Chı̍t ê loán-jio̍k ê lú-chú

 Iok 150 nı̂ chêng, Eng-kok ū chı̍t ê lú-chú miâ-kiò Í-lı̄-sa-pek Hut-lûi. Ū chı̍t-jı̍t, i khı̀ chham-koan chı̍t ê kàm-ga̍k, hit lāi-bı̄n ê chêng-kéng chin sı̄ thang kiaⁿ, só tı̄ lāi-bı̄n ê tō sı̄ choē-ok tiōng-tāi ê hiong-hoān. Hiah ê sió-sió ê chia̍h-mı̍h put-kò sı̄ hō͘ in iau-gō. Eng-kok ê khı̀-hāu hân-léng, chóng-sı̄ hiah ê hoān-lâng put-kò sı̄ khùn tı̄ tē-nih lóng bô sím-mı̍h thang kah. Hut-lûi khoàⁿ-tio̍h chit khoán chêng-hêng sim-lāi kám-kak thòng-khó͘ bô pí, nā-sı̄ i sı̄ chı̍t ê cha-bó͘-lâng, ū sím-mı̍h pān-hoat nih? 
 Hut-lûi sı̄ chı̍t ê khiân-sêng ê Ki-tok-tô͘, i tāi-seng kı̂-tó, āu-lâi chiū chiong chit ê sū kā i ê pêng-iú kóng. Tùi án-ni ū chı̍t koá hū-jı̂n-lâng hun-hun koan-chhut i-ho̍k lâi kiù-chè hiah ê hoān-lâng. In iā tit-tio̍h ún-chún khı̀ kaⁿ-ga̍k kà hoān-lâng tha̍k-chheh siá-jı̄, soà kà in jı̄n-bat Iâ-so͘. Chiah ê lâng ê só͘ choè ū kám-tōng kaⁿ-ga̍k ê lâng, tùi án-ni chiām-chiām kái-siān khoân-kéng, koh kiong-kip pí-kàu khah hó ê chia̍h-mı̍h hō͘ hoān-lâng. 
 Bān-bān, choân Eng-kok ê kaⁿ-ga̍k to͘ kái-siān khí-lâi. Tùi chit ê hū-jı̂n-lâng ê só͘ choè ū éng-hióng kàu án-ni. In-ūi i ū thiàⁿ-sim kap lı̂n-bín. I ū chhùi-chı̍h thoân kóng Iâ-so͘, iā ū ióng-khı̀ hiàn i só͘ ū ê lâi kòng-hiàn tı̄ siā-hoē tiong.

(“Kı̂-biāu ê Iâ-so͘”, Ia̍h 49-50)