Chū-chı̄n
Jı̍t-pún-kok ê hong-sio̍k ū-ê lán khoàⁿ chò m̄-hó; chiông-tiong chı̍t-hāng chiū-sı̄ chū-chı̄n ê sū. In chū-chı̄n ê in-toaⁿ khah-siông sı̄ in-ūi lâm-lú saⁿ ı̀-ài bô chiâⁿ sim-goān; á-sı̄ khiàm lâng gı̂n bô thang hêng; hoān-tio̍h kok-hoat, kiaⁿ chia̍h-choē hit-hō. Koh in chū-chı̄n ê hoat,pêng-siông sı̄ ēng soh, to,chhèng lâi chū-chı̄n; á-sı̄ hō͘ hoé-chhia kauh-sí. Lūn tùi chit-hō lâi sí, tı̄ Jı̍t-pún-kok ta̍k-nı̂ ū chin chē.
Tı̄ chit kúi-goe̍h-kan tı̄ Tang-kiaⁿ ê Bān-tiâu-pò 6 goe̍h tē 8 hō, ū koh kı̀ chit-chân chū-chı̄n ê sū; chóng-sı̄ i chū-chı̄n ê in-toaⁿ kap chū-chı̄n ê hoat-tō͘ chham téng-bı̄n só͘ kóng--ê ū toā-toā koh-iūⁿ. Taⁿ kán-lio̍k kı̀ tı̄ ē-té.
Chāi Jı̍t-pún-kok Tang-kiaⁿ kú-kú í-keng ū siat Ko-téng ha̍k-hāu; ha̍k-hāu lāi ū hun chē-chē ha̍k-kho, chiū-sı̄ Tia̍t, I, Lí, Bûn, Hoat, Kang, Lông chiah-ê; in só͘ ha̍k-sı̍p--ê sı̄ bô saⁿ-tâng, lán bián lóng kóng. Chhin-chhiūⁿ Tia̍t-ha̍k-kho, choan-choan sı̄ teh káng-kiù bān-hāng ê tı̀-sek, lán ê Sèng-chheh in iā ū káng-kiù, chóng-sı̄ bô tek-khak ū sı̀n. Hit tiong-kan ū chı̍t ê ha̍k-seng sèⁿ Tı̂n-chhoan miâ Chhò ( Fujimuru Misawo ), kin-nı̂ 18 hoè; in peh sèⁿ Nâ-ká, miâ Thong-sè-sı̄ (Naka Michiyo),sı̄ bûn-ha̍k ū miâ-siaⁿ ê phok-sū.
Tı̂n-chhoan jı̍p Tia̍t-ha̍k-kho 2, 3 nı̂, i ê chu-chit chin hó, só͘ ha̍k-sı̍p--ê chin chêng-kong. Sui-jiân án-ni chóng-sı̄ i chai bān-hāng mı̍h, khah gâu káng-kiù iā sı̄ chē-chē bē hiáu-tit; koh chhòng-chō bān-mı̍h ê Siōng-tè i iā káng-kiù bô. Se-kok chē-chē ê kek-bu̍t-su iā sı̄ án-ni. Só͘-í i chı̄n-sim tı̀-chı̀ ài siūⁿ khoàⁿ ū sím-mı̍h hoat thang lâi kiông-ke̍k i-ê tı̀-sek, kàu-boé bô; chiū chin hoân-ló kan-khó͘ kàu tòng-bē-tiâu. Ū chı̍t-jı̍t ka-tı̄ khı̀ tı̄ Hoa-giâm(Kegon no taki) ê chúi-chhiâng tâu-chúi-sí. ( Chit-ê chúi-chhiâng kı̄n tı̄ chı̍t-ê chhut-miâ ê siâⁿ, kiò-chò Jı̍t-kong (Nekko). Chêng-nı̂ Pa Sian-siⁿ kap Sian-siⁿ-niû ū bat khı̀ hia iû-le̍k ). Boē sí ê sı̂, i tı̄ khàm-téng ū tiû-tû thó͘-khùi; āu-lâi pak-khui chhiū-phoê chiū siá jı̄ tı̄ chhiū ê jı̄-nn̂g--nih. I ê oē kóng :－
“ Khoah-toā--ah ! Chit-ê thiⁿ-tē. Kú-tn̂g ah! chit ê kó͘-kim. Ēng 5 chhioh sió-sè ê seng-khu kiám ē tit-thang káng-kiù i mah? Ho-lé-sió ( chiū-sı̄ Tek-kok chò Tia̍t-ha̍k chheh ê Sian-siⁿ ) chit-ê Sian-siⁿ só͘ káng-kiù ê Tia̍t-ha̍k kàu-boé ū sím-mı̍h lō͘-ēng ta̍t-chı̂ⁿ leh? Bān-hāng-mı̍h pún-goân ê lí kan-ta thang ēng chı̍t-kù-oē lâi kóng i, chiū-sı̄ Bē-thang ké-bêng. Taⁿ goá ê sim phāu-hı̄n ut-chut,kàu chia koat-toàn beh sí--lah ! Í-keng khiā tı̄ gâm-téng sim-tiong ū siáⁿ bô pêng-an--leh! chiah chai toā-toā pi-siong kàu-ke̍k chiū-sı̄ toā-toā khoài-lo̍k.”
Siá chiah-ê oē liáu chiah thiàu-lo̍h chúi-chhiâng sí. Āu-lâi lâng khı̀ chhoē i-ê sin-si chhoē bô, kan-ta hip I só͘ siá ê jı̄, kap i pêng-jı̍t ê siōng, ı̀n tı̄ pò-nih hō͘ lâng khoàⁿ.
Lán khoàⁿ chit-chân sū chiū thang siūⁿ :－
Chit-ê lâng i khiok chai bān-hāng-mı̍h, sè-kan bô lâng káng-kiù ē-tit-chı̄n. Che khiok ū iáⁿ; chóng-sı̄ che thang hián-bêng bān-mı̍h sı̄ Siōng-tè chhòng-chō, Siōng-tè ê pún-sū tı̀-sek, sè-kan siāng tı̀-sek ê iā bē chhek-to̍k pí-phēng tit ( thang khoàⁿ I Lı̂m 1 : 25; Iok-pek 26 : 36 : 22, 37 : 41 : ) Thang kà-sı̄ lán, Siōng-tè hiah toā koân-lêng, lán tio̍h kèng-ho̍k chun-chông.
I sui-jiân ū tı̀-sek thiaⁿ tō-lí káng-kiù tō-lí, iáu-kú m̄-bat Siōng-tè chò bān tı̀-sek ê goân-pún lâi kèng-ùi I ( Chim-giân 1:7 ), tı̀-kàu chı̍t-sı̂ kheng-seng chū-chı̄n. Che sı̄ hō͘ lán chai lâng m̄-bat Siōng-tè, bô kèng-ùi Siōng-tè sı̄ chin chhám, sui-jiân tı̀-hūi, kiù-sı̍t sı̄ gû-chhún ( I Lı̂m 1 : 9, 10 ). Lán bat Siōng-tè lâi kèng I, sı̄ chin ū hok-khı̀. Sèng-keng kóng, Kèng-ùi Siōng-tè chiū-sı̄ tı̀-hūi; tû khı̀ pháiⁿ chiū-sı̄ chhang-miâ ( Iok-pek 28:28 ); che chin-chiàⁿ ū iáⁿ. Iū-koh hō͘ lán siūⁿ, lâng kan-ta thiaⁿ tō-lí, bat tō-lí, nā sı̄ bô sı̀n, bô tit-tio̍h, án-ni lâi sí--khı̀ sı̄ chin óng-khut, hô-hòng thang ka-tı̄ chū-chı̄n mah? Nā kóng, “ Chá-khí thiaⁿ tō-lí ê-hng chiū khó-í sí ”, chóng káⁿ m̄-sı̄ chit-ê ké-soeh. Lán hiān-sı̂ oa̍h--teh thiaⁿ tō-lí ê lâng, tio̍h chhı̀-mn̄g khoàⁿ lán ū sı̀n boē ? ( II Lı̂m 13 : 5 ) Nā boē, tio̍h koáⁿ-kín sı̀n, nā bô chı̍t chá-àm kan nā put-chheh sí--khı̀ , sı̄ kài m̄-ta̍t; hit-sı̂ hoán-hoé sı̄ tı̂--liáu.
I kan-ta beh khò ka-kı̄ ê tı̀-sek lâi káng-kiù, só͘-í m̄-bat Siōng-tè. (Thang khoàⁿ I Lı̂m 1: 21-26, Lō͘ 10: 21-22). Che sı̄ hō͘ lán chai, lâng beh káng-kiù bāng-bu̍t ê lí tio̍h jı̄n Siōng-tè choè chō-bu̍t-chú lâi kàng-ho̍k i, kui êng-kng i, chiah khah ē bêng. Lán beh káng-kiù Siōng-tè ê tō-lí iā-sı̄ án-ni. Koat-toān m̄-thang khò ka-kı̄ ê tı̀-sek; tio̍h jı̂n-ài, chheng-khı̀, ı̀-sù siān-liông, sı̀n Chú bô ké chiah ē bat; nā-bô sı̄ khang-khang (I Thê 1: 5). Káⁿ m̄-sı̄ chhin-chhiūⁿ chit-ê lâng kan-ta phı̄n khu-khu ê kiàn-sek, beh lâi káng-kiù toā-toā ê koân-lêng? Ai--ah! Ū sím-mı̍h koh-iūⁿ the̍h lê-khak beh lâi iúⁿ ta hái-chúi, chē chíⁿ-té beh lâi khoàⁿ chı̄n thiⁿ leh! Kan-ta tô͘-hùi-sim-le̍k bô-chhái kúi-nā nı̂ só͘ ha̍k-sı̍p ê tı̀-sek, tiap-á-kú hiat hō͘ chúi lâu--khı̀. Chāi siōng lı̄ bē-tit kui êng Siōng-tè, hû-chō͘ jı̂n-kun; chāi hā lı̄ bē-tit hián-iông pē-bú tı̀-ı̀m kiáⁿ-sun. Kan-ta chiong 5 chhioh ê seng-khu chòng tı̄ hı̂-pak-lāi, káⁿ m̄-sı̄ chin thang khó-sioh ah! “Tha̍k ê lâng eng-kai tı̀-ı̀ siūⁿ.” (Thài 14: 15)
(Tâi-lâm Kàu-hoē-pò tē 219 koàn, 1909 nı̂ 6 ge̍h)