Chiūⁿ pak hoé-chhia

“Koh-ūi lú-kheh, thàu-chá 1:00 chiūⁿ-pak kàu Chhiū-nâ-á ê khoài-chhia, tı̄ tē-1 goe̍h-tâi beh khí-kiâⁿ--a, iáu-boē chiūⁿ-chhia ê lú-kheh chhiáⁿ koáⁿ-kín chiūⁿ-chhia!” Chhia-tiúⁿ khiā tı̄ chhia-mn̂g piⁿ-á khoàⁿ, tán lâng lóng chiūⁿ-chhia hó-sè, tō ē-sái kā ūn-choán-chhiú pí beh khí-kiâⁿ. Hoé-chhia khí-kiâⁿ, thih-chhia-lián kā thih-ki-lō͘ tǹg kah khi-khi-kho̍k-kho̍k, thih-chhia-lián tı̄ thih-ki-lō͘ téng thoa kah ki-ki-kiò, oāⁿ thih-ki-lō͘ kā chhia-siuⁿ hàiⁿ-leh kiâⁿ. Chit-pan thàu-chá 1:00 ê khoài-chhia, phó͘-thong sı̂-á khah chió lâng chē, ài kàu pài-6 lé-pài, ū chin chē siūⁿ beh tı̄ chhia-téng khùn, koáⁿ thàu-chá kàu Tâi-pak ê lâng, chiah ē chē chit-pan khoài-chhia. Àm-pan-chhia bô sió-chiá, kan-taⁿ ū chhia-tiúⁿ, ūn-choán-chhiú hām 1-ê toè-chhia ê cha-po͘ chit-goân, nā sı̄ beh sǹg ū khò hoé-chhia thàn-chia̍h--ê, koh ū 1-ê tı̄ So͘-ō chiūⁿ-chhia, kha páiⁿ-páiⁿ teh bē piān-tong ê a-peh-á, chhun--ê tō sı̄ khai-chı̂ⁿ chē hoé-chhia koáⁿ-lō͘ ê chhut-goā-lâng. Pài-6 thàu-chá 1:00, hoé-chhia chún-sı̂ ùi Hoa-liân chhia-thâu hoat-chhia, hoé-chhia-siaⁿ tı̄ kı̂-lâi pêng-iá pı̀n-piàng-kiò, chhia-tiúⁿ sûn-koè 1-choā, kui-chhia chhut-goā-lâng lóng khùn kah kô͘ⁿ-kô͘ⁿ-kiò. Tı̄ chhia-mn̂g piⁿ, ū lâng ē kā mn̂g khui-khí-lâi siàn-hong. Nā sı̄ khoàⁿ-tio̍h chit-chióng lâng, chiâⁿ-chò 1-ê chhia-tiúⁿ, tō ài kā mn̂g koaiⁿ oá--lâi, koh ài kiò lú-kheh chù-ı̀ an-choân, hông kóng ê lâng mā ē chin phoè-ha̍p kā mn̂g koaiⁿ--khí-lâi, tán chhia-tiúⁿ kiâⁿ--koè chiah koh khui, sǹg sı̄ hō͘ chhia-tiúⁿ chit-ê sin-hūn 1-ê bı̄n-chú. Sûn 1-choā liáu, chhia-tiúⁿ ē tńg khı̀ i ê hioh-khùn-sek, tán koè Hô-pêng chhia-thâu, i chiah koh chhut-lâi ka-phiò. Ū chin chē lâng ē thau cháu-phiò, chiâⁿ-chò 1-ê chhia-tiúⁿ, i mā kám-kak ū 1-koá tāi-chı̀ bô kài thò-tòng, chhia-siuⁿ chiah kū, gâu bān hun, kāng-khoán phiò-chı̂ⁿ koh bô it-tēng ū ūi thang chē, nā m̄-sı̄ chia̍h thih-lō͘ pn̄g, che-chhia bián-chı̂ⁿ, i mā siūⁿ beh thau cháu-phiò. Hoé-chhia sái bān beh jı̍p-chām, goe̍h-tâi-téng bô poàⁿ-ê-lâng, mā bô lâng lo̍h-chhia, kàu Tâi-pak chı̀n- chêng, chit-khoán chhia-thâu koh ū chiâⁿ 10-ê. Goe̍h-tâi cháu tùi āu-piah khı̀, bô joā kú hoé-chhia tō sái jı̍p-khı̀ pōng-khang, chhia-tiúⁿ beh khai-sí chò siōng tiōng-iàu ê khang-khoè, i ùi hioh-khùn-sek kiâⁿ tuÌ chhia-siuⁿ, chhiú tah chhia-mn̂g-téng ê po-lê, kā mn̂g sak--khui, tē-1-chhia bô poàⁿ-lâng, khang-khang liān 1-chiah niau-á káu-á to bô, liān kha-báng mā lóng bô khoàⁿ--tio̍h, kan-taⁿ kú-nı̂ oa̍h tı̄ chhia-lāi ê ka-choa̍h teh sı̀-kè loā-loā-sô. Chhia-tiúⁿ khoàⁿ 1-ē lâng gāng-- khı̀, tú-á Hô-pêng chhia-thâu a̍h bô lâng lo̍h-chhia, nah ē 1 chhia pah- goā-ê lâng lóng bô--khı̀? I kiâⁿ tùi tē-2-chhia, chhia-mn̂g sak--khui, ū 2-ê lâng khiā tı̄ siang-pêng mn̂g-piⁿ, ba̍k-chiu lô-lô kā khoàⁿ, chhia-tiúⁿ bē-hù khui-chhùi, hit 2-ê seng hoah “Goá bô-phiò!”, kóng liáu thiàu tùi goā-kháu khı̀, chhia-tiúⁿ koáⁿ-kín kā chhiú-ki-á giâ-khí-lâi hoah ūn-choán-chhiú “Ū lâng thiàu-chhia! Kín thêng-chhia!” Un7-choán-chhiú tòng-á chhui--lo̍h, chhia-lián kā thih-ki-lō͘ kā ân-ân, thih-ki-lō͘ ki-ki-kiò koh phùn hoé-chheⁿ, pōng-khang lāi-toé ná teh pàng ian-hoé. Chhia thêng tiāⁿ, ūn-choán-chhiú kó͘ chhiú-ki-á thong-ti Hoa-liân, Hô-pêng kap Lâm-ō chhia-thâu. Kóng soah, kín thiàu-lo̍h chhia-toé sûn, chhia-tiúⁿ mā giâ chhiú-tiān chhoē chhia-kha, toè chhia ê chit-goân kín lâi tàu chhoē, kui-choā khoài-chhia ta̍k-lia̍p lián-á lóng bô khoàⁿ-tio̍h tú-á thiàu-chhia hit 2-ê. In chhoē kàu chhui tòng-á koh koè beh 1-khi-loh, bô hoeh-tih, bô bah-iú-á, koh khah mài kóng ū kui-sian lâng. Bêng-bêng khoàⁿ-tio̍h 2-ê lâng thiàu--lo̍h-khı̀, chhoē bô tō kā tòng-choh bô tāi-chı̀, chhia koh kā sái kiâⁿ, chhı̀n-chhái hoe 1-ê lí-iû ū kau-tài tō hó--a, hoé-chhia bān-hun sı̄ sù-siông--ê, mā bô lâng ē khı̀ kè-kàu. Ta̍k-ê tńg-khı̀ ka-tı̄ ê khang-khoè, chhia-tiúⁿ soah lo̍h beh去 2-chhia ka-phiò. Chhia-tiúⁿ jı̍p-khı̀ kàu 2-chhia, bô lâng! Kap 1-chhia kāng-khoán, lâng lóng bô--khı̀. I sim-lāi teh siūⁿ: “M̄ tio̍h--a! Kám ē khı̀ tú-tio̍h siáⁿ-mih là-sap--ê?”, i kiâⁿ khı̀ tē-3-chhia beh khoàⁿ ū lâng--bô, chiap chhia ê siang-pêng mn̂g-piⁿ, 2-ê lâng khoàⁿ-tio̍h i lâi, hoah kóng “Goá bô phiò!”, sûi thiàu--lo̍h-khı̀. Chò chhia-tiúⁿ chiah kú, thâu 1-pái tú--tio̍h, kám kóng chiah--ê lâng chiah gê-siâu Thih-lō͘-kio̍k? 3-chhia, 4-chhia, 5-chhia it-tı̍t kàu siōng-boé chhia lóng bô lâng, chhia-mn̂g-piⁿ ê lâng lóng ba̍k-chiu lô-lô, hoah 1-kù “Goá bô phiò!” tō thiàu--chhut-khı̀. Koán chit-pan iā-khoài-chhia ê chek-jı̄m ài chò kah kàu, i koat-sim beh sūn kàu siōng-boé-chat ê siōng-boé 1-ê mn̂g, chhia-tiúⁿ chit-ê ūi chiah chò ē khí. Siōng-boé hit-ê mn̂g pún-chiâⁿ sı̄ beh chiap āu-1-chat chhia-siuⁿ--ê, nā bô chiap, chhut--khı̀ tō sı̄ thih-ki-lō͘. chhia-tiúⁿ khoàⁿ-tio̍h ūn-choán- chhiú kap toè chhia ê chit-goân khiā tı̄ mn̂g-piⁿ, in kap chı̀n-chêng thiàu- chhi ê lâng kāng-khoán, ba̍k-chiu lô-lô teh khoàⁿ chhia-tiúⁿ, chhia-tiúⁿ bē-hù khui-chhùi mn̄g in sı̄ án-choáⁿ, 2-ê lâng tō hoah kóng “Goá bô phiò!”, ùi siōng boé chat ê siōng boé hit-ê mn̂g thiàu--chhut-khı̀. Chhia-tiúⁿ nńg-kha, kui-sian lâng un--lo̍h-khı̀, phı̀ tı̄ mn̂g thâu-chêng, ba̍k-chiu lô-lô, chhùi--nih se̍h-se̍h-liām “Goá bô phiò......Goá bô phiò......” (TGB Thong-sı̀n tē 8 kı̂, 2000 nı̂ 5 goe̍h)