh the̍h hiah ê bı̂n-chhn̂g kha ê mı̍h-kiāⁿ chhut-lâi chheng-sàu koh chéng-lí sı̍t-chāi sı̄ chin mâ-hoân.
Kàu ge̍h-té ma-ma lóng bô kóng khí san-ô͘-chu ê sū, Bí-kùi iā m̄-káⁿ kóng. Ū chı̍t-jı̍t ma-ma mn̄g i kóng, “Bí-kùi lí thài ē bô koà hit koāⁿ san-ô͘-chu liān?”
Bí-kùi Khàu chhut lâi kóng, “Ma-ma, lí to bô hō͘ goá!”
Ma-ma Kóng, “Goá í-keng hō͘ lí, iā hē tı̄ lí ê pâng-keng, lí siáⁿ-sū m̄-chai?”
Bí-kùi tio̍h-kiaⁿ, cháu jı̍p-khı̀ pâng-keng chhoē, chhoē lóng bô. Āu-lâi khut-sin lo̍h-khı̀ chiong bı̂n-chhn̂g-kha ê siuⁿ-á thoa chhut-lâi, khoàⁿ-kı̀ⁿ āu-bı̄n ū chı̍t-ê soè-soè âng-choá-a̍p-á. I the̍h chhut-lâi khà-khà leh, hian-khui, aih ah, bí-lē ê san-ô͘-chu liān! Kiàn-siàu ê bı̄n lâi kàu ma-ma ê só͘-chāi kóng, “Ma-ma chin tùi put-chū, goá put-phoè the̍h chit ê chu-liān. Thèng-hāu goá ē kham-tit ê sı̂, chiū-sı̄ ū chiàu iok-sok chéng-lí pâng-keng ê sı̂ chiah hō͘ goá”.
Ma-ma khan Bí-kùi kàu sin-piⁿ kóng, “Goá sı̀n lí it-tēng ē chò, kiû Siōng-tè pang-chān lí, hō͘-lí choè sū chı̄n-tiong.”
Bí-kùi kóng, “Goá it-tēng beh àn-choè, goán Chú-jı̍t-o̍h ū chı̍t-chat kim-kù kóng, ‘I kā lán kóng sím-mı̍h, lín tio̍h chiàu án-ni kiâⁿ’, goá taⁿ goān-ı̀ thiaⁿ-thàn.”
(“Kı̂-biāu ê Iâ-so͘”, Ia̍h 13-14 )
