“Kang-hu nā beh hó, chāi pún-tó,
Kang-hu nā beh ē, chāi pún-tē,
Kang-hu nā beh gâu, tio̍h khoàⁿ goán lāi-bı̄n ê sai-hū-thâu.”
Che-sı̄ goá sè-hàn ê sı̂, tı̄ biō-kháu tùi hia ê bē-ko-io̍h ê kûn-thâu-sai thiaⁿ tio̍h siōng cheng-chhái ê oē-thâu gú, m̄-nā kóng-oē ê sı̂ chhiong-moá chū-sı̀n, koh khah cheng-chhái--ê, chiū-sı̄ tı̄ ta̍h-oē-thâu liáu-āu, bē ko-io̍h chı̀n-chêng, tek-khak lâi chı̍t-toāⁿ chin-to sı̍t-liāu ê ngē kang-hu. Sió-tı̄ kim-seng-iú-hēng, bat chhin-ba̍k khoàⁿ-kı̀ⁿ Lo̍k-káng Si Kiàm-sian ê kiáⁿ-sun, tı̄ bē in chó͘-thoân ê “Thun-kiàm-io̍h “chı̀n-chêng, piáu-ián chı̍t-thò “Thun-kiàm-su̍t“, chı̍t-ki kiàm tùi chhùi thun jı̍p pak-lāi, jiân-āu m̄-chai tùi tó-ūi sái chı̍t-ē la̍t, kiàm phùn kàu poàⁿ khong-tiong, tūi-lo̍h--lâi ê sı̂, chài tián chı̍t-pō͘ “Tan-chhiú lia̍h ko͘-niáu“, chhit-chhit lè, siu to jı̍p siau.
Goá m̄-sı̄ teh siá bú-kiap sió-soat, sı̄ kám-kak Tâi-oân lâng èng-kai chiong chit-khoán ê chū-sı̀n ---- kiàn-lı̍p tı̄ chin kang-hu ---- súi ê bûn-hoà téng-koân ê chū-sı̀n khioh tò-tńg--lâi, chiah boē ko͘-hū Siōng-tè hō͘ lán chit-tè súi ê thó͘-tē, súi ê pē-bó-oē ê un-tián.
(Tâi-oân kàu-hoē Kong-pò tē 2085 kı̂, 1992 nı̂ 2 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
